ឯកសារគ្រូបង្រៀនមេរៀនទី ១៦ ៖ ព្រះវិហារបរិសុទ្ធខឺតឡង់ និង កូនសោបព្វជិតភាព

« ឯកសារគ្រូបង្រៀនមេរៀនទី ១៦ ៖ ព្រះវិហារបរិសុទ្ធខឺតឡង់ និង កូនសោបព្វជិតភាព » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀនមេរៀនទី ១៦ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀនមេរៀនទី ១៦

ព្រះវិហារបរិសុទ្ធខឺតឡង់ និង កូនសោបព្វជិតភាព

ព្រះអម្ចាស់បានបង្គាប់ពួកបរិសុទ្ធឲ្យសាងសង់ព្រះវិហារបរិសុទ្ធមួយនៅទីក្រុងខឺតឡង់ រដ្ឋអូហៃអូ ហើយបានសន្យាថា ទ្រង់នឹងប្រទានឲ្យពួកគេនូវ« ព្រះចេស្ដាមកពីស្ថានលើ »( គោលលទ្ធិ និង សេចក្ដីសញ្ញា ៩៥:៨ ) ។ មេរៀននេះនឹងជួយសិស្សឲ្យពិចារណាអុំពីរបៀបដែលពួកគេអាចគោរពបទបញ្ញត្តិរបស់ព្រះអម្ចាស់ទាក់ទងនឹងព្រះវិហារបរិសុទ្ធឲ្យកាន់តែពេញលេញ ។ វាក៏នឹងជួយពួកគេពន្យល់ពីសារៈសំខាន់នៃកូនសោបព្វជិតភាពដែលត្រូវបានស្ដារឡើងវិញនៅក្នុងព្រះវិហារបរិសុទ្ធខឺតឡង់ផងដែរ ។

យោបល់សម្រាប់ការបង្រៀន

ព្រះអម្ចាស់បានជួយពួកបរិសុទ្ធឲ្យបំពេញបទបញ្ញត្តិរបស់ទ្រង់ដើម្បីសង់ព្រះវិហារបរិសុទ្ធខឺតឡង់ ។

សូមអញ្ជើញសិស្សឲ្យគិតពីអ្វីមួយដែលព្រះអម្ចាស់បានសុំឲ្យសមាជិកសាសនាចក្រធ្វើតាមរយៈពួកអ្នកបម្រើរបស់ទ្រង់ ដែលទំនងជារឿងពិបាក ឬធ្វើឲ្យថប់បារម្ភ ។ សូមឲ្យសិស្សពីរបីនាក់ចែកចាយឧទាហរណ៍មួយជាមួយនឹងសិស្សនៅក្នុងថ្នាក់ ។

សូមបង្ហាញរូបភាពព្រះវិហារបរិសុទ្ធខឺតឡង់ ។ សូមរំឭកសិស្សថា នៅខែធ្នូ ឆ្នាំ១៨៣២ ព្រះអម្ចាស់បានបង្គាប់ពួកបរិសុទ្ធឲ្យសង់« ដំណាក់នៃព្រះ »នៅទីក្រុងខឺតឡង់( គោលលទ្ធិ និង សេចក្ដីសញ្ញា ៨៨:១១៩ ) ។

សូមពន្យល់ថា បន្ទាប់ពីសេចក្ដីបង្គាប់របស់ព្រះបានជាងប្រាំខែក្រោយមក ថ្នាក់ដឹកនាំ និងសមាជិកក្នុងសាសនាចក្រនៅតែពុំបានចាប់ផ្ដើមសាងសង់ព្រះវិហារបរិសុទ្ធនៅឡើយ ។ សូមអាន គោលលទ្ធិ និង សេចក្តីសញ្ញា ៩៥:១–៣ ជាមួយនឹងសិស្ស ហើយរកមើលអ្វីដែលព្រះអម្ចាស់បានមានបន្ទូលអំពីការពន្យារពេលរបស់ពួកបរិសុទ្ធនៅក្នុងការសាងសង់ព្រះវិហារបរិសុទ្ធនោះ ។

