សៀវភៅការសិក្សាសម្រាប់គ្រូបង្រៀន មេរៀនទី ៥ ៖ ការលេចចេញមកនៃព្រះគម្ពីរមរមន

« សៀវភៅសិក្សាសម្រាប់គ្រូបង្រៀន មេរៀនទី ៥ ៖ ការលេចចេញមកនៃព្រះគម្ពីរមរមន » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« សៀវភៅសិក្សាសម្រាប់គ្រូបង្រៀន មេរៀនទី ៥ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ

សៀវភៅសិក្សាសម្រាប់គ្រូបង្រៀន មេរៀនទី ៥

ការលេចចេញមកនៃព្រះគម្ពីរមរមន

ការលេចចេញមកនៃព្រះគម្ពីរមរមនបានកើតឡើងតាមរបៀបដ៏អព្ភូតហេតុមួយ ។ មេរៀននេះនឹងជួយសិស្សឲ្យយល់កាន់តែច្បាស់ពីរបៀប ដែលព្រះគម្ពីរមរមនត្រូវបានបកប្រែដោយ « អំណោយទាន និងព្រះចេស្តានៃព្រះ » ( គោលលទ្ធិ និង សេចក្ដីសញ្ញា ១៣៥:៣ ) ។ សិស្សក៏នឹងគិតដល់ និងមានឱកាសចែកចាយសក្ខីភាពរបស់ពួកគេអំពីភាពពេញលេញនៃសេចក្ដីពិតក្នុងព្រះគម្ពីរមរមន ។

យោបល់សម្រាប់ការបង្រៀន

អភិវឌ្ឍការបង្រៀន និងការរៀនសូត្ររបស់យើង

បង្រៀនឲ្យប្រែចិត្តជឿ ។ ប្រធាន ហិនរី ប៊ី អាវរិងបានបង្រៀនថា ៖ « យើងត្រូវតែលើកកម្ពស់ការយល់ដឹងរបស់យើង ។ យើងត្រូវតែរក្សាគោលដៅទាំងឡាយ ដែលយើងត្រូវមានជានិច្ច ៖ ការចុះឈ្មោះចូលរៀន ចូលរៀនទៀងទាត់ ការបញ្ចប់ការសិក្សា ចំណេះដឹងពីបទគម្ពីរ បទពិសោធន៍នៃការទទួលអារម្មណ៍ពីព្រះវិញ្ញាណបរិសុទ្ធបញ្ជាក់នូវសេចក្តីពិត ។ លើសពីនេះ យើងត្រូវតែដាក់គោលដៅដើម្បីជួយសិស្សឲ្យរៀបចំសម្រាប់តំបន់បេសកកម្ម និងព្រះវិហារបរិសុទ្ធ ។ ប៉ុន្តែសិស្សទាំងឡាយត្រូវការច្រើនបន្ថែមទៀតក្នុងពេល ដែលពួកគេជាសិស្សរបស់យើង ។ …

ដំណឹងល្អដ៏បរិសុទ្ធរបស់ព្រះយេស៊ូវគ្រីស្ទត្រូវតែចូលជ្រៅទៅក្នុងដួងចិត្តរបស់សិស្សទាំងឡាយ ដោយព្រះចេស្តានៃព្រះវិញ្ញាណបរិសុទ្ធ ។ … គោលដៅរបស់យើងត្រូវតែធ្វើឲ្យពួកគេបានប្រែក្លាយជាអ្នកប្រែចិត្តជឿយ៉ាងពេញលេញចំពោះដំណឹងល្អ ដែលបានស្ដារឡើងវិញរបស់ព្រះយេស៊ូវគ្រីស្ទ ខណៈពេលពួកគេនៅជាមួយនឹងយើង » ( « We Must Raise Our Sights » [ សន្និសីទប្រព័ន្ធអប់រំសាសនាចក្រអំពីព្រះគម្ពីរមរមនថ្ងៃទី ១៤ ខែ សីហា ឆ្នាំ ២០០១ ] ទំព័រ២ ) ។

