ឯកសារគ្រូបង្រៀន មេរៀនទី ២២ ៖ អាពាហ៍ពិពាហ៍ពហុពន្ធភាព

« ឯកសារគ្រូបង្រៀន មេរៀនទី ២២ ៖ អាពាហ៍ពិពាហ៍ពហុពន្ធភាព » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀន មេរៀនទី ២២ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀន មេរៀនទី ២២

អាពាហ៍ពិពាហ៍ពហុពន្ធភាព

អាពាហ៍ពិពាហ៍រវាងបុរសម្នាក់ និង ស្ត្រីម្នាក់ គឺជាក្រិត្យវិន័យរបស់ព្រះលុះត្រាតែទ្រង់បញ្ជាផ្សេងទៀតប៉ុណ្ណោះ ( សូមមើល យ៉ាកុប ២:២៧–៣០ ) ។ តាមរយៈវិវរណៈ ព្រះអម្ចាស់បានត្រាស់បង្គាប់ព្យាការី យ៉ូសែប ស៊្មីធ ឲ្យរស់នៅតាមគោលការណ៍នៃអាពាហ៍ពិពាហ៍ពហុពន្ធភាព ហើយបង្រៀនវាដល់សមាជិកសាសនាចក្រពីដើមមួយចំនួន ។ អាពាហ៍ពិពាហ៍ពហុពន្ធភាពបានបន្ដនៅក្នុងសាសនាចក្ររហូតដល់ព្រះអម្ចាស់បានប្រកាសតាមរយៈវិវរណៈថា ពួកបរិសុទ្ធគួរតែបញ្ឈប់ការអនុវត្តនេះ ( សូមមើល សេចក្ដីប្រកាសជាផ្លូវការ ១ ) ។ មេរៀននេះត្រូវបានរៀបចំដើម្បីពង្រឹងដល់ការធានារបស់សិស្សថា យ៉ូសែប ស៊្មីធ និងសមាជិកសាសនាចក្រពីដើមបានធ្វើសកម្មភាពក្រោមការដឹកនាំពីព្រះអម្ចាស់ នៅពេលពួកគេបានអនុវត្តអាពាហ៍ពិពាហ៍ពហុពន្ធភាព ។ វាក៏នឹងជួយសិស្សឲ្យទុកចិត្តលើព្រះអម្ចាស់កាន់តែពេញលេញ នៅពេលពួកគេខិតខំគោរពតាមព្រះទ័យរបស់ទ្រង់ ហើយស្វែងរកចម្លើយចំពោះសំណួររបស់ពួកគេ ។

យោបល់សម្រាប់ការបង្រៀន

ព្រះអម្ចាស់បានបើកបង្ហាញនូវការអនុវត្តអាពាហ៍ពិពាហ៍ពហុពន្ធភាព ។

សូមបង្ហាញសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ៖

ព្រះបានតែងតែតម្រូវឲ្យបុត្រាបុត្រីទ្រង់ដែលធ្វើសេចក្ដីសញ្ញា ធ្វើកិច្ចការដ៏លំបាកៗ ។ ( រ័សុល អិម ណិលសុន « Stand as True Millennials » Ensign ខែ តុលា ឆ្នាំ ២០១៦ ទំព័រ ២៧ )

តើ « កិច្ចការដ៏លំបាក » ដែលព្រះបានសុំឲ្យសមាជិកសាសនាចក្រធ្វើនៅជំនាន់យើងនេះមានអ្វីខ្លះ ? ( បងប្អូនអាចរាយចម្លើយនៅលើក្ដារខៀន ។ សូមអញ្ជើញសិស្សឲ្យពិចារណាពីការគោរពប្រតិបត្តិផ្ទាល់ខ្លួនរបស់គេតាមបទបញ្ញតិ្តទាំងនេះពេញមួយមេរៀននេះ ) ។
ហេតុអ្វីបងប្អូនគិតថា ព្រះអម្ចាស់សុំឲ្យបុត្រាបុត្រីក្នុងសេចក្ដីសញ្ញារបស់ទ្រង់ធ្វើការណ៍ទាំងនេះ ?

