សៀវភៅសិក្សាសម្រាប់គ្រូបង្រៀន មេរៀនទី ៤ ៖ គោលលទ្ធិនៃវិវរណៈ

« សៀវភៅសិក្សាសម្រាប់គ្រូបង្រៀន មេរៀនទី ៤ ៖ គោលលទ្ធិនៃវិវរណៈ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« សៀវភៅសិក្សាសម្រាប់គ្រូបង្រៀន មេរៀនទី ៤ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ

សៀវភៅសិក្សាសម្រាប់គ្រូបង្រៀន មេរៀនទី ៤

គោលលទ្ធិនៃវិវរណៈ

ព្រះអម្ចាស់បានបើកសម្ដែងសេចក្ដីពិតដ៏សំខាន់អំពីគោលលទ្ធិនៃវិវរណៈទៅកាន់ យ៉ូសែប ស៊្មីធ និងមនុស្សដទៃទៀតនៅជំនាន់ដើមនៃការស្ដារឡើងវិញ ។ មេរៀននេះត្រូវបានរៀបចំឡើងដើម្បីជួយសិស្សឲ្យបង្កើនសមត្ថភាពរបស់ពួកគេ ដើម្បីទទួលវិវរណៈ ហើយស្គាល់កាន់តែច្បាស់ពីពេលដែលព្រះវិញ្ញាណបរិសុទ្ធមានបន្ទូលមកកាន់ពួកគេ ។

យោបល់សម្រាប់ការបង្រៀន

ព្រះអម្ចាស់បើកសម្ដែងគោលការណ៍នៃវិវរណៈដល់យ៉ូសែប ស្ម៉ីធ និង អូលីវើរ ខៅឌើរី ។

អភិវឌ្ឍការបង្រៀន និងការរៀនសូត្ររបស់យើង

បង្កើតឲ្យមានបរិយាកាសរៀនសូត្រប្រកបដោយសេចក្តីស្រឡាញ់ ការគោរព និងមានគោលបំណង ។ នៅពេលសិស្សទាំងឡាយដឹងថា ពួកគេត្រូវបានស្រឡាញ់ និងគោរពដោយគ្រូ និងសិស្សផ្សេងទៀត នោះពួកគេកាន់តែចូលចិត្តមកកាន់ថ្នាក់ ដោយត្រៀមខ្លួនជាស្រេចដើម្បីរៀន ។ ការទទួលយកដែលសិស្សមានអារម្មណ៍ពីគ្នានេះអាចបន្ទន់ចិត្ត កាត់បន្ថយការភ័យខ្លាច ហើយអញ្ជើញឲ្យមានការចែកចាយបទពិសោធន៍ និងអារម្មណ៍ជាមួយសិស្សក្នុងថ្នាក់ ។

សូមបង្ហាញសំណួរដូចតទៅនេះ ៖ តើមានស្ថានភាព ការសម្រេចចិត្ត ឬសំណួរថ្មីៗអ្វីខ្លះដែលបងប្អូនចង់ទទួលបានការដឹកនាំ និងវិវរណៈមកពីព្រះវរបិតាសួគ៌របស់បងប្អូន ?

សូមអញ្ជើញសិស្សឲ្យគិតពីសំណួរនេះ ហើយសរសេរនូវគំនិតរបស់គេ ។ ក្រោយពីទុកពេលឲ្យគ្រប់គ្រាន់ហើយ សូមអញ្ជើញសិស្សពីរបីនាក់ចែកចាយនូវអ្វីដែលពួកគេបានសរសេរជាមួយសិស្សក្នុងថ្នាក់ ប្រសិនបើវាមិនឯកជនខ្លាំងពេក ។

ដើម្បីជួយសិស្សឲ្យយល់ពីភាពទាក់ទងគ្នានៃមេរៀននេះទៅនឹងជីវិតរបស់ពួកគេ សូមពន្យល់ពីលទ្ធផលដែលចង់បាន ដែលបានពិពណ៌នានៅក្នុងសេចក្ដីផ្ដើមនៃមេរៀននេះ ។

