Materiali i Mësuesit për Mësimin 28

Të Ndiejmë Shpresë për Ndërtimin e një Familjeje të Përjetshme

Ne të gjithë kemi shpresë se mund të ndërtojmë një familje të përjetshme, pavarësisht se cilat kanë qenë rrethanat tona familjare. Ky mësim do t’i ndihmojë studentët të kuptojnë më mirë se si mund t’i ndihmojë Zoti që t’ia dalin me sukses në ndërtimin e një familjeje të përjetshme. Studentët gjithashtu do të kenë mundësinë të tregojnë dhe përcaktojnë se si ta zbatojnë më tej atë që kanë mësuar dhe përjetuar në kursin Familja e Përjetshme.

Sugjerime për Mësimdhënien

Zoti dëshiron të na ndihmojë që t’ia dalim me sukses në ndërtimin e familjeve të përjetshme.

Shënim: Me kujdes përzgjidheni alternativën e mësimdhënies për pjesën e parë të mësimit që do t’i bekojë më shumë studentët tuaj. Sigurohuni që të lini rreth 20 minuta për pjesën përfundimtare të mësimit.

Fillojeni mësimin duke i ftuar studentët që të përsiatin dhe t’i shënojnë mendimet e tyre rreth pyetjes vijuese:

• Çfarë shpresash keni ju për ndërtimin e një familjeje të përjetshme?

Pas një kohe të mjaftueshme, ftojini disa studentë të japin mendimet e tyre nëse ndihen rehat.

Paraqitni të vërtetën vijuese nga citimi i Plakut Dejvid A. Bednar në pjesën 2 të materialit të përgatitjes: “Me ndihmën e Zotit, ju mund të krijoni një familje të përjetshme” (“Një Lidhje Bashkëngjitëse” [takim shpirtëror mbarëbotëror për të rinjtë e të rejat në moshë madhore, 10 shtator 2017], broadcasts.ChurchofJesusChrist.org).

Zgjidhni njërën prej veprimtarive në vijim për t’i ndihmuar studentët që të thellojnë të kuptuarit e tyre për këtë të vërtetë dhe për t’i lejuar të tregojnë atë që mësuan ndërkohë që përgatiteshin për orën mësimore:

Alternativa 1

Kujtojini studentët se në veprimtarinë “Shënojini Mendimet Tuaja” në pjesën 1 të materialit të përgatitjes, ata u ftuan të përcaktonin një shembull nga shkrimet e shenjta ose përvoja e vetë familjes së tyre për mënyrën se si i ndihmon Zoti ata që mirëbesojnë tek Ai dhe kërkojnë ndihmën e Tij. Jepuni studentëve pak minuta për të rishikuar shembujt dhe përgjigjet e tyre për pyetjet.

Ndajini studentët në dyshe ose në grupe të vogla. Lejojuni studentëve kohë të mjaftueshme për të treguar shembujt dhe përgjigjet e tyre.

Kur studentët të kenë mbaruar, shkruajeni thënien e papërfunduar vijuese në tabelë: Gjithmonë mbani mend: . Jepini secilit student një copë të vogël letre dhe një shirit ngjitës. Ftojini studentët të shkruajnë se si do ta përfundonin fjalinë në tabelë për të formuluar një të vërtetë nisur nga ajo që kanë mësuar në diskutimin me grupin e tyre, gjë e cila i ndihmon të ndihen plot shpresë rreth ndërtimit të një familjeje të përjetshme. Pastaj kërkojuni studentëve t’i ngjitin fletët nëpër dhomë. (Nëse klasa juaj është e vogël, mund ta përshtatni këtë veprimtari duke i ftuar studentët t’i shkruajnë përgjigjet e tyre në tabelë.)

Jepuni studentëve pak minuta që të ecin nëpër dhomë dhe të lexojnë thëniet e njëri‑tjetrit. Kur studentët të mbarojnë, nxitini të shënojnë ndonjë të vërtetë shtesë që duan ta mbajnë mend ose ndonjë mbresë që mund ta kanë marrë.

Alternativa 2

Shpjegoni se disa prej nesh mund të hasin vështirësi që të ndihen plot shpresë rreth ndërtimit të një familjeje të përjetshme, sepse nuk kemi përjetuar modele të drejta familjare në vetë familjet tona.

