សៀវភៅសិក្សាសម្រាប់គ្រូបង្រៀន មេរៀនទី ១០ ៖ ការធ្វើតាមព្យាការីនៅរស់របស់ព្រះអម្ចាស់

« សៀវភៅសិក្សាសម្រាប់គ្រូបង្រៀន មេរៀនទី ១០ ៖ ការធ្វើតាមព្យាការីនៅរស់របស់ព្រះអម្ចាស់ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« សៀវភៅសិក្សាសម្រាប់គ្រូបង្រៀន មេរៀនទី ១០ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ

សៀវភៅសិក្សាសម្រាប់គ្រូបង្រៀន មេរៀនទី ១០

ការធ្វើតាមព្យាការីនៅរស់របស់ព្រះអម្ចាស់

សេចក្ដីពិតគ្រឹះមួយនៃដំណឹងល្អដែលបានស្ដារឡើងវិញគឺថា ព្រះអម្ចាស់បន្ដហៅព្យាការីនៅរស់ឲ្យបើកសម្ដែងព្រះទ័យ និងគោលលទ្ធិរបស់ទ្រង់ដល់រាស្ដ្ររបស់ទ្រង់ ។ មេរៀននេះត្រូវបានរៀបចំដើម្បីជួយពង្រឹងការតាំងចិត្តរបស់សិស្ស ក្នុងការធ្វើតាមព្យាការីរបស់ព្រះអម្ចាស់ដោយសេចក្ដីអំណត់ និងសេចក្ដីជំនឿ ។

យោបល់សម្រាប់ការបង្រៀន

ព្រះអម្ចាស់បញ្ជាពួកបរិសុទ្ធឲ្យគោរពតាមពាក្យសម្ដីរបស់ព្យាការីទ្រង់ ។

សូមបង្ហាញរូបភាពមួយរបស់ប្រធានសាសនាចក្រ ហើយសួរសិស្សថា តើពួកគេគិត និងមានអារម្មណ៍យ៉ាងណា នៅពេលពួកគេឃើញរូបភាពនេះ ។

សូមបង្ហាញសេចក្ដីថ្លែងការណ៍ខាងក្រោមដោយអែលឌើរ អូលីសេស សូរ៉េស នៃកូរ៉ុមនៃពួកសាវកដប់ពីរនាក់ដែលមាននៅក្នុងសៀវភៅសិក្សាការរៀបចំ ៖

ការមានពួកព្យាការីគឺជាសញ្ញាមួយនៃសេចក្ដីស្រឡាញ់របស់ព្រះចំពោះកូនចៅរបស់ទ្រង់ ។ ( អូលីសេស សូរ៉េស « ពួកព្យាការីថ្លែងដោយព្រះចេស្ដានៃព្រះវិញ្ញាណបរិសុទ្ធ » Ensign ឬ Liahona ខែ ឧសភា ឆ្នាំ ២០១៨ ទំព័រ ៩៩ )

តើព្យាការីនៅរស់គឺជាសញ្ញាមួយនៃសេចក្ដីស្រឡាញ់របស់ព្រះដល់បុត្រាបុត្រីរបស់ទ្រង់តាមរបៀបណា ? ( សូមលើកទឹកចិត្តសិស្សឲ្យរំឭកអ្វីដែលពួកគេបានសិក្សានៅក្នុងផ្នែកទី ១ នៃសៀវភៅសិក្សាការរៀបចំ ) ។

សូមពន្យល់ថា នៅថ្ងៃដែលសាសនាចក្រត្រូវបានរៀបចំ ព្យាការី យ៉ូសែប ស៊្មីធបានទទួលវិវរណៈមួយមកពីព្រះអម្ចាស់ ដែលមានបទបញ្ញត្តិមួយ និងការសន្យាដល់សមាជិកក្នុងសាសនាចក្ររបស់ទ្រង់ ។ សូមអាន គោលលទ្ធិ និង សេចក្តីសញ្ញា ២១:៤–៥ ជាមួយសិស្ស ដោយស្វែងរកអ្វីដែលព្រះអម្ចាស់បានត្រាស់បង្គាប់ឲ្យសមាជិកសាសនាចក្រធ្វើ ។

តើសេចក្ដីពិតអ្វីដែលយើងអាចស្គាល់ចេញពីបទបញ្ញត្តិរបស់ព្រះអម្ចាស់ដល់ពួកបរិសុទ្ធ ? ( ដោយប្រើសម្ដីរបស់សិស្ស សូមរកមើលសេចក្ដីពិតមួយដែលស្រដៀងគ្នាដូចតទៅនេះ ៖ ព្រះអម្ចាស់ត្រាស់បង្គាប់យើងឲ្យទទួលយកពាក្យសម្ដីរបស់ព្យាការី ហាក់ដូចជាចេញពីព្រះឱស្ឋរបស់ទ្រង់ផ្ទាល់ដោយសេចក្ដីអំណត់ និងសេចក្ដីជំនឿ ) ។
ហេតុអ្វីពេលខ្លះវាតម្រូវឲ្យមានការអត់ធន់ និងសេចក្ដីជំនឿដើម្បីទទួលយក និងស្ដាប់ពាក្យសម្ដីរបស់ព្យាការី ?

