ឯកសារគ្រូបង្រៀនមេរៀនទី ២៥ ៖ ការបន្តតំណែងនៅក្នុងគណៈប្រធានទីមួយ និង ដំណើរទៅទិសខាងលិច

« ឯកសារគ្រូបង្រៀនមេរៀនទី ២៥ ៖ ការបន្តតំណែងនៅក្នុងគណៈប្រធានទីមួយ និង ដំណើរទៅទិសខាងលិច » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀនមេរៀនទី ២៥ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀនមេរៀនទី ២៥

ការបន្តតំណែងនៅក្នុងគណៈប្រធានទីមួយ និង ដំណើរទៅទិសខាងលិច

បន្ទាប់ពីការស៊ូស្លាប់ដើម្បីជំនឿរបស់យ៉ូសែប និង ហៃរុម ស៊្មីធមក ពួកបរិសុទ្ធជាច្រើនបានទទួលសាក្សីដ៏ទេវភាពមួយថា ព្រិកហាំ យ៉ង់ និងពួកសាវកដប់ពីរនាក់ត្រូវដឹកនាំសាសនាចក្ររបស់ព្រះអម្ចាស់ ។ នៅក្រោមការដឹកនាំដ៏បំផុសគំនិតរបស់ពួកលោក នោះពួកបរិសុទ្ធបានធ្វើដំណើរទៅកាន់ជ្រលងភ្នំសលត៍ លេក ។ មេរៀននេះត្រូវបានរៀបចំឡើងដើម្បីពង្រឹងសេចក្ដីជំនឿរបស់សិស្សថា គណៈប្រធានទីមួយ និងពួកសាវកដប់ពីរនាក់កាន់រាល់កូនសោបព្វជិតភាពនៃគ្រាកាន់កាប់ត្រួតត្រាចុងក្រោយនេះ ។ មេរៀននេះក៏នឹងជួយសិស្សឲ្យទុកចិត្តថា ព្រះអម្ចាស់នឹងដឹកនាំជីវិតរបស់ពួកគេម្នាក់ៗ ពេលពួកគេគោរពតាមសេចក្ដីសញ្ញារបស់ពួកគេផងដែរ ។

យោបល់សម្រាប់ការបង្រៀន

ពួកសាវកកាន់កូនសោទាំងឡាយនៃនគរ ។

សូមដាក់បង្ហាញរូបភាពខាងក្រោមនេះអំពីយ៉ូសែប និង ហៃរុម ស៊្មីធ ។

សូមពន្យល់ថា បងប្អូនប្រុសពីររូបនេះត្រូវបានគេសម្លាប់ដោយសារជំនឿនៅល្ងាចថ្ងៃទី ២៧ ខែ មិថុនា ឆ្នាំ ១៨៤៤ ។ លុះព្រឹកស្អែក មិត្តរបស់ព្យាការីឈ្មោះ ផតធើរ រ៉ក់វ៉េល បានជិះសេះចូលទៅក្នុងក្រុងណៅវូ ដោយស្រែកឡើងថា « យ៉ូសែបត្រូវបានគេសម្លាប់ ! យ៉ូសែប ត្រូវបានគេសម្លាប់ ! ពួកគេបានសម្លាប់លោកហើយ ! » ( Anson Call, Autobiography and journal, circa 1856–1889, 12, Church History Library, Salt Lake City, Utah ) ។

តើអ្នកគិតថា ពួកបរិសុទ្ធមានអារម្មណ៍បែបណាបន្ទាប់ពីឮដំណឹងនេះ ?