សូមបង្ហាញថា សម្រាប់ពួកបរិសុទ្ធថ្ងៃចុងក្រោយពីដើមជាច្រើន តម្រូវការដ៏ពិបាកបំផុតមួយមកពីព្រះនោះគឺ ឲ្យពួកគេរស់នៅតាមគោលការណ៍នៃអាពាហ៍ពិពាហ៍ពហុពន្ធភាព ។ សូមរំឭកសិស្សថា នៅដើមឆ្នាំ ១៨៣១ យ៉ូសែប ស៊្មីធបានអធិស្ឋានទូលសូមយល់ពីមូលហេតុដែលព្យាការីពីបុរាណមួយចំនួន និងស្ដេចសាសន៍អ៊ីស្រាអែលបានអនុវត្តអាពាហ៍ពិពាហ៍ពហុពន្ធភាព ( សូមមើលក្បាលកណ្ឌ និងខទី ១ នៃ គោលលទ្ធិ និង សេចក្ដីសញ្ញា ១៣២ ) ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១៣២:៣៤–៣៧ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលរបៀបដែលព្រះអម្ចាស់បានឆ្លើយតបទៅនឹងសំណួររបស់ព្យាការី ។

សូមដាក់បង្ហាញសំណួរដូចតទៅនេះ ៖ ហេតុអ្វីអ័ប្រាហាំបានរៀបការនឹងនាងហាកាជាប្រពន្ធទីពីរ ?
យោងតាម ខទី ៣៦–៣៧ តើព្រះអម្ចាស់បានបង្រៀនគោលការណ៍អ្វីដល់យ៉ូសែប ស៊្មីធស្ដីពីការគោរពប្រតិបត្តិតាមព្រះបញ្ញត្តិរបស់ទ្រង់ ? ( បន្ទាប់ពីសិស្សឆ្លើយតប សូមសរសេរសេចក្ដីពិតដូចតទៅនេះនៅលើក្ដារខៀន ៖ នៅពេលយើងស្ម័គ្រចិត្តគោរពតាមអ្វីក៏ដោយដែលព្រះអម្ចាស់ត្រាស់បង្គាប់ នោះវាត្រូវបានរាប់ជាសេចក្ដីសុចរិតដល់ [ យើង ] វិញ ) ។
តើព្រះបញ្ញត្តិរបស់ព្រះអម្ចាស់ឲ្យអ័ប្រាហាំថ្វាយអ៊ីសាក អាចប្រៀបធៀបទៅនឹងព្រះបញ្ញត្តិរបស់ទ្រង់ឲ្យយ៉ូសែប ស៊្មីធ និងពួកបរិសុទ្ធពីដើមអនុវត្តអាពាហ៍ពិពាហ៍ពហុពន្ធភាពបានដោយរបៀបណា ?

សូមពន្យល់ថា មួយរយៈក្រោយពីព្រះអម្ចាស់បានបើកសម្ដែងគោលការណ៍នៃអាពាហ៍ពិពាហ៍ពហុពន្ធភាពដល់យ៉ូសែប ស៊្មីធ នោះទ្រង់បានត្រាស់បង្គាប់ឲ្យព្យាការីរស់នៅតាមគោលការណ៍នេះ ហើយបង្រៀនវាដល់មនុស្សដទៃ ។

សូមបង្ហាញសេចក្ដីថ្លែងការណ៍ដូចខាងក្រោម ហើយអញ្ជើញសិស្សម្នាក់ឲ្យអានវាឮៗ ៖

យោងតាម ហេឡែន ម៉ា ឃឹមបឹល យ៉ូសែប ស្ម៊ីធ បានមានប្រសាសន៍ថា « ការអនុវត្តគោលការណ៍នេះគឺជាការសាកល្បងដ៏លំបាកបំផុតដែលពួកបរិសុទ្ធធ្លាប់បានជួបពីមុនមកក្នុងការសាកល្បងសេចក្ដីជំនឿរបស់ពួកគេ » ។ ទោះបីជាវាគឺជាការសាកល្បងមួយ « ដ៏លំបាកបំផុត » នៃជីវិតរបស់នាង នាងបានថ្លែងទីបន្ទាល់ថា វាក៏ជា « ពរជ័យមួយដ៏អស្ចារ្យបំផុតដែរ »( « Plural Marriage in Kirtland and Nauvoo » Gospel Topics នៅលើគេហទំព័រ topics.ChurchofJesusChrist.org )

