ឯកសារគ្រូបង្រៀន មេរៀនទី ១៨ ៖ ស្ត្រីបរិសុទ្ធថ្ងៃចុងក្រោយ និង សមាគមសង្គ្រោះ

« ឯកសារគ្រូបង្រៀន មេរៀនទី ១៨ ៖ ស្ត្រីបរិសុទ្ធថ្ងៃចុងក្រោយ និង សមាគមសង្គ្រោះ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀន មេរៀនទី ១៨ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀន មេរៀនទី ១៨

ស្ត្រីបរិសុទ្ធថ្ងៃចុងក្រោយ និង សមាគមសង្គ្រោះ

សមាគមសង្គ្រោះគឺជាអង្គការដ៏ចំណាស់ជាងគេបំផុតមួយ ដែលមានសមាជិកជាង ៧.១ លាននាក់ ហើយជាអង្គការស្ដ្រីដ៏ធំបំផុតនៅក្នុងពិភពលោកនេះ ។ សមាគមសង្គ្រោះគឺជាផ្នែកមួយដ៏សំខាន់នៃសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញ ។ មេរៀននេះនឹងជួយសិស្សឲ្យអាចចែកចាយថា តើសមត្ថភាពដ៏វិសេស និងការរួមចំណែកដ៏សំខាន់របស់ស្ដ្រីបរិសុទ្ធថ្ងៃចុងក្រោយសំខាន់ចាំបាច់ប៉ុណ្ណាចំពោះកិច្ចការរបស់ព្រះអម្ចាស់ ។ សិស្សក៏នឹងសម្រេចពីរបៀបដែលពួកគេអាចចូលរួមកាន់តែពេញលេញថែមទៀត ឬគាំទ្រសមាគមសង្គ្រោះឲ្យសម្រេចបានគោលបំណងរបស់វាបានផងដែរ ។

យោបល់សម្រាប់ការបង្រៀន

ស្ត្រីដែលរក្សាសេចក្ដីសញ្ញាធ្វើការរួមចំណែកដ៏វិសេស និងសំខាន់មួយក្នុងការកសាងនគររបស់ព្រះ ។

សូមបង្ហាញរូបភាព ឬពិពណ៌នាអំពីស្ដ្រីដ៏សុចរិតម្នាក់នៅក្នុងជីវិតរបស់បងប្អូន ។ សូមចែកចាយដោយសង្ខេបជាមួយនឹងសិស្សក្នុងថ្នាក់នូវអ្វីដែលធ្វើឲ្យស្ដ្រីម្នាក់ក្លាយជាស្ដ្រីគំរូ ហើយតើនាងបានរួមចំណែកក្នុងការកសាងនគររបស់ព្រះតាមរបៀបណា ។

សូមឲ្យសិស្សចែកចាយគំនិតរបស់ពួកគេអំពីស្ដ្រីសុចរិតម្នាក់ ដែលពួកគេស្គាល់ និងឥទ្ធិពលដែលស្ដ្រីនោះមានសម្រាប់សេចក្ដីល្អក្នុងការកសាងនគររបស់ព្រះ ។ ( កិច្ចការនេះគឺជាកិច្ចការដែលសិស្សត្រូវបានអញ្ជើញឲ្យសញ្ជឹងគិតនៅក្នុងឯកសាររៀបចំ ) ។

សូមបង្ហាញសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ។ សូមអញ្ជើញសិស្សម្នាក់ឲ្យអានវាឮៗ ហើយអញ្ជើញសិស្សក្នុងថ្នាក់ឲ្យផ្ទៀងតាម ហើយរកមើលសេចក្ដីបង្រៀនរបស់ប្រធានណិលសុនស្តីអំពីស្ដ្រីសុចរិតក្នុងសាសនាចក្រ ។

បងប្អូនស្រីជាទីស្រឡាញ់របស់ខ្ញុំអើយ បងប្អូន… គឺជាចំណែកដ៏សំខាន់របស់យើងអំឡុងពេលដ៏វិលវល់នេះ ។ … គុណធម៌ ពន្លឺ ក្ដីស្រឡាញ់ ចំណេះដឹង ភាពក្លាហាន អត្តចរិត សេចក្ដីជំនឿ និងជីវិតដ៏សុចរិតរបស់បងប្អូន នឹងនាំស្ត្រីល្អៗនៃពិភពលោកមកកាន់សាសនាចក្រក្នុងចំនួនដ៏នឹកស្មានមិនដល់មួយ ដោយដើរជាមួយនឹងក្រុមគ្រួសារបងប្អូន !