អ្នកគួរសួរសិស្សថាតើពួកគេធ្លាប់ស្ដាប់ឮដំណឹងមរណភាពរបស់ព្យាការី ហើយថាតើពួកគេមានអារម្មណ៍បែបណាដែរ ។

តើអ្នកគិតថាពួកបរិសុទ្ធពីជំនាន់មុនមានសំណួរ និងកង្វល់អ្វីខ្លះ ពេលពួកគេបានឮពីមរណភាពរបស់យ៉ូសែប ស្ម៊ីធ ?
តើព្រិកហាំ យ៉ង់មានប្រតិកម្មយ៉ាងណាចំពោះដំណឹងមរណភាពរបស់យ៉ូសែប និង ហៃរុម ស៊្មីធ ? ( ប្រសិនបើចាំបាច់ សូមអញ្ជើញសិស្សឲ្យរំឭកពីប្រតិកម្មរបស់ព្រិកហាំ យ៉ង់នៅក្នុងផ្នែកទី ១នៃឯកសាររៀបចំ ) ។
ទោះលោកមានការឈឺចាប់នឹងមរណភាពរបស់ព្យាការីក្ដី តើមានអ្វីទៅដែលបានលួងលោមចិត្តដល់ព្រិកហាំ ?

សូមដាក់បង្ហាញរូបភាពរបស់ព្រិកហាំ យ៉ង់ និងស៊ីឌនី រិកដុន ។

ព្រិកហាំ យ៉ង់ លោកម៉ូសេរបស់អាមេរិក ដោយ ខេនណេធ អេ ខ័រប៊េត និង ស៊ីឌនី រិកដុន

សូមរំឭកសិស្សថា ព្រិកហាំ យ៉ង់គឺជាសាវករៀមច្បងនៅគ្រានៃមរណភាពរបស់ព្យាការី ។ ស៊ីឌនី រិកដុន បានបម្រើជាទីប្រឹក្សារបស់យ៉ូសែប ស្ម៊ីធនៅក្នុងគណៈប្រធានទីមួយ ហើយបានមានអារម្មណ៍ថា លោកគួរដឹកនាំសាសនាចក្រក្នុងនាមជាអាណាព្យាបាល ។ ស៊ីឌនីបានកោះហៅការប្រជុំពិសេសមួយ ដោយសង្ឃឹមថា សមាជិកសាសនាចក្រនឹងអនុម័តការទាមទាររបស់លោកជាថ្នាក់ដឹកនាំ ។ ទាំងស៊ីឌនី និងព្រិកហាំបានថ្លែងសុន្ទរកថាទៅកាន់ពួកបរិសុទ្ធ ។

សូមឲ្យសិស្សម្នាក់អានឮៗពីសេចក្ដីថ្លែងការណ៍ដោយប្រធានព្រិកហាំ យ៉ង់ ដែលមាននៅក្នុងផ្នែកទី ៣នៃឯកសាររៀបចំ ។

តើយើងអាចរៀនសេចក្ដីពិតអ្វីខ្លះមកពីសេចក្ដីថ្លែងការណ៍របស់ព្រិកហាំ យ៉ង់អំពីសិទ្ធិអំណាចនៃអ្នកដែលបានតែងតាំងជាពួកសាវក ? ( បន្ទាប់ពីសិស្សបានឆ្លើយ សូមសរសេរសេចក្ដីពិតដូចតទៅនេះនៅលើក្ដារខៀន ៖ ពួកសាវកកាន់រាល់កូនសោទាំងឡាយនៃបព្វជិតភាពដែលចាំបាច់ដើម្បីធ្វើជាអធិបតីលើសាសនាចក្រ ។ [ សូមមើល គោលលទ្ធិ និង សេចក្តីសញ្ញា ២៧:១២–១៣, ១១២:៣០–៣២ ] ) ។

