Toko 40
Miresaka momba an’i Jesoa Kristy i Samoela Lamanita
Nankato ny didin’ Andriamanitra ny Lamanita. Lasa marina kokoa noho ny Nefita izy ireo.
Samoela izay mpaminany Lamanita iray dia nandeha tany Zarahemlà nitory tany amin’ny Nefita ratsy fanahy. Nasainy hibebaka izy ireo.
Nandroaka an’i Samoela hivoaka ny tanàna ny Nefita ary dia nanomboka ny diany miverina any amin’ny taniny izy.
Saingy naniraka an’i Samoela hiverina any Zarahemlà ny Tompo sy hiteny amin’ny vahoaka izay zavatra hapetraky ny Tompo ao am-pony.
Tsy navelan’ny Nefita hiditra ao an-tanàna i Samoela ka dia niakatra teo ambon’ny mandan’ny tanàna izy ary teo izy no nitory.
Naminany izy fa ho fongotra ny Nefita rehefa afaka 400 taona raha tsy mibebaka sy manam-pinoana an’i Jesoa Kristy.
Niteny tamin’ny Nefita i Samoela fa ho teraka i Jesoa Kristy rehefa afaka dimy taona ary Izy no hamonjy izay rehetra nino Azy.
Niteny tamin’izy ireo momba ny famantarana ny fahaterahan’i Jesoa Kristy i Samoela. Hisy kintana vaovao hipoitra ary tsy ho maizina ny alina alohan’ny fahaterahan’i Jesoa.
Avy eo dia niteny tamin’izy ireo momba ny famantarana ny fahafatesan’i Jesoa i Samoela. Ho maizina tanteraka mandritra ny telo andro ka tsy hamirapiratra ny masoandro na ny volana na ny kintana.
Hisy kotroka sy tselatra sy horohoro tany koa. Hirodana ny tendrombohitra ary maro ireo tanàna izay ho fongotra.
Nisy Nefita izay nino an’i Samoela ka nibebaka noho ny fahotan’izy ireo. Nandeha izy ireo nitady an’i Nefia, izay Nefita marina, afaka manao batisa azy ireo.
Tsy nino an’i Samoela ny Nefita sasany. Nitora-bato sy nitifitra zanatsìpika tany aminy izy ireo. Nefa niaro azy ny Tompo ka tsy nisy nahavoa azy na vato na zanatsìpika.
Rehefa hitan’ny vahoaka fa tsy mety voa izy dia maro hafa tamin’izy ireo no nino ka nandeha tany amin’i Nefia mba hatao batisa.
Nampianatra ny vahoaka momba an’i Jesoa koa i Nefia. Tiany hino an’i Jesoa sy hibebaka ary hatao batisa izy ireo.
Na dia izany aza dia tsy nino an’i Samoela ny ankamaroan’ny Nefita. Niezaka ny hisambotra azy izy ireo.
Nitsambikina nidina avy eny amin’ny manda i Samoela ka nihazakazaka tany amin’ny fireneny izy.
Nanomboka nampianatra ireo Lamanita i Samoela. Tsy re intsony na oviana na oviana tany amin’ny Nefita izy.