តើយ៉ូសែប ស្ម៊ីធ មានអារម្មណ៍យ៉ាងណាចំពោះការអនុវត្តអាពាហ៍ពិពាហ៍ពហុពន្ធភាព នៅពេលវាត្រូវបានណែនាំលើកដំបូង ? ( ប្រសិនបើចាំបាច់ សូមឲ្យសិស្សរំឭកសេចក្ដីថ្លែងការណ៍របស់ស៊ិស្ទើរ អេលីហ្សា អរ ស្នូ នៅក្នុងផ្នែកទី ២ នៃឯកសាររៀបចំ ) ។

សូមឲ្យសមាជិកក្នុងថ្នាក់ពិចារណាពីគំរូរបស់អ័ប្រាហាំ និង យ៉ូសែប ស៊្មីធ ។

តើឆន្ទៈរបស់ពួកបរិសុទ្ធពីដើមក្នុងការគោរពតាមបទបញ្ញត្តិដ៏ពិបាកបែបនោះ បង្ហាញអ្វីខ្លះអំពីចរិតលក្ខណៈ និងសេចក្ដីជំនឿរបស់ពួកគេ ?

សូមពន្យល់ថា ពួកបរិសុទ្ធពីដើមជាច្រើនបានបន្សល់ទុកនូវការពិពណ៌នានៃការពុះពារក្នុងចិត្តដែលពួកគេបានដកពិសោធន៍ នៅពេលអាពាហ៍ពិពាហ៍ពហុពន្ធភាពត្រូវបានណែនាំដល់ពួកគេ ។ សូមឲ្យសិស្សចែកចាយអ្វីដែលពួកគេចងចាំពីដំណើររឿង ដែលពួកគេបានសិក្សានៅក្នុងផ្នែកទី ៣ នៃឯកសាររៀបចំ ។

សូមបង្ហាញដំណើររឿងខាងក្រោមនេះមកពី ហ្វែប វូឌដ្រុព្វ ជាភរិយារបស់ប្រធាន វិលហ្វួឌ វូឌដ្រុព្វ ។ សូមឲ្យសិស្សម្នាក់អានវគ្គនេះឮៗ ៖

នៅពេលគោលការណ៍នៃអាពាហ៍ពិពាហ៍ពហុពន្ធភាពត្រូវបានបង្រៀនជាលើកដំបូង ខ្ញុំបានគិតថា វាជារឿងដ៏ទុច្ចរិតបំផុតមួយដែលខ្ញុំធ្លាប់បានឮ ។ … ប៉ុន្ដែពេលខ្ញុំជឿភ្លាមថា វាជាវិវរណៈមួយដែលបានមកពីព្រះតាមរយៈយ៉ូសែប ហើយដោយដឹងថាលោកគឺជាព្យាការីម្នាក់ នោះខ្ញុំបានតស៊ូជាមួយនឹងព្រះវរបិតាសួគ៌របស់ខ្ញុំនៅក្នុងការអធិស្ឋានដ៏ក្លៀវក្លា ដើម្បីទទួលបានការណែនាំដ៏ត្រឹមត្រូវនៅក្នុងគ្រាដ៏សំខាន់ខ្លាំងនៅក្នុងជីវិតខ្ញុំនោះ ។ ចម្លើយបានមកដល់ ។ សេចក្ដីសុខសាន្ដបានជ្រាបចូលមកក្នុងគំនិតរបស់ខ្ញុំ ។ ខ្ញុំបានដឹងថា នោះគឺជាព្រះទ័យរបស់ព្រះ ។ ( Phebe Woodruff, in Edward Tullidge, The Women of Mormondom [ ឆ្នាំ ១៨៧៧ ] ទំព័រ ៤១៣ )

តើគំរូរបស់ហ្វែបអាចជួយនរណាម្នាក់នាសព្វថ្ងៃនេះ ដែលអាចពុះពារក្នុងការគោរពតាមបទបញ្ញត្តិមួយរបស់ព្រះដោយរបៀបណា ? តើគំរូរបស់នាងអាចជួយនរណាម្នាក់ដែលអាចមានសំណួរអំពីការអនុវត្តអាពាហ៍ពិពាហ៍ពហុពន្ធភាពក្នុងចំណោមពួកបរិសុទ្ធពីដើមដោយរបៀបណា ?