សូមចង្អុលបង្ហាញថា នៅជំនាន់របស់យើង ពេលសាវកមួយរូបៗត្រូវបានតែងតាំង លោកត្រូវបានប្រគល់ឲ្យនូវរាល់កូនសោនៃបព្វជិតភាពដែលព្រះអម្ចាស់បានស្ដារឡើងវិញមកលើផែនដីតាមរយៈយ៉ូសែប ស្ម៊ីធ ។ ប៉ុន្តែ មានតែប្រធាននៃសាសនាចក្រប៉ុណ្ណោះទើបមានសិទ្ធិអំណាចដើម្បីអនុវត្តគ្រប់កូនសោទាំងអស់នេះ ។ សមាជិកកូរ៉ុមនៃពួកសាវកដប់ពីរនាក់អនុវត្តកូនសោបព្វជិតភាពរបស់ពួកលោកនៅក្រោមការដឹកនាំរបស់ប្រធានសាសនាចក្រ ។

តើឥឡូវមានអ្វីកើតឡើងពេលប្រធានសាសនាចក្រទទួលមរណភាព ?

ប្រសិនបើចាំបាច់ សូមបង្ហាញសេចក្តីថ្លែងការណ៍ដូចខាងក្រោម ហើយសូមអញ្ជើញសិស្សម្នាក់ឲ្យអានវាឲ្យឭៗ ៖

នៅពេលប្រធាននៃសាសនាចក្រទទួលមរណភាព គណៈប្រធានទីមួយត្រូវបានរំលាយដោយស្វ័យប្រវត្តិ ។ ពួកបុរសដែលពីមុនបម្រើជាទីប្រឹក្សា ត្រូវបានត្រឡប់ទៅកាន់តំណែងក្នុងកូរ៉ុមនៃពួកសាវកដប់ពីរនាក់វិញ ហើយកូរ៉ុមនោះ ទទួលជាបន្ទុកថ្នាក់ដឹកនាំនៃសាសនាចក្រដោយមានសាវករៀមច្បងធ្វើជាប្រធាន ។ … នៅក្នុងប្រវត្តិសាស្ត្ររបស់យើង សាវករៀមច្បងតែងតែក្លាយទៅជាអ្នកបន្ដតំណែងធ្វើជាប្រធាននៃសាសនាចក្រ ។ ( « សារលិខិតមកពីគណៈប្រធានទីមួយ » ថ្ងៃទី ១៦ ខែ មករា ឆ្នាំ ២០១៨ នៅលើគេហទំព័រ ChurchofJesusChrist.org )

សូមត្រឡប់ទៅមើលរូបភាពរបស់ព្រិកហាំ និង ស៊ីឌនី វិញ ហើយសួរថា

តើពួកបរិសុទ្ធជាច្រើនបានជួបអ្វីខ្លះ ពេលពួកគេបានមើល ហើយស្ដាប់ព្រិកហាំ យ៉ង់ មានប្រសាសន៍ ? តើការណ៍នោះជះឥទ្ធិពលដល់ពួកគេយ៉ាងដូចម្ដេច ? ( សូមលើកទឹកចិត្តសិស្សឲ្យរំឭកអ្វីដែលពួកគេបានរៀននៅក្នុងផ្នែកទី ១ នៃឯកសាររៀបចំ ) ។

សូមបង្ហាញសេចក្ដីថ្លែងការណ៍ខាងក្រោមដោយ អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ។ សូមពន្យល់ថា អែលឌើរ អាន់ឌើរសិន បានមានប្រសាសន៍ពីពាក្យពេចន៍ទាំងនេះនៅថ្ងៃដែលប្រធាន រ័សុល អិម ណិលសុន ត្រូវបានគាំទ្រជាប្រធានថ្មីរបស់សាសនាចក្រ ។

យើងមានឯកសិទ្ធិក្នុងនាមជាពួកបរិសុទ្ធថ្ងៃចុងក្រោយ ដើម្បីទទួលសាក្សីផ្ទាល់ខ្លួនថា ការហៅ [ របស់ព្យាការី ] គឺមកពីព្រះ ។ ( នែល អិល អាន់ឌើរសិន « ព្យាការីនៃព្រះ » Ensign ឬ Liahona ខែ ឧសភា ឆ្នាំ ២០១៨ ទំព័រ ២៥–២៦ )

