Jesu Kreste o ile a beha Ba-Apostola.
Khaolo ea 18
Kereke eo Jesu Kreste a e Hlophisitseng
Jesu o ile a hlophisa kereke ha a le lefats’eng. E ile ea bitsoa eng? Ke mang ea ileng a etella Kereke ea Hae pele?
Jesu e Ne e Le Eena Hlooho Ea Kereke Eo A e Hlophisitseng
Ha Jesu a le lefats’eng o ile a hlophisa kereke. Kereke ena e ile ea bitsoa Kereke ea Jesu Kreste. Litho tsa Kereke ea Jesu li ne li bitsoa Bahalaleli. Jesu Ka bo Eena e ne e le hlooho ea Kereke. O ile a e etella pele. O ile a khetha banna ba leshome le metso e ’meli ho Mo thusa ho etella pele Kereke. Ba ile ba bitsoa Ba-Apostola. Ba-Apostola ba na, e ne ebile e le baporofeta. Jesu o ile a ba beha matsoho lihloohong ’me a ba neha boporista. O ile a ba abela mosebetsi oa Hae. Ba-Apostola le baporofeta e ile ea eba baetapele ka har’a Kereke ea Jesu Kreste.
Ka har’a Kereke ea Jesu Kreste, banna ba amohetseng boporista ba beha matsoho lihloohong tsa ba bang ho ba neha boporista. Ke eona feela tsela eo boporista bo ka fetisetsoang ho tloha ho monna e mong ho ea ho e mong. Boporista ha bo rekoe.
Puisano
-
Ke mang eo e neng e le moetapele oa Kereke ea Jesu Kreste?
-
Banna ba neng ba thusa Jesu ba ne ba bitsoa eng?
Kereke ea Jesu Kreste E ile Ea Tsoelapele Lefats’eng Le Kamor’a Hore a Khutlele Leholimong
Kamor’a hore Jesu a khutlele maholimong, Kereke ea Hae e ile ea tsoelapele lefats’eng. E ile ea etelloa pele ke Ba-Apostola ba Leshome le Metso e ’Meli. Ha Moapostola a ne a shoele, Jesu o ne a khetha e mong ho ema bakeng sa hae. Ka Moea o Halalelang, Jesu o ne a tsebahatsa ho Ba-Apostola na Moapostola e mocha e tla ba ofe. Ba-Apostola Ba Leshome le Metso e ’Meli ba ne ba khetha banna ba bang ba lokileng e be ba ba neha boporista ho thusa ka mosebetsi oa Kereke ea Jesu. Banna bana ba ile ba bitsoa Ba Mashome a Supileng, baporista ba baholo, baholo, babishopo, baporista, baruti, le bateakone. Mesebetsi ea bona e hlalositsoe ka ho khaolo 20.
Jesu O Ile A Etella Kereke Pele ka Ts’enolo
Melaetsa eo Jesu a nehelanang ka eona ka Moea o Halalelang ho batho ba lefats’eng e bitsoa lits’enolo. Jesu o tataisa Kereke ea Hae ka ho senola ho moporofeta le baetapele ba bang lintho tseo ba lokelang ho li etsa.
Pele Jesu a khutlela leholimong, O ile a bolella Ba-Apostola ba hae hore O tla ba le bona kamehla. Jesu o ne a bolela hore O tla tsoelapele ho ba tataisa ka Moea o Halalelang.
Puisano
-
Jesu o ile a etella Kereke ea Hae joang kamor’a hore a khutlele leholimong?
Kereke ea Jesu Kreste e Ne e ts’oere Lithuto tsa Hae tsa ’Nete
Baetapele ba Kereke ea Jesu Kreste ba ile ba amohela ts’enolo ho hlaha ho Jesu Kreste ka Moea o Halalelang. Mohlala, Jesu o ile a bolella Moapostola Petrose hore evangeli e lokela ho bolelloa bohle e seng feela sechaba sa Iseraele. Jesu o ile a bolella Moapostola Pauluse lintho tse ngata tseo a neng a lokela ho li ruta batho. Jesu o ile a bolella Moapostola Johanne ka lintho tse ngata tse tlang ho etsahala nakong e tlang.
Ha a ne a le lefats’eng, Jesu o ile a ruta batho hore ba lumele ho Eena, ba bake, ’me ba kolobetsoe. Jesu o rutile batho ho rata Ntat’a rona ea Maholimong le hore ba Mo mamele. O ile a ba ruta ho rata le ho thusa batho ba bang.