ជាថ្នាក់ទាំងមូល ឬជាក្រុមតូចៗ សូមអញ្ជើញសិស្សឲ្យអានស្ថានភាពខាងក្រោមនេះ ហើយពិភាក្សាសំណួរដែលមានបន្ដ ៖

ខណៈជជែកជាមួយមិត្តម្នាក់អំពីសន្និសីទទូទៅថ្មីមួយ មិត្តរបស់បងប្អូនប្រាប់បងប្អូនអំពីការស្មុគស្មាញរបស់នាងក្នុងការទទួលយកអ្វីមួយ ដែលបានបង្រៀនដោយថ្នាក់ដឹកនាំសាសនាចក្រម្នាក់ ។ នាងសួរថា « តើខ្ញុំគួរធ្វើអ្វី ប្រសិនបើខ្ញុំមិនយល់ស្របនឹងអ្វីមួយដែលព្យាការីម្នាក់បានបង្រៀននោះ ? »

ហេតុអ្វីការណ៍នេះអាចជាការខ្វល់ចិត្តដ៏ខ្លាំងមួយសម្រាប់សមាជិកសាសនាចក្រ ?
តើបងប្អូនអាចចែកចាយអ្វីខ្លះជាមួយមិត្តរបស់បងប្អូន ដើម្បីលើកទឹកចិត្តនាងឲ្យធ្វើសកម្មភាពដោយសេចក្ដីអំណត់ និងសេចក្ដីជំនឿ កាលនាងព្យាយាមដោះស្រាយកង្វល់របស់នាង ? ( សូមលើកទឹកចិត្តសិស្សឲ្យគិតអំពី ឬបើចាំបាច់រំឭកពីអ្វីដែលពួកគេបានរៀននៅក្នុងផ្នែកទី ២ នៃសៀវភៅសិក្សាការរៀបចំ ) ។
តើអ្វីដែលបានជួយបងប្អូនឲ្យធ្វើតាមព្យាការីរបស់ព្រះអម្ចាស់ដោយសេចក្ដីអំណត់ និងសេចក្ដីជំនឿ ? ឬ តើបងប្អូនបានរៀនអ្វីខ្លះមកពីសមាជិកគ្រួសារ ឬមិត្តម្នាក់ដែលបងប្អូនបានជជែកជាមួយអំពីសំណួរនេះ ( ដូចបានស្នើនៅក្នុងផ្នែកទី ២ នៃសៀវភៅសិក្សាការរៀបចំ ) ?

សូមសរសេរនៅលើក្ដារខៀន ( ឬសូមបង្ហាញ ) គោលការណ៍មិនពេញលេញដូចតទៅនេះ ៖ កាលយើងគោរពតាមពាក្យសម្ដីរបស់ព្យាការីនៃព្រះអម្ចាស់ដោយសេចក្ដីអំណត់ និងសេចក្ដីជំនឿ …

សូមអាន គោលលទ្ធិ និង សេចក្តីសញ្ញា ២១:៦ ជាមួយសិស្ស ដោយស្វែងរកពរជ័យដែលបានសន្យារបស់ព្រះអម្ចាស់ សម្រាប់ការធ្វើតាមព្យាការីរបស់ទ្រង់ដោយសេចក្ដីអំណត់ និងសេចក្ដីជំនឿ ។

តើអ្នកគិតថា វាមានន័យយ៉ាងណាដែលថា « ទ្វារស្ថាននរកនឹងពុំដែលឈ្នះអ្នកឡើយ » ? ថាព្រះអម្ចាស់នឹង « កម្ចាត់អំណាចនៃសេចក្ដីងងឹតចេញពីអ្នកទៅ »? ថាស្ថានសួគ៌នឹង « ញាប់ញ័រដើម្បីសេចក្ដីល្អដល់អ្នក » ? ( សូមសរសេរចម្លើយរបស់សិស្សនៅលើក្ដារខៀននៅក្រោមសេចក្ដីថ្លែងការណ៍នៃគោលការណ៍មិនពេញលេញនោះ ) ។
តើមានការបង្រៀនថ្មីៗណាខ្លះមកពីព្យាការីរបស់ព្រះអម្ចាស់ ដែលអាចជួយការពារយើងពីអំណាចនៃសេចក្ដីងងឹត ហើយបណ្ដាលឲ្យស្ថានសួគ៌ញាប់ញ័រដើម្បីសេចក្ដីល្អរបស់យើង ? ( សូមពិចារណារៀបចំចែកចាយឧទាហរណ៍ពីរបី ) ។
តើនៅពេលណាដែលឆន្ទៈរបស់បងប្អូនដើម្បីធ្វើតាមការប្រឹក្សារបស់ព្យាការីដោយសេចក្ដីអំណត់ និងសេចក្ដីជំនឿ បាននាំទៅរកពរជ័យទាំងនេះមួយចំនួន ?

