ឯកសារគ្រូបង្រៀន មេរៀនទី ១៣ ៖ ច្បាប់របស់ព្រះ

« ឯកសារគ្រូបង្រៀន មេរៀនទី ១៣ ៖ ច្បាប់របស់ព្រះ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀន មេរៀនទី ១៣ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀន មេរៀនទី ១៣

ច្បាប់របស់ព្រះ

ព្រះអម្ចាស់បានបើកសម្ដែងពីច្បាប់ និងព្រះបញ្ញត្តិរបស់ទ្រង់ម្ដងទៀតនៅក្នុងគ្រាកាន់កាប់ត្រួតត្រានេះតាមរយៈ យ៉ូសែប ស៊្មីធ និងព្យាការីបន្ដបន្ទាប់ ។ មេរៀននេះនឹងរៀបចំសិស្សឲ្យពន្យល់ពីគោលបំណងដ៏ទេវភាពរបស់ព្រះ ដែលបានប្រទានព្រះបញ្ញតិ្តទាំងឡាយដល់បុត្រាបុត្រីរបស់ទ្រង់ ។ សិស្សក៏នឹងត្រូវបានអញ្ជើញឲ្យសម្រេចពីអ្វីដែលពួកគេអាចធ្វើបាន ដើម្បីរក្សាព្រះបញ្ញត្តិរបស់ព្រះអម្ចាស់ឲ្យបានកាន់តែស្មោះត្រង់ផងដែរ ។

យោបល់សម្រាប់ការបង្រៀន

ព្រះអម្ចាស់ប្រទានដល់យើងនូវច្បាប់ និងព្រះបញ្ញត្តិទាំងឡាយសម្រាប់សេចក្ដីសង្គ្រោះរបស់យើង ។

សូមបង្ហាញសិស្សនូវវីដេអូ « Why Does God Give Us Commandments? » ( ០:៣៩ ) ហើយសូមឲ្យពួកគេរកមើលអ្វីដែលវាបង្ហាញអំពីរបៀបដែលមនុស្សមួយចំនួនអាចមើលទៅព្រះបញ្ញត្តិរបស់ព្រះ ។

តើវីដេអូនេះបង្ហាញអ្វីខ្លះ អំពីឥរិយាបថរបស់យុវមជ្ឈិមវ័យមួយចំនួនដែលអាចមានទៅលើច្បាប់ និងព្រះបញ្ញត្តិរបស់ព្រះ ?
តើមនុស្សមួយចំនួនដែលមើលទៅច្បាប់របស់ព្រះថាតឹងរឹងនោះអាចយល់ខុសអ្វីខ្លះ ?

សូមពន្យល់ថា មានគោលបំណងដ៏កាន់តែសំខាន់សម្រាប់ច្បាប់របស់ព្រះ ជាជាងការគ្រាន់តែការពារខាងរូបកាយ ឬការសាកល្បងខាងសីលធម៌ ។ នៅក្នុងវិវរណៈរបស់ទ្រង់ទៅកាន់ព្យាការី យ៉ូសែប ស៊្មីធ ព្រះអម្ចាស់បានបង្រៀនពួកបរិសុទ្ធពីមូលហេតុដ៏កាន់តែខ្ពស់មួយចំនួនដែលព្រះប្រទានច្បាប់ និងព្រះបញ្ញត្តិទាំងឡាយដល់បុត្រាបុត្រីរបស់ទ្រង់ ។ សូមអញ្ជើញសិស្សពាក់កណ្ដាលថ្នាក់ឲ្យអាន គោលលទ្ធិ និង សេចក្ដីសញ្ញា ៩៣:១៩–២០ ដោយស្ងៀមស្ងាត់ ហើយសូមឲ្យសិស្សផ្សេងទៀតអាន គោលលទ្ធិ និង សេចក្តីសញ្ញា ១៣០:២០–២១ ដោយស្ងៀមស្ងាត់ ។ សូមឲ្យសិស្សរកមើលសេចក្ដីសន្យារបស់ព្រះអម្ចាស់ដល់អស់អ្នកដែលរក្សាច្បាប់ និងព្រះបញ្ញត្តិទាំងឡាយរបស់ព្រះ ។ សូមឲ្យសិស្សរាយការណ៍ពីអ្វីដែលពួកគេបានរកឃើញ ។

