Toko 34
I Helamàna sy ireo zatovolahy miaramila 2000
Nampanantena an’ Andriamanitra ny vahoakan’i Amôna fa tsy hiady na oviana na oviana intsony. Nipetraka teo akaikin’ny Nefita izy ireo ary ny Nefita dia niaro azy ireo.
Rehefa nanafika ny Nefita ireo fahavalon’ny vahoakan’i Amôna dia nitady handrava ny fampanantenana nataony ny vahoakan’i Amôna ka hanampy ny Nefita hiady.
Tsy tian’i Helamàna sy ireo mpitarika Nefita hafa ny vahoakan’i Amôna handrava ny fampanantenana nataon’izy ireo tamin’ Andriamanitra.
Ireo zatovolahy zanaky ny vahoakan’i Amôna dia tsy nanao fampanantenana. Te hanampy ny Nefita hiady ho an’ny fahafahana izy ireo.
Roa arivo tamin’ireo zatovolahy ireo no nisafidy ny hiaro ny tanindrazan’izy ireo. Nangatahan’izy ireo mba ho mpitarika azy ireo i Helamàna.
Ireo zatovolahy ireo dia sahy sy be herim-po ary natanjaka. Marin-toetra sy mendri-pitokisana ary nitandrina ny didin’ Andriamanitra ihany koa izy ireo.
Nitarika ireo zatovo miaramilany 2000 tamin’ny ady i Helamàna Nantsoiny hoe zanakalahiny izy ireo ary izy ireo niantso azy ho rain’izy ireo.
Na dia tsy mbola niady mihitsy aza ireo zanakalahin’i Helamàna dia tsy natahotra izy ireo. Nampianarin’ny renin’izy ireo izy ireo mba hanam-pinoana an’ Andriamanitra sy hahafantatra fa hanampy azy ireo izy.
Ady maro no nataon’i Helamàna sy ny tafikany tamin’ny Lamanita. Nankatoavin’ireo zatovolahy ireo avokoa ny baikon’i Helamàna rehetra.
Niady tamin-kerim-po izy ireo ary nanampy nanosika hiverina ny fahavalo. Taorian’ny ady dia hitan’i Helamàna fa naratra avokoa ireo zanany lahy kanefa tsy nisy maty na dia iray aza.
Fahagagana izany. Tena faly i Helamàna. Fantany fa ireo zatovolahy ireo dia voaaro noho ny finoana lehibe nananan’izy ireo an’ Andriamanitra.