ព្រះគម្ពីរមរមនបានលេចចេញមក « ដោយអំណោយទាន និងព្រះចេស្ដានៃព្រះ » ។

សូមបង្ហាញរូបភាពមរ៉ូណៃកប់ផ្ទាំងចំណារមាស ។

សូមឲ្យសិស្សពិពណ៌នាពីអ្វីដែលពួកគេដឹងអំពីអ្វីដែលកំពុងកើតឡើងនៅក្នុងរូបភាពនេះ ។ បងប្អូនក៏អាចសួរពីអ្វីដែលពួកគេគិតថា មរ៉ូណៃបានដឹងអំពីឥទ្ធិពលដែលកំណត់ត្រានេះនឹងមានលើមនុស្សជំនាន់អនាគត ។

សូមអញ្ជើញសិស្សឲ្យអាន មរ៉ូណៃ ៨:១២–១៦ ដោយរកមើលអ្វីដែលមរ៉ូណៃបានបង្រៀនអំពីការលេចចេញមកនៃព្រះគម្ពីរមរមន ។

តើមរ៉ូណៃចង់បញ្ជាក់អ្វីឲ្យច្បាស់អំពីការលេចចេញមកនៃព្រះគម្ពីរមរមន ?

សូមបង្ហាញសេចក្ដីថ្លែងការណ៍ខាងក្រោមដោយ យ៉ូសែប ស៊្មីធ ដែលលោកបានថ្លែងឡើងវិញជាញឹកញាប់ ពេលគេសួរលោកអំពីការបកប្រែព្រះគម្ពីរមរមន ៖

ខ្ញុំបានបកប្រែព្រះគម្ពីរមរមនដោយអំណោយទាន និងព្រះចេស្ដានៃព្រះ ។ ( យ៉ូសែប ស៊្មីធ នៅក្នុងជេមស៍ ផាលមើរ សៀវភៅកំណត់ហេតុ ៧៥ បណ្ណាល័យប្រវត្តិសាស្រ្តសាសនាចក្រ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទីក្រុង សលត៍ លេក រដ្ឋ យូថាហ៍ ) ។

សូមឲ្យសិស្សចែកចាយពីអ្វីដែលពួកគេបានរកឃើញក្នុងសៀវភៅសិក្សាការរៀបចំ អំពីរបៀបដែលព្រះគម្ពីរមរមនបានលេចចេញមក « ដោយអំណោយទាន និងព្រះចេស្ដានៃព្រះ » ។ ( ប្រសិនបើចាំបាច់ សូមលើកទឹកចិត្តសិស្សឲ្យរំឭកផ្នែកទី ១ ត្រួសៗនៃសៀវភៅសិក្សាការរៀបចំ ) ។ បងប្អូនក៏អាចសូមឲ្យពួកគេសួរសំណួរនានា ដែលពួកគេអាចមានមកពីការសិក្សារបស់គេអំពីការបកប្រែនៃព្រះគម្ពីរមរមនផងដែរ ។

សូមអញ្ជើញសិស្សឲ្យរំឭកពីអ្វីដែលពួកគេបានរៀនមកពីសេចក្ដីថ្លែងការណ៍របស់យ៉ូសែប ស៊្មីធ និងអែលឌើរ នែល អេ ម៉ាកស្វែល នៅចុងបញ្ចប់នៃផ្នែកទី ១ នៃសៀវភៅសិក្សាការរៀបចំ ។ ( បងប្អូនគួរតែអញ្ជើញសិស្សម្នាក់ឲ្យអានសេចក្ដីថ្លែងការណ៍ទាំងនេះឮៗ ) ។

ហេតុអ្វីបងប្អូនគិតថា យើងគួរតែខ្វល់អំពី « ធាតុនៃព្រះគម្ពីរ » ជាងពី « ដំណើរការដែលយើងបានទទួលវា » ?