សូមបង្ហាញថា « ភាពពោរពេញ » របស់ព្រះដែលសរសេរនៅក្នុង គោលលទ្ធិ និង សេចក្ដីសញ្ញា ៩៣:១៩–២០ គឺជាសេចក្ដីសន្យានៃជីវិតដ៏អស់កល្ប—ដើម្បីចូលទៅកាន់វត្តមានរបស់ព្រះ ហើយកា្លយដូចជាព្រះវរបិតា និងព្រះរាជបុត្រា ( សូមមើល គោលលទ្ធិ និង សេចក្ដីសញ្ញា ៧៦:៩៤ ) ។

តើបងប្អូននឹងសង្ខេបសេចក្ដីពិតមួយមកពីវគ្គខគម្ពីរទាំងនេះ អំពីមូលហេតុដែលព្រះវរបិតាសួគ៌ប្រទានព្រះបញ្ញត្តិដល់បុត្រាបុត្រីរបស់ទ្រង់ដោយរបៀបណា ? ( ដោយប្រើពាក្យរបស់សិស្ស សូមសរសេរនៅលើក្ដារខៀន ឬបង្ហាញសេចក្ដីថ្លែងការណ៍នៃគោលលទ្ធិមួយស្រដៀងគ្នាដូចតទៅនេះ ៖ ព្រះវរបិតាសួគ៌ប្រទានព្រះបញ្ញត្តិដល់បុត្រាបុត្រីរបស់ទ្រង់ ដើម្បីទ្រង់អាចប្រទានពរដល់ពួកគេ ហើយជួយពួកគេឲ្យក្លាយដូចជាទ្រង់ ) ។

ដើម្បីជួយពង្រីកការយល់ដឹងរបស់សិស្សឲ្យកាន់តែស៊ីជម្រៅអំពីសេចក្ដីពិតនេះ សូមបង្ហាញសេចក្ដីថ្លែងការណ៍ខាងក្រោមដោយអែលឌើរ ឌេល ជី រេនឡាន់ នៃកូរ៉ុមនៃពួកសាវកដប់ពីរនាក់ ហើយសុំសិស្សម្នាក់ឲ្យអានវាឮៗ ៖

ផែនការរបស់ព្រះរួមមាននូវការណែនាំសម្រាប់យើងនៅក្នុងព្រះគម្ពីរ យើងហៅការណែនាំនោះថាជាបទបញ្ញត្តិ ។ បទបញ្ញត្តិទាំងនេះពុំមែនជាអ្វីដែលហួសសម័យ ហើយក៏ពុំមែនជាការប្រមូលផ្តុំតាមទំនើងចិត្តនៃការរំលោភលើច្បាប់ក្នុងគោលបំណង ដើម្បីគ្រាន់តែបំពាក់បំប៉នយើងឲ្យគោរពប្រតិបត្តិនោះទេ ។ បទបញ្ញត្តិទាំងនេះផ្សារភ្ជាប់ទៅនឹងការអភិវឌ្ឍបុគ្គលិកលក្ខណៈរបស់យើងស្តីពីភាពជាព្រះ ការត្រឡប់ទៅកាន់ព្រះវរបិតាសួគ៌យើងវិញ និងការទទួលអំណរដ៏យូរអង្វែង ។( « ចូរអ្នកជ្រើសរើសថ្ងៃនេះចុះ » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១០៥ )

តើព្រះបញ្ញត្តិគឺជាការបង្ហាញមួយអំពីសេចក្ដីស្រឡាញ់របស់ព្រះវរបិតាសួគ៌ និងព្រះអង្គសង្គ្រោះចំពោះយើងយ៉ាងដូចម្ដេច ?
តើវាអាចធ្វើឲ្យមានភាពខុសគ្នាអ្វីខ្លះនៅក្នុងជីវិតរបស់យើង ពេលយើងមើលទៅព្រះបញ្ញត្តិថាជាការណែនាំពេញដោយក្ដីស្រឡាញ់ ដែលនឹងជួយយើងឲ្យទទួលបានលក្ខណៈសម្បត្តិនៃភាពជាព្រះ និងទទួលបានសេចក្ដីអំណរ ?