ហេតុអ្វីបងប្អូនគិតថា ការពុំបានសង់ព្រះវិហារបរិសុទ្ធអាចចាត់ទុកថាជា« អំពើបាបដ៏ធ្ងន់ធ្ងរណាស់ » ? ( ខទី ៣, សូមមើលផងដែរខទី ៦ ) ។
តើបងប្អូនគិតថា ការផ្ចាញ់ផ្ចាលរបស់ព្រះអម្ចាស់ចំពោះពួកបរិសុទ្ធដោយសារពុំបានសង់ព្រះវិហារបរិសុទ្ធគឺជាសញ្ញាមួយនៃសេចក្ដីស្រឡាញ់របស់ទ្រង់ចំពោះពួកគេតាមរបៀបណា ? ( សូមមើលខទី ១ ) ។

សូមអញ្ជើញសិស្សឲ្យអាន គោលលទ្ធិ និងសេចក្ដីសញ្ញា ៩៥:៨ ដោយស្វែងរកហេតុផលមួយដែលព្រះអម្ចាស់សព្វព្រះទ័យចង់ឲ្យព្រះវិហារបរិសុទ្ធមួយត្រូវបានសង់ឡើងនៅក្នុងទីក្រុងខឺតឡង់ ។

សូមពន្យល់ថា ប្រទានមានន័យថាការផ្ដល់អំណោយមួយដល់មនុស្សម្នាក់ ។ អំណោយទានដែលបានលើកឡើងនៅក្នុង គោលលទ្ធិ និង សេចក្តីសញ្ញា ៩៥ រួមមានអំណោយទាននៃចំណេះដឹង និងអំណាចខាងវិញ្ញាណ ។ ពិធីអំណោយទានពិសិដ្ឋផ្ទាល់ខ្លួននៅក្នុងព្រះវិហារបរិសុទ្ធដែលបានអនុវត្តនៅសព្វថ្ងៃនេះពុំត្រូវបានបើកសម្ដែងឡើយរហូតដល់ឆ្នាំ ១៨៤២ នៅទីក្រុងណៅវូ រដ្ឋអិលលីណោយ ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ៩៥:១១–១២ ឲ្យឮៗ ។

តើយើងអាចរៀនគោលការណ៍អ្វីខ្លះមកពី ការសន្យារបស់ព្រះអម្ចាស់ចំពោះពួកបរិសុទ្ធនៅក្នុង ខទី ១១ ? ( ដោយប្រើពាក្យសម្ដីរបស់សិស្ស សូមសរសេរគោលការណ៍មួយនៅលើក្ដារខៀនដែលស្រដៀងគ្នានឹងគោលការណ៍ដូចទៅនេះ ៖ នៅពេលយើងខិតខំគោរពតាមបទបញ្ញត្តិរបស់ព្រះអម្ចាស់ នោះទ្រង់នឹងប្រទានអំណាចដល់យើងដើម្បីសម្រេចបានតាមព្រះទ័យរបស់ទ្រង់ ) ។
ហេតុអ្វីការសន្យានេះមកពីព្រះអម្ចាស់បានក្លាយជាការលួងលោមចិត្តមួយដល់ពួកបរិសុទ្ធនៅទីក្រុងខឺតឡង់ ? ( សូមមើលសេចក្ដីថ្លែងការណ៍របស់ អេលីហ្សា អ័រ ស្នូនៅក្នុងផ្នែកទី ១ នៃឯកសាររៀបចំ ) ។ តើគោលការណ៍នេះអាចជាការលួងលោមចិត្តដល់បងប្អូននៅក្នុងជីវិតសព្វថ្ងៃរបស់បងប្អូនតាមរបៀបណា ?
តើអ្វីខ្លះជាការលះបង់មួយចំនួនដែលពួកបរិសុទ្ធបានធ្វើដើម្បីគោរពតាមបទបញ្ញត្តិរបស់ព្រះអម្ចាស់ដើម្បីសង់ព្រះវិហារបរិសុទ្ធខឺតឡង់ ? ( ប្រសិនបើចាំបាច់ សូមលើកទឹកចិត្តសិស្សឲ្យរំឭកផ្នែកទី ១នៃឯកសាររៀបចំ ) ។
តើព្រះអម្ចាស់បានប្រទានអំណាច ហើយជួយពួកបរិសុទ្ធឲ្យសង់ព្រះវិហារបរិសុទ្ធខឺតឡង់តាមរបៀបណា ?