ព្រះសន្យាថា បុគ្គលទាំងអស់អាចទទួលបានការបញ្ជាក់សាក្សីអំពីព្រះគម្ពីរមរមន ។

សូមសួរសិស្សថា តើពួកគេប៉ុន្មាននាក់ដែលចង់ឃើញផ្ទាំងចំណារមាសដោយខ្លួនគេផ្ទាល់ ហើយតើហេតុអ្វី ។

ហេតុអ្វីបងប្អូនគិតថា ព្រះអម្ចាស់មិនបញ្ជាក់ពីភាពពិសេសនៃព្រះគម្ពីរមរមន តាមរយៈការអនុញ្ញាតឲ្យពិភពលោកនេះឃើញផ្ទាំងចំណារ និងរបស់ផ្សេងទៀត ?

សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ៥:៣, ៦–៧ ដោយរកមើលមូលហេតុដែលយ៉ូសែបមិនបានបង្ហាញផ្ទាំងចំណារនេះដល់អស់អ្នកដែលចង់បានភស្ដុតាង ។ សូមឲ្យសិស្សពន្យល់ពីអ្វីដែលខគម្ពីរនេះបង្រៀន ។

សូមពន្យល់ថា វិវរណៈនេះត្រូវបានប្រទានដល់យ៉ូសែបជាលទ្ធផលមកពីម៉ាទិន ហារីសបានសុំសាក្សីមួយថា យ៉ូសែបពិតជាមានផ្ទាំងចំណារមាសមែន ។ ម៉ាទិនគឺជាមិត្តរបស់យ៉ូសែប ហើយមានសមត្ថភាពខាងហិរញ្ញវត្ថុដើម្បីជួយបោះពុម្ពព្រះគម្ពីរមរមន ពេលវាបានបកប្រែហើយ ។ ភរិយារបស់ម៉ាទិន លូស៉ី បាននាំពាក្យប្ដឹងផ្ដល់ទៅតុលាការក្នុងស្រុក ដោយចោទថាយ៉ូសែបបានបោកបញ្ឆោតស្វាមីរបស់នាង និងមនុស្សដទៃទៀតដើម្បីទទួលបានផលចំណេញខាងហិរញ្ញវត្ថុ ។ នៅខែ មីនា ឆ្នាំ ១៨២៩ ម៉ាទិនបានទៅភូមិហាម៉ូនី រដ្ឋផែនស៉ីលវេនញ៉ាដើម្បីសូមយ៉ូសែប ស្ម៉ីធ មើលភស្តុតាងថាពិតជាមានផ្ទាំងចំណារមែន ។

សូមអញ្ជើញសិស្សឲ្យអាន គោលលទ្ធិ និង សេចក្តីសញ្ញា ៥:១១–១៥ ដោយរកមើលរបៀបមួយ ដែលព្រះអម្ចាស់បានស្ថាបនាសេចក្ដីពិតនៃកំណត់ត្រាព្រះគម្ពីរមរមន ។ សូមសិស្សឲ្យពន្យល់ពីអ្វីដែលពួកគេបានរៀនមកពីខគម្ពីរទាំងនេះ ។

សូមពន្យល់ថា ព្រះអម្ចាស់បានបើកសម្ដែងថា ម៉ាទិន ហារីសអាចធ្វើជាសាក្សីម្នាក់នៃសាក្សីទាំងបី ប្រសិនបើគាត់ « ក្រាបចុះ » ហើយ « បន្ទាបខ្លួនដោយនូវការអធិស្ឋាន និងសេចក្ដីជំនឿដ៏ខ្លាំងក្លា ឲ្យអស់ពីដួងចិត្តលោក » ( គោលលទ្ធិ និង សេចក្តីសញ្ញា ៥:២៤ ) ។ បីខែក្រោយមក យ៉ូសែបបានអញ្ជើញម៉ាទិស ហារីសឲ្យចូលរួមនឹង អូលីវើរ ខៅឌើរី និង ដេវីឌ វិតមើរ ក្នុងការស្វែងរកសាក្សីពិសេស ដែលព្រះអម្ចាស់បានសន្យា ។