• Çfarë mund të mësojmë nga përvoja e profetit Abraham që mund të na japë shpresë? (Nxitini studentët të kujtojnë atë që e mësuan rreth Abrahamit te pjesa 2 e materialit të përgatitjes. Merreni parasysh të lexoni së bashku tek Abraham 1:2. Më pas ndihmojini studentët të përcaktojnë një të vërtetë si ajo që vijon: Ne mund të jemi çasti vendimtar për familjen tonë dhe të zgjedhim drejtësinë pavarësisht se cilat kanë qenë rrethanat e familjes sonë.)

• Kush ishte, nëse ishte dikush, personi që ka qenë vendimtar në fillimin (ose vazhdimin) e modeleve të drejta familjare në familjen tuaj? Çfarë ndryshimi kanë sjellë në jetën tuaj vendimet e këtij personi?

Ftojeni një student të lexojë me zë të lartë paragrafët e tretë dhe të pestë të citimit nga Plaku Dejvid A. Bednar në pjesën 2 të materialit të përgatitjes.

• Si mund t’ju ndihmojë Zoti që t’i “shtoni forcë zinxhirit tuaj e ndoshta edhe të ndihmoni për t’i rivendosur lidhjet e thyera”? (“Një Lidhje Bashkëngjitëse”). (Ju mund të dëshironi t’i ftoni studentët që t’i shënojnë përgjigjet e tyre për këtë pyetje në vend që t’i diskutoni si klasë.)

Ftojini studentët të reflektojnë mbi pyetjet që u ftuan t’i përsiatin lidhur me modelet e familjes për t’i filluar, vazhduar ose për të mos i vazhduar (shih pjesën 2 të materialit të përgatitjes). Nxitini studentët të mbajnë shënim çfarëdo mendimi ose mbrese që kanë.

Ne bekohemi duke reflektuar mbi atë që kemi mësuar dhe duke planifikuar mënyra për ta vënë atë në jetë.

Përmirësimi i Mësimdhënies dhe i të Mësuarit Tonë

Jepuni studentëve kohë për të reflektuar. Studentët mund të gjejnë qëllim dhe kuptim më të thellë në të mësuarit e tyre, teksa marrin kohën për të reflektuar mbi mënyrën se si kanë ndikuar në mendjen, zemrën dhe jetën e tyre të vërtetat e ungjillit. Nxitja e studentëve që të mendojnë rreth mënyrës se si do ta vënë në jetë atë që kanë mësuar dhe ndier mund t’i ndihmojë për ta thelluar kthimin e tyre në besim.

Merreni parasysh të paraqitni një kopje të proklamatës “Familja: Një Proklamatë drejtuar Botës” (ChurchofJesusChrist.org). Kujtojuani studentëve mundësinë që kanë pasur gjatë gjithë këtij kursi për t’i studiuar mësimet mbi familjen nga një këndvështrim i përjetshëm.

Paraqitini titujt e mësimeve nga ky kurs ose ftojini studentët t’u referohen atyre në pajisjet e tyre elektronike. Lejojuni studentëve kohë që të rishikojnë titujt e mësimeve për t’i ndihmuar të reflektojnë për atë që kanë mësuar, ndier dhe përjetuar gjatë këtij kursi. Më pas ftojini studentët të japin mendimet e tyre. Ju mund të doni të bëni pyetje si ato që vijojnë për të ndihmuar që të çohet më tej diskutimi:

• Si ka ndikuar ky kurs te të kuptuarit dhe dëshmia juaj për mësimet e Zotit mbi martesën dhe familjen?

• Cila ka qenë njëra nga idetë më të rëndësishme që nxorët nga ky kurs?

• Çfarë keni mësuar rreth Atit Qiellor dhe Jezu Krishtit gjatë gjithë këtij kursi? Si është forcuar marrëdhënia juaj me Ta?

Për ta përfunduar këtë mësim ju mund të ftoni një student/e që të lexojë me zë të lartë thënien nga Presidenti M. Rasëll Ballard në pjesën 3 të materialit të përgatitjes. Mund të jetë e dobishme të paraqitni pyetjet vijuese dhe t’u jepni studentëve disa minuta kohë për të shënuar mendimet ose mbresat e tyre rreth tyre:

• Si do të jetë jeta juaj e ndryshme si rezultat i asaj që keni mësuar dhe përjetuar në këtë kurs? Si do të jeni më shumë si Jezu Krishti?

Merreni parasysh të ftoni ndonjë student që dëshiron të japë dëshminë e vet rreth rëndësisë së familjes në planin e Atit Qiellor për lumturinë, që ta bëjë këtë gjë siç ua lejon koha. Merreni parasysh të jepni edhe vetë dëshminë tuaj. Dhe nxitini studentët të vazhdojnë të regjistrohen në institut.