សូមអញ្ជើញសិស្សម្នាក់ឲ្យអាន សុភាសិត ៣:៥–៦ ឲ្យឮៗ ហើយសូមឲ្យសិស្សក្នុងថ្នាក់ផ្ទៀងតាម ហើយរកមើលគោលការណ៍មួយ ដែលអាចទាក់ទងនឹងបទពិសោធន៍របស់ពួកបរិសុទ្ធសម័យដើមទាំងនេះ ។

តើយើងអាចរៀនគោលការណ៍អ្វីខ្លះចេញពីវគ្គគម្ពីរនេះ និងបទពិសោធន៍របស់ពួកបរិសុទ្ធពីដើម ? ( ដោយប្រើពាក្យរបស់សិស្ស សូមសរសេរនៅលើក្ដារខៀន ( ឬបង្ហាញ ) គោលការណ៍មួយដែលស្រដៀងគ្នាដូចតទៅនេះ ៖ ប្រសិនបើយើងទុកចិត្តលើព្រះអម្ចាស់ដោយអស់ពីចិត្តរបស់យើង ហើយមិនពឹងផ្អែកលើការយល់ដឹងរបស់យើងផ្ទាល់ទេ នោះទ្រង់នឹងដឹកនាំជីវិតរបស់យើង ) ។

សូមសួរសិស្សនូវសំណួរខាងក្រោម ៖

តើបងប្អូនគិតថា វាមានន័យយ៉ាងណាសម្រាប់នរណាម្នាក់ដែលបារម្ភអំពីការអនុវត្តអាពាហ៍ពិពាហ៍ពហុពន្ធភាពសម័យដើម ដើម្បីទុកចិត្តលើព្រះអម្ចាស់ឲ្យអស់ពីដួងចិត្តរបស់គេ ហើយមិនពឹងផ្អែកលើការយល់ដឹងរបស់គេផ្ទាល់នោះ ?

សូមពន្យល់ថា តាមធម្មតា សមាជិកសាសនាចក្រមានសំណួរ ឬកង្វល់អំពីអាពាហ៍ពិពាហ៍ពហុពន្ធភាព ។ ព្រះបានបើកសម្ដែង ហើយមិនតម្រូវឲ្យបុត្រាបុត្រីរបស់ទ្រង់នៅសព្វថ្ងៃនេះយល់ពីសេចក្ដីលម្អិតនៃអាពាហ៍ពិពាហ៍ពហុពន្ធភាពឡើយ ។ ទោះយ៉ាងណា ពួកបរិសុទ្ធទាំងអស់ត្រូវបានសន្យាថា ពួកគេអាចទទួលបានសាក្សីមួយថា យ៉ូសែប ស៊្មីធគឺជាព្យាការីរបស់ព្រះ ដែលទទួលបានបទបញ្ញត្តិ និងវិវរណៈមកពីទ្រង់ ហើយថាយ៉ូសែបបានរស់នៅយ៉ាងស្មោះត្រង់ តាមការបញ្ជារបស់ព្រះអម្ចាស់ ។

អភិវឌ្ឍការបង្រៀន និងការរៀនសូត្ររបស់យើង

បងប្អូនអាចជួយសិស្សឲ្យឆ្លើយនឹងសំណួរពិបាកៗបាន ។ ការផ្ដល់ដល់សិស្សនូវព័ត៌មានត្រឹមត្រូវ និងការជួយពួកគេឲ្យចេះរកប្រភពដែលទុកចិត្តបាន អាចជួយពួកគេឲ្យគិត និងពន្យល់ពីប្រធានបទប្រឈមនានាតាមរបៀបដ៏ត្រឹមត្រូវមួយ ។ ប្រសិនបើសិស្សចង់រៀនបន្ថែមទៀតអំពីការអនុវត្តអាពាហ៍ពិពាហ៍ពហុពន្ធភាពនៅក្នុងប្រវត្តិសាសនាចក្រកាលពីដើម សូមឲ្យពួកគេសិក្សាប្រកបដោយការអធិស្ឋានក្នុងធនធានបន្ថែមដែលមានចែងមកនៅក្នុងផ្នែក « ចង់បានបន្ថែមទៀតទេ ? នៃឯកសាររៀបចំ ។

