Laumālie Māʻoniʻoní

Ko e Laumālie Māʻoniʻoní ʻa e mēmipa hono tolu ʻo e Toluʻi ʻOtuá. Ko ha tokotaha ia ko e laumālie, ʻo ʻikai ha sino ʻo e kakano mo e ngaahi hui. ʻOku faʻa ui pē ia ko e Laumālié, ko e Laumālie Māʻoniʻoní, ko e Laumālie ʻo e ʻOtuá, ko e Laumālie ʻo e ʻEikí, pe ko e Fakafiemālié.

Vakai Fakalūkufuá

Lekooti e Ngaahi Ongo ʻOkú ke Maʻú

Ngaahi Fatongia ʻo e Laumālie Māʻoniʻoní

ʻOku fengāueʻaki uouangataha ʻa e Laumālie Māʻoniʻoní mo e Tamai Hēvaní mo Sīsū Kalaisi, ʻo fakahoko ha ngaahi fatongia ke tokoniʻi kitautolu ke tau moʻui angatonu mo maʻu ʻa e ngaahi tāpuaki ʻo e ongoongoleleí.

ʻOkú Ne “fakamoʻoniʻi ʻa e Tamaí mo e ʻAló” (2 Nīfai 31:18) pea fakahā mo akoʻi “ʻa e moʻoni ʻo e ngaahi meʻa kotoa pē” (Molonai 10:5). Te tau toki lava pē ʻo maʻu ha fakamoʻoni pau ki he Tamai Hēvaní mo Sīsū Kalaisi ʻi he mālohi ʻo e Laumālie Māʻoniʻoní. Ko ʻEne fetuʻutaki ki hotau laumālié ʻoku mātuʻaki pau ange ia ʻi ha toe faʻahinga fetuʻutaki te tau lava ke maʻu ʻaki hotau ngaahi ongo fakanatulá.

ʻI heʻetau feinga ke nofo maʻu ʻi he hala ʻoku fakatau ki he moʻui taʻengatá, ʻe lava ke tataki kitautolu ʻe he Laumālie Māʻoniʻoní ʻi heʻetau ngaahi filí mo maluʻi kitautolu mei ha fakatuʻutāmaki fakatuʻasino mo fakalaumālie.

Te tau lava ʻiate Ia ʻo maʻu ʻa e ngaahi meʻa-foaki ʻo e Laumālié ke ʻaonga kiate kitautolu pea mo kinautolu ʻoku tau ʻofa aí (vakai, Tokāteline mo e Ngaahi Fuakava 46:9–11).

Ko Ia ʻa e Fakafiemālié (Sione 14:26). ʻE lava ʻe he fanafana ʻa e Laumālié ʻo fakanonga ʻetau manavasiʻí, lolou ʻa e ngaahi loto-hohaʻa ʻo ʻetau moʻuí, mo fakafiemālieʻi kitautolu ʻi heʻetau mamahí, ʻo hangē ko e leʻo fakanonga ʻa ha mātuʻa ʻofa ki ha fānau ʻoku tangi. ʻE lava ʻe he Laumālie Māʻoniʻoní ke fakafonu kitautolu ʻaki ʻa e “ʻamanaki leleí mo e ʻofa haohaoá” mo “akoʻi [kitautolu] ʻi he ngaahi meʻa fakamelino ʻo e puleʻangá” (Molonai 8:26; Tokāteline mo e Ngaahi Fuakava 36:2).

ʻI Hono mālohí, ʻoku fakamāʻoniʻoniʻi ai kitautolu ʻi he taimi ʻoku tau fakatomala aí, maʻu ʻa e ngaahi ouau ʻo e papitaisó mo e hilifakinimá, pea tuʻu maʻu ʻi heʻetau ngaahi fuakavá (vakai, Mōsaia 5:1–6; 3 Nīfai 27:20; Mōsese 6:64–68).

Ko Ia ʻa e Laumālie Māʻoniʻoni ʻo e Talaʻofá (vakai ʻEfesō 1:13; Tokāteline mo e Ngaahi Fuakava 132:7, 18–19, 26). ʻI he fatongia ko ʻení, ʻokú Ne fakapapauʻi ai ko e ngaahi ouau ʻo e lakanga fakataulaʻeiki kuo tau maʻú pea mo e ngaahi fuakava kuo tau fakahokó, ʻoku tali ia ʻe he ʻOtuá. ʻOku makatuʻunga ʻa hono tali ko ʻení mei he hokohoko atu ʻetau faivelengá.

Ko e Meʻafoaki ʻo e Laumālie Māʻoniʻoní

ʻE lava ke ongoʻi ʻa e Laumālie Māʻoniʻoní ʻe he tokotaha kotoa pē ʻoku fekumi fakamātoato ki he moʻoní, pea tataki ai kinautolu kia Sīsū Kalaisi mo ʻEne ongoongoleleí. Ka neongo ia, ʻoku ʻatā ʻa e kakato ʻo e ngaahi tāpuaki kuo foaki ʻo fakafou ʻi he Laumālie Māʻoniʻoní, kiate kinautolu pē ʻoku nau maʻu ʻa e meʻafoaki ʻo e Laumālie Māʻoniʻoní mo moʻui tāú.

Hili hano papitaiso ʻo ha taha ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku hilifaki ʻe ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange honau nimá ki he ʻulu ʻo e tokotahá pea fakamaʻu ia ko ha mēmipa ʻo e Siasí ʻi ha ouau lakanga fakataulaʻeiki toputapu. ʻI he konga ʻo e ouau ko ʻeni ʻoku ui ko e hilifakinimá, ʻoku foaki ki he tokotahá ʻa e meʻa-foaki ʻo e Laumālie Māʻoniʻoní.

ʻOku kehe pē ʻa e meʻa-foaki ia ʻo e Laumālie Māʻoniʻoní mei he ivi tākiekina ʻo e Laumālie Māʻoniʻoní. Kimuʻa ʻi he papitaisó, ʻe lava ke ongoʻi ʻe ha taha ʻa e ivi tākiekina ʻo e Laumālie Māʻoniʻoní ʻi he taimi ki he taimi, pea ʻoku fakafou ʻi he tākiekina ko iá ʻene maʻu ha fakamoʻoni ki he moʻoní. Hili hono maʻu ʻa e meʻa-foaki ʻo e Laumālie Māʻoniʻoní, ʻoku maʻu leva ʻe he tokotahá ʻa e totonu ki he takaua maʻu pē ʻo e mēmipa ko ia ʻo e Toluʻi ʻOtuá ʻo kapau ʻokú ne tauhi ʻa e ngaahi fekaú.