1 ’E i muri a’era, ’ia hope a’era e piti ao ’e e piti ho’i ru’i, ’ua fātata roa rātou i te rave i tōna tino nō te tu’u atu i roto i te hō’ē mēnema i hāmanihia e rātou nō te huna i tō rātou feiā pohe.

2 I teienei, ’ia fa’aro’o a’era te ari’i vahine i te ro’o o Amona, nō reira ’ua tono atu ra ’oia i te hō’ē ve’a, i hina’aro ho’i ’oia ’ia haere mai ’oia i mua iāna ra.

3 ’E i muri a’era, ’ua nā reira Amona mai te au i tei fa’auehia mai iāna ra, ’e ’ua haere atu ra ’oia i mua i te ari’i vahine, ’e ’ua ui atu ra iāna i te mea tāna i hina’aro iāna ’ia rave.

4 ’E ’ua parau mai ra ’oia iāna : ’Ua fa’a’ite mai te mau tāvini o tā’u ra tāne ē, e peropheta ’oe nā te Atua mo’a, ’e e mana ho’i tō ’oe nō te rave i te mau ’ohipa rarahi e rave rahi i tōna ra i’oa.

5 Nō reira, mai te mea e parau mau te reira, tē hina’aro nei au ’ia haere ’oe i roto nō te hi’o i tā’u ra tāne, nō te mea ’ua tu’uhia ’oia i ni’a iho i tōna ro’i nō te ārea e piti ao ’e e piti ho’i ru’i te maoro ; ’e tē parau ra te tahi pae ē, ’aita ’oia i pohe, ’e tē parau ra ho’i te tahi atu pae ē, ’ua pohe ’oia ’e tē hau’a ’ino ra ho’i, ’e e mea ti’a iāna ’ia tu’uhia atu i roto i te mēnema ; ’āre’a rā iā’u iho nei, ’aita roa ’oia e hau’a ’ino ra.

6 I teienei, teie ïa tō Amona hina’aro, nō te mea ’ua ’ite ’oia ē, tei roto te ari’i ra ’o Lamoni i te mana o te Atua ; ’e ’ua ’ite ho’i ’oia ē, i rave-’ē-hia atu te pāruru pōiri nō te ti’aturi ’ore i tōna ferurira’a, ’e ’ua tae mai te māramarama tei ha’amāramarama mai i tōna ra ferurira’a, ’oia ho’i, te māramarama o te hanahana o te Atua, ’oia te māramarama māere ho’i o tōna ra maita’i—’oia ïa, ’ua fa’aō taua māramarama ra i te ’oa’oa rahi i roto i tōna vārua, ’e ’ua pe’e ’ē atu ra te ata pōiri, ’e ’ua fa’aamahia te māramarama nō te ora mure ’ore i roto i tōna ra vārua, ’oia ïa, ’ua ’ite ’oia ē, e mana tō te reira i ni’a i tōna tino tāhuti, ’e ’ua ’āfa’i-’ē-hia atu tōna vārua i roto i te Atua ra—

7 Nō reira, ’o tā te ari’i vahine i hina’aro mai iāna ra, ’o tōna ato’a iho ïa hina’aro. Nō reira, ’ua haere atu ra ’oia i roto nō te hi’o i te ari’i mai tā te ari’i vahine i hina’aro iāna ; ’e ’ua hi’o atu ’oia i te ari’i, ’e ’ua ’ite ihora ’oia ē, ’aita roa ’oia i pohe.

8 ’E ’ua parau atu ra ’oia i te ari’i vahine : ’Aita ’oia i pohe, tē ta’oto noa ra rā ’oia i te Atua, e ananahi e ti’a fa’ahou mai ’oia i ni’a ; nō reira, ’eiaha roa e huna iāna.