Kamor’a hore Jesu a khutlele maholimong, Ba-Apostola ba ile ba ruta lintho tseo Jesu a ba rutileng tsona. Bohle ba neng ba batla ho ba litho tsa Kereke ea Jesu Kreste ba ne ba lokela ho ba le tumelo ho Jesu Kreste, ba bake libeng tsa bona ba be ba kolobetsoe. Ba ile ba amohela mpho ea Moea o Halalelang joalokaha Jesu a ba ts’episitse. Ba ile ba ithuta ho rata Ntat’a rona ea Maholimong le ho Mo mamela. Ba ile ba ithuta ho rata le ho sebeletsa batho ba bang.
Puisano
-
Ke eng seo batho ba neng ba lokela ho se etsa hore e be litho tsa Kereke ea Jesu Kreste?
Bao e Leng Litho tsa Kereke ea Jesu Kreste Ba ile Ba Amohela Limpho tsa Moea
Bao e eneng e le litho tsa Kereke ea Jesu Kreste ba ile ba amohela limpho tsa moea. Limpho tse ling e ne e le tumelo ea ho folisa batho, boiphihlelo ba ho bolela liketsahalo tsa nako e tlang, le matla a ho ba le lipono.
Puisano
-
Ke li fe tse ling tsa limpho tsa moea?
Kereke Ea Jesu Ets’ Ne E Se E Le Sieo Lefaeng
Kamora hore Jesu a khutlele leholimong, Ba-Apostola ba hae ile ba etella pele Kereke. Batho ba bangata e ile ea eba litho tsa Kereke. Empa ba bang ba litho ba ile ba qalella ho ruta le ho lumela lintho tsa leshano, ho fapana le hore ba rute tseo Jesu le Ba-apostola ba li rutileng. Mohlala, Batho ba bang ba ile ba ruta hore Ntat’a rona ea Maholimong ha ana ’mele oa nama le masapo.
Batho ba khopo ba ile ba qala ho hlorisa baetapele le litho tse ling tsa Kereke. Batho ba khopo ba ile ba bolaea Ba-Apostola le baetapele ba neng ba na le boporista. Ba ile ba bolaea le litho tsa Kereke ea Jesu Kreste.
Batho ba ile ba rutoa lintho tse ngata tsa leshano ho fihlela ho se na ea lumelang lithutong tsa Jesu. Ho ne ho se motho ea nang le boporista, ’me ho ne ho se na motho ea etsang mosebetsi oa Jesu lefats’eng kapa ea amohelang litaelo ho tsoa ho Jesu bakeng sa bana bohle ba Ntat’a rona ea Maholimong. Nako eo ho neng ho se ea lumelang lithuto tsa Jesu, ho bile ho se ea nang le tokelo e bitsoa Koeneho.
Nakong ea Koeneho, batho ba ile ba hlophisa likereke tse fapaneng le eo Jesu a e hlophisitseng. Ba ile ba ruta lintho tseo Jesu a sa li rutang. Ba ne ba se na matla a boporista. Ba ile ba etsa lits’ebeletso tse neng li fapane le tse etsoang Kerekeng ea Jesu. Ba ne ba sena ts’enolo e tsoang ho Jesu. Ha ba ka ba ruta litaelo tsohle tsa evangeli joaloka ha Jesu le Ba-Apostola ba Hae ba li rutile. Baporofeta ba ile ba bolela hore tsena tsohle li tla etsahala.
Puisano
-
Koeneho e etsahetse joang?
Jesu O Boletse Hore O tla Tsosolosa Kereke Ea Hae Lefats’eng
Jesu o ile a tseba hore batho ba tla lahleheloa ke matla a Hae le lithuto tsa ’nete. Eaba O hlophisa mokhoa oa hore Kereke ea ’nete e tle e hlophisoe lefats’eng.
Moapostola Johanne o ile a ba le pono ea nako eo evangeli e tla busetsoa lefats’eng. O ile a bona hore Jesu o tla romela mangeloi ho ruta batho ’nete ka Ntat’a rona ea Maholimong. Jesu o tla netefatsa hore bana bohle ba Ntat’a rona ea Maholimong ba fumana evangeli, boporista, litlhohonolofatso, le lintho tsohle tse hlokehang hore ba khutlele ho Ntat’a rona ea Maholimong.
Puisano
-
Hobaneng Jesu a ile a hlophisa mokhoa oa hore Kereke ea hae e tle e tle lefats’eng hape?