Baetapele ba Kereke ba etelletseng pele Boporista ke Boetapele ba Pele le Lekhotla la Ba-Apostola Ba Leshome le Metso e ’meli. Ho na le banna le basali ba bangata ba thusang ho etella pele mosebetsi oa Kereke.
Khaolo ea 20
Lekhotla la Boporista
Motho a ka fumana tokelo joang ea ho etsa mosebetsi oa Ntat’a rona ea Maholimong?
Ha Monna A Ena Le Boporista, A Ka Ema Lebitsong La Ntat’a rona ea Maholimong
Boporista ke tokelo eo Ntat’a rona ea Maholimong a e nehang banna ba lokelang le bahlankana ho etsa mosebetsi oa Hae lefats’eng. O nehile Jesu tokelo ena. Jesu o neha banna ba lefats’eng tokelo ena. Banna le bahlankana ba nang le boporista ba ema sebakeng sa Ntat’a rona ea Maholimong le Jesu. Ba ka etsa lintho tseo banna le bahlankana ba bang ba ke keng ba li etsa. E ka ba baruti har’a lichaba ba ruta evangeli ea ’nete ea Jesu Kreste. Ba ka hlohonolofatsa bakuli. Ba ka etsa mesebetsi e halalelang ka har’a Kereke.
Jesu o re bolelletse tsela ea ho nehelana ka boporista ho monna e mong kapa mohlankana. Monna ea nang le boporista o beha matsoho a hae hloohong ea monna kapa mohlankana. E be o mo neha matla a boporista ka lebitso la Jesu Kreste le ka tokelo ea boporista boo a nang le bona.
Ke monna kapa mohlankana ea mamelang litaelo tsa Jesu feela ea ka amohelang boporista. Jesu o tla lumella feela banna le bahlankana ho etsa mosebetsi oa Hae ha ba mamela litaelo tsa Hae.
Ha hona motho e moholo lefats’eng ho feta monna kapa mohlankana ea sebelisang boporista ka tsela e nepahetseng.
Puisano
-
Boporista ke eng?
-
Ke mang ea ka amohelang boporista?
Boporista Bo Arotsoe Ka Likarolo Tse Peli
Likarolo tse peli tsa boporista ke Boporista ba Arone le Boporista ba Melkisedeke. Boporista ba Aarone bo bitsoa boporista bo bonyenyane. Boporista ba Melkisedeke bo bitsoa boporista bo boholo.
Boporista ba Aarone
Boporista ba Aarone bo reheletsoe ka Aarone, e leng moholoane oa moporofeta Moshe. Aarone e ne e le moetapele ka nako ea Moshe.
Motho e motona eo e leng setho sa kereke, ea lokeloang ke ho amohela Boporista ba Aarone ho tloha maqalong a khoeli ea Pherekhong ha aba le lilemo tse leshome le metso e meli. Banna le bahlankana ba nang le Boporista ba Aarone ba ka ruta batho. Ba bang ba nang le Boporista ba Aarone ba ka kolobetsa batho. Ba thusa batho ho hopola Jesu. Ba ka thusa batho ka tsela tse ngata.
Boporista ba Melkisedeke
Boporista ba Melkisedeke bo reheloetsoe ka monna ea bitsoang Melkisedeke. Melkisedeke e ne e le monna ea lokileng haholo ea nang le boporista. O ne a phela nakong ea Abrahama. E bile Moporista e moholo. Pele boporista bo rehelloa ka eena, bo ne bo bitsoa Boporista bo Halalelang ka mokhoa oa Mora oa Molimo. Lebitso la boporista le ile la fetoha ho ba Melkisedeke ho thibela batho hore ba sebelise lebitso la Molimo haholo.
Motho e motona eo e leng setho sa kereke, ea lokeloang ke ho amohela Boporista ba Melkisedeke o lokela a be a le lilemo tse leshome le metso e robeli. Banna ba nang le Boporista ba Melkisedeke ba na le matla a ho fana ka tlhohonolofatso ho ba bang. Jesu o senola ho bona lintho tseo ba lokelang ho li tseba le ho li bua ha ba fana ka litlhohonolofatso tsena.
Puisano
-
Ke bofe boporista bo teng ka har’a Kereke?