សូមអញ្ជើញសិស្សពីរបីនាក់ឲ្យចែកចាយទីបន្ទាល់របស់ពួកគេថា ព្យាការីបច្ចុប្បន្នត្រូវបានហៅមកពីព្រះ និងប្រហែលមកពីរបៀបដែលពួកគេបានទទួលទីបន្ទាល់នោះ ។ សូមលើកទឹកចិត្តសិស្សឲ្យស្វែងរកសាក្សីរបស់ពួកគេផ្ទាល់ថា ថ្នាក់ដឹកនាំសាសនាចក្រត្រូវបានហៅដោយការបំផុសគំនិត ។

ព្រិកហាំ យ៉ង់ និងពួកដប់ពីរនាក់ដឹកនាំពួកបរិសុទ្ធទៅកាន់ជ្រលងភ្នំសលត៍ លេក ។

សូមបង្ហាញរូបភាពពីព្រះវិហារបរិសុទ្ធណៅវូ ហើយសួរសិស្សហេតុអ្វីពួកបរិសុទ្ធបានខិតខំធ្វើការដើម្បីបញ្ចប់ការសាងសង់ព្រះវិហារបរិសុទ្ធពីមុនពួកគេបានចាកចេញពីផ្ទះសម្បែងរបស់ពួកគេ ហើយធ្វើដំណើរទៅទិសខាងលិច ។ ( អ្នកអាចអញ្ជើញសិស្សឲ្យអានសេចក្ដីថ្លែងការណ៍របស់សារ៉ា រីឆ នៅក្នុងផ្នែកទី ២ នៃឯកសាររៀបចំ ) ។

សូមពន្យល់ថា ពេលពួកបរិសុទ្ធចាកចេញពីទីក្រុងណៅវូ ហើយធ្វើដំណើរទៅទិសខាងលិច ពួកគេដឹងពីរឿងដែលនៅចំពោះមុខពួកគេតិចតួចប៉ុណ្ណោះ ។ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយអែលឌើរ អេរ៉ាស្តុស ស្នូ ជាអ្នកត្រួសត្រាយផ្លូវជំនាន់ដើម ហើយក្រោយមកជាសមាជិកមួយរូបក្នុងកូរ៉ុមនៃពួកសាវកដប់ពីរនាក់ ៖

ពេលពួកអ្នកត្រួសត្រាយផ្លូវបានចេញដំណើរទៅ [ ទិសខាងលិច ]… យើងបានស្វែងរកប្រទេសមួយដែលបានចង្អុលបង្ហាញដោយព្យាការី យ៉ូសែប ស៊្មីធនៅកណ្ដាលជួរភ្នំរ៉កគី ។… ពួកអ្នកត្រួសត្រាយផ្លូវក្រុមនោះបានចេញទៅ ដោយពុំដឹងថាពួកគេនឹងទៅទីណាទេ ប៉ុន្តែគ្រាន់តែដឹងថា…ព្រះបានបង្គាប់ពួកគេឲ្យទៅកាន់ដែនដីមួយដែលទ្រង់នឹងបង្ហាញដល់ពួកគេ ។ ហើយនៅពេលណាដែលព្យាការី ព្រិកហាំ យ៉ង់…ត្រូវបានសួរសំណួរថា—« តើលោកនឹងទៅទីណា ? » ចម្លើយតែមួយគត់ដែលលោកផ្ដល់ឲ្យគឺ—« ខ្ញុំនឹងបង្ហាញដល់អ្នកពេលយើងជិតទៅដល់ទីនោះ » ។ ការអធិស្ឋានរបស់ពួកអ្នកត្រួសត្រាយផ្លូវក្រុមនោះបានធ្វើឡើងទាំងយប់ទាំងថ្ងៃទៅកាន់ព្រះជាបន្តបន្ទាប់ ឲ្យដឹកនាំយើងទៅកាន់ដែនដីមួយ ដូចដែលទ្រង់បានសន្យា … ដែលទ្រង់បានប្រកាសថាទ្រង់នឹងប្រទានដល់យើង ។( Journal of Discourses ១៦:២០៧ )

តើអ្នកសម្គាល់ឃើញអ្វីខ្លះមកពីសេចក្ដីថ្លែងការណ៍អំពីសេចក្ដីជំនឿរបស់ពួកអ្នកត្រួសត្រាយផ្លូវ ?

