Mësimi 19 Materiali i Përgatitjes së Klasës

Të Jetuarit me Drejtësi në një Kohë Ligësie

Presidenti Ezra Taft Benson dha mësim se Libri i Mormonit “i përforcon pasuesit e përulur të Krishtit kundër planeve, strategjive dhe doktrinave të liga të djallit në kohën tonë” (“The Book of Mormon Is the Word of God”, Ensign, janar 1988, f. 3). Në këtë njësi ju do të keni mundësinë të mësoni se si Libri i Mormonit i vë në dukje këto rreziqe në mënyrë që të mund ta mbroni më mirë veten. Teksa e studioni këtë mësim, kërkoni parime që mund t’ju ndihmojnë të jetoni me drejtësi në një kohë ligësie.

Pjesa 1

Si mund të qëndroj besnik ndaj Zotit kur përballem me përndjekje ngaqë e jetoj ungjillin?

Kur Helamani, biri i Helamanit, zuri fronin e gjykimit, nefitët përjetuan një periudhë paqeje dhe dhjetëra e mijëra njerëz u bashkuan me Kishën. Ndërsa Kisha përparonte, disa anëtarë u bënë krenarë dhe filluan t’i përndiqnin pasuesit e përulur të Jezu Krishtit. (Shih Helamani 3:20–34.)

Studioni në Përgatitje për Orën Mësimore

Lexoni te Helamani 3:33–35 dhe kërkoni mënyrën se si pasuesit e përulur të Krishtit reaguan ndaj përndjekjes nga anëtarët e tjerë të Kishës.

Përsiatni në Përgatitje për Orën Mësimore

Mendoni për një rast kur keni përjetuar ose dëshmuar sjellje lënduese ose fjalë të ashpra nga një anëtar tjetër i Kishës. Si reaguat? Çfarë mund të mësoni nga këta shenjtorë të përulur rreth mënyrës se si të përballemi me të tilla forma përndjekjeje?

Pjesa 2

Si mund të jem i/e drejtë kur jam i/e rrethuar nga ligësia?

Profeti Mormoni dhe biri i tij, Moroni, u përballën me një kohë kur ligësia ishte e përhapur gjerësisht. Për shkak të mëkatit dhe mosbesimit, nuk ndodhnin më mrekulli dhe Fryma e Shenjtë nuk ishte më me njerëzit. Fuqia e Satanit mbizotëronte në të gjithë vendin. (Shih Mormoni 1:13–19.) Në një letër drejtuar birit të tij, Moronit, Mormoni përshkroi gjendjen e njerëzve dhe e mbylli [me fjalët] se ata qenë kaq të çoroditur saqë ishin “pa qytetërim” (Moroni 9:11). Dhuna, lufta dhe masakrat e mbuluan vendin aq sa lamanitët dhe nefitët luftuan vazhdimisht kundër njëri‑tjetrit. Si përfundim, lamanitët dolën fitimtarë dhe Mormoni e Moroni dëshmuan shkatërrimin e plotë të nefitëve (shih Mormoni 2–6; 8:1–3, 7).

Studioni në Përgatitje për Orën Mësimore

Lexoni te Mormoni 1:1–2, 15 dhe Moroni 9:25–26 dhe kërkoni disa arsye përse Mormoni dhe Moroni ishin në gjendje të qëndronin besnikë edhe kur qenë të rrethuar nga ligësia.

Duke folur për fuqinë e përqendrimit te Shpëtimtari në një botë mëkatare, Presidentja Xhoi D. Xhons, Presidente e Përgjithshme e Fillores, dha mësim:

“Nëse tërheqja e botës është më e fortë sesa besimi dhe mirëbesimi që kemi te Shpëtimtari, atëherë tërheqja e botës do të mbizotërojë kurdoherë. …

… Ndërsa shpesh herë është më e lehtë që të jemi shpirtërisht jo vepruese sesa të bëjmë përpjekjen shpirtërore për të kujtuar dhe përqafuar identitetin tonë hyjnor, ne nuk mund t’ia lejojmë vetes atë lëshim në këto ditë të mëvonshme. Qofshim ne … ‘besnik[ë] në Krisht; … Krishti të mund të [na] ngrejë dhe qëndrofshin në mendjen [tonë] përherë vuajtjet dhe vdekja e tij … dhe mëshira dhe durimi i tij, dhe shpresa e lavdisë së tij dhe e jetës së përjetshme’ [Moroni 9:25]. Ndërsa Shpëtimtari na ngre në një nivel më të lartë, ne mund të kuptojmë më qartë jo vetëm se kush jemi, por që jemi më afër Tij nga sa e kemi imagjinuar ndonjëherë.” (“Vlerë e Pamasë”, Ensign ose Liahona, nëntor 2017, f. 15)

