Toko 53
I Môrônia sy ireo fampianarany
Rehefa maty i Môrmôna dia tavela irery i Môrônia. Nofaranany ireo rakitsoratra nomen’ny rainy azy.
Fantatr’i Môrônia fa havoaka avy ao amin’ny tany ireo takela-bolamena indray andro any.
Milaza momba an’i Jesoa Kristy ireo teny eo amin’ireo takela-bolamena. Mijoro ho vavolombelona sy mampianatra ny olona hiaina amim-pahamarinana izy ireo.
Novonoin’ireo Lamanita ratsy fanahy avokoa ny Nefita rehetra izay tsy nety nandà an’i Jesoa Kristy.
Tsy handà na oviana na oviana an’i Jesoa Kristy i Môrônia. Nivezivezy tetsy sy teroa izy niafina tamin’ny Lamanita.
Nanoratra misimisy kokoa i Môrônia teo amin’ireo takelaka, indrindra indrindra ho an’ireo Lamanita amin’ny andro farany.
Nanoratra zavatra manan-danja izy. Anisan’izany ireo teny atao amin’ny vavaky ny fanasan’ny Tompo.
Nanoratra i Môrônia fa ny hany olona azo atao batisa dia ireo izay vonona ny hibebaka amin’ny fahotan’izy ireo sy hanompo an’i Jesoa Kristy.
Tian’i Môrônia hino sy hahafantatra an’i Jesoa Kristy ny olon-drehetra. Nolazainy fa izay rehetra tsara dia avy amin’i Kristy.
Nanoratra i Môrônia fa raha tia an’ Andriamanitra sy manaraka azy ny olona dia afaka ny ho tanteraka.
Fantatr’i Môrônia fa rehefa maty izy dia hitsangana amin’ny maty ary hiara-hiaina amin’ny Ray any An-danitra sy i Jesoa Kristy.