Materiali i Mësuesit për Mësimin 4

Familja Është Qendrore në Planin e Atit Qiellor

Familja është qendrore në planin e Atit Qiellor për fatin tonë hyjnor. Në këtë mësim, studentët do të kenë mundësinë të shpjegojnë se si Krijimi i tokës, Rënia e Adamit dhe Evës, si dhe Shlyerja e Jezu Krishtit lejojnë që familjet e përjetshme të formohen dhe të përparojnë. Studentët do të marrin ftesë për t’i vlerësuar përpjekjet e tyre vetjake në krijimin dhe forcimin e vetë familjes së tyre të përjetshme.

Sugjerime për Mësimdhënien

Krijimi i tokës dhe Rënia e Adamit dhe Evës lejuan që familjet të formoheshin e të rriteshin.

Përmirësimi i Mësimdhënies dhe i të Mësuarit Tonë

Përcaktoni si zbatohet në jetë dhe qëllimin. Fillimi i një mësimi me një pyetje, situatë ose problem që ka lidhje me të, mund t’i bëjë studentët të përfshihen në mësim dhe të kërkojnë njohuri të mëtejshme. Kjo mund t’i ndihmojë ata edhe për të parë se si mësimet e shkrimeve të shenjta dhe të udhëheqësve bashkëkohorë të Kishës japin përgjigje dhe drejtim që mund t’i udhërrëfejnë ata në situata të jetës reale. Kur studentët e kuptojnë domethënien e asaj që po studiojnë në situatat dhe rrethanat e tyre vetjake, ata janë përgjithësisht më të nxitur për t’i mësuar dhe zbatuar mësimet e ungjillit.

Ndajini studentët në grupe të vogla dhe caktoni një udhëheqës/e për secilin grup. Paraqitni ose sigurojini secilit grup një kopje të skenarit dhe pyetjeve vijuese. (Merreni parasysh se si mund ta përshtatni këtë skenar sipas nevojës, që të jetë më domethënës për kulturën tuaj dhe jetën e studentëve tuaj.)

Ndërkohë që po bënte kërkime në internet për detyrën e një lënde në shkollë, Rejçëlli gjeti disa artikuj që argumentonin se “familja tradicionale” (një burrë dhe një grua të martuar me fëmijë) nuk qe më e nevojshme në shoqëri. Gjatë orës së asaj lënde disa ditë më vonë, Rejçëlli e kuptoi se ishte e vetme në përpjekjen për ta mbrojtur rëndësinë e familjes tradicionale. Shumë prej shokëve të saj të klasës e kishin pak ose aspak përparësi martesën ose pasjen e fëmijëve. Për ta, martesa dhe fëmijët janë pengesë në udhën e përmbushjes individuale të një personi. Kjo përvojë e la Rejçëllin me disa pyetje dhe ndjenja të trazuara.

• Si mendoni, përse disa njerëz ndihen në këtë mënyrë rreth martesës dhe familjes?

• Çfarë keni mësuar rreth familjeve dhe planit të Atit Qiellor që mund ta ndihmonte Rejçëllin? (Nëse nevojitet, mund të rishikoni pjesën 1 të materialit të përgatitjes për të ndihmuar në diskutim.)

Pasi studentët të kenë pasur kohë të mjaftueshme për ta diskutuar skenarin, ftojini ata të renditin në tabelë disa nga të vërtetat për të cilat biseduan. Ndërtoni mbi këto të vërteta gjatë gjithë mësimit.

Mund ta ftoni një student/e që ta recitojë ose ta lexojë vargun te Moisiu 1:39 dhe më pas kërkojini klasës të shpjegojë se çfarë na mëson ky varg rreth qëllimeve të planit të Atit Qiellor. Nëse nevojitet, pyetini studentët se si do ta përkufizonin “jetën e përjetshme” dhe mënyrën se si ai qëllim lidhet me familjen. (Shihni pjesën e parë në materialin e përgatitjes si ndihmë për një përkufizim.)

Merreni parasysh të shfaqni figura që përfaqësojnë Krijimin dhe Rënien e Adamit dhe të Evës. Ftojini studentët të rishikojnë vargjet te Doktrina e Besëlidhje 49:15–17 dhe 2 Nefi 2:22–23. Pastaj bëni pyetjet vijuese:

• Si ndihmoi Krijimi i tokës për t’i përmbushur qëllimet e përjetshme të Atit Qiellor për fëmijët e Tij? (Përgjigjet e studentëve mund të jenë të ngjashme me sa vijon: Toka u krijua që të sigurohej një vend ku fëmijët e Perëndisë të mund të lindeshin në familje dhe të përparonin së bashku.)

