Materiali i Mësuesit për Mësimin 1

Studimi i Doktrinës së Familjes së Përjetshme

Doktrina e familjes na përket ne të gjithëve. Në këtë mësim, studentët do të marrin ftesë për të vlerësuar mirëbesimin e tyre tek urtësia e Atit Qiellor dhe te plani i Tij për familjet. Studentët gjithashtu do të marrin parasysh se çfarë mund të bëjnë për të ndihmuar që të krijohet një mjedis plot dashuri, ndjeshmëri dhe respekt si të Krishtit kur të diskutojnë doktrinën e familjes.

Shënim: Nëse është e mundur, vihuni në kontakt me studentët që regjistrohen për këtë kurs, përpara ditës së tyre të parë të mësimit dhe ftojini ta studiojnë materialin e përgatitjes për orën mësimore për këtë mësim të parë. Sigurohuni që të gjithë studentët e tjerë të kenë një kopje të materialit të përgatitjes kur filloni orën mësimore. Gjatë diskutimit tuaj në klasë, përdoreni materialin e përgatitjes në mënyrë të atillë që studentët të mund të kuptojnë se si do t’i ndihmojë ai të përgatiten për përvojën e tyre të të mësuarit dhe ta pasurojnë atë përvojë. Ndihuni të lirshëm të shpenzoni 5 deri në 10 minuta në fillim të këtij mësimi për t’u njohur me njëri-tjetrin dhe për t’u uruar mirëseardhjen studentëve në kurs.

Sugjerime për Mësimdhënien

Ne mund t’u mirëbesojmë dashurisë dhe urtësisë së përsosur të Atit Qiellor dhe Jezu Krishtit.

Si parathënie për këtë kurs, ju mund t’u tregoni studentëve tabelën e përmbajtjes ose programin e gjysmës së parë të kursit. Për t’u familjarizuar më shumë me nevojat e studentëve tuaj, ftojini ata t’ju shkruajnë një letër të shkurtër anonime rreth temave për të cilat kanë më shumë interes ose të cilat duan t’i kuptojnë më mirë. Gjithashtu mund t’i ftoni të shkruajnë çfarëdo pyetjeje që ata shpresojnë se ky kurs do t’i ndihmojë për t’u dhënë përgjigje. Mblidhini përgjigjet e tyre dhe merrini ato parasysh teksa përgatiteni për mësimet e ardhshme.

Përmirësimi i Mësimdhënies dhe i të Mësuarit Tonë

Zbulojini nevojat dhe interesat e studentëve. Studentët do të ndiejnë një dëshirë më të madhe për të mësuar kur ata ndiejnë se mësimet janë hartuar për të plotësuar nevojat dhe interesat e tyre. Siguroni mundësi për studentët që t’i shprehin interesat dhe pyetjet e tyre rreth familjes. Bazuar te përgjigjet e studentëve, ndiqeni Shpirtin për të ditur se kur t’i theksoni dhe të diskutoni për interesat dhe pyetjet e tyre gjatë kursit.

Merreni parasysh të bëni pyetjet vijuese:

• Cilët janë disa njerëz të cilëve u mirëbesoni dhe pse?

• Për çfarë do t’u mirëbesonit këtyre njerëzve?

Ndajini studentët në grupe me nga tre veta. Jepini secilit grup një kopje të fletushkës vijuese dhe kërkojuni që të ndjekin udhëzimet.

Mirëbesimi tek Ati Qiellor dhe Jezu Krishti

Materiali i Mësuesit – Familja e Përjetshme – Mësimi 1

Ftojeni secilin anëtar të grupit që të lexojë njërin nga fragmentet vijuese, duke kërkuar të vërteta rreth Atit Qiellor dhe Jezu Krishtit që mund të na ndihmojnë t’u mirëbesojmë Atyre: 2 Nefi 26:24; Mosia 4:9 dhe Isaia 55:8–9. Pastaj diskutoni pyetjet vijuese:

• Çfarë mund të mësojmë rreth Atit Qiellor dhe Jezu Krishtit nga këto fragmente? Si ndikojnë të vërtetat që zbuluat te dëshira për të mirëbesuar tek Ata?

• Kur e keni përjetuar ose dëshmuar vlerën e mirëbesimit tek Ati Qiellor dhe Jezu Krishti?

© 2022 by Intellectual Reserve, Inc. All rights reserved.

Mirëbesimi tek Ati Qiellor dhe Jezu Krishti

fletushka e mësuesit

Shpjegoni se njëra nga provat më të mëdha të dashurisë dhe urtësisë së Atit Qiellor dhe Jezu Krishtit është doktrina e familjes së përjetshme. Mirëbesimi ynë tek Ata dhe te plani i Atit mund të na ndihmojë të gjejmë drejtim mes pikëpamjeve të ndryshme të botës mbi çështjet familjare.