សូមឲ្យសិស្សពិចារណាពីពេលនានាក្នុងជីវិតរបស់ពួកគេ ពេលដែលពួកគេបានទុកចិត្តលើព្រះអម្ចាស់ ហើយបានគោរពតាមបទបញ្ញត្តិដ៏ពិបាកមួយ—ឬពេលដែលពួកគេ « មិនត្រូវពឹងផ្អែកលើការយល់ដឹងរបស់ពួកគេផ្ទាល់ » កាលពួកគេស្រាវជ្រាវរកចម្លើយចំពោះសំណួរពិបាកៗនោះ ។ បងប្អូនអាចសុំឲ្យសិស្សពីរបីនាក់ចែកចាយបទពិសោធន៍របស់ពួកគេ ។ សូមសួរពួកគេពីរបៀបដែលព្រះអម្ចាស់បានដឹកនាំផ្លូវរបស់ពួកគេ ។

សូមពិចារណាផ្ដល់ពេលឲ្យសិស្សគិតអំពីសំណួរខាងសាសនា ឬផ្ទាល់ខ្លួនដែលពួកគេមាន ។ សូមឲ្យពួកគេពិចារណាពីអ្វីដែលពួកគេអាចធ្វើបានដើម្បីរកឃើញចម្លើយ ឬការធានាអះអាងអំពីសំណួរទាំងនេះ ដើម្បីទុកចិត្តលើព្រះអម្ចាស់ និងពឹងផ្អែកលើទ្រង់ ។ ពួកគេអាចថែមទាំងកត់ត្រាគំនិតយោបល់របស់ពួកគេទុកក្នុងសៀវភៅកំណត់ហេតុមួយ ឬអធិស្ឋានសូមជំនួយពីព្រះអម្ចាស់ឲ្យដឹងពីរបៀបដើម្បីធ្វើសកម្មភាពដោយសេចក្ដីជំនឿទៀតផង ។

ព្រះអម្ចាស់បានបើកបង្ហាញពីមូលហេតុមួយចំនួនក្នុងការអនុវត្តនៃអាពាហ៍ពិពាហ៍ពហុពន្ធភាព ។

សូមពន្យល់ថា យើងមិនយល់ពីគោលបំណងរបស់ព្រះទាំងអស់ស្ដីពីការនាំមក អាពាហ៍ពិពាហ៍ពហុពន្ធភាពនៅក្នុងគ្រាកាន់កាប់ត្រួតត្រានេះនោះទេ ប៉ុន្ដែទ្រង់បានប្រទានដល់យើងនូវមូលហេតុរបស់ទ្រង់មួយចំនួន ។ ឧទាហរណ៍ ព្រះអម្ចាស់បានបង្រៀនព្យាការី យ៉ូសែប ស៊្មីធថា ការអនុវត្តនោះគឺជាផ្នែកនៃការស្ដារឡើងវិញនៃ « ការណ៍គ្រប់យ៉ាង » មកពីគ្រាកាន់កាប់ត្រួតត្រាមុនៗ ( សូមមើល គោលលទ្ធិ និង សេចក្ដីសញ្ញា ១៣២:៤០, ៤៥ ) ។

សូមអញ្ជើញសិស្សម្នាក់ឲ្យអាន យ៉ាកុប ២:៣០ ឲ្យឮៗ ហើយសូមឲ្យសិស្សក្នុងថ្នាក់រកមើលមូលហេតុមួយទៀត ដែលព្រះអម្ចាស់បានប្រទានមកសម្រាប់ការបញ្ជាឲ្យរាស្ដ្ររបស់ទ្រង់អនុវត្តអាពាហ៍ពិពាហ៍ពហុពន្ធភាព ។ សូមឲ្យសិស្សរៀបរាប់ពីអ្វីដែលពួកគេរកឃើញ ។ ( សិស្សគួរតែបញ្ចូលនៅក្នុងចម្លើយរបស់ពួកគេថា ការត្រាស់បញ្ជានេះត្រូវបានប្រទានទុកជាវិធីមួយដើម្បីបង្កើនចំនួនកូនចៅ ដែលកើតមកនៅក្នុងសេចក្ដីសញ្ញានៃដំណឹងល្អ ។ តាមវិធីនេះ រាស្ដ្ររបស់ព្រះអម្ចាស់ « បង្កើនពូជ » ដល់ទ្រង់ ) ។