សូមដាក់បង្ហាញរូបភាពខាងក្រោមនេះ ហើយសូមសួរ ៖

អំណោយទាន និងព្រះចេស្ដានៃ ព្រះ ដោយ យ៉ូស្វេ ដេននីស

តើមានកាលៈទេសៈអ្វីខ្លះ ដែលបានដឹកនាំឲ្យ អូលីវើរ ខៅឌើរីទៅជួយ យ៉ូសែប ស៊្មីធក្នុងការបកប្រែព្រះគម្ពីរមរមន ? ( បើចាំបាច់ សូមឲ្យសិស្សគូសលើអ្វីដែលពួកគេបានរៀនពីក្នុងផ្នែកទី ១ នៃសៀវភៅសិក្សារៀបចំរបស់ពួកគេ ) ។
តើវិវរណៈបានជះឥទ្ធិពលលើការសម្រេចចិត្តរបស់អូលីវើរឲ្យមកជួយយ៉ូសែបដោយរបៀបណា ?

សូមរំឭកសិស្សថា ជាចម្លើយចំពោះបំណងរបស់អូលីវើរដើម្បីជួយបកប្រែព្រះគម្ពីរមរមន ព្រះអម្ចាស់បានបង្រៀនគាត់បន្ថែមទៀតអំពីការទទួលវិវរណៈ ។ សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ៨:១–៣ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលសេចក្ដីពិត ដែលអូលីវើរត្រូវការដើម្បីយល់ពីរបៀបទទួលបានវិវរណៈដើម្បីបកប្រែ ។

អភិវឌ្ឍការបង្រៀន និងការរៀនសូត្ររបស់យើង

ស្គាល់គោលការណ៍ និងគោលលទ្ធិ ។ គោលការណ៍ និងគោលលទ្ធិដែលស្គាល់ច្បាស់ជួយសិស្សឲ្យឃើញសេចក្ដីពិតតាមរបៀបមួយ ដែលសាមញ្ញ និងទាក់ទងគ្នា ។ ពេលអាចធ្វើបាន សូមលើកទឹកចិត្តសិស្សឲ្យរកមើល និងចែកចាយគោលការណ៍ និងគោលលទ្ធិចេញពីអ្វីដែលពួកគេកំពុងសិក្សា ។ ការសរសេរ ឬការបង្ហាញគោលការណ៍ ឬការឲ្យសិស្សកត់ចំណាំសេចក្ដីពិតក្នុងព្រះគម្ពីររបស់ពួកគេ នឹងជួយសិស្សឲ្យសញ្ជឹងគិតពីគោលការណ៍នោះកាន់តែស៉ីជម្រៅ ហើយទទួលបានវិវរណៈអំពីរបៀបដែលពួកគេអាចអនុវត្តតាមគោលការណ៍ទាំងនោះ ។

តើយើងអាចរៀនសេចក្ដីពិតអ្វីខ្លះចេញពីខគម្ពីរទាំងនេះអំពីការស្វែងរក និងការទទួលបានវិវរណៈ ? ( សិស្សអាចរកឃើញសេចក្ដីពិតពីរបីដែលរួមមានដូចតទៅនេះ ៖ ព្រះអម្ចាស់មានបន្ទូលមកកាន់គំនិត និងដួងចិត្តរបស់យើងតាមរយៈព្រះចេស្ដានៃព្រះវិញ្ញាណបរិសុទ្ធ ) ។
ដោយផ្អែកលើការសិក្សា និងបទពិសោធន៍ផ្ទាល់ខ្លួនរបស់បងប្អូន តើព្រះអម្ចាស់មានបន្ទូលមកកាន់គំនិត និងដួងចិត្តរបស់បងប្អូនតាមរបៀបណាខ្លះ ? ( សូមសរសេរចម្លើយរបស់សិស្សនៅលើក្ដារខៀន ។ បើចាំបាច់ សូមឲ្យសិស្សរំឭកវគ្គគម្ពីរ និងមតិអធិប្បាយដែលពួកគេបានសិក្សានៅក្នុងផ្នែកទី ១ នៃសៀវភៅសិក្សារៀបចំ ) ។
ហេតុអ្វីបងប្អូនគិតថា ព្រះអម្ចាស់ជ្រើសរើសទាក់ទងមកយើងតាមរយៈគំនិតយើងផង និងដួងចិត្តរបស់យើងផង ? ( សូមលើកទឹកចិត្តសិស្សឲ្យលើកឡើងនូវអ្វីដែលពួកគេបានរៀន និងសញ្ជឹងគិតអំឡុងពេលសិក្សា និងរៀបចំផ្ទាល់ខ្លួនរបស់ពួកគេ ) ។