Jepuni studentëve një kopje të dokumentit “Familja: Një Proklamatë drejtuar Botës” (ChurchofJesusChrist.org) ose kërkojuni ta hapin atë në mënyrë digjitale. Ftojini studentët të zgjedhin disa paragrafë që t’i lexojnë dhe të shenjojnë frazat që përshkruajnë bekimet dhe gëzimin që Ati Qiellor dëshiron për ta dhe familjet e tyre. Pas një kohe të mjaftueshme ftojini studentët të tregojnë atë që shenjuan dhe arsyen përse e shenjuan.

• Si përputhen dëshirat tuaja për familjen tuaj me dëshirat e Atit Qiellor për familjen tuaj?

• Çfarë vlere ka që t’u mirëbesoni urtësisë dhe këndvështrimit të përjetshëm të Atit Qiellor dhe Jezu Krishtit më shumë sesa urtësisë dhe këndvështrimit të botës?

Dëshmoni ose ftojini studentët të dëshmojnë për urtësinë e Atit Qiellor, Jezu Krishtit dhe për dëshirat e tyre për familjet tona të tashme e të ardhshme.

Ne mund të krijojmë një mjedis dashurie dhe respekti për të mësuar.

Paraqitni një fotografi të familjes tuaj. Tregoni disa gjëra që ju pëlqejnë shumë rreth familjes suaj dhe disa prej mënyrave që e bëjnë të pashoqe situatën tuaj familjare.

Ftojeni një student të lexojë me zë të lartë thënien nga Plaku Nil L. Andersen në pjesën 2 të materialit të përgatitjes.

• Çfarë ju bën më shumë përshtypje rreth asaj që dha mësim Plaku Andersen? (Mund t’i ndihmoni studentët të përcaktojnë të vërtetën vijuese: Ngaqë të gjitha familjet janë të ndryshme, na nevojitet ta diskutojmë modelin e Zotit për familjet në një mënyrë të matur e me ndjeshmëri.)

Mund t’i ftoni studentët të tregojnë atë që mund të mësojnë nga shembulli i dashurisë, ndjeshmërisë dhe dhembshurisë së Shpëtimtarit për të tjerët që përjetuan situata sfiduese, vetjake ose familjare. (Shembujt mund të gjenden në pjesën “Doni më Shumë?” të materialit të përgatitjes.)

Merreni parasysh t’u jepni studentëve pak minuta që të shënojnë mendimet e tyre për pyetjen vijuese:

• Çfarë mund të bëj për t’i ndihmuar të tjerët të ndiejnë se i duan dhe i respektojnë, ndërkohë që diskutojnë për familjen dhe tema të tjera delikate? (Nëse studentët e studiuan pjesën 2 të materialit të përgatitjes, ata mund t’i kenë mbajtur shënim tashmë disa mendime rreth kësaj pyetjeje. Mund t’u jepni kohë të shqyrtojnë atë që shkruan.)

Ftojini disa studentë të shprehin disa nga mendimet që shënuan.

Me vetë fjalët tuaja mund të shpjegoni se gjatë gjithë këtij kursi, studentët do të diskutojnë shumë të vërteta për të cilat kërkohet ndihma e Frymës së Shenjtë që të kuptohen. Për shkak se rrethanat vetjake dhe familjare janë të pashoqe, studentët do të kenë nevojë për zbulesë vetjake që të kuptojnë se si t’i vënë në jetë mësimet. Duke qenë se disa nga ndjenjat tona më të forta kanë të bëjnë me familjet tona, aftësia jonë për të mësuar nga njëri-tjetri dhe Shpirti kërkon që ne të kemi një mjedis plot dashuri, ndjeshmëri dhe respekt si të Krishtit. Ftojini studentët të bëjnë pjesën e tyre për të dhënë ndihmesë për një mjedis të tillë.

Mund ta mbyllni orën mësimore duke u treguar studentëve si të kenë qasje te materiali i përgatitjes. Kërkojuni atyre të marrin parasysh se si studimi i tyre individual i materialit të përgatitjes përpara orës mësimore mund ta ndihmojë të gjithë klasën që ta mësojë doktrinën e familjes më thellësisht. Ftojini të përgatiten me besnikëri për çdo orë mësimore.

Për Herën Tjetër

Nxitini studentët që në studimin e tyre për orën e ardhshme mësimore të kërkojnë arsyen pse udhëheqësit e Kishës së Zotit kapen me vendosmëri pas doktrinës së familjes që parashtrohet në proklamatën mbi familjen, edhe kur opinionet më të përhapura mund të jenë kundër kësaj doktrine.