9 ’E ’ua parau atu ra Amona iāna : ’Ua ti’aturi ānei ’oe i te reira ? ’E ’ua parau mai ra ’oia iāna : ’Aita tō’u e ’ite maori rā ’o tā ’oe parau ana’e ra, ’e te parau ho’i a tō māua mau tāvini nei ; ’āre’a rā tē ti’aturi nei au ē, e tupu ïa te reira mai tā ’oe i parau iho nei.

10 ’E ’ua parau atu ra Amona iāna : E ao tō ’oe nō tō ’oe fa’aro’o rahi ; tē parau atu nei au ia ’oe, e teie nei vahine, ’aita teie huru fa’aro’o rahi i ’itehia i rotopū i te mau ’āti Nephi ato’a.

11 ’E i muri a’era, ’ua tīa’i noa a’era ’oia i te ro’i o tāna tāne, mai taua taime mai ra ē tae noa atu i taua iho taime ra i te po’ipo’i a’e ’o tā Amona i fa’ata’a e ti’a mai ai ’oia i ni’a.

12 ’E i muri a’era, ’ua ti’a mai ’oia i ni’a, mai te au i te mau parau a Amona ; ’e ’a ti’a mai ai ’oia i ni’a, ’ua fa’atoro atu ra ’oia i tāna rima i ni’a i te vahine ra, ’e ’ua nā ’ō atu ra : ’Ia fa’ahanahanahia tō te Atua ra i’oa, ’e ’ia fa’ahanahanahia ho’i ’oe.

13 Nō te mea, mai ia ’oe e ora nei, ’ua ’ite au i tō’u Tāra’ehara ; ’e e haere mai ’oia ’e e fānauhia ’oia e te hō’ē vahine, ’e e fa’aora ’oia i te mau ta’ata ato’a ’o tē ti’aturi i tōna ra i’oa. I teienei, ’ia oti a’era tāna paraura’a mai i teie mau parau, ’ua putapū ihora tōna ’ā’au i roto iāna, ’e ’ua ma’iri fa’ahou ihora ’oia i raro nō te ’oa’oa ; ’e ’ua ma’iri ato’a ihora te ari’i vahine i raro, ’ua paruparu ho’i ’oia i te Vārua.

14 I teienei, ’ia ’ite a’era Amona i te Vārua o te Fatu i te nīni’ira’ahia mai, mai te au i tāna ra mau pure, i ni’a iho i te mau ’āti Lamana, i tōna ra mau taea’e, ’o tei fa’atupu i te ’oto rahi i rotopū i te mau ’āti Nephi, ’e ’aore rā i rotopū i te mau ta’ata ato’a o te Atua ra, nō tā rātou mau ’ohipa ’ī’ino ’e tā rātou mau peu tumu ho’i, ’ua tu’u ihora ’oia i tōna turi i raro, ’e ’ua ha’amata ihora i te nīni’i atu i tōna vārua ato’a nā roto i te pure, i te ha’amaita’ira’a atu i te Atua nō tāna i rave na i tōna ra mau taea’e ; ’e ’ua ro’o-ato’a-hia ’oia i te ’oa’oa ; ’e ’ua ma’iri rātou to’otoru ato’a i raro i te repo.

15 I teienei, i te ’itera’a te mau tāvini o te ari’i ē ’ua ma’iri rātou i raro, ’ua ha’amata ato’a ihora rātou i te ti’aoro atu i te Atua, nō te mata’u ’o te ro’ohia ho’i rātou i te mata’u o te Fatu, ’o rātou ho’i tei ti’a i mua i te ari’i ra ’e tei fa’a’ite pāpū mai ho’i iāna i te mana rahi o Amona.