សូមពន្យល់ថា នៅពេលអូលីវើរបានប៉ុនប៉ងបកប្រែ នោះគាត់ពិបាកនឹងទទួលបានវិវរណៈ ដែលគាត់ត្រូវការដើម្បីបន្ដ ។ យ៉ូសែប និងអូលីវើរបានទូលសួរព្រះអម្ចាស់ពីមូលហេតុ ដែលអូលីវើរមានការពិបាក ។ សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ៩:៧–៩ ដោយស្ងៀមស្ងាត់ ហើយរកមើលគំរូមួយដែលព្រះអម្ចាស់បានបង្រៀនដល់អូលីវើរ អំពីរបៀបទទួលបានវិវរណៈ ។

តើព្រះអម្ចាស់បានបើកសម្ដែងដល់អូលីវើរពីគំរូអ្វី ដែលអាចជួយយើងឲ្យទទួល និងស្គាល់វិវរណៈ ? ( ជាញឹកញាប់វិវរណៈកើតមក ក្រោយពីការសិក្សាសំណួរ និងបញ្ហាក្នុងគំនិតរបស់យើង ឈានដល់សេចក្ដីសន្និដ្ឋាន រួចហើយទូលសូមដល់ព្រះ ថាតើសេចក្ដីសន្និដ្ឋានរបស់យើងនោះត្រឹមត្រូវដែរឬទេ ) ។

សូមពន្យល់ថា ប្រធាន ដាល្លិន អេក អូក ក្នុងគណៈប្រធានទីមួយបានពោលថា « ការឆេះឆួលក្នុងទ្រូង » អាចជាសញ្ញានៃ « អារម្មណ៍មួយនៃការលួងលោម និងភាពស្ងប់ស្ងៀម » ( « Teaching and Learning by the Spirit » Ensign ខែ មីនា ឆ្នាំ ១៩៩៧ ទំព័រ ១៣ ) ។

សូមឲ្យសិស្សចែកចាយគំនិតរបស់ពួកគេអំពីសំណួរដូចតទៅនេះ និងការអញ្ជើញពីសៀវភៅសិក្សារៀបចំរបស់ពួកគេ ៖

ហេតុអ្វីបងប្អូនគិតថា ព្រះអម្ចាស់រំពឹងឲ្យបងប្អូនសិក្សាបញ្ហានោះក្នុងគំនិតរបស់បងប្អូន ជាផ្នែកនៃការស្វែងរកវិវរណៈ ?
តើមិត្ត ឬសមាជិកគ្រួសារម្នាក់អាចបង្រៀនបងប្អូនអ្វីខ្លះអំពីការអញ្ជើញ និងការទទួលបានវិវរណៈ ? តើបងប្អូនបានរៀនអ្វីខ្លះ មកពីបទពិសោធន៍ផ្ទាល់ខ្លួនអំពីការអញ្ជើញ និងការទទួលបានវិវរណៈ ?