សូមអញ្ជើញសិស្សឲ្យរំឭកសេចក្ដីថ្លែងការណ៍ដោយប្រធាន ថូម៉ាស អេស ម៉នសុន នៅក្នុង ផ្នែកទី ១ នៃឯកសាររៀបចំ ហើយគិតពីសំណួរដូចតទៅនេះ ៖ តើពួកបរិសុទ្ធសព្វថ្ងៃជួយនៅក្នុងការសង់ព្រះវិហារបរិសុទ្ធតាមរបៀប ណា ? តើការលះបង់បែបណាខ្លះដែលខ្ញុំនឹងធ្វើទាក់ទងនឹងការថ្វាយបង្គំនៅក្នុងព្រះវិហារបរិសុទ្ធ ?

តើបងប្អូនគិតថា ហេតុអ្វីបានជាការលះបង់ជារឿយៗតែងតែមានការទាក់ទងទៅនឹងពរជ័យនៃព្រះវិហារបរិសុទ្ធ ?

អភិវឌ្ឍការបង្រៀន និងការរៀនសូត្ររបស់យើង

សូមទុកពេលឲ្យសិស្សគិត ។ នៅពេលសិស្សមានពេលដើម្បីសញ្ជឹងគិតពីបទពិសោធន៍នានាជាមួយនឹងការរស់នៅតាមដំណឹងល្អនៃព្រះយេស៊ូវគ្រីស្ទ នោះព្រះវិញ្ញាណបរិសុទ្ធអាចជួយនាំយកការចងចាំចូលមកក្នុងគំនិតរបស់ពួកគេ ។ ការប្រើវិធីសាស្ដ្រនេះម្ដងម្កាលជាមួយនឹងការអញ្ជើញសិស្សឲ្យកត់ត្រានូវគំនិតរបស់ពួកគេពីមុនចែកចាយវា អាចដឹកនាំទៅការឆ្លើយតបកាន់តែមានន័យ និងឆន្ទៈដ៏ធំមួយដើម្បីចែកចាយ ។

សូមទុកពេលឲ្យសិស្សគិត ( ហើយប្រហែលជាសរសេរផងដែរ ) អំពី (១) ការលះបង់ដែលពួកគេបានធ្វើទាក់ទងនឹងព្រះវិហារបរិសុទ្ធ (២) ពរជ័យដែលពួកគេបានទទួលរួចហើយមកពីព្រះវិហារបរិសុទ្ធ និង ( ៣) អ្វីដែលពួកគេអាចធ្វើដើម្បីកាន់តែឧស្សាហ៍ព្យាយាមគោរពតាមព្រះបញ្ញត្តិទាំងឡាយរបស់ព្រះអម្ចាស់ទាក់ទងនឹងព្រះវិហារបរិសុទ្ធ ។

ព្រះអម្ចាស់បានទទួលយកព្រះវិហារបរិសុទ្ធខឺតឡង់ ហើយកូនសោបព្វជិតភាពត្រូវបានប្រគល់ដល់យ៉ូសែប ស្ម៊ីធ និងអូលីវើរ ខៅឌើរី ។

កំណត់ចំណាំ ៖ សិស្សនឹងធ្វើការសិក្សា គោលលទ្ធិ និង សេចក្តីសញ្ញា ១០៩, ការអធិស្ឋានឧទ្ទិសឆ្លងព្រះវិហារបរិសុទ្ធខឺតឡង់ នៅក្នុង មេរៀនទី ២០ ។

សូមពន្យល់ថា តាមរយៈការធ្វើពលិកម្មរបស់ពួកបរិសុទ្ធ និងមានជំនួយរបស់ព្រះអម្ចាស់ នោះព្រះវិហារបរិសុទ្ធខឺតឡង់ត្រូវបានសង់រួចរាល់ ហើយបន្ទាប់មកបានឧទ្ទិសឆ្លងនៅថ្ងៃទី ២៧ ខែ មីនា ឆ្នាំ ១៨៣៦ ។ អំណោយទានពិសិដ្ឋនៃព្រះចេស្ដារបស់ព្រះអម្ចាស់បានប្រទានឲ្យដែលជាលទ្ធផលមកពីការគោរពប្រតិបត្តិរបស់ពួកបរិសុទ្ធក្នុងការសាងសង់ព្រះវិហារបរិសុទ្ធនេះ ។