16 ’E i muri a’era, ’ua ti’aoro atu ra rātou i te i’oa o te Fatu ma tō rātou pūai, ē tae noa atu ’ua ma’iri rātou i raro i te repo, maori rā te hō’ē noa iho o te mau vahine ’āti Lamana, ’o Abisa tōna i’oa, i fa’afāriuhia na ho’i ’oia i te Fatu e rave rahi matahiti, nā roto i te hō’ē ’ōrama ta’a ’ē i fāri’ihia e tōna metua tāne—

17 Nō reira, nō te mea ’ua fa’afāriuhia ’oia i te Fatu, ’e ’aita ho’i ’oia i fa’a’ite atu i te reira, nō reira, i tōna ’itera’a ē ’ua ma’iri te mau tāvini o Lamoni i raro i te repo, ’e tōna ato’a fatu vahine, ’oia te ari’i vahine, ’e te ari’i, ’e ’o Amona ato’a ho’i i raro i te repo, ’ua ’ite ’oia ē nā te mana ïa te reira o te Atua ; ’e nō te mea ’ua mana’o ’oia ē, mai te mea e fa’a’itehia atu te mau mea i tupu i rotopū ia rātou i te mau ta’ata, ’e ’ia hi’o rātou i taua mea ra, e riro ïa rātou i te ti’aturi i te mana o te Atua, nō reira ’ua horo atu ’oia i terā fare ’e i terā fare, i te fa’a’itera’a atu i te reira i te mau ta’ata.

18 ’E ’ua ha’aputuputu mai ra rātou i te fare o te ari’i. ’E e rave rahi ta’ata tei haere mai, ’e i tō rātou māere, ’ua ’ite atu ra rātou i te ari’i, ’e te ari’i vahine, ’e tō rāua mau tāvini i te tāravara’a i raro i te repo, ’e tē tārava ra rātou mai te mea ra ē, ’ua pohe roa rātou ; ’e ’ua ’ite ato’a atu rātou ia Amona, ’E inaha, e ’āti Nephi ’oia.

19 ’E i teienei ’ua ha’amata ihora te mau ta’ata i te amuamu i rotopū ia rātou iho ; ’e tē parau ra te tahi pae ē, e ’ino rahi teie i tae mai i ni’a iho ia rātou, ’oia ho’i, i ni’a iho i te ari’i ’e tōna ’utuāfare, nō te mea ’ua fa’ati’a ’oia ’ia pārahi mai taua ’āti Nephi ra i taua fenua ra.

20 ’Āre’a rā ’ua ’avau a’era te tahi pae ia rātou, i te nā-’ō-ra’a ē : Nā te ari’i iho i fa’atae mai i teie nei ’ino i ni’a iho i tōna ’utuāfare, nō te mea ’ua taparahi ’oia i tōna mau tāvini, ’o tei tīa’i i te mau nana māmoe i ha’apurarahia i te mau pape nō Sebusa ra.

21 ’E ’ua fa’ahapa-ato’a-hia rātou e te mau ta’ata i ti’a na i te mau pape nō Sebusa ra, ’e tei ha’apurara ho’i i te mau nana māmoe a te ari’i ra ; ’ua riri ho’i rātou ia Amona nō te rahi o tō rātou mau taea’e tāna i taparahi i te mau pape nō Sebusa ra, ’a pāruru ai ’oia i te mau nana māmoe a te ari’i ra.

22 I teienei, ’ua riri roa te hō’ē ’o rātou ia Amona, ’oia ’o tei taparahihia tōna taea’e i te ’o’e a Amona ra ; ’ua huti ihora ’oia i tāna ’o’e ’e ’ua haere atu ra nō te taparahi ia Amona ; ’e ’a fa’ateitei ai ’oia i te ’o’e nō te taparahi iāna, inaha, ’ua ma’iri ihora ’oia i raro, ’e ’ua pohe roa.

23 I teienei, ’ua ’ite tātou ē, ’aita roa ’o Amona e ti’a ’ia taparahihia, nō te mea ’ua parau mai te Fatu i tōna metua tāne ia Mosia : E fa’aora noa vau iāna, ’e te mau mea ato’a e tupu i ni’a iho iāna ra mai te au ïa i tō ’oe fa’aro’o—nō reira, ’ua tu’u Mosia iāna i