ព្រះអម្ចាស់ប្រទានច្បាប់របស់ទ្រង់ដល់ពួកបរិសុទ្ធ ។

សូមរំឭកសិស្សថា មិនយូរប៉ុន្មានក្រោយពីព្យាការី យ៉ូសែប ស៊្មីធបានប្ដូរទៅទីក្រុងខឺតឡង់ រដ្ឋអូហៃអូ លោកបានទទួលវិវរណៈមួយដែលរួមមាននូវច្បាប់របស់ព្រះអម្ចាស់សម្រាប់សាសនាចក្ររបស់ទ្រង់ ( សូមមើល គោលលទ្ធិ និង សេចក្ដីសញ្ញា ៤២ ) ។ ប៉ុន្មានឆ្នាំក្រោយពីនោះ ព្រះអម្ចាស់បានបង្រៀនច្បាប់របស់ទ្រង់បន្ថែមទៀតដល់ពួកបរិសុទ្ធ ។

តើមានច្បាប់ និងព្រះបញ្ញត្តិពីបុរាណមួយចំនួនណាខ្លះ ដែលព្រះអម្ចាស់បានបញ្ជាក់សារជាថ្មីនៅក្នុងគ្រាកាន់កាប់ត្រួតត្រារបស់យើង ?

សូមរំឭកសិស្សពីកិច្ចការ ដែលពួកគេមាននៅក្នុងឯកសារការរៀបចំ ។ សូមផ្ដល់ពេលពីរបីនាទីឲ្យសិស្សរំឭកច្បាប់នោះ ឬច្បាប់ទាំងឡាយដែលពួកគេបានសិក្សា ។ សូមឲ្យសិស្សដែលមិនបានសិក្សាច្បាប់មួយ ដែលមាននៅក្នុងសៀវភៅសិក្សារៀបចំ អានច្បាប់នោះអំឡុងពេលនេះ ។

អភិវឌ្ឍការបង្រៀន និងការរៀនសូត្ររបស់យើង

ការពិភាក្សា និងកិច្ចការជាក្រុមតូចៗអាចជួយសិស្សឲ្យរៀនបានកាន់តែស៊ីជម្រៅ ។ ការបែងចែកសិស្សក្នុងថ្នាក់ទៅជាដៃគូ ឬក្រុមតូចៗអនុញ្ញាតឲ្យសិស្សជាច្រើនបង្ហាញពីយោបល់ និងអារម្មណ៍របស់ពួកគេ ហើយបង្រៀនគ្នាទៅវិញទៅមក ។ ដើម្បីជួយសិស្សឲ្យមានបទពិសោធន៍ដ៏មានអត្ថន័យមួយ សូមប្រាកដថា ពួកគេយល់ពីគោលបំណង និងភាពទាក់ទងនៃអ្វីដែលពួកគេកំពុងពិភាក្សានោះ ពីមុនពួកគេចាប់ផ្ដើមពិភាក្សា ។ បងប្អូនក៏អាចចាត់ឲ្យមានការពិភាក្សាមួយនៅពេលក្រោយ ឬចាត់ឲ្យសិស្សម្នាក់ចែកចាយជាមុនសិនផងដែរ ។