Boporista Bo Bong Le Bo Bong Bo Na Le Mesebetsi Le Tokelo Tse Fapaneng
Ha motho a amohela boporista, o beoa boruting bakeng sa mosebetsi oa boporista. Boporista ba Aarone le Boporista ba Melkisedeke ka bobeli bo na le mesebetsi e mengata. Bo bong le bo bong bo na le mesebetsi e ikhethileng.
Banna le bahlankana ba nang le Boporista ba Aarone ba beiloeng mosebetsing oa moporista ba na le matla a ho etsa tse latelang:
-
Ho ruta evangeli.
-
Ho kolobetsa.
-
Ho hlophisa, ho hlohonolofatsa le ho nehelana ka selallo.*
-
Ho thusa ba nang le Boporista ba Melkisedeke ho hloela le ho thusa litho tsa Kereke.
-
Ho nehelana ka Boporista ba Aarone ho ba bang.
Banna ba nang le Boporista ba Melkisedeke ba na le tokelo ea ho etsa tse latelang:
-
Ho etella pele Kereke.
-
Ho ruta evangeli.
-
Ho nehelana ka mpho ea Moea o Halalelang.
-
Ho nehelana ka litlhohonolofatso tse ikhethang.
-
Ho neha bana lebitso le tlhohonolofatso.
-
Ho folisa ba kulang.
-
Ho nehelana ka boporista ho ba bang.
-
Ho etsa tsohle tseo banna le bahlankana ba nang le Boporista ba Aarone ba li etsang.
Puisano
-
Banna ba nang le Boporista ba Melkisedeke ba na le tokelo ea ho etsa eng?
-
Banna ba nang le Boporista ba Aarone ba na le tokelo ea ho etsa eng?
Mosebetsi Oa Boporista Ba Aarone
Mosebetsi oa Boporista ba Aarone ke moteakone, moruti, moporista, le mobishopo.
Moteakone
Motho e motona eo e leng setho sa Kereke, ea lokeloang a ka amohela Boporista ’me a beoa boteakone ho tloha maqalong a khoeli ea Pherekhong ha a le lilemo tse leshome le metso e ’meli. O tlameha ho mamela litaelo tsa Jesu le melao ea Kereke.
Ena ke mesebetsi ea moteakone:
-
Ho nehelana ka selallo.
-
Ho thusa baetapele ba hae.
-
Ho thusa baruti ka har’a Boporista Ba Aarone ho etsa mesebetsi eo ba e khethetsoeng.
Moteakone a ke ke a nehelana ka boporista ho motho e mong. A ke ke a kolobetsa. A ke ke a hlohonolofatsa selallo.
Moruti
Motho e motona eo e leng setho sa kereke ea lokeloang, a ka amohela Boporista a ba a beoa boruting ho tloha maqalong a khoeli ea Pherekhong ha a le lilemo tse leshome le metso e mene. O tlameha ho mamela litaelo tsa Jesu le melao ea Kereke.
Ena ke mesebetsi ea moruti:
-
Ho hlokomela litho tsa Kereke, ho ba thusa ho fihlela litlhoko tsa bona tsa nama le tsa moea.
-
Ho thusa litho ho mamela litaelo tsa Jesu.
-
Ho thusa ba nang le Boporista ba Melkisedeke ho sebeletsa malapa le ho thusa ka ho ruta ka evangeli.
-
Ho hlophisa selallo.
-
Ha ho hlokeha, ba etsa tsohle tseo moteakone a li etsang.
Moruti a ke ke a nehelana ka matla a boporista ho motho e mong. Hape a ke ke a kolobetsa. A ke ke a hlohonolofatsa selallo.
Moporista
Motho e motona eo e leng setho sa kereke ea lokeloang, a ka amohela Boporista a ba a beoa boprorista ho tloha maqalong a khoeli ea Pherekhong ha a le lilemo tse leshome le metso e ts’eletseng. O tlameha ho mamela litaelo tsa Jesu le melao ea Kereke.
Ena ke mesebetsi ea moporista:
-
Ho ruta evangeli.
-
Ho khothaletsa litho ho mamela litaelo tsa Jesu.
-
Ho kolobetsa.
-
Ho hlohonolofatsa selallo.
-
Ho beha ba bang bateakone, baruti, le moporista.
-
Ho etella pele likopano ha ho sena motho ea nang le Boporista ba Melkisedeke.
