Toko 35
Kapiteny Môrônia sy i Pahôràna
Faly ny Kapiteny Môrônia nandre fa maro tamin’ireo tanin’ny Nefita no azon’i Helamàna sy ny miaramilany indray.
Saingy nila fanampiana i Helamàna sy ny tafikany. Tsy ampy ny miaramilan’izy ireo mba hiarovana tanàna maro be.
Nanoratra taratasy ho an’i Pahôràna, lohan’ny mpitsara sy governora ny Kapiteny Môrônia. Nangataka an’i Pahôràna izy mba handefa miaramila fanampiny mba hanampy ny tafik’i Helamàna.
Nanafika ny tanàna iray efa azon’ny Helamàna sy ny tafikany ny Lamanita. Namono Nefita maro izy ireo ary noroasiny hiala ny tanàna ny ambiny.
Tezitra tamin’ireo mpitarika tao amin’ny governemanta i Môrônia satria tsy nandefa fanampiana izy ireo ka nandefa taratasy iray hafa ho an’i Pahôràna i Môrônia.
Nosoratan’i Môrônia hoe maro ny olona maty satria i Pahôràna tsy nandefa miaramila fanampiny.
Raha tsy nandefa vatan-dehilahy sy sakafo haingana i Pahôràna dia hitondran’i Môrônia ny miaramilany ho any Zarahemla ka halainy izay zavatra ilain’ny miaramilany.
Tsy ela dia naharay taratasy avy tany amin’i Pahôràna i Môrônia. Nalahelo be izy hoe nijaly i Môrônia sy ny tafikany.
Notenenin’i Pahôràna tamin’i Môrônia fa misy vondrona Nefita ratsy fanahy iray antsoina hoe olon’ny mpanjaka no tsy nanaiky ahy ho lohan’ny mpitsara. Noteren’izy ireo hiala an’i Zarahemla izy sy ny mpomba azy.
Nampian’i Pahôràna hoe eo am-panangonana tafika izy mba hiezaka haka an’i Zarahemla indray.
Nisafidy mpanjaka iray mba ho mpitarika azy ireo ny olon’ny mpanjaka ary nikambana tamin’ny Lamanita.
Tsy tezitra tamin’ny zavatra nosoratan’i Môrônia i Pahôràna. Naniry ny mba haha-olon’afaka ny Nefita ihany koa izy.
Nangataka an’i Môrônia izy mba hitondra vatan-dehilahy vitsy hanampy azy ary nilaza fa raha afaka manangona lehilahy misimisy i Môrônia eny am-pandehanana dia afaka maka indray an’i Zarahemla ny fitambaran’ny tafika.
Faly ny Kapiteny Môrônia fa mbola tsy nivadika tamin’ny tanindrazany ary mbola maniry ny fahafahan’ny vahoakany ihany i Pahôràna.
Nihaona tamin’i Pahôràna i Môrônia niaraka tamin’ny olony vitsivitsy. Nitondra ny fanevan’ny fahafahana izy ary lehilahy an’arivony no nanaraka azy ireo teny am-pandehanana.
Ny fitambaran’ny tafik’i Môrônia sy ny an’i Pahôrana dia nandeha nanohitra ny tanin’i Zarahemla. Novonoin’izy ireo ny mpanjakan’ireo Nefita ratsy fanahy ary nalain’izy ireo ho babo ny olony.
Avy eo dia nandefa sakafo sy miaramila 12,000 i Môrônia hanampy ny tafika Nefita. Ireo miaramila ireo dia nanosika ny miaramila Lamanita hiala ary nisy fandriam-pahalemana indray teo amin’ny tany.