សូមឲ្យសិស្សពិចារណាមួយនាទីពីដំណើរជីវិតដែលពួកគេនឹងឆ្លងកាត់ និងការដឹកនាំអ្វីខ្លះមកពីស្ថានសួគ៌ដែលពួកគេសង្ឃឹមនឹងទទួលបាន ។

តើឧបសគ្គមួយចំនួនអ្វីខ្លះដែលពួកបរិសុទ្ធបានជួប ពេលពួកគេចាកចេញពីក្រុងណៅវូ ហើយចាប់ផ្ដើមដំណើររបស់ពួកគេទៅទិសខាងលិច ? ( ប្រសិនបើចាំបាច់ សូមឲ្យសិស្សមើលផ្នែកទី ២នៃឯកសាររៀបចំ ) ។

សូមរំឭកសិស្សថា អំឡុងរដូវរងារនៃឆ្នាំ១៨៤៦–៤៧ ខណៈដែលពួកបរិសុទ្ធប្រជុំគ្នាតាំងទីលំនៅនៅទីក្រុងវិនទើរ ខ្វ័រទើរ្ស រដ្ឋនេប្រាស្កា នោះព្រិកហាំ យ៉ង់បានទទួលវិវរណៈដែលបានកត់ត្រានៅក្នុង គោលលទ្ធិ និង សេចក្តីសញ្ញា ១៣៦ ។ សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ១៣៦:២២ ដោយរកមើលការសន្យារបស់ព្រះអម្ចាស់ចំពោះពួកបរិសុទ្ធដែលអាចផ្ដល់ការលួងលោមចិត្តដល់យើង នៅពេលយើងខិតខំស្វែងរក ហើយធ្វើតាមព្រះទ័យរបស់ព្រះសម្រាប់យើងនៅក្នុងជីវិតរបស់យើង ។

អ្នកអាចចង្អុលបង្ហាញថា ឃ្លា « ព្រះពាហុរបស់យើងកំពុងលើកសន្ធឹងឡើងនៅថ្ងៃចុងក្រោយបង្អស់ » តំណាងឲ្យព្រះចេស្ដា និងការដឹកនាំរបស់ព្រះអម្ចាស់ដែលកំពុងលាតសន្ធឹងដល់រាស្ត្ររបស់ទ្រង់ ។

តើយើងអាចរៀនអ្វីខ្លះមកពីខគម្ពីរនេះ អំពីអ្វីដែលព្រះអម្ចាស់មានព្រះរាជបំណងចង់ធ្វើសម្រាប់រាស្ត្ររបស់ទ្រង់ ? ( បន្ទាប់ពីសិស្សឆ្លើយតប សូមដាក់បង្ហាញ ឬសរសេរសេចក្ដីពិតដូចតទៅនេះនៅលើក្ដារខៀន ៖ ព្រះអម្ចាស់មានព្រះរាជបំណងចង់ដឹកនាំ ហើយជួយយើងនៅក្នុងជីវិតរបស់យើង ) ។
តើវិធីមួយចំនួនណាខ្លះដែលព្រះអម្ចាស់ដឹកនាំយើងនៅក្នុងជីវិតរបស់យើង ? តើយើងត្រូវធ្វើអ្វីខ្លះដើម្បីទទួលបានការដឹកនាំបែបនេះ ? ( សូមមើលឡើងវិញនូវសេចក្ដីថ្លែងការណ៍របស់ប្រធាន អូកនៅក្នុងផ្នែកទី ២ នៃឯកសាររៀបចំ ) ។