តើការបង្ហាញខាងវិញ្ញាណណាខ្លះដែលពួកបរិសុទ្ធបានជួបប្រទះនៅអំឡុងពេលធ្វើការឧទិ្ទសឆ្លងព្រះវិហារបរិសុទ្ធខឺតឡង់ ? ( សូមលើកទឹកចិត្តសិស្សឲ្យរំឭកអ្វីដែលពួកគេបានសិក្សានៅក្នុង ផ្នែកទី ២ នៃឯកសាររៀបចំ ) ។

សូមពន្យល់ថា នៅក្នុងមេរៀនក្រោយ ព្រះអង្គសង្រ្គោះ និងពួកសារទូតសួគ៌ដទៃទៀតបានបង្ហាញព្រះកាយដល់យ៉ូសែប ស្ម៊ីធ និងអូលីវើរ ខៅឌើរី នៅក្នុងព្រះវិហារបរិសុទ្ធ ។ សូមអញ្ជើញសិស្សម្នាក់ឲ្យអានក្បាលកណ្ឌ គោលលទ្ធិ និង សេចក្ដីសញ្ញា ១១០ ឮៗ ។

សូមបង្ហាញរូបភាពដូចខាងក្រោម ៖

ព្រះអម្ចាស់បង្ហាញព្រះកាយទ្រង់នៅក្នុងព្រះវិហារបរិសុទ្ធខឺតឡង់ ដោយ ឌេល ផាសិន

សូមអាន គោលលទ្ធិ និង សេចក្តីសញ្ញា ១១០:១–១០ជាមួយនឹងសិស្ស ដោយរកមើលការពិពណ៌នាអំពីព្រះអង្គសង្រ្គោះ និងសារលិខិតរបស់ទ្រង់ចំពោះយ៉ូសែប និងអូលីវើរ ។ សូមអញ្ជើញសិស្សឲ្យចែកចាយអ្វីដែលលេចធ្លោចំពោះពួកគេ ។ នៅពេលសិស្សចែកចាយ សូមទុកពេលឲ្យពួកគេពិភាក្សាសំណួរដូចខាងក្រោម ៖

តើយើងអាចរៀនអ្វីខ្លះអំពីព្រះអម្ចាស់ ចេញមកពីការបង្ហាញព្រះកាយ និងការបង្រៀននៅក្នុងដំណាក់ដែលទើបសង់ឡើងថ្មីរបស់ទ្រង់ ?
តើព្រះបន្ទូលរបស់ព្រះអម្ចាស់ និងសេចក្តីសន្យាអ្វីខ្លះនៅក្នុង ខទី ៧–៨ បង្រៀនអំពីភាពពិសិដ្ឋនៃព្រះវិហារបរិសុទ្ធរបស់ទ្រង់ ?
តើព្រះវិហារបរិសុទ្ធខឺតឡង់មានឥទ្ធិពលអ្វីខ្លះចំពោះពិភពលោកទាំងមូល ? ( សូមមើលខទី ៩–១០ ) ។

សូមឲ្យសិស្សចែកចាយនូវអ្វីដែលពួកគេដឹងអំពីពួកសារទូតទេវតាដទៃទៀតដែលបានបង្ហាញព្រះកាយនៅក្នុងព្រះវិហារបរិសុទ្ធខឺតឡង់ ។ បងប្អូនអាចបង្ហាញសេចក្តីពិតដូចតទៅនេះ ៖ព្រះអម្ចាស់បានបញ្ជូនសារទូតមកពីស្ថានសួគ៌មកកាន់ព្រះវិហារបរិសុទ្ធខឺតឡង់ ដើម្បីប្រគល់កូនសោបព្វជិតភាពដែលចាំបាច់សម្រាប់កិច្ចការនៃសេចក្តីសង្រ្គោះ ។

