Toko 4: Ireo takela-barahina

Niteny tamin’i Nefia i Lehia fa ny Tompo dia nila azy sy ireo rahalahiny mba hiverina hankany Jerosalema. Mila maka ireo takela-barahina any amin’ny lehilahy iray atao hoe Labàna izy ireo.

1 Nefia 3:2–4

Rakitsoratra tena nanan-danja ireo takela-barahina. Izy ireny dia nilaza momba ny razamben’i Lehia sy ny tenin’ Andriamanitra izay nambara tamin’ny alalan’ireo mpaminany.

1 Nefia 3:3, 20

Tsy te hiverina haka ny takela-barahina i Lamàna sy i Lemoela. Nilaza izy ireo fa sarotra loatra ny manao izany. Tsy nanam-pinoana ny Tompo izy ireo.

1 Nefia 3:5

Naniry ny hankato ny Tompo i Nefia. Fantany fa hanampy azy sy ny rahalahiny ny Tompo amin’ny fangalana ny takela-barahina any amin’i Labàna.

1 Nefia 3:7

i Lamàana, i Lemoela, sy i Samy, ary i Nefia

Nandeha niverina tany Jerosalema i Lamàna, i Lemoela, sy i Samy, ary i Nefia mba haka ireo takela-barahina.

1 Nefia 3:9

Nandeha tany amin’i Labàna i Lamàna ary nangataka ireo takelaka taminy.

1 Nefia 3:11–12

Tezitra i Labàna ka tsy nanaiky ny hanome ireo takela-barahina an’i Lamàna. Nikasa ny hamono an’i Lamàna i Labàna, fa saingy nandositra i Lamàna.

1 Nefia 3:13–14

Notantarain’i Lamàna tamin’ireo rahalahiny izay zavatra nitranga. Natahotra izy ary te hilavo lefona sy hiverina any amin’ny rainy any an-tany foana.

1 Nefia 3:14

Nilaza i Nefia fa tsy afaka hiverina izy ireo raha tsy mitondra ny takela-barahina. Niteny tamin’ny rahalahiny izy mba hananany finoana ny Tompo bebe kokoa dia ho azon’izy ireo ireo takela-barahina.

1 Nefia 3:15–16

Niverina tany an-tranony tao Jerosalema i Nefia sy ny rahalahiny ary nanangona ny volamenany sy ny volafotsiny mba ho takalon’ireo takelaka.

1 Nefia 3:22

Nasehon’izy ireo an’i Labàna ny harenany ary natolony ho takalon’ireo takelaka. Rehefa nahita ny volamena sy ny volafotsin’izy ireo i Labàna dia naniry izany ho azy irery ka noroahiny hivoaka izy ireo.

1 Nefia 3:24–25

Niteny ny olony i Labàna mba hamono ireo zanakalahin’i Lehia. Nihazakazaka nandositra sy niafina tao anaty lava-bato i Nefia sy ny rahalahiny. Notazomin’i Labàna ny volamena sy ny volafotsin’izy ireo.

1 Nefia 3:25–27

mikapoka an’i Nefia sy Samy i Lamàna sy i Lemoela

Tezitra tamin’i Nefia i Lamàna sy i Lemoela. Nikapoka an’i Nefia sy i Samy tamin’ny tehina izy ireo.

1 Nefia 3:28

Nisy anjely iray niseho ary nilaza tamin’i Lamàna sy i Lemoela mba hitsahatra tsy hikapoka intsony. Niteny izy fa ho ampian’ny Tompo izy ireo haka ireo takelaka. Niteny ihany koa izy fa ho lasa mpifehy ny rahalahiny i Nefia.

1 Nefia 3:29

Niteny tamin’ireo rahalahiny i Nefia fa tokony hanam-pinoana amin’ny Tompo izy ireo ary tsy tokony hatahotra an’i Labàna sy ny olony. Namporisika ireo rahalahiny mba hiverina hankany Jerosalema i Nefia.

1 Nefia 4:1–4

Ny alina iny ihany dia niafina tany ivelan’ny manda ny rahalahin’i Nefia raha nisoko niditra tany anatiny i Nefia. Nandeha nankany amin’ny tranon’i Labàna izy.

1 Nefia 4:5

Raha tonga teo akaikin’ny tranon’i Labàna i Nefia dia nahita lehilahy iray mamo izay nandry tamin’ny tany. I Labàna ilay izy.

1 Nefia 4:6–8

Tazan’i Nefia ny sabatr’i Labàna ary noraisiny. Niteny tamin’i Nefia ny Fanahy Masina mba hamono an’i Labàna fa tsy te hamono azy i Nefia.

1 Nefia 4:9–10

Niteny tamin’i Nefia indray ny Fanahy Masina mba hamono an’i Labàna mba hahafahany maka ireo takela-barahina. Nilain’ny ankohonan’i Lehia ireo takelaka mba hahafahan’izy ireo mianatra ny filazantsara.

1 Nefia 4:12, 16–17

Nankato ny Fanahy Masina i Nefia ary namono an’i Labàna. Avy eo dia nanaovan’i Nefia ny fitafiana sy ny fiadian’i Labàna.

1 Nefia 4:18–19

Nandeha nankany an-tranon’i Labàna i Nefia ary nihaona tamin’i Zôrama, mpanompon’i Labàna. Nitovy endrika sy feo tamin’i Labàna mihitsy i Nefia.

1 Nefia 4:20

Nasainy nalain’i Zôrama ireo takela-barahina. Noheverin’i Zôrama fa i Labàna i Nefia ka nomeny azy ireo takelaka. Nasain’i Nefia hanaraka azy i Zôrama.

1 Nefia 4:21, 24–25

Nahita an’i Nefia nanatona i Lamàna, sy i Lemoela ary i Samy ka natahotra izy ireo. Noheverin’izy ireo fa i Labàna izy. Nanomboka nandositra izy ireo saingy nijanona raha vao niantso azy ireo i Nefia.

1 Nefia 4:28–29

Iny dia hitan’i Zôrama fa tsy i Labàna i Nefia, ka nanandrana ny handositra izy. Tratran’i Nefia i Zôrama ary nanome toky fa tsy hanao ratsy azy izy raha manaiky ny hanaraka an’i Nefia any an-tany foana izy.

1 Nefia 4:30–33

Nanaiky i Zôrama. Naka an’i Zôrama sy ireo takela-barahina i Nefia sy ny rahalahiny ary niverina tany amin’i Lehia sy Sarià.

1 Nefia 4:35, 38

Nomen’izy ireo an’i Lehia ireo takela-barahina. Faly izy sy Sarià satria tsy naninona ny zanakalahin’izy ireo. Nifaly sy nisaotra an’ Andriamanitra izy rehetra.

1 Nefia 5:1, 9

Novakin’i Lehia ireo takela-barahina. Nitantara momba an’i Adama sy i Eva ary ny fahariana an’izao tontolo izao izy ireny. Nirakitra ny tenin’ny mpaminany maro ireny.

1 Nefia 5:10–11, 13

Nifaly i Lehia sy i Nefia satria nankato ny Tompo izy ireo ary afaka nahazo ireo takela-barahina.

1 Nefia 5:20–21

Nahoron’ny ankohonan’i Lehia ireo takela-barahina mba hoentina nanaraka azy ireo nandritra ny dian’izy ireo hahafahan’izy ireo hampianatra ny zanak’izy ireo momba ny didy izay voasoratra eo amin’ireo takelaka.

1 Nefia 5:21–22