ក្រោយពីទុកពេលគ្រប់គ្រាន់ហើយ សូមបែងចែកសិស្សក្នុងថ្នាក់ទៅជាក្រុមតូចៗ ( សិស្សពីរទៅប្រាំនាក់ក្នុងមួយក្រុម ) ស្របទៅតាមច្បាប់ដែលពួកគេបានជ្រើសរើសសិក្សា ។ ឧទាហរណ៍ សិស្សពីរទៅប្រាំនាក់ដែលបានជ្រើសរើសសិក្សាច្បាប់នៃការថ្វាយនឹងបង្កើតជាក្រុមមួយ ។ បងប្អូនក៏អាចមានក្រុមច្រើនដែលពិភាក្សាច្បាប់តែមួយ ប្រសិនបើមានសិស្សច្រើនជាងប្រាំនាក់បានជ្រើសរើសសិក្សាច្បាប់ដូចគ្នានេះ ។ ( ប្រសិនបើថ្នាក់របស់បងប្អូនតូច ឬប្រសិនបើមានតែសិស្សម្នាក់បានជ្រើសរើសសិក្សាច្បាប់ជាក់លាក់មួយ សូមកែសម្រួលសកម្មភាពនេះឲ្យបំពេញតាមតម្រូវការសិស្សក្នុងថ្នាក់របស់បងប្អូន ។ ឧទាហរណ៍ បងប្អូនអាចអញ្ជើញសិស្សម្នាក់ឲ្យចែកចាយអ្វីដែលគាត់បានរៀនជាមួយនឹងបងប្អូន ឬជាមួយក្រុមមួយដែលបានសិក្សាប្រធានបទខុសគ្នាមួយ ) ។

សូមឲ្យសិស្សចាត់ឲ្យមានសមាជិកក្រុមម្នាក់ធ្វើជាមេក្រុម ។ សូមចែកសំណៅចម្លងក្រដាសចែក « ច្បាប់របស់ព្រះ » ខាងក្រោមនេះដល់មេក្រុមនីមួយៗមួយច្បាប់ ។

ច្បាប់របស់ព្រះ

សេចក្ដីណែនាំដល់មេក្រុម ៖ សូមដឹកនាំក្រុមរបស់បងប្អូនឲ្យឆ្លើយនឹងសំណួរដូចខាងក្រោមនេះនៅក្នុងការពិភាក្សាដ៏មានអត្ថន័យមួយ ។ សូមប្រាកដថាបានរួមបញ្ចូលសមាជិកគ្រប់គ្នាក្នុងក្រុមនៅក្នុងការពិភាក្សារបស់បងប្អូន ។

តើបងប្អូនបានរៀនសេចក្ដីពិតអ្វីខ្លះមកពីការសិក្សារបស់បងប្អូន ?
តើមានឧបសគ្គអ្វីខ្លះដែលជាប់ទាក់ទងជាមួយនឹងការគោរពតាមច្បាប់នេះនាពេលសព្វថ្ងៃ ហើយតើពួកគេអាចយកឈ្នះឧបសគ្គនោះដោយរបៀបណា ?
តើបងប្អូន ឬគ្រួសាររបស់បងប្អូនបានទទួលពរជ័យអ្វីខ្លះតាមរយៈការកាន់តាមច្បាប់នេះ ?
តើការកាន់តាមច្បាប់នេះអាចជួយបងប្អូនឲ្យក្លាយកាន់តែដូចជាព្រះវរបិតាសួគ៌តាមរបៀបណា ?

កាលបងប្អូនបញ្ចប់មេរៀននេះ សូមហៅសិស្សម្នាក់ដែលនឹងស្ម័គ្រចិត្តចែកចាយជាមួយសិស្សក្នុងថ្នាក់អំពីចំណុចជាក់ច្បាស់ពីរបីមកពីការពិភាក្សាក្រុមរបស់បងប្អូន ។