Moporista a ka etsa tsohle tseo moruti le moteakone ba li etsang. A ke ke a beha mang kapa mang mosebetsing oa mobishopo kapa mosebetsing o fe kapa o fe oa Boporista ba Melkisedeke.
Mobishopo
Mobishopo ke moetapele oa lekala.
Ena ke mesebetsi ea mobishopo (mookameli oa lekalana o na le boikarabello bo ts’oanang ka har’a lekalana):
-
Ho etella pele lekala.
-
Ho sebeletsa joaloka Mookameli oa mokhatlo oa baporista.
-
Ho lekola bohlokoa ba litho tsa lekala.
-
Ho eletsa litho tsa lekala.
-
Ho thusa litho tsa lekala ho ikemela le ho hlophisetsa lintho tsa ts’ohanyetso.
-
Ho etsa poloko ea lingoliloeng le lichelete le ts’ebeliso ea meaho ea kereke.
Mookameli oa Kereke o laela baokameli ba litereke ho beha banna hore ebe babishopo.
Puisano
-
Mosebetsi oa moteakone, moruti, moporista, le mobishopo ke o fe?
Mosebetsi Oa Boporista Ba Melkisedeke
Mosebetsi oa Boporista ba Melkisedeke ke moholo, moporista e moholo, mopatriareka, Mashome a Supileng, le Moapostola. Ofisi e ’ngoe le e ’ngoe e na le mesebetsi e ikhethileng.
Moholo
-
Ho kolobetsa.
-
Ho nehelana ka mpho ea Moea o Halalelang.
-
Ho hlophisa likopano.
-
Ho etella pele likopano ha ho se na moporista e moholo ea teng.
-
Ho ruta evangeli.
-
Ho hlohonolofatsa bakuli.
-
Ho hlohonolofatsa bana.
-
Ho nehelana ka boporista ho ba bang, le ho ba beha mosebetsing oa moholo, moporista, moruti, kapa moteakone.
-
Ha ho hlokeha, ba etsa tsohle tseo moporista, moruti kapa moteakone a li etsang.
Moporista e moholo
Mosebetsi oa mantlha oa moporista e moholo ke ho etella pele batho ka hare ho Kereke le ho ikarabella linthong tsa se-moea. Ha ho hlokeha, ba etsa tsohle tseo moholo, moporista, moruti kapa moteakone a li etsang.
Mopatriareka
Mopatriareka ke moporista e moholo ea nehelanang ka litlhohonolofatso tse ikhethang ho litho tsa Kereke. Litlhohonolofatso tsena li bitsoa hlohonolofatso ea bopatriareka. Hlohonolofatso ea bopatriareka e thusa litho ho utloisisa lintho tse itseng tseo Jesu a batlang ba li etse.
Mashome a Supileng
Ba Mashome a Supileng ke lipaki tse ikhethang tsa Jesu Kreste ho lefats’e. Ba sebetsa tlasa taolo ea Ba-Apostola ho aha Kereke.
Moapostola
Moapostola ke paki e ikhethang ea Jesu Kreste ho lefats’e. Ba-Apostola ba tsamaisa litaba tsa Kereke lefats’eng lohle. Moapostola e mong le e mong o na le tokelo ea boporista. Empa ke feela Mookameli oa Kereke eo eleng Moapostola, ea ka sebelisang tokelo eohle ea boporista. Ba-Apostola ba bang ba sebelisa tokelo ea bona ha feela Mookameli oa Kereke a ba laela ho etsa joalo.
Linotlolo tsa Boporista Ke Tokelo Ea Ho Tsamaisa Ts’ebeliso ea Boporista
Boporista ke tokelo ea ho etsa ka lebitso la Jesu le ho re tataisa ho khutlela ho Ntat’a rona ea Maholimong. Ts’ebeliso ea tokelo ea boporista e tsamaisoa ke ba ts’oarang linotlolo. Linotlolo tsena ke tokelo ea ho etella pele le ho tsamaisa Kereke ka har’a sebaka se itseng. Morena Jesu Kreste o ts’oere linotlolo tsohle tsa boporista. O nehile Ba-Apostola ba Hae linotlolo tse hlokahalang ho tsamaisa Kereke. Ke Moapostola a moholo, Mookameli oa Kereke feela ea ka sebelisang (kapa ho lumella motho e mong ho sebelisa) linotlolo tsena ho tsamaisa Kereke eohle. Mookameli oa Kereke o lumella baokameli ba litempele, bon’gosa ba kereke, litereke tse ikemetseng, le litereke; babishopo le baokameli ba makalana; baokameli ba mokhatlo ho ba le linotlolo tsa boporista tseo ba li hlokang ho etella pele.