សូមសរសេរសេចក្ដីថ្លែងការណ៍ដូចតទៅនេះនៅលើក្ដារខៀន ៖ ខ្ញុំអាចទទួលបានការដឹកនាំ និងជំនួយមកពីព្រះអម្ចាស់ ពេលខ្ញុំ … ។

សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ១៣៦:២–៤, ៧–១១, ១៩–២៤ ដោយរកមើលថាតើមនុស្សបែបណាដែលពួកបរិសុទ្ធត្រូវបានប្រែក្លាយ ដើម្បីទទួលបានការដឹកនាំរបស់ព្រះអម្ចាស់ ។ សូមពិចារណាអញ្ជើញសិស្សឲ្យសរសេរចម្លើយរបស់ពួកគេនៅលើក្ដារខៀនដើម្បីបំពេញគោលការណ៍នោះ ។

ហេតុអ្វីអ្នកគិតថា ការខិតខំប្រែក្លាយជាមនុស្សដែលបានរៀបរាប់នៅក្នុងខគម្ពីរទាំងនេះជួយយើងឲ្យទទួលបានការដឹកនាំ និងជំនួយរបស់ព្រះអម្ចាស់ ?

សូមអញ្ជើញសិស្សឲ្យរំឭកពីអ្វីដែលព្រិកហាំ យ៉ង់ បានមានប្រសាសន៍ ពេលលោកបានឃើញជ្រលងភ្នំសលត៍ លេកជាលើកដំបូង ( ផ្នែកទី ២ នៃឯកសាររៀបចំ ) ។ សូមសួរសិស្សថាតើពួកគេធ្លាប់មានគ្រាមួយនៅក្នុងជីវិតរបស់ពួកគេទេ ពេលព្រះអម្ចាស់បានបញ្ជាក់ដល់ពួកគេថា ពួកគេកំពុងធ្វើរឿងត្រឹមត្រូវ ឬស្ថិតនៅកន្លែងត្រឹមត្រូវ ។ សូមពិចារណាអញ្ជើញសិស្សពីរបីនាក់ឲ្យចែកចាយបទពិសោធន៍របស់ពួកគេ ។

សូមផ្ដល់ពេលពីរបីនាទីឲ្យសិស្សសញ្ជឹងគិតពីសំណួរដូចតទៅនេះ ហើយកត់ត្រាគំនិត និងអារម្មណ៍នានាដែលពួកគេអាចទទួលបាន ៖

តើអ្នកមានអារម្មណ៍ថាអ្នកត្រូវធ្វើអ្វីខ្លះដើម្បីទទួលបានការដឹកនាំដែលអ្នកសង្ឃឹមចង់បានមកពីព្រះអម្ចាស់ ?

សូមបញ្ចប់ដោយការលើកទឹកចិត្តសិស្សឲ្យធ្វើតាមអារម្មណ៍ដែលពួកគេបានទទួល ហើយចែកចាយទីបន្ទាល់របស់អ្នកអំពីសេចក្ដីពិតទាំងឡាយ ដែលបានបង្រៀននៅក្នុងមេរៀននេះ ។

សម្រាប់ពេលក្រោយ

សូមពន្យល់សិស្សថា នៅក្នុងឯកសាររៀបចំសម្រាប់មេរៀនក្រោយ ពួកគេនឹងសិក្សាអំពីព្រឹត្តិការណ៍ពេញដោយសោកនាដកម្មបំផុតមួយនៅក្នុងប្រវត្តិសាសនាចក្រ ភ្នំម៉ៃដូស៍ ម៉ាសាក្រី ។ សូមអញ្ជើញសិស្សឲ្យត្រៀមខ្លួនជាស្រេចពេលមកថ្នាក់រៀនដើម្បីពិភាក្សាពីមេរៀនដែលយើងអាចរៀនមកពីបទពិសោធន៍នេះ ។