សូមបង្ហាញរូបភាពយ៉ូសែប ស៊្មីធ និង សាក្សីទាំងបីនាក់ ពីក្នុងសៀវភៅសិក្សាការរៀបចំ ហើយសូមឲ្យសិស្សក្នុងថ្នាក់នឹកចាំពីអ្វីដែលបានកើតឡើង នៅពេលបុរសទាំងនេះបានអធិស្ឋានទូលសូមសាក្សីមួយនៃផ្ទាំងចំណារ ។

តើយ៉ូសែប ស៊្មីធបានមានអារម្មណ៍យ៉ាងណា អំពីសាក្សីទាំងបីដែលបានឃើញផ្ទាំងចំណារនេះ ? ( ប្រសិនបើចាំបាច់ សូមសិស្សឲ្យរំឭកពីដំណើររឿងរបស់លូស៉ី ម៉ាក ស្ម៉ីធ ក្នុងសៀវភៅសិក្សាការរៀបចំ ) ។
តើទីបន្ទាល់នៃពួកសាក្សីទាំងបីនាក់ត្រូវបានពង្រឹងដោយការពិតដែលពួកគេមិនអាចបដិសេធសាក្សីរបស់ពួកគេ ទោះជាពេលពួកគេម្នាក់ៗបានចាកចេញពីព្យាការី និងសាសនាចក្រហើយក្ដីដោយរបៀបណា ?

សូមអញ្ជើញសិស្សឲ្យអាន គោលលទ្ធិ និង សេចក្តីសញ្ញា ៥:១៥–១៦ និង មរ៉ូណៃ ១០:៣–៥ ដោយរកមើលរបៀបដែលមនុស្សទាំងអស់អាចទទួលបានសាក្សីមួយអំពីភាពពេញលេញនៃសេចក្ដីពិតក្នុងព្រះគម្ពីរមរមន ។ ពេលសិស្សពន្យល់ពីអ្វីដែលពួកគេបានរៀនពីវគ្គបទគម្ពីរទាំងនេះ សូមជួយពួកគេឲ្យស្គាល់គោលការណ៍មួយ ដែលស្រដៀងទៅនឹងអ្វីដូចតទៅនេះ ៖ ព្រះអម្ចាស់នឹងបើកសម្ដែងសេចក្ដីពិតពេញលេញនៃព្រះគម្ពីរមរមនតាមរយៈព្រះវិញ្ញាណបរិសុទ្ធដល់អ្នកទាំងអស់ដែលស្វែងរកសាក្សីមួយ ។

តើសាក្សីមួយមកពីព្រះវិញ្ញាណបរិសុទ្ធប្រៀបបានទៅនឹងភស្ដុតាងរូបីយដោយរបៀបណា ដូចជាការឃើញផ្ទាំងចំណារ ឬការមានចំណេះដឹងពេញលេញអំពីសេចក្ដីលម្អិតទាំងអស់នៃការបកប្រែព្រះគម្ពីរមរមន ?

សូមអញ្ជើញសិស្សម្នាក់ឲ្យអានដំណើររឿងខាងក្រោមមកពីបងប្រុស ថាត អរ ខាលីស្ទើរ អតីតប្រធានសាលាថ្ងៃអាទិត្យទូទៅ ៖