សូមឲ្យក្រុមមានពេល ១០ នាទី ឬមានពេលគ្រប់គ្រាន់ដើម្បីធ្វើការពិភាក្សាដ៏មានអត្ថន័យមួយ ។ បន្ទាប់ពីទុកពេលគ្រប់គ្រាន់ហើយនោះ សូមឲ្យតំណាងក្រុមមកពី ក្រុមនីមួយៗឡើងមកចែកចាយជាមួយសិស្សក្នុងថ្នាក់ទាំងមូល នូវចំណុចជាក់ច្បាស់ពីរបីមកពីការពិភាក្សារបស់ពួកគេ ។ សូមពិចារណាលើកទឹកចិត្តអ្នកតំណាងម្នាក់ៗឲ្យចែកចាយពីរបៀបដែលការកាន់តាមច្បាប់ ដែលគាត់បានសិក្សានោះអាចជួយយើងឲ្យក្លាយកាន់តែដូចជាព្រះវរបិតាសួគ៌របស់យើង ។

សូមចែកចាយទីបន្ទាល់ និងបទពិសោធន៍របស់បងប្អូនអំពីរបៀបដែលការកាន់តាមច្បាប់ និងព្រះបញ្ញត្តិទាំងឡាយរបស់ព្រះបានប្រទានពរដល់ជីវិតរបស់បងប្អូន និងបានជួយបងប្អូនឲ្យក្លាយកាន់តែដូចជាព្រះវរបិតាសួគ៌ ។

សូមដាក់បង្ហាញសំណួរខាងក្រោម ។ សូមឲ្យសិស្សមានពេលសញ្ជឹងគិតអំពីសំណួរនេះ កត់ត្រាទុកនូវចំណាប់អារម្មណ៍របស់ពួកគេ ហើយស្គាល់សកម្មភាពដែលពួកគេមានអារម្មណ៍បំផុសគំនិតឲ្យធ្វើតាម ។ សូមលើកទឹកចិត្តសិស្សឲ្យស្វែងរកជំនួយ និងការដឹកនាំពីព្រះវរបិតាសួគ៌ក្នុងការអធិស្ឋាន ដើម្បីធ្វើសកម្មភាពតាមការបំផុសគំនិត ដែលពួកគេបានទទួល ។ បងប្អូនក៏អាចអញ្ជើញពួកគេឲ្យសម្រេចពីពេលមួយ ដើម្បីធ្វើការតាមដានលើអ្វីដែលពួកគេបានតាំងចិត្តធ្វើនេះផងដែរ ។

តើព្រះបញ្ញត្តិរបស់ព្រះអម្ចាស់មួយណាដែលបានពិភាក្សានៅថ្ងៃនេះ ដែលខ្ញុំអាចកាន់តាមកាន់តែស្មោះត្រង់ ?
តើខ្ញុំត្រូវផ្លាស់ប្ដូរអ្វីឲ្យជាក់លាក់ ត្រូវចាប់ផ្ដើមធ្វើអ្វី ឬឈប់ធ្វើអ្វីដើម្បីកាន់តាមព្រះបញ្ញត្តិនេះឲ្យកាន់តែពេញលេញ ?
តើពរជ័យ គុណលក្ខណៈនៃភាពជាព្រះ និងសេចក្ដីអំណរអ្វីខ្លះ ដែលកើតមានដល់ជីវិតខ្ញុំតាមរយៈការធ្វើតាមព្រះបញ្ញត្តិនេះឲ្យកាន់តែពេញលេញ និងដោយភាពស្មោះត្រង់កាន់តែខ្លាំងនោះ ?

សម្រាប់ពេលក្រោយ

សូមពន្យល់ថា ជំនឿពិសេសមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺថា ព្រះបន្ដដឹកនាំបុត្រាបុត្រីរបស់ទ្រង់តាមរយៈការផ្ដល់បទគម្ពីរបន្ថែមទៀត ។ សូមអញ្ជើញសិស្សឲ្យសិក្សាក្នុងឯកសាររៀបចំសម្រាប់មេរៀនលើកក្រោយ ហើយមករៀនដោយបានការរៀបចំខ្លួនដើម្បីពិភាក្សាពីរបៀបដែលបទគម្ពីរបន្ថែមបញ្ជាក់ច្បាស់ និងពង្រីកការយល់ដឹងរបស់យើងអំពីដំណឹងល្អរបស់ព្រះអង្គសង្គ្រោះ ។