សូមបង្ហាញថា កិច្ចខំប្រឹងរបស់ពួកបរិសុទ្ធពីដើមក្នុងការគោរពតាមបទបញ្ញត្តិនេះ « ផ្ដល់ជាលទ្ធផលឲ្យមានចំនួនកំណើតកូនចៅច្រើននៅក្នុងគេហដ្ឋានរបស់ពួកបរិសុទ្ធថ្ងៃចុងក្រោយដ៏ស្មោះត្រង់ » ( « Plural Marriage and Families in Early Utah » Gospel Topics នៅលើគេហទំព័រ topics.ChurchofJesusChrist.org ) ។

ក្រោយមក ព្រះអម្ចាស់បានបើកបង្ហាញថា ពួកបរិសុទ្ធថ្ងៃចុងក្រោយគួរតែបញ្ឈប់ការអនុវត្តអាពាហ៍ពិពាហ៍ពហុពន្ធភាព ។

សូមឲ្យសិស្សម្នាក់ដែលបានសិក្សាក្នុងឯកសាររៀបចំ ( ផ្នែកទី ២ ) ឲ្យតំណាលពីអ្វីដែលបានដឹកនាំទៅរកទីបញ្ចប់នៃអាពាហ៍ពិពាហ៍ពហុពន្ធភាពនៅក្នុងសាសនាចក្រដែលបានស្ដារឡើងវិញនេះ ។

តើបងប្អូននឹងពន្យល់ពីគោលជំហររបស់សាសនាចក្រនាពេលនេះទាក់ទងនឹងអាពាហ៍ពិពាហ៍ពហុពន្ធភាពដល់នរណាម្នាក់យ៉ាងដូចម្ដេច ?

សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗមកពីកថាខណ្ឌទីមួយ និងទីប្រាំពីរនៃ « សេចក្ដីសម្រង់មកពីសុន្ទរកថាបីដោយប្រធាន វិលហ្វួឌ វូឌដ្រុព្វ ទាក់ទងនឹងការបើកបង្ហាញ » ដែលមានបន្ទាប់ពី សេចក្ដីប្រកាសជាផ្លូវការ ១ ។

តើប្រធាន វិលហ្វូឌ វូឌដ្រុព្វបានបង្រៀនដល់ពួកបរិសុទ្ធអ្វីខ្លះ ? ( សិស្សគួរតែរកឃើញសេចក្ដីពិតមួយដែលស្រដៀងគ្នាដូចតទៅនេះ ៖ ព្រះអម្ចាស់នឹងមិនដែលអនុញ្ញាតឲ្យប្រធានសាសនាចក្រដឹកនាំសាសនាចក្រឲ្យវង្វេងនោះទេ ) ។
តើសេចក្ដីពិតនេះអាចប៉ះពាល់ដល់របៀបដែលយើងឆ្លើយតបផ្ទាល់ទៅនឹងការប្រឹក្សា និងការបង្រៀនរបស់ពួកព្យាការីនៅរស់នៃព្រះអម្ចាស់ដោយរបៀបណា ?

សូមបញ្ចប់ដោយការចែកចាយទីបន្ទាល់របស់បងប្អូនថា ព្យាការី យ៉ូសែប ស៊្មីធ និងថ្នាក់ដឹកនាំសាសនាចក្រពីដើមផ្សេងទៀតគឺជាព្យាការីដ៏ពិតរបស់ព្រះ ដែលបានធ្វើតាមដោយការគោរពប្រតិបត្តិ និងបានបង្រៀនពីបទបញ្ញត្តិរបស់ព្រះអម្ចាស់ដល់ពួកបរិសុទ្ធថ្ងៃចុងក្រោយ ។

សម្រាប់ពេលក្រោយ

សូមពន្យល់សិស្សថា នៅពេលពួកគេសិក្សាសម្រាប់មេរៀនក្រោយ ពួកគេនឹងមានឱកាសរៀនបន្ថែមទៀតអំពីសេចក្ដីលម្អិតជុំវិញការស្លាប់របស់យ៉ូសែប និង ហៃរុម ស៊្មីធ ។ សូមលើកទឹកចិត្តសិស្សឲ្យមកថ្នាក់រៀនដោយបានរៀបចំខ្លួនដើម្បីពិភាក្សាពីគំនិតរបស់ពួកគេ ស្ដីពីអ្វីដែលយ៉ូសែប ស៊្មីធបានសម្រេចបានក្នុងនាមជាព្យាការីរបស់ព្រះ ។