Ba nang le boporista ba na le tokelo ea ho etsa lintho tse ling ntle le tumello e ikhethang. Mohlala, banna ba nang le Boporista ba Melkisedeke ba ka hlohonolofatsa bakuli ’me joaloka balekane le bo ntate, ba ka hlohonolofatsa malapa a bona. Le ha ho le joalo, lintho tse ling li hloka tumello ho hlaha ho ba nang le linotlolo. Mohlala, moporista o na le tokelo ea ho kolobetsa. Empa a ke ke a kolobetsa hofihlela mobishopo kapa mookameli oa lekalana a mo lumella ho etsa joalo. Mobishopo kapa mookameli oa lekalana o na le linotlolo tsa Boporista ba Aarone ka hare ho lekala la Kereke.
Puisano
-
Linotlolo tsa Boporista ke eng?
Ba Nang Le Boporista Ba Hlophisoa Ka Mekhatlo
Banna le bahlankana ba nang le mosebetsi o ts’oanang oa boporista ba aroloa ka lihlopha. Lihlopha tsena li bitsoa mekhatlo. Ka hare ho Boporista ba Aarone ho na le mokhatlo oa bateakone, mokhatlo oa baruti, le mokhatlo oa baporista. Ka hare ho Boporista ba Melkisedeke ho na le mokhatlo oa baholo, le mokhatlo oa baporista ba baholo.
Ha monna kapa moshanyana a behoa mosebtsing oa boporista, e ba setho sa mokhatlo oa boporista o nang le ba nang le mosebetsi o ts’oanang. O lula ka har’a mokhatlo oo hofihlela a beoa mosebetsing o mong. Baetapele ba mokhatlo ba ruta setho se seng le se seng ka mokhatlo.
Mokhatlo Oa Bateakone
Mokhatlo oa bateakone o ka ba le bateakone ba 12. Haeba ho na le bateakone ba fetang 12 lekaleng, mokhatlo o mong oa bateakone o ka thehoa. Mokhatlo oa bateakone o na le mookameli le baeletsi ba babeli.
Mokhatlo Oa Baruti
Mokhatlo oa baruti o ka ba le baruti ba 24. Haeba ho na le baruti ba fetang 24 lekaleng, mokhatlo o mong oa baruti o ka thehoa. Mokhatlo oa baruti o na le mookameli le baeletsi ba babeli.
Mokhatlo Oa Baporista
Mokhatlo oa baporista o ka ba le baporista ba 48. Haeba ho na le baporista ba fetang 48 lekaleng, mokhatlo o mong oa baporista o ka thehoa. Mookameli oa mokhatlo oa baporista ke mobishopo kapa mookameli oa lekalana. O khetha baporista ba babeli ho hlaha mokhatlong ho ba bathusi ba hae.
Mokhatlo Oa Baholo
Mokhatlo oa baholo o ka ba le baholo ba 96, ’me o kenyeletsa baholo bohle ba lulang lekaleng. Haeba ho na le baholo ba fetang 96, mokhatlo o mong oa boholo o ka thehoa. Banna ba eso amohele Boporista ba Melkisedeke ba ka kopana le baholo ho ithuta, ho ba teng likopanong tsa bona tsa boikhathollo le mesebetsi e meng.
Mookameli le baeletsi ba babeli ba etella pele mokhatlo oa baholo.
Mokhatlo Oa Baporista Ba Baholo
Mokhatlo oa baporista ba baholo o kenyeletsa baporista ba baholo ba sebetsang lipitsong tsa boetapele tsa setereke se ikemetseng. Mookameli oa setereke se ikemetseng le baeletsi ba babeli ba etella pele mokhatlo oa baporista ba baholo.
Puisano
-
Mokhatlo ke eng?
-
Mekhatlo ea bateakone, baruti, baporista, baholo le baporista ba baholo e etsoa ke litho tse kae?
-
Litho tsa mokhatlo li ka thusana joang?