Khaolo ea 25
Molao oa Bohloeki
Ntat’a rona ea Maholimong o re nehile matla a halalelang ho ba le bana. O re boleletse na re sebelise matla ana joang. Ha re a sebelisa ka nepo, re ka thaba haholo.
Ntat’a rona ea Maholimong O re Boleletse Ho Ba le Bana le Ho Mamela Molao oa Bohloeki
Ha Adama le Eva ba se ba nyalane, Ntat’a rona ea Maholimong o ile a ba bolella hore ba be le bana. O ile a bolella Adama le mosali oa hae Eva, ho ba le bana hore meea e maholimong e tle lefats’eng ho amohela ’mele ea nama le masapo. ’Mele oa nama le masapo ke mpho ea bohlokoahali eo Ntat’a ea rona Maholimong a re nehileng eona. Ntat’a rona ea Maholimong o na le ’mele oa nama le masapo, ’me O batla bana ba hae ba be joaloka Eena.
Matla a ho ba le bana a ea halalela. Ntat’a rona ea Maholimong o re nehile molao oo re bolellang na re sebelise matla ana joang. Molao ona o bitsoa molao oa bohloeki. O re re lokela ho ba le likamano tsa thobalano feela le motho eo re nyalaneng ka molao. Hona ho bolela hore ha rea lokela ho ba le likamano tsa thobalano pele ho lenyalo, ’me kamor’a lenyalo re lokela hoba le likamano tsa thobalano feela le balekane ba rona.
Ho bolaea mpa, kapa ho tlosa lesea le so hlahe mpeng ea ’ma lona, le ho lumella hore le shoe kapa ho bolaea ngoana a sale mpeng ea ’m’e, ke phoso ntle le haeba ho na le maemo a ikhethang, a tlamehang ho shejoa ka hlokolosi ka thapelo le ka thuso ea mobishopo kapa mookameli oa lekalana. Ha rea lokela ho thusa mang kapa mang ho boloaea mpa.
Batsoali ke bona ba lokelang ho ruta bana ba bona ka molao oa bohloeki. Batsoali ba lokela ho ba ruta hore ’mele ea bona e ea halalela le hore ha ba ea lokela ho lumella ho ts’oaroa lithong tse itseng tsa ’mele ea bona. Ba lokela ho lokisa menahano ea bona e fosahetseng le mantsoe ao ba ithutang oona ho ba bang.
Bana ha ba hola ba lokela ho rutoa hore Ntat’a rona ea Maholimong o re nehile matla a ho ba le bana le hore ho sebelisa matla ana kamor’a hore re nyalane ho nepahetse. Ha bana ba rona ba na le lilemong tse 12 kapa 13, re lokela hore re be re se re ba thusitse ho utloisisa hore na bana ba etsoa joang. Re hloka ho ba ruta esale nako ka tsela e masene ho ba sireletsa bobeng kapa lithutong tsa leshano.
Puisano
-
Hobaneng ha Ntat’a rona ea Maholimong a re neha matla a ho ba le bana?
-
Molao oa bohloeki ke eng?
-
Ke eng eo re lokelang ho e ruta bana ba rona ke ’mele ea bona?
Satane o Batla Re Robe Molao oa Bohloeki
Satane o batla ho re thibela ho khutlela ho Ntat’a rona ea Maholimong. Satane o batla re robe molao oa bohloeki. O batla re nahane hore matla a ho ba le bana ha a halalele. O batla re nahane hore ho roba molao oa bohloeki ha se sebe.
Satane o sebelisa litsela tse bohlale ho re susumetsa ho roba molao ona. O leka ho etsa hore re nahane hore ho lumella ba bang ho sheba le ho ts’oara ’mele ea rona ho amohelehile. Satane o batla re nahane bobe. O re khothaletsa ho sheba lits’oants’o, lifilimi, le motjeko tse re lekang hore re se hloeke. O re khothaletsa ho nka karolo motjekong le ho mamela lipale, metlae, le ’mino tse re lekang hore re se hloeke. Satane o batla re etse tsena hore ’mele ea rona e seke ea bonahala e halalela le hore re sebelise matla ho ba le bana ka tsela e fosahetseng.
Ka nako e ’ngoe Satane o re leka ka boikutlo ba rona. Satane o ea tseba ha re le bolutu, re ferekane, kapa re sa thaba. O khetha tsona linako tsena tsa bofokoli ho etsa hore re robe molao oa bohloeki. O batla re nahane hore re na le tokelo ea ho sebelisa matla ho ba le bana ka tsela eo re batlang ho a sebelisa ka eona. O leka ho etsa hore re nahane hore ha ho se sebe se tlang ho etsahala ho rona ha re roba molao oa bohloeki.
Ntat’a rona ea Maholimong a ka re neha matla a ho hlola liteko tsa Satane. Ha a batle re bone lintho tse khopo kapa menahano e khopo. O re ts’episitse hore A ke ke a lumella Satane ho re leka ho feta ka moo re ka tsebang ho hana. O lokisitse tsela eo re ka hlolang meleko ka eona.