សូមផ្ដល់ពេលឲ្យសិស្សសញ្ជឹងគិតដោយការអធិស្ឋានអំពីអ្វីដែលពួកគេអាចធ្វើបាន ដើម្បីធ្វើតាមព្យាការីរបស់ព្រះអម្ចាស់ដោយសេចក្ដីអំណត់ និងសេចក្ដីជំនឿដ៏អស្ចារ្យជាងនេះ ។ ការណ៍នេះអាចរួមមានការគិតអំពីរបៀបដែលពួកគេអាចធ្វើសកម្មភាពតាមការអញ្ជើញ និងការប្រឹក្សារបស់ព្យាការីនាពេលថ្មីៗនេះឲ្យបានកាន់តែពេញលេញ ។ សូមអញ្ជើញសិស្សឲ្យកត់ត្រាគំនិត និងចំណាប់អារម្មណ៍ដែលពួកគេគិតដល់ ។ សូមលើកទឹកចិត្តពួកគេឲ្យធ្វើតាមការបំផុសគំនិតនានា ដែលពួកគេទទួលបានមកពីព្រះវិញ្ញាណ ។

ព្យាការីរបស់ព្រះអម្ចាស់ទទួលវិវរណៈ និងប្រកាសពីគោលលទ្ធិសម្រាប់សាសនាចក្រទាំងមូល ។

សូមឲ្យសិស្សនឹកចាំដល់បទពិសោធន៍ជាមួយហៃរាំ ភេច និងត្បូងរបស់លោកតាមរយៈការសិក្សារបស់ពួកគេក្នុងសៀវភៅសិក្សាការរៀបចំ ។

តើវិវរណៈអះអាងរបស់ហៃរាំ ភេច បានបណ្ដាលឲ្យមានបញ្ហាអ្វីខ្លះដល់សមាជិកសាសនាចក្រ ?

សូមរំឭកសិស្សថា ហៃរាំ ភេចមិនត្រឹមតែបានអះអាងថាបានទទួលវិវរណៈសម្រាប់សាសនាចក្រប៉ុណ្ណោះទេ ប៉ុន្ដែវិវរណៈអះអាងរបស់គាត់ថែមទាំងផ្ទុយពីគោលលទ្ធិ ដែលបានបង្រៀននៅក្នុងបទគម្ពីរ និងវិវរណៈដែលបានទទួលដោយយ៉ូសែប ស្ម៉ីធ ពីមុនៗមកផងដែរ ។ អស់អ្នកដែលបានទទួលយកវិវរណៈរបស់ហៃរាំ ភេចរួមមានសមាជិកគ្រួសារវិតមើរ និង អូលីវើរ ខៅឌើរី ។

សូមអាន គោលលទ្ធិ និង សេចក្តីសញ្ញា ២៨:១–៧ ដោយរកមើលការបង្រៀនរបស់ព្រះអម្ចាស់ដល់ អូលីវើរ ខៅឌើរី និងសមាជិកសាសនាចក្រ ។ សូមចង្អុលបង្ហាញថា « សេចក្ដីអាថ៌កំបាំង » ដែលបានលើកឡើងនៅក្នុងខទី ៧ សំដៅទៅលើ « សេចក្ដីពិតខាងវិញ្ញាណដែលដឹងបានតែតាមរយៈវិវរណៈប៉ុណ្ណោះ » ( សេចក្ដីណែនាំដល់បទគម្ពីរទាំងឡាយ « អាថ៌កំបាំងនៃព្រះ » នៅលើគេហទំព័រ scriptures.ChurchofJesusChrist.org ) ។

តើយើងអាចរៀនសេចក្ដីពិតអ្វីខ្លះមកពីខគម្ពីរទាំងនេះ អំពីអ្នកដែលអាចទទួលបានវិវរណៈសម្រាប់សាសនាចក្រទាំងមូល ? ( សិស្សអាចរកឃើញសេចក្ដីពិតផ្សេងគ្នា រួមទាំងសេចក្ដីពិតដូចតទៅនេះ ៖ មានតែអស់អ្នកដែលកាន់កូនសោដឹកនាំសាសនាចក្រប៉ុណ្ណោះ ទើបមានសិទ្ធិអំណាចទទួលបានវិវរណៈ និងស្ថាបនាគោលលទ្ធិសម្រាប់សាសនាចក្រទាំងមូលបាន ) ។
តើការយល់ដឹងពីសេចក្ដីពិតនេះអាចជួយយើងឲ្យចៀសវាងពីការត្រូវបានបោកបញ្ឆោតយ៉ាងដូចម្ដេច ?