កំណត់ចំណាំ ៖ សកម្មភាពខាងក្រោមនេះមានបំណងផ្ដល់ឲ្យសិស្សមានពេលគ្រប់គ្រាន់ ដើម្បីពិចារណាពីអ្វីដែលពួកគេកំពុងរៀន ហើយចាប់អនុវត្តវា ។ សូមសម្របមេរៀនតាមការចាំបាច់ ដើម្បីផ្ដល់ពេលច្រើនឲ្យសិស្សសញ្ជឹងគិត សរសេរ អាន ឬអធិស្ឋាន ។

សូមឲ្យសិស្សសញ្ជឹងគិត និងសរសេរក្នុងរយៈពេលពីរបីនាទីនូវអ្វីដែលពួកគេបានរៀនអំពីវិវរណៈ និងរបៀបដែលវាទាក់ទងទៅនឹងគំនិតដែលពួកគេបានសរសេរនៅដើមមេរៀននេះ ។ ឬ ពួកគេអាចអធិស្ឋានដោយស្ងាត់ស្ងៀមសុំការដឹកនាំលើអ្វីដែលពួកគេបានសរសេរនេះ ។ បងប្អូនក៏អាចបង្ហាញសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ហើយអញ្ជើញសិស្សឲ្យអានវាដោយស្ងាត់ស្ងៀម ហើយរកមើលរបៀបបន្ថែមទៀតដែលពួកគេអាចអញ្ជើញវិវរណៈ ។

សូមអធិស្ឋាននៅក្នុងព្រះនាមនៃព្រះយេស៊ូវគ្រីស្ទអំពីកង្វល់ ការភ័យខ្លាច ភាពទន់ខ្សោយរបស់បងប្អូន—ពិតណាស់ ជាបំណងប្រាថ្នានៅក្នុងដួងចិត្តរបស់បងប្អូន ។ បន្ទាប់មក ចូរស្តាប់ ! សូមសរសេរគំនិតដែលកើតមានក្នុងគំនិតរបស់បងប្អូន ។ សូមកត់ត្រាអារម្មណ៍របស់បងប្អូន ហើយធ្វើសកម្មភាពតាមអ្វីដែលបងប្អូនត្រូវបានបំផុសគំនិតឲ្យធ្វើ ។ កាលអ្នកធ្វើដំណើរការនេះម្ដងហើយម្ដងទៀតរៀងរាល់ថ្ងៃ រាល់ខែ រាល់ឆ្នាំ បងប្អូននឹង « រីកចម្រើននៅក្នុងគោលការណ៍នៃវិវរណៈ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ១៣២ ) ។ …

ខ្ញុំសូមលើកទឹកចិត្តបងប្អូនឲ្យខិតខំបន្ថែមទៀតលើសពីលទ្ធភាពខាងវិញ្ញាណរបស់បងប្អូននៅពេលនេះ ដើម្បីទទួលបានវិវរណៈផ្ទាល់ខ្លួន ។ …

គ្មានអ្វីមួយដែលធ្វើឲ្យស្ថានសួគ៌បើកចំហរឡើង ដូចជាពេលដែលមានការប្រមូលផ្ដុំនៃបរិសុទ្ធភាពកាន់តែខ្លាំង ការគោរពប្រតិបត្តិយ៉ាងមុតមាំ ការស្វែងរកដោយស្មោះ ការទទួលទានព្រះបន្ទូលនៃព្រះគ្រីស្ទនៅក្នុងព្រះគម្ពីរមរមនរៀងរាល់ថ្ងៃ និងការធ្វើកិច្ចការព្រះវិហារបរិសុទ្ធ និងពង្សប្រវត្តិជាទៀងទាត់នោះឡើយ ។ ( រ័សុល អិម ណិលសុន « វិវរណៈសម្រាប់សាសនាចក្រ វិវរណៈសម្រាប់ជីវិតរបស់យើង » Ensign ឬ លីអាហូណា ខែ ឧសភា ឆ្នាំ ២០១៨ ទំព័រ ៩៥ )

ការស្ដារដំណឹងល្អឡើងវិញផ្ដល់គំរូមួយនៃការទទួលវិវរណៈ ។

សូមចង្អុលបង្ហាញថា គោលការណ៍នៃវិវរណៈដែល យ៉ូសែប ស៊្មីធ និង អូលីវើរ ខៅឌើរីបានរៀននោះត្រូវបានបើកសម្ដែងដល់ពួកលោកគ្រប់ពេល ស្របតាមកាលៈទេសៈដែលកើតឡើង និងសំណួរដែលពួកលោកបានសួរ ។ ការណ៍នេះបង្ហាញពីសេចក្ដីពិតដ៏សំខាន់ ដែលព្រះអម្ចាស់បានបង្រៀនក្នុងវិវរណៈជាច្រើន ។