សូមឲ្យសិស្សពន្យល់ផងដែរអំពីកូនសោដែលសារទូតទាំងនេះបានប្រគល់ដល់យ៉ូសែប និងអូលីវើរ ។ សូមឲ្យសិស្សបើកទៅផ្នែកទី ២ នៃឯកសាររៀបចំ បើចាំបាច់ ។ នៅពេលសិស្សចែកចាយ សូមពិចារណាការបង្ហាញឈ្មោះ ម៉ូសេ អេលីយ៉ាស និង អេលីយ៉ា ជាមួយនឹងកូនសោទាំងឡាយដែលជាប់ទាក់ទងគ្នា ។

តើតាមរបៀបអ្វីខ្លះដែលយើងទទួលបានពរជ័យសព្វថ្ងៃនេះ ដោយសារតែកូនសោបព្វជិតភាពដែលបានប្រគល់ឲ្យនៅក្នុងព្រះវិហារបរិសុទ្ធខឺតឡង់ ?

សូមបង្ហាញសេចក្តីថ្លែងការណ៍ដូចខាងក្រោមដោយប្រធាន យ៉ូសែប ហ្វិលឌីង ស្ម៊ីធ ហើយសូមអញ្ជើញសិស្សម្នាក់ធ្វើការអានឲ្យឭៗ ៖

ព្រះវិហារបរិសុទ្ធខឺតឡង់ គឺជាទីតាំងដ៏អស្ចារ្យមួយនៃកំណត់ហេតុនៃការសង់ព្រះវិហារបរិសុទ្ធ ។ វាពុំដូចជាព្រះវិហារបរិសុទ្ធផ្សេងទៀតនោះទេ ។ វាត្រូវបានសាងសង់ឡើងជាចម្បងសម្រាប់ការស្ដារកូនសោនៃសិទ្ធិអំណាចឡើងវិញ ។ ( យ៉ូសែប ហ្វិលឌីង ស្ម៊ីធ Doctrines of Salvation រៀបរៀងដោយ ប្រ៊ូស អ័រ ម៉ាក់ខន់ឃី [ ឆ្នាំ ១៩៥៥ ] ២:២៤២ )

សូមពិចារណាចែកចាយឧទាហរណ៍មួយអំពីវិធីជាក់លាក់មួយ ដែលកូនសោទាំងឡាយត្រូវបានប្រគល់ឲ្យនៅក្នុងព្រះវិហារបរិសុទ្ធខឺតឡង់ ដែលបានផ្ដល់ពរជ័យដល់ជីវិតរបស់បងប្អូន ។ សូមថ្លែងទីបន្ទាល់ថា កូនសោបព្វជិតភាពដែលបានផ្ដល់ដល់ព្យាការីយ៉ូសែប ស្ម៊ីធ និង អូលីវើរ ខៅឌើរី ត្រូវបានកាន់ ហើយបានប្រើប្រាស់នៅសព្វថ្ងៃនេះដោយសមាជិកគ្រប់រូបនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់ ក្រោមការដឹកនាំរបស់ប្រធានសាសនាចក្រ ។

សម្រាប់ពេលក្រោយ

សូមពន្យល់ថា ដើម្បីរៀបចំខ្លួនសម្រាប់មេរៀនសប្ដាហ៍ក្រោយ សិស្សនឹងមានឱកាសសិក្សាពីគ្រាដ៏ខ្មៅងងឹតមួយនៅក្នុងប្រវត្តិសាសនាចក្រ ពេលពួកបរិសុទ្ធបានដកពិសោធន៍នូវការសាកល្បង ការបៀតបៀន និងការក្បត់ ។ សូមអញ្ជើញសិស្សឲ្យសិក្សាឯកសាររៀបចំ ហើយមកកាន់ថ្នាក់រៀនដោយបានត្រៀមខ្លួនជាស្រេច ដើម្បីចែកចាយពីគោលការណ៍ដែលអាចជួយពួកគេឲ្យប្រឈមមុខនិងឧបសគ្គ និងការលំបាកដោយមានសេចក្ដីជំនឿលើព្រះ ។