សូមពន្យល់ថា មានភាពខ្ជាប់ខ្ជួនដ៏អស្ចារ្យនៅក្នុងគោលលទ្ធិដែលបានបង្រៀនដោយព្យាការីដ៏ជម្រើសរបស់ព្រះអម្ចាស់នៅក្នុងប្រវត្តិសាស្ដ្រសាសនាចក្រទាំងមូល ។ ទោះយ៉ាងណា សមាជិកមួយចំនួនអាចឆ្ងល់ថាត្រូវធ្វើអ្វី នៅពេលពួកគេឃើញសេចក្ដីថ្លែងការណ៍មួយធ្វើឡើងពីអតីតកាលដោយអ្នកដឹកនាំសាសនាចក្រម្នាក់ ដែលមើលទៅមិនខ្ជាប់ខ្ជួននឹងគោលលទ្ធិដែលបានបង្រៀននៅសព្វថ្ងៃនេះ ។

តើមានគោលការណ៍អ្វីខ្លះ ដែលអាចដឹកនាំឲ្យស្គាល់គោលលទ្ធិរបស់ព្រះអម្ចាស់ ដូចបានបង្រៀនដោយពួកព្យាការីនៅរស់របស់ទ្រង់ ? ( បងប្អូនអាចអញ្ជើញសិស្សឲ្យរំឭកសេចក្ដីថ្លែងការណ៍ដោយអែលឌើរ ឌី ថត គ្រីស្តូហ្វឺសិន និង នែល អិល អាន់ឌើរសិន នៅក្នុងផ្នែកទី ៣ នៃសៀវភៅសិក្សាការរៀបចំ ) ។

ជាផ្នែកនៃការពិភាក្សានេះ បងប្អូនអាចចែកចាយសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ៖

អ្នកអាចនឹងមិនយល់ការប្រកាសចេញពីព្យាការី ដែលកំពុងរស់នៅជានិច្ចនោះទេ ។ ប៉ុន្តែពេលអ្នកដឹងថា ព្យាការីគឺជាព្យាការី នោះអ្នកអាចចូលទៅជិតព្រះអម្ចាស់ដោយការបន្ទាបខ្លួន និង សេចក្ដីជំនឿ រួចទូលសុំសាក្សីផ្ទាល់ខ្លួនអំពីអ្វីគ្រប់យ៉ាង ដែលព្យាការីបានប្រកាស ។ ( រ័សុល អិម ណិលសុន « Stand as True Millennials » Ensign ខែ តុលា ឆ្នាំ ២០១៦ ទំព័រ ៣១ )

សូមពិចារណាបញ្ចប់មេរៀននេះដោយការចែកចាយទីបន្ទាល់របស់បងប្អូនអំពីព្យាការីនៅរស់ និងពរជ័យនៃការធ្វើតាមពួកលោកដោយសេចក្ដីអំណត់ និងសេចក្ដីជំនឿ ។

សម្រាប់ពេលក្រោយ

សូមពន្យល់ថា ថ្នាក់លើកក្រោយនឹងផ្ដោតលើប្រធានបទមួយដែលប្រធាន រ័សុល អិម ណិលសុន បានសំដៅទៅថាជា « ឧបសគ្គដ៏អស្ចារ្យបំផុត បុព្វហេតុដ៏អស្ចារ្យបំផុត និងកិច្ចការដ៏អស្ចារ្យបំផុតនៅលើផែនដីសព្វថ្ងៃនេះ » ( « សេចក្ដីសង្ឃឹមនៃអ៉ីស្រាអែល » [ ការប្រជុំធម្មនិដ្ឋានយុវវ័យទូទាំងពិភពលោកនៅថ្ងៃទី ៣ ខែ មិថុនា ឆ្នាំ ២០១៨ ] បំពេញបន្ថែមឲ្យ New Era និង Ensign ៤–៥ នៅលើគេហទំព័រ ChurchofJesusChrist.org; អក្សរទ្រេតដើម ) ។ សូមអញ្ជើញសិស្សឲ្យសិក្សាក្នុងសៀវភៅសិក្សាការរៀបចំសម្រាប់មេរៀនលើកក្រោយ ហើយមករៀនដោយបានការរៀបចំខ្លួនដើម្បីពិភាក្សាពីគោលបំណង និងពរជ័យនៃការចូលរួមក្នុងបុព្វហេតុដ៏អស្ចារ្យនេះ និងកិច្ចការនៃការប្រមូលផ្ដុំអ៉ីស្រាអែល ។