យើងជាបងប្អូនប្រុសរបស់បងប្អូន ត្រូវការកម្លាំង ជំនឿស៊ប់ ការផ្លាស់ប្រែចិត្តជឿ លទ្ធភាពដឹកនាំ ប្រាជ្ញា និងសំឡេងរបស់បងប្អូន ។ នគរព្រះគឺពុំមាន និងពុំអាចមានពេញលេញដោយគ្មានស្ត្រី ដែលធ្វើសេចក្ដីសញ្ញាពិសិដ្ឋ រួចហើយរក្សាសេចក្ដីសញ្ញា ជាស្ត្រីដែលអាចនិយាយដោយអានុភាព និងសិទ្ធិអំណាចនៃព្រះបានទេ ! ( រ័សុល អិម ណិលសុន « ការអង្វរដល់បងប្អូនស្ត្រីរបស់ខ្ញុំ » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៩៦ )

តើបងប្អូនចាប់អារម្មណ៍អ្វីខ្លះពីក្នុងសេចក្ដីថ្លែងការណ៍នេះ ?
តើបងប្អូននឹងសង្ខេបសេចក្ដីពិតមួយ ដែលយើងអាចរៀនមកពីការបង្រៀនរបស់ប្រធានណិលសុន អំពីស្ដ្រីដែលរក្សាសេចក្ដីសញ្ញាក្នុងសាសនាចក្រនេះយ៉ាងដូចម្ដេច ? ( ដោយប្រើពាក្យរបស់សិស្ស សូមសរសេរនៅលើក្ដារខៀន ឬបង្ហាញសេចក្ដីពិតមួយស្រដៀងគ្នាដូចតទៅនេះ ៖ ឥរិយាបថ ភាពដឹកនាំ និងសំឡេងរបស់ស្ដ្រីដែលរក្សាសេចក្ដីសញ្ញាមានសារសំខាន់ណាស់ក្នុងការកសាងនគររបស់ព្រះ ) ។
ហេតុអ្វីបងប្អូនគិតថា នគររបស់ព្រះ « គឺពុំមាន និងពុំអាចមានពេញលេញ » ដោយគ្មានសំឡេង និងការរួមចំណែកពីស្ត្រីដែលរក្សាសេចក្ដីសញ្ញា ?

សូមពន្យល់ថា ដូចបានកត់ត្រានៅក្នុង គោលលទ្ធិ និង សេចក្ដីសញ្ញា ២៥ ព្រះអម្ចាស់បានហៅ អិមម៉ា ស្ម៊ីធ ឲ្យប្រើសំឡេងរបស់នាង ទេពកោសល្យ និងសមត្ថភាពរបស់នាងដើម្បីជួយកសាងនគររបស់ទ្រង់ ។ សូមឲ្យសិស្សរំឭក គោលលទ្ធិ និង សេចក្ដីសញ្ញា ២៥:៥–៧, ១០–១៦ ដែលពួកគេបានសិក្សានៅក្នុងផ្នែកទី ១ នៃឯកសាររៀបចំ ហើយសូមឲ្យពួកគេរកមើលការប្រឹក្សា និងការទទួលខុសត្រូវនានាដែលព្រះអម្ចាស់បានប្រទានដល់អិមម៉ា ។

សូមសិស្សឲ្យចែកចាយអ្វីដែលពួកគេចាប់អារម្មណ៍ពីខគម្ពីរទាំងនេះ និងប្រាប់ពីមូលហេតុផង ។ សូមឲ្យសិស្សមានពេលមួយនាទីគិតអំពីចំណុចណាមួយក្នុងយោបល់ប្រឹក្សា ដែលព្រះអម្ចាស់សព្វព្រះទ័យឲ្យពួកគេទទួលយក និងរស់នៅឲ្យកាន់តែពេញលេញ ។

ព្រះអម្ចាស់បានរៀបចំសមាគមសង្គ្រោះតាមរយៈព្យាការី យ៉ូសែប ស្ម៊ីធ ។

សូមបង្ហាញរូបភាពហាងឥដ្ឋក្រហមរបស់ យ៉ូសែប ស៊្មីធនៅទីក្រុងណៅវូ រដ្ឋអិលលីណយ ហើយសូមពន្យល់ថា វានៅត្រង់នេះឯងដែលសមាគមសង្គ្រោះត្រូវបានបង្កើតឡើងនៅខែ មីនា ឆ្នាំ ១៨៤២ ។

សូមឲ្យសិស្សនឹកចាំពីស្ថានភាពដែលបានដឹកនាំទៅរកការបង្កើតសមាគមសង្គ្រោះក្នុងផ្នែកទី ២ នៃឯកសាររៀបចំ ( ឬសូមឲ្យសិស្សម្នាក់រៀបចំធ្វើដូច្នោះមុនពេលចាប់ផ្ដើមបង្រៀន ) ។