Plaku Nil L. Andersen, i Kuorumit të Dymbëdhjetë Apostujve, dha dëshminë vijuese për mënyrën se si Zoti do t’i ndihmojë besnikët të përballen me një botë të ligë:

“Ditët tona nuk janë ditë të paparashikuara dhe Zoti është kujdesur që ne të kemi siguri shpirtërore. … Ndërkohë që ligësia shtohet në botë, të drejtëve iu jepet një fuqi shpërblyese zbulese dhe dhurata shpirtërore. Zoti na jep fuqi më të madhe kur jemi të gatshëm të qëndrojmë të drejtë në një botë të ligë.” (“A Classroom of Faith, Hope, and Charity” [mbrëmje me një Autoritet të Përgjithshëm, 28 shkurt 2014], ChurchofJesusChrist.org)

Shënojini Mendimet Tuaja

Përcaktoni një individ ose grup njerëzish në Librin e Mormonit që, sikurse Mormoni ose Moroni, u përballën me ligësi dhe qëndruan besnikë ndaj Zotit. Ndërsa mendoni rreth këtij shembulli, kërkoni një fragment të shkrimit të shenjtë që mund t’ju japë një këndvështrim shtesë rreth këtij personi (ose grupi njerëzish). Pastaj shënojini mendimet tuaja rreth pyetjeve vijuese:

• Si do ta përshkruanit ligësinë me të cilën u përball ky person (ose grup njerëzish)?

• Çfarë është diçka që bëri ky person (ose grup njerëzish), të cilën mund ta bëni edhe ju për të qëndruar besnikë ndaj Zotit kur përballeni me ligësitë dhe tundimet e botës?

Ejani në klasë të përgatitur që t’i tregoni shembujt tuaj. Ju gjithashtu mund të përgatiteni që të tregoni shembullin e dikujt që e njihni personalisht i/e cili/a është përballur me ligësitë dhe ka qëndruar besnik/e ndaj Zotit.

A Doni më Shumë? (Sipas Dëshirës)

Në çfarë mënyrash mund të bekohem duke ia dhënë zemrën time Perëndisë?

Lexoni krerët e kapitujve për librin Helamani 7–9. Pastaj lexoni te Helamani 10:1–5, duke kërkuar mënyrën se si Nefi, i biri i Helamanit, u bekua ngaqë iu nënshtrua vullnetit të Zotit.

Në bisedën e saj “Dorëzimi i Zemrave Tona Perëndisë” (Ensign ose Liahona, nëntor 2015, f. 30–32), Motra Nill F. Mariot, ish-këshilltare në Presidencën e Përgjithshme të Të Rejave, dha mësim se si ne mund ta rritim fuqinë tonë për të jetuar me drejtësi ndërsa ia japim zemrat tona Perëndisë (shih edhe Helamani 3:35).

Përse është e rëndësishme që të kemi guxim kur përballemi me situata që nuk janë në përputhje me mësimet e Jezu Krishtit?

Në materialin filmik “Leave the Party” [“Largohu nga Festa”] (06:26), Plaku Geri E. Stivenson, i Kuorumit të Dymbëdhjetë Apostujve, tregon historinë e një të riu që tregoi guxim të drejtë përballë tundimit.

Në bisedën e tij “That We May Always Have His Spirit to Be with Us” (Ensign ose Liahona, maj 2006, f. 28–31), [“Që të Mund të Kemi Gjithmonë me Vete Shpirtin e Tij”, Konferenca e Përgjithshme, prill 2006, f. 48–52], Plaku Dejvid A. Bednar, i Kuorumit të Dymbëdhjetë Apostujve, paralajmëroi për gjërat që mund të na veçojnë nga Fryma e Shenjtë (kodi kohor 04:40–07:24).

Ku mund të mësoj më shumë rreth mënyrës se si të kem një jetë të lumtur në një botë të ligë?

Në bisedën e tij “How to Live Well amid Increasing Evil” [“Si të Jetosh Mirë mes Ligësisë në Rritje”] (Ensign ose Liahona, maj 2004, f. 100–102), Plaku Riçard G. Skot, i Kuorumit të Dymbëdhjetë Apostujve, diskutoi mbi mënyrën se si përqendrimi te Jezu Krishti bën të mundur që Shpëtimtari t’ju sigurojë “një jetë të begatë dhe të plotësuar pavarësisht se çfarë ndodh në botën përreth jush” (f. 101).