Re ka rapela ho Ntat’a rona ea Maholimong ho re thusa ho hlola Satane. Ha re rapela, Ntat’a rona ea Maholimong o tla romela Moea o Halalelang ho re thusa. Moea o Halalelang o tla re thusa ho hopola hore ’mele ea rona e ea halalela le hore matla a ho ba le bana a ea halalela. Moea o Halalelang o tla re thusa ho se sebelise matla ana ka tsela e fosahetseng. O tla re thusa ho khetha lintho tse lokileng tseo re li bonang, tseo re li balang, le tseo re li nahanang. O tla re thusa ho hopola hore ho roba molao oa bohloeki ho tla etsa hore re hloname le hore ho mamela molao ona ho tla re thabisa.
Puisano
-
Hobaneng ha Satane a batla re robe molao oa bohloeki?
-
Ke eng seo re lokelang ho se etsa ho hlola liteko tsa Satane?
-
Ntat’a rona ea Maholimong o tla re thusa joang ho mamela molao oa bohloeki?
Ho Roba Molao oa Bohloeki Ke Sebe se Tebileng Haholo
Likamano tsa thobalano li lokile le ho hloeka ha li etsoa ke monna le mosali ba ratanang le ho hlomphana. Ke tsela eo Ntat’a rona ea Maholimong a re nehileng eona hore re be le bana. Hape ke tsela eo balekane ba bonts’anang lerato la bona le ho ba haufi le e mong boikutlong ba bona. Empa ho ba le likamano tsa thobalano kantle ho lenyalo ke sebe se tebileng haholo.
Ho roba molao oa bohloeki ho etsa hore re hloname. Ha re hlokomela hore ha rea mamela Ntat’a rona ea Maholimong, re ikutloa re le molato re bile re le lihlong. Re tla hlokomela hore re sebelisitse matla a halalelang ao A re nehileng oona ka tsela e fosahetseng le hore re entse hore batho ba bang ba hloname. Ho roba molao oa bohloeki ho ka etsa hore ngoana a se hlahele lelapeng le loketseng.
Ke libe tse peli feela tse tebileng ho feta ho roba molao oa bohloeki. Tsona ke ho latola Moea o Halalelang le ho bolaea. Ba robileng molao oa bohloeki ba ka ts’oareloa. Ntat’a rona ea Maholimong o re bolelletse hore ha ba ka ba le tumelo ho Jesu ba baka libe tsa bona, O tla ba ts’oarela. Ba robang molao oa bohloeki ebe ha ba bake, ba ke ke ba phela le Ntat’a rona ea Maholimong.
Ba ileng ba betoa kapa ba hlekefetsoa ka motabo ha ba molato oa ho roba molao oa bohloeki.
Ts’oarelo e ka tla feela ka tumelo ho Jesu le ka pako. Re lokela ho hlokomela hore re sitiloe le ho soabela ele kannete liphoso tseo re li entseng. Re lokela ho emisa ho etsa ntho e fosahetseng ebe re ipolela libe ho Ntat’a rona ea Maholimong, ho motho eo re mo utloisitseng bohloko, le ho boporista bo lokelang (mobishopo, mookameli oa lekalana, mookameli oa setereke se ikemetseng, le mookameli oa bon’gosa ba kereke). Ntat’a rona ea Maholimong o boletse hore O tla ts’oarela ba nang le tumelo ho Jesu, ba ipolelang libe ho Ntat’a rona ea Maholimong le ho moetapele oa Kereke ea lokelang, le ea bakang kannete. E mong le e mong ea sa etseng lintho tsena ha a baka e le kannete ’me a ke ke a ts’oareloa.
Puisano
-
Hobaneng ho roba molao oa bohloeki e le sebe se tebileng haholo?
-
Ke eng e ka etsahalang ho rona ha re roba molao oa bohloeki?
-
Ke hobaneng ke lokela ho boloka molao oa bohloeki?
-
Ke eng eo re ka e etsang ho baka ha re robile molao oa bohloeki?
Ho Mamela Molao oa Bohloeki Ho Etsa Hore re Thabe
Ka ho mamela molao oa bohloeki, re bonts’a mohlala o motle ho bana ba rona hore ba latele. Ntat’a rona ea Maholimong o thabisoa ke rona ha re Mo mamela. Ha re o mamela, ba malapa a rona ba ea tseba hore rea ba rata, ’me ha re na lebaka la ho hlonama kapa ho soaba. Re ba joaloka Ntat’a rona ea Maholimong. Ntat’a rona ea Maholimong o hlohonolofatsa rona le bana ba rona, kapa bana bao re tlang ho ba le bona ha re mamela molao oa bohloeki.
Ho sebelisa matla ao Ntat’a rona ea Maholimong a a behileng ’meleng ea rona kahar’a lenyalo ho tlisa thabo. Ho balekane, ho ba le likamano tsa thobalano ho ka tlisa thabo. Ho ka ba etsa ba utloane ka boikutlo bo tebileng ba lerato. Bana ba ka hlahang ke tlhohonolofatso e hlahang ho Ntat’a rona ea Maholimong. Leha ka nako e ’ngoe bana ba tlisa ho ts’oenyeha kapa ho hlonama ho batsoali ba bona, hape ba tlisa thabo e kholo. E ’ngoe ea thabo e kholohali eo re e tsebang bophelong ba rona e tlisoa ke ha bana ba rona ba hola, ba ithuta, le ho ba le bana ba bona.
Puisano
-
Ke litlhohonolofatso life tseo re li amohelang ha re mamela molao oa bohloeki?
-
Hobaneng ha re thaba ha re mamela molao oa bohloki ho feta ha re sa o mamele?