តើយ៉ូសែប ស៊្មីធ បាននិយាយថាសមាគមសង្គ្រោះនេះត្រូវបានបង្កើតតាមគន្លងអ្វីដែរ ? ( សមាគមសង្រ្គោះត្រូវបានបង្កើតឡើងតាមគន្លងនៃបព្វជិតភាព ) ។
តើវាមានន័យយ៉ាងណា ដែលសមាគមសង្រ្គោះត្រូវបានបង្កើតឡើងតាមគន្លងនៃបព្វជិតភាព ? ហេតុអ្វីការណ៍នេះសំខាន់ដើម្បីឲ្យយើងដឹងពីរឿងនេះ ? ( បើចាំបាច់ សូមឲ្យសិស្សរំឭកនូវអ្វីដែលពួកគេបានរៀននៅក្នុងផ្នែកទី ២ នៃឯកសាររៀបចំ ) ។
តើបងប្អូននឹងសង្ខេបគោលបំណងនៃសមាគមសង្គ្រោះដោយរបៀបណា ? ( បងប្អូនអាចអញ្ជើញសិស្សឲ្យរំឭកសេចក្ដីថ្លែងការណ៍ដោយស៊ិស្ទើរ ស៊ីណា ឌី អេច យ៉ង់ និង ស៊ិស្ទើរ ជូលី ប៊ី ប៊េក នៅក្នុងផ្នែកទី ៣ នៃឯកសាររៀបចំដើម្បីជួយពួកគេឲ្យស្គាល់សេចក្ដីពិតមួយស្រដៀងនឹងអ្វីដូចតទៅនេះ ៖ សមាគមសង្គ្រោះត្រូវបានបង្កើតឡើងដើម្បីផ្ដល់ការសម្រាលបន្ទុកដល់អ្នកទ័លក្រ និងដើម្បីជួយសង្គ្រោះព្រលឹង ) ។
តើបងប្អូនបានឃើញស្ដ្រីក្នុងសមាគមសង្គ្រោះជួយបំពេញតាមគោលបំណងទាំងនេះតាមរបៀបណាខ្លះ ? ( បងប្អូនក៏អាចចែកចាយអំពីគំរូ ឬបទពិសោធន៍ដ៏មានអត្ថន័យមួយផ្ទាល់ខ្លួនរបស់បងប្អូនបានដែរ ) ។

សូមទុកពេលឲ្យបងប្អូនស្ដ្រីពីរបីនាក់ក្នុងថ្នាក់ចែកចាយអារម្មណ៍របស់ពួកគេអំពីពរជ័យនៃសមាគមសង្គ្រោះ ។

សូមឲ្យសិស្សពីរបីនាក់ចែកចាយចម្លើយរបស់ពួកគេចំពោះសំណួរខាងក្រោមនេះ ដែលពួកគេត្រូវបានអញ្ជើញឲ្យពិចារណានៅក្នុងឯកសារការរៀបចំ ៖

តើទាំងស្ដ្រី និងបុរសអាចធ្វើអ្វីខ្លះដើម្បីធ្វើតាមចក្ខុវិស័យរបស់សមាគមសង្គ្រោះ និងធ្វើការរួមគ្នាដើម្បីជួយសម្រេចឲ្យបានគោលបំណងនេះ ?

សូមដាក់បង្ហាញសំណួរខាងក្រោម ហើយសូមឲ្យសិស្សគិតប្រកបដោយការអធិស្ឋានអំពីសំណួរនេះ រួចហើយសរសេរគោលដៅមួយក្នុងសៀវភៅកំណត់ហេតុ ឬសៀវភៅកត់ចំណាំរបស់ពួកគេ ៖

បងប្អូនស្រី តើបងប្អូននឹងចូលរួមឲ្យបានកាន់តែពេញលេញក្នុងការសម្រេចបានគោលបំណងរបស់សមាគមសង្គ្រោះ តាមរយៈសមត្ថភាព សេចក្ដីជំនឿ សំឡេង និងភាពដឹកនាំរបស់បងប្អូនដោយរបៀបណា ?
បងប្អូនប្រុស តើបងប្អូននឹងធ្វើអ្វីខ្លះដើម្បីគាំទ្រ លើកទឹកចិត្ត និងធ្វើការជាមួយស្ដ្រីឲ្យបានកាន់តែប្រសើរក្នុងការកសាងនគររបស់ព្រះ ?