សូមឲ្យសិស្សបីនាក់ឆ្លាស់វេនគ្នាអាន គោលលទ្ធិ និង សេចក្ដីសញ្ញា ៤២:៦១; ៥០:២៤; ៩៨:១២ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលអ្វីដែលវគ្គទាំងនេះបង្រៀនអំពី របៀបដែលព្រះអម្ចាស់បើកសម្ដែងសេចក្ដីពិត និងព្រះទ័យរបស់ទ្រង់ប្រាប់យើង ។

តើបងប្អូននឹងសង្ខេបសេចក្ដីពិតមួយ ដែលខគម្ពីរទាំងនេះបង្រៀនអំពីការទទួលវិវរណៈមកពីព្រះអម្ចាស់ដោយរបៀបណា ? ( ដោយប្រើពាក្យសម្ដីរបស់សិស្ស សូមបង្ហាញ ឬសរសេរសេចក្ដីពិតមួយនៅលើក្ដារខៀនដែលស្រដៀងនឹងអ្វីដូចតទៅនេះ ៖ ព្រះអម្ចាស់បើកសម្ដែងសេចក្ដីពិតដល់យើង « មួយបន្ទាត់ម្ដងៗ មួយសិក្ខាបទម្ដងៗ » ) ។

សូមរំឭកសិស្សថា នៅក្នុងផ្នែកទី ៣ នៃសៀវភៅសិក្សារៀបចំ ពួកគេបានរៀនអំពីគំរូនៃការទទួលវិវរណៈមកពីអែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ ។ សូមអញ្ជើញសិស្សឲ្យចែកចាយអ្វីដែលពួកគេចាប់អារម្មណ៍ពីការបង្រៀនរបស់លោក ។ បងប្អូនក៏អាចសួរពួកគេពីរបៀបដែលរឿងប្រៀបប្រដូចរបស់លោកទាក់ទងទៅនឹងវិវរណៈ អាចជួយយើងឲ្យយល់ពីសេចក្ដីពិតដែលបានបង្ហាញ ឬសរសេរនៅលើក្ដារខៀនឲ្យកាន់តែច្បាស់ផងដែរ ។

តើការយល់ពីសេចក្ដីពិតនេះអាចជួយនរណាម្នាក់ ដែលមានអារម្មណ៍ថា គាត់មិនទទួលបានចម្លើយ ឬការដឹកនាំពីព្រះអម្ចាស់ដោយរបៀបណា ?
តើបងប្អូនមានបទពិសោធន៍អ្វីខ្លះ អំពីការទទួលបានចម្លើយ ឬការដឹកនាំបន្ដិចម្ដងៗក្នុងពេលយូរ ?

សូមបញ្ចប់ដោយការថ្លែងទីបន្ទាល់ ឬអញ្ជើញសិស្សណាមួយ ដែលចង់ថ្លែងទីបន្ទាល់នៃសេចក្ដីពិតអំពីវិវរណៈ ដែលបានបង្រៀននៅក្នុងមេរៀននេះ ។

សម្រាប់ពេលក្រោយ

សូមសួរសិស្សថា តើពួកគេគិតថាអ្វីទៅអាចជាអព្ភូតហេតុដ៏មហិមាបំផុតនៃការស្ដារឡើងវិញ ។ សូមឲ្យពួកគេសិក្សាក្នុងសៀវភៅសិក្សាការរៀបចំសម្រាប់ថ្នាក់រៀនលើកក្រោយស្ដីពីការលេចចេញមកនៃព្រះគម្ពីរមរមន ហើយពិចារណាពីអព្ភូតហេតុដែលទាក់ទងទៅនឹងការការពារ ការបកប្រែ និងការបោះពុម្ពព្រះគម្ពីរមរមន ។