មិត្តភក្ដិដ៏ល្អ និងវាងវៃម្នាក់របស់ខ្ញុំបានចាកចេញពីព្រះវិហារអស់មួយរយៈពេល ។ ថ្មីៗនេះគាត់បានសរសេរសំបុត្រមកខ្ញុំប្រាប់អំពីការត្រឡប់មកវិញរបស់គាត់ ៖ « ដំបូង ខ្ញុំចង់ឲ្យព្រះគម្ពីរមរមនបង្ហាញភស្តុតាងដល់ខ្ញុំអំពីប្រវត្តិ ភូមិសាស្ត្រ ភាសាវិទ្យា និងវប្បធម៌ ។ ប៉ុន្តែពេលខ្ញុំបានផ្លាស់ប្តូរការផ្តោតចិត្តទុកដាក់របស់ខ្ញុំទៅលើការបង្រៀននៃព្រះគម្ពីរអំពីដំណឹងល្អនៃព្រះយេស៊ូវគ្រីស្ទ និងបេសកកម្មសង្គ្រោះរបស់ទ្រង់ នោះខ្ញុំបានចាប់ផ្តើមទទួលទីបន្ទាល់អំពីភាពពោរពេញនៃសេចក្តីពិតរបស់គម្ពីរនេះ ។ ថ្ងៃមួយអំឡុងពេលអានព្រះគម្ពីរមរមននៅក្នុងបន្ទប់ ខ្ញុំបានឈប់មួយសន្ទុះ លុតជង្គង់ចុះ ហើយបានអធិស្ឋានដោយស្មោះអស់ពីដួងចិត្ត ហើយបានទទួលអារម្មណ៍យ៉ាងច្បាស់លាស់ថា ព្រះវរបិតាសួគ៌បានខ្សឹបប្រាប់ដល់វិញ្ញាណខ្ញុំថា សាសនាចក្រ និងព្រះគម្ពីរមរមនគឺពិតប្រាកដមែន ។ អំឡុងពេលបីឆ្នាំកន្លះរបស់ខ្ញុំក្នុងការរៀនពីសាសនាចក្រឡើងវិញ បាននាំខ្ញុំឲ្យត្រឡប់មកកាន់ភាពពោរពេញនៃសេចក្តីពិតនៃព្រះគម្ពីរនេះទាំងស្រុង និងដោយការជឿជាក់ » ។

ប្រសិនបើមនុស្សម្នាក់ឆ្លៀតពេលអានដោយរាបសា និងពិចារណាអំពីព្រះគម្ពីរមរមន ដូចជាមិត្តខ្ញុំបានធ្វើ ហើយស្តាប់តាមផលផ្លែដ៏ផ្អែមល្ហែមនៃព្រះវិញ្ញាណ នោះទីបំផុតគាត់នឹងទទួលបាននូវសាក្សីដែលគាត់ប៉ងប្រាថ្នា ។

ព្រះគម្ពីរមរមនគឺជាអំណោយមួយដែលពុំអាចកាត់ថ្លៃបានមកពីព្រះសម្រាប់ពួកយើង ។ ( ថាត អរ ខាលីស្ទើរ « God’s Compelling Witness: The Book of Mormon » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ១០៩ )

តើបទពិសោធន៍អ្វីខ្លះដែលបានជួយបងប្អូនឲ្យដឹងថា ព្រះគម្ពីរមរមនគឺពិត ? ( សូមផ្ដល់ឱកាសឲ្យសិស្សចែកចាយអ្វីដែលពួកគេបានសរសេរនៅក្នុងសៀវភៅសិក្សាការរៀបចំរបស់ពួកគេនៅចុងបញ្ចប់នៃផ្នែកទី ២ ) ។

សូមបញ្ចប់ដោយការចែកចាយទីបន្ទាល់របស់បងប្អូនថា ខណៈយើងមិនបានឃើញផ្ទាំងចំណារមាស ហើយក៏មិនមានវត្តមាននៅពេលព្រះគម្ពីរមរមនបានបកប្រែ ក៏យើងអាចអាន និងសិក្សាគម្ពីរនេះ ហើយទទួលបានសាក្សីខាងវិញ្ញាណមួយសម្រាប់ខ្លួនយើងថា វាពិតជាព្រះបន្ទូលរបស់ព្រះមែន ។

សម្រាប់ពេលក្រោយ

សូមឲ្យសិស្សពិចារណាពីមូលហេតុដែលមតិរិះគន់ដល់សាសនាចក្ររបស់ព្រះអម្ចាស់វាយលុកសំដៅលើព្រះគម្ពីរមរមនយ៉ាងខ្លាំង ។ សូមលើកទឹកចិត្តសិស្សក្នុងថ្នាក់ឲ្យសិក្សាសៀវភៅសិក្សាការរៀបចំសម្រាប់ថ្នាក់រៀនលើកក្រោយ ហើយរកមើលរបៀបដែលពួកគេអាចបង្កើនសមត្ថភាពរបស់គេដើម្បីការពារព្រះគម្ពីរមរមន ។