ប្រសិនបើពេលវេលាអនុញ្ញាត សូមពិចារណាអញ្ជើញសិស្សពីរបីនាក់ឲ្យចែកចាយពីអ្វីដែលពួកគេបានសរសេរ ។

អភិវឌ្ឍការបង្រៀន និងការរៀនសូត្ររបស់យើង

កែសម្រួលយោបល់សម្រាប់ការបង្រៀន ។ បងប្អូនអាចជ្រើសរើសប្រើប្រាស់យោបល់សម្រាប់ការបង្រៀនសម្រាប់បណ្តុំបទគម្ពីរទាំងអស់ ឬតែមួយចំនួននៅក្នុងមេរៀននីមួយៗ ហើយបងប្អូនអាចកែសម្រួលយោបល់នោះស្របតាមការណែនាំពីព្រះវិញ្ញាណ និងតម្រូវការ ព្រមទាំងស្ថានភាពក្នុងថ្នាក់រៀនរបស់បងប្អូន ។ នៅពេលកែសម្រួលយោបល់សម្រាប់ការបង្រៀន ឬជំនួសចំណុចមេរៀនដោយគំនិតផ្ទាល់របស់បងប្អូនផ្ទាល់ សូមពិចារណាពីលទ្ធផលរៀនសូត្ររបស់សិស្សដែលបានចូលរួម ហើយជ្រើសរើសយោបល់សម្រាប់ការបង្រៀនជម្រើស ដែលនឹងនាំមកនូវលទ្ធផលស្របតាមបំណង ។

ដើម្បីបញ្ចប់មេរៀននេះ សូមពិចារណាធ្វើតាមអ្វីខាងក្រោមនេះមួយ ឬច្រើន ៖

សូមសួរសិស្សថា តើពួកគេនឹងឆ្លើយតបនឹងនរណាម្នាក់ ដែលអះអាងថា ស្ដ្រីមានទីតាំង និងតួនាទីថយចុះនៅក្នុងសាសនាចក្រនៃព្រះយេស៊ូវ គ្រីស្ទ នៃពួកបរិសុទ្ធថ្ងៃចុងក្រោយដោយរបៀបណា ។
សូមថ្លែងទីបន្ទាល់អំពីសេចក្ដីពិតដែលបានបង្ហាញនៅក្នុងមេរៀននេះ ។
សូមឲ្យសិស្សម្នាក់អានការអញ្ជើញដូចតទៅនេះដោយប្រធាន រ័សុល អិម ណិលសុន ៖

វាគឺជាស្ត្រីដែលបានផ្លាស់ប្រែចិត្តជឿ ជាស្ត្រីរក្សាសេចក្ដីសញ្ញា … ដែលរស់នៅសុចរិតដែលនឹងមានភាពលេចធ្លោនៅក្នុងពិភពលោកកំពុងតែចុះអាប់អួរនេះ ហើយដែលនឹងត្រូវបានគេមើលឃើញខុសប្លែក និងមានលក្ខណៈផ្សេងនៅក្នុងរបៀបដ៏រីករាយបំផុតនោះ ។

… ខ្ញុំសូមអង្វរដល់បងប្អូនស្រីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយរបស់ខ្ញុំឲ្យបោះជំហានទៅមុខ ! សូមទទួលយកកន្លែងត្រឹមត្រូវ និងដែលតម្រូវនៅក្នុងគេហដ្ឋានរបស់បងប្អូននៅក្នុងសហគមន៍ និងនគរនៃព្រះ--ច្រើនជាងបងប្អូនធ្លាប់ធ្វើពីមុន ។ ( រ័សុល អិម ណិលសុន « ការអង្វរដល់បងប្អូនស្ត្រីរបស់ខ្ញុំ » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៩៧, អក្សរទ្រេតដើម )

សម្រាប់ពេលក្រោយ

សូមពន្យល់ដល់សិស្សថា ពេលពួកគេជួបគ្នាលើកក្រោយ ពួកគេនឹងផ្ដោតលើផ្នែកមួយនៃដំណឹងល្អដែលបានស្ដារឡើងវិញ ដែលព្យាការីយ៉ូសែប ស៊្មីធ បានសំដៅថាជាការទទួលខុសត្រូវដ៏ធំបំផុតមួយនៅក្នុងពិភពលោកនេះ ដែលព្រះបានប្រទានដល់ពួកបរិសុទ្ធថ្ងៃចុងក្រោយ ( សូមមើល Teachings of Presidents of the Church: Joseph Smith [ ឆ្នាំ ២០០៧ ] ទំព័រ ៤៧៥ ) ។ សូមអញ្ជើញសិស្សឲ្យសិក្សាក្នុងឯកសាររៀបចំសម្រាប់មេរៀនទី ១៩ ដោយយកចិត្តទុកដាក់ ហើយមករៀនដោយបានការរៀបចំខ្លួនដើម្បីពិភាក្សាពីសេចក្ដីសន្យារបស់ព្យាការីដ៏អស្ចារ្យ ដែលបានសន្យាដល់អស់អ្នកដែលជួយសម្រេចកិច្ចការព្រះវិហារបរិសុទ្ធសម្រាប់មរណជន ។