• Si ndihmoi Rënia e Adamit dhe Evës për t’i çuar përpara qëllimet e Atit dhe për ta lejuar tokën “të përmbushë qëllimin e krijimit të saj”? (Doktrina e Besëlidhje 49:16). (Studentët mund të japin përgjigje të ndryshme, përfshirë pohimin e një të vërtete të ngjashme me këtë: Për shkak të Rënies, Adami dhe Eva mund të lindnin fëmijë dhe pasardhësit e tyre mund të përparonin drejt jetës së përjetshme.)

• Si mund të ndikojë të kuptuarit e këtyre qëllimeve të Krijimit dhe Rënies te përpjekjet tona për t’u dhënë përparësi e për të krijuar vetë familjet tona të përjetshme?

Nëpërmjet Shlyerjes së Tij, Jezu Krishti i ka bërë të mundura familjet e përjetshme.

Merreni parasysh diskutimin e pyetjes vijuese si klasë:

• Cili është roli i Shpëtimtarit dhe i Shlyerjes së Tij në bërjen të mundur të familjeve të përjetshme? (Merreni parasysh të rishikoni vargjet te 2 Nefi 9:6–8, 10, 18 për t’i ndihmuar studentët të përcaktojnë se nëpërmjet Shlyerjes së Tij, Jezu Krishti siguron një mënyrë që të gjithë fëmijët e Atit Qiellor ta mposhtin mëkatin dhe vdekjen.)

Paraqiteni thënien e mëposhtme nga Plaku M. Rasëll Ballard, i Kuorumit të Dymbëdhjetë Apostujve:

Faktori përcaktues që i lidh të gjitha – nga i cili varet plani i Perëndisë dhe fati ynë i përjetshëm dhe rreth të cilit rrotullohet gjithçka tjetër – është Shpëtimtari ynë, Jezu Krishti. Flijimi i Tij shlyes i bën të gjitha gjërat të mundura, përfshirë, por jo vetëm i kufizuar te një martesë dhe familje të dashur, përkujdesëse dhe të përjetshme. (M. Rasëll Ballard, “Mundësitë dhe Përgjegjësitë e Mësuesve të SAK-ut në Shekullin e 21-të” [mbrëmje me një Autoritet të Përgjithshëm, 26 shkurt 2016], ChurchofJesusChrist.org).

Ftojini studentët të shqyrtojnë atë që shkruan në përgjigje të pyetjeve në fund të pjesës 2 të materialit të përgatitjes. (Nëse është e nevojshme, jepuni studentëve kohë për t’i mbajtur shënim përgjigjet e tyre ose për të shtuar diçka në to.) Ftojini disa studentë të tregojnë atë që shkruan. Merreni parasysh të shprehni edhe ndjenjat tuaja.

Për t’i ndihmuar studentët të veprojnë sipas asaj që mësuan sot, zgjidhni njërën ose të dyja idetë vijuese – cilado që të jetë më e dobishme për studentët tuaj.

Kërkojini një studenti të lexojë me zë të lartë thënien nga Plaku Robert D. Hejls në pjesën 3 të materialit të përgatitjes.

• Në çfarë mënyrash mund ta shihni Satanin të veprojë për të sulmuar martesat dhe familjet në kohën tonë?

Ftojini studentët të shpenzojnë një ose dy minuta kohë për të marrë në shqyrtim mënyrat se si Satani mund të jetë duke u përpjekur që t’i sulmojë martesat dhe familjet e tyre (në të tashmen dhe në të ardhmen). Nxitini ata gjithashtu të përsiatin dhe t’i mbajnë shënim ndjenjat e tyre rreth mënyrës se si mbajtja e një këndvështrimi të përjetshëm mund t’i ndihmojnë që t’u japin përparësi e t’i mbrojnë familjet e tyre.

Jepuni studentëve kohë të reflektojnë më tej për pyetjet vijuese nga pjesa 3 e materialit të përgatitjes dhe t’i shënojnë përshtypjet që mund të marrin:

• Si mund ta bëni familjen tuaj më qendrore në jetën tuaj?

• Si mund ta ftoni fuqinë e Zotit në përpjekjet tuaja për të krijuar ose për ta forcuar vetë familjen tuaj të përjetshme?

Pas një kohe të mjaftueshme, ftoni disa studentë që janë të gatshëm të flasin për këtë. Nxitini studentët të veprojnë sipas asaj që ndien.

Për Herën Tjetër

Merreni parasysh ta rishikoni shkurtimisht me studentët atë që kanë mësuar në katër mësimet e para të kursit. Mund të sugjeroni se herën tjetër që do të mblidheni, do t’u jepni atyre mundësi për të treguar atë që kanë qenë duke e vënë në zbatim deri tani me familjen e tyre ose me njerëz të tjerë. Ftojini studentët teksa përgatiten për orën e ardhshme mësimore që të mendojnë me kujdes rreth mënyrës se si zgjedhjet që bëjnë me trupat e tyre fizikë mund të ndikojnë te familjet e tyre dhe te plani i Perëndisë për ta.