« សៀវភៅសិក្សាសម្រាប់គ្រូបង្រៀន មេរៀនទី ៦ ៖ ព្រះគម្ពីរមរមន—ជាមូលដ្ឋាននៃសាសនារបស់យើង » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )
« សៀវភៅសិក្សាសម្រាប់គ្រូបង្រៀន មេរៀនទី ៦ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ
សៀវភៅសិក្សាសម្រាប់គ្រូបង្រៀន មេរៀនទី ៦
ព្រះគម្ពីរមរមន—ជាមូលដ្ឋាននៃសាសនារបស់យើង
ព្យាការី យ៉ូសែប ស៊្មីធ បានប្រកាសថា « ព្រះគម្ពីរមរមនគឺជាមូលដ្ឋាននៃសាសនារបស់យើង » ( បុព្វកថានៃព្រះគម្ពីរមរមន ) ។ មេរៀននេះរៀបចំឡើងដើម្បីជួយសិស្សឲ្យពន្យល់ពីមូលហេតុ ដែលព្រះគម្ពីរមរមនគឺជាមូលដ្ឋាននៃសាសនារបស់យើង ហើយពង្រឹងសមត្ថភាពរបស់ពួកគេដើម្បីឆ្លើយតបនឹងមតិរិះគន់ទាស់នឹងព្រះគម្ពីរ ។
យោបល់សម្រាប់ការបង្រៀន
អភិវឌ្ឍការបង្រៀន និងការរៀនសូត្ររបស់យើង
ផ្ដោតលើការជួយដល់សិស្ស ។ កាលបងប្អូនបង្រៀន សូមចាំដើម្បីផ្ដោតលើតម្រូវការរបស់សិស្សម្នាក់ៗ ។ សូមប្រុងប្រយ័ត្ន កុំឲ្យចំណុចមេរៀនសំខាន់ជាងសិស្សនៅក្នុងថ្នាក់រៀនឲ្យសោះ ។ សូមបន្ដឲ្យសិស្សចូលរួម ហើយអនុញ្ញាតឲ្យមានភាពបត់បែនល្មមក្នុងការពិភាក្សាដើម្បីបំពេញតាមតម្រូវការរបស់ពួកគេ ។
ព្រះគម្ពីរមរមនគឺជាការណ៍ដ៏ចាំបាច់ចំពោះសាសនាចក្ររបស់ព្រះ និងចំពោះទីបន្ទាល់របស់យើង ។
បងប្អូនអាចចាប់ផ្ដើមបង្រៀនដោយការលើកព្រះគម្ពីរមរមនមួយក្បាលឡើង ហើយធ្វើការពិភាក្សាគ្នាខ្លីមួយអំពីសេចក្ដីថ្លែការណ៍ និងសំណួរដូចខាងក្រោមនេះ ៖
ការវាយប្រហារជាច្រើនដែលមកពីមតិរិះគន់ចំពោះសាសនាចក្រសំដៅលើព្រះគម្ពីរមរមន ។ ហេតុអ្វីបងប្អូនគិតថាដូច្នេះ ?
សូមឲ្យសិស្សបើក ឬរកមើលទំព័របុព្វកថានៃព្រះគម្ពីរមរមន ។ សូមពន្យល់ថា នៅថ្ងៃ អាទិត្យ ទី ២៨ ខែ វិច្ឆិកា ឆ្នាំ ១៨៤១ ព្យាការី យ៉ូសែប ស៊្មីធបានចំណាយពេលមួយថ្ងៃនៅក្នុងក្រុមប្រឹក្សាជាមួយពួកសាវកដប់ពីរនាក់នៅផ្ទះរបស់ប្រធាន ព្រិកហាំ យ៉ង់ ដែលបានបម្រើជាប្រធានកូរ៉ុមនៅពេលនោះ ( សូមមើល ប្រវត្តិ ១៨៣៨–១៨៥៦ [ Manuscript History of the Church ] វ៉ុល C-1 ទំព័រ ១២៥៥ នៅលើគេហទំព័រ josephsmithpapers.org ) ។ សូមអញ្ជើញសិស្សម្នាក់ឲ្យអានកថាខណ្ឌទីប្រាំមួយក្នុង បុព្វកថានៃព្រះគម្ពីរមរមន ឮៗដើម្បីរកមើលអ្វីដែលយ៉ូសែបបានប្រាប់ទៅពួកសាវក ។ សូមឲ្យសិស្សពិចារណាគូសចំណាំសេចក្ដីពិត ដែលយ៉ូសែបបានបង្រៀន ។
-
តើមាននរណាម្នាក់ស្ម័គ្រចិត្តចែកចាយគំនិត ឬទីបន្ទាល់របស់ពួកគេអំពីការបង្រៀនទាំងនេះណាមួយទេ ? ( កំណត់ចំណាំ ៖ កាលសិស្សឆ្លើយតប សូមពិចារណាប្រើយោបល់សម្រាប់ការបង្រៀនដូចតទៅនេះ ដើម្បីជួយពួកគេឲ្យយល់ពីសេចក្ដីពិត ដែលយ៉ូសែបបានបង្រៀនពួកដប់ពីរនាក់ ) ។
ព្រះគម្ពីរមរមនគឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ។
បើចាំបាច់ សូមជួយសិស្សឲ្យយល់ពីឃ្លា « ព្រះគម្ពីរមរមនគឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ » ដោយប្រើព័ត៌មានដែលមានក្នុង ផ្នែកទី ២ នៃសៀវភៅសិក្សាការរៀបចំ ។
បងប្អូនក៏អាចពន្យល់ដល់សិស្សដែរថា សេចក្ដីថ្លែងការណ៍របស់ យ៉ូសែប ស៊្មីធពុំមែនមានន័យថា កំណែបោះពុម្ពព្រះគម្ពីរមរមនមិនមានកំហុសនោះទេ ។ ការកែកំហុសបានធ្វើឡើងមុនការបោះពុម្ពព្រះគម្ពីរមរមននីមួយៗតាំងពីឆ្នាំ ១៨២៩ មក ។ ការកែកំហុសជួយផ្លាស់ប្ដូរកំហុសតូចៗលើពាក្យ ឬការប្រកប អព្ភន្តរសញ្ញា ឬការប្រើអក្សរធំតូច ។ ការប្រើពាក្យត្រឹមត្រូវនៅក្នុងសេចក្ដីថ្លែងការណ៍នេះសំដៅលើសេចក្ដីពិតដ៏មានអនុភាព ដែលមាននៅក្នុងព្រះគម្ពីរមរមន ប៉ុន្ដែមិនមែនមានន័យថា អត្ថបទបោះពុម្ពគ្មានកំហុសនោះទេ ។
ព្រះគម្ពីរមរមនគឺជាមូលដ្ឋាននៃសាសនារបស់យើង ។
កាលសិស្សលើកឡើងថាព្រះគម្ពីរមរមនគឺជា « មូលដ្ឋាននៃសាសនារបស់យើង » បងប្អូនអាចបង្ហាញរូបភាពសិលាគន្លឹះ ដូចជារូបភាពមួយនៅក្នុងសៀវភៅសិក្សាការរៀបចំ ។ សូមឲ្យសិស្សពន្យល់ពីមូលហេតុដែលពួកគេគិតថា សិលាគន្លឹះគឺជាការប្រៀបធៀបដ៏ល្អមួយសម្រាប់ព្រះគម្ពីរមរមន ។
សូមឲ្យសិស្សម្នាក់អាន ឬសង្ខេបសេចក្ដីថ្លែងការណ៍ដោយប្រធាន អ៊ែសរ៉ា ថាហ្វ ប៊ែនសឹន នៅក្នុងផ្នែកទី ៣ នៃសៀវភៅសិក្សាការរៀបចំ ។ ( សេចក្ដីថ្លែងការណ៍នេះពន្យល់ពីរបៀបបីយ៉ាង ដែលព្រះគម្ពីរមរមនគឺជាមូលដ្ឋាននៃសាសនារបស់យើង ) ។ សូមពិចារណាសួរសំណួរខាងក្រោមនេះខ្លះ ឬទាំងអស់ដើម្បីជួយសិស្សឲ្យយល់កាន់តែស៉ីជម្រៅពីការបង្រៀនរបស់ប្រធាន ប៊ែនសឹន អំពីការដែលព្រះគម្ពីរមរមនគឺជាមូលដ្ឋានមួយ ។
-
តើព្រះគម្ពីរមរមនបានពង្រឹងទីបន្ទាល់របស់បងប្អូនអំពីព្រះអង្គសង្គ្រោះយេស៊ូវគ្រីស្ទដោយរបៀបណា ?
-
តើសាសនាចក្រឈរឡើង ឬធ្លាក់ចុះអាស្រ័យលើភាពពេញលេញនៃព្រះគម្ពីរមរមនតាមរបៀបណា ?
-
តើទីបន្ទាល់របស់បងប្អូនអំពីព្រះគម្ពីរមរមន បានមានឥទ្ធិពលលើទីបន្ទាល់របស់បងប្អូនអំពីគោលលទ្ធិ និង ការបង្រៀនទាំងឡាយក្នុងសាសនាចក្រយ៉ាងដូចម្ដេច ?
-
តើព្រះគម្ពីរមរមនក្លាយជាមូលដ្ឋាននៃទីបន្ទាល់ផ្ទាល់ខ្លួនរបស់យើងដែរឬទេ ? បើមែន តើតាមរបៀបណា ?
យើងអាចខិតទៅកាន់តែជិតព្រះ តាមរយៈការធ្វើតាមការបង្រៀនក្នុងព្រះគម្ពីរមរមន ។
សូមបំបែកសិស្សទៅជាក្រុមតូចៗ ហើយសូមឲ្យពួកគេចែកចាយ និងពន្យល់ពីវគ្គនៅក្នុងព្រះគម្ពីរមរមន ដែលបានជួយពួកគេឲ្យខិតទៅជិតព្រះ ។ ( សិស្សដែលបានសិក្សាក្នុងសៀវភៅសិក្សាការរៀបចំអាចសំដៅលើអ្វី ដែលពួកគេបានសរសេរនៅចុងបញ្ចប់នៃផ្នែកទី ៤ ) ។ បងប្អូនក៏អាចអញ្ជើញសិស្សឲ្យពិភាក្សាក្នុងក្រុមរបស់គេ អំពីរបៀបដែលការរស់នៅតាមការបង្រៀនដូចបានកត់ត្រានៅក្នុងវគ្គ ដែលពួកគេបានជ្រើសរើសនេះ ជួយពួកគេឲ្យក្លាយកាន់តែដូចជាព្រះយេស៊ូវគ្រីស្ទ ។
ពួកសត្រូវរបស់សាសនាចក្រប៉ុនប៉ងបង្ខូចព្រះគម្ពីរមរមន ។
សូមបង្ហាញនូវសេចក្ដីថ្លែងការណ៍ខាងក្រោមដោយបងប្រុស ថាត អរ ខាលីស្ទើរ ដែលជាប្រធានសាលាថ្ងៃអាទិត្យទូទៅ ហើយសូមឲ្យសិស្សម្នាក់អានវាឮៗ ៖
[ ព្រះគម្ពីរមរមន ] គឺជាផ្នែកមួយដ៏ធ្ងន់នៅលើជញ្ជីងនៃសេចក្តីពិតដែលធ្ងន់លើសពីទម្ងន់រួមគ្នានៃការជជែកវែកញែករបស់អ្នករិះគន់ទាំងអស់ ។ ហេតុអ្វី ? ដោយសារប្រសិនបើព្រះគម្ពីរនេះពិត នោះយ៉ូសែប ស្ម៉ីធគឺជាព្យាការី ហើយនេះគឺជាសាសនាចក្រព្រះយេស៊ូវគ្រីស្ទដែលបានស្តារឡើងវិញ ដោយមិនគិតអំពីប្រវត្តិ ឬការជជែកវែកញែកផ្សេងទៀតដែលផ្ទុយនឹងការពិតទាំងនោះឡើយ ។ ដោយសារហេតុផលនេះ អ្នករិះគន់មានបំណងបង្ហាញថា ព្រះគម្ពីរមរមនខុសឆ្គង ប៉ុន្តែឧបសគ្គដែលពួកគេមាននោះគឺធំពេកដែលពុំអាចយកឈ្នះបានឡើយ ដោយសារនេះជាព្រះគម្ពីរពិត ។( « សាក្សីដ៏មានឥទ្ធិពលរបស់ព្រះ ៖ ព្រះគម្ពីរមរមន » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ១០៧ )
សូមជួយសិស្សឲ្យរកមើលធនធានអេឡិចត្រូនិចទុកចិត្តបានដូចខាងក្រោមនេះ ឬផ្ដល់ច្បាប់ចម្លងក្រដាសខ្លះដល់ពួកគេ បើចាំបាច់ ។ សូមបែងចែកធនធាននេះដល់សិស្ស ហើយសូមឲ្យពួកគេគិត ហើយរកមើលអំណះអំណាងខ្លះ ដែលមតិរិះគន់លើកឡើងប្រឆាំងនឹងព្រះគម្ពីរមរមន ហើយពិចារណាពីរបៀបដែលយើងអាចប្រើធនធានខាងក្រោមនេះដើម្បីឆ្លើយតបនឹងមតិរិះគន់បែបនេះ កាលយើងព្យាយាមទទួលបានចំណេះដឹងខាងវិញ្ញាណ និងបង្កើនទីបន្ទាល់ ។ សូមឲ្យសិស្សរាយការណ៍ពីអ្វីមួយចំនួនដែលពួកគេរកឃើញ ។ ពួកគេអាចធ្វើការណ៍នេះក្នុងក្រុមតូចៗ ឬជាថ្នាក់ ។
-
មរមន ៨:១៤–២២ ។ មរ៉ូណៃបញ្ចប់កំណត់ត្រាមរមនរបស់ឪពុកលោកដោយការព្រមានដល់អស់អ្នកដែលរិះគន់ព្រះគម្ពីរមរមននៅថ្ងៃចុងក្រោយ ។
-
អេធើរ ១២:២៣–២៩ ។ មរ៉ូណៃខ្វល់ខ្វាយថា មនុស្សមួយចំនួនអាចរិះគន់ភាពទន់ខ្សោយក្នុងការសរសេររបស់លោក ហើយខកខានពីសារលិខិតដ៏មានអនុភាពនៃព្រះគម្ពីរមរមន ។
-
ថាត អរ ខាលីស្ទើរ « សាក្សីដ៏មានឥទ្ធិពលរបស់ព្រះ ៖ ព្រះគម្ពីរមរមន » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ១០៧–៩ ) ( បងប្អូនអាចប្រើតែសុន្ទរកថាពាក់កណ្ដាលដំបូងរបស់បងប្រុស ខាលីស្ទើរ ) ។ ឬ សិស្សអាចមើលវីដេអូ « Compelling Witness » ( ៧:៤៦ ) ។
-
« Critics of the Book of Mormon » Church History Topics នៅលើគេហទំព័រ history.ChurchofJesusChrist.org ។
-
« ព្រះគម្ពីរមរមន និង ការសិក្សា ឌី អិន អេ » ប្រធានបទដំណឹងល្អ topics.ChurchofJesusChrist.org ។ ( បងប្អូនអាចប្រើតែ « The Ancestors of the American Indians » និងផ្នែក « Conclusion » ) ។
-
ជែហ្វ្រី អ័រ ហូឡិន « Safety for the Soul » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ៨៨–៩០ ។ ( បងប្អូនអាចសិក្សាតែសុន្ទរកថាពាក់កណ្ដាលចុងក្រោយរបស់អែលឌើរហូឡិន ) ។
បន្ទាប់ពីសិស្សពិភាក្សាអ្វីដែលពួកគេបានរកឃើញហើយ សូមសួរសំណួរដូចខាងក្រោមមួយ ឬច្រើន ៖
-
ហេតុអ្វីបងប្អូនគិតថា ព្រះមិនផ្ដល់ភស្ដុតាងពេញលេញថា ព្រះគម្ពីរមរមនគឺពិត ?
-
តើបងប្អូននឹងផ្ដល់ការប្រឹក្សាអ្វីដល់មិត្ត ឬសមាជិកគ្រួសារ ដែលប្រាប់បងប្អូនថា គាត់កំពុងស្មុគស្មាញនឹងមតិរិះគន់លើព្រះគម្ពីរមរមន ? តើបងប្អូនអាចធ្វើអ្វីផ្សេងទៀតដើម្បីជួយ ?
-
តើបងប្អូនធ្វើអ្វីខ្លះ ( ឬ តើបងប្អូនអាចធ្វើអ្វីខ្លះ ) ប្រសិនបើមើលទៅពុំមានចម្លើយល្អមួយចំពោះមតិរិះគន់ដែលបងប្អូនឮនោះ ?
សូមផ្ដល់ពេលពីរបីនាទីឲ្យសិស្សគិតពីប្រសិទ្ធភាពនៃការសិក្សាព្រះគម្ពីរមរមនផ្ទាល់ខ្លួនរបស់ពួកគេ ហើយដាក់ផែនការធ្វើការផ្លាស់ប្ដូរដូចបានបំផុសគំនិតដោយព្រះវិញ្ញាណ ។ សូមលើកទឹកចិត្តសិស្សឲ្យដាក់បញ្ចូលក្នុងគម្រោងរបស់ពួកគេនូវគោលដៅមួយដើម្បីសិក្សា និងអធិស្ឋានបើចាំបាច់ ដើម្បីប្រាកដថា ព្រះគម្ពីរមរមនគឺជាមូលដ្ឋាននៃទីបន្ទាល់របស់ពួកគេ ។ កាលពួកគេសញ្ជឹងគិត បងប្អូនអាចបង្ហាញសេចក្ដីថ្លែងការណ៍ដូចតទៅនេះដោយអែលឌើរ ខេវីន ដបុលយូ ភើសុន នៃក្រុមចិតសិបនាក់ ៖
បើអ្នកកំពុងមានបញ្ហា ភាន់ច្រឡំ ឬវង្វេងខាងវិញ្ញាណ ខ្ញុំសូមជំរុញអ្នកឲ្យធ្វើកិច្ចការមួយ ដែលខ្ញុំដឹងថានឹងនាំអ្នកឲ្យត្រឡប់មកលើផ្លូវត្រឹមត្រូវវិញ ។ ចូរចាប់ផ្ដើមម្ដងទៀតដើម្បីសិក្សាព្រះគម្ពីរមរមនដោយការអធិស្ឋាន ហើយរស់នៅតាមការបង្រៀនជារៀងរាល់ថ្ងៃ រាល់ថ្ងៃ រាល់ថ្ងៃ ! ខ្ញុំសូមថ្លែងទីបន្ទាល់អំពីអំណាចដ៏អស្ចារ្យនៅក្នុងព្រះគម្ពីរមរមនថា វានឹងផ្លាស់ប្តូរជីវិតអ្នក ហើយពង្រឹងបំណងប្រាថ្នារបស់អ្នកដើម្បីធ្វើតាមព្រះគ្រីស្ទ ។ ព្រះវិញ្ញាណបរិសុទ្ធនឹងផ្លាស់ប្ដូរដួងចិត្តរបស់អ្នក ហើយជួយអ្នកឲ្យមើលឃើញ « ការណ៍ដែលពួកគេពិតជាមាន » [ យ៉ាកុប ៤:១៣ ] ។ ទ្រង់នឹងបង្ហាញនូវអ្វីដែលអ្នកចាំបាច់ត្រូវធ្វើបន្ទាប់ ។ ( ខេវីន ដបុលយូ ភៀរសិន « Stay by the Tree » Ensign ឬ Liahona ខែវិច្ឆិកា ឆ្នាំ២០១៥ ទំព័រ ១១៦ )
សូមអញ្ជើញសិស្សពីរបីនាក់ ដែលចង់ចែកចាយទីបន្ទាល់ខ្លីមួយអំពីព្រះគម្ពីរមរមនឲ្យឡើងចែកចាយ ។ បងប្អូនក៏គួរចែកចាយទីបន្ទាល់របស់ខ្លួនផងដែរ ។
សម្រាប់ពេលក្រោយ
សូមឲ្យសិស្សពិចារណាពីភាពញឹកញាប់នៃការដែលពួកគេដកបទពិសោធន៍នៃពរជ័យនៃសិទ្ធិអំណាចបព្វជិតភាព និងកូនសោបព្វជិតភាពរាល់សប្ដាហ៍ ។ សូមលើកទឹកចិត្តពួកគេឲ្យសិក្សាសៀវភៅសិក្សាការរៀបចំសម្រាប់ថ្នាក់រៀនលើកក្រោយស្ដីពីការស្ដារបព្វជិតភាពឡើងវិញ ហើយរកមើលរបៀបដែលបព្វជិតភាពអាចផ្ដល់ឲ្យពួកគេនូវអំណាចដ៏សង្គ្រោះរបស់ព្រះយេស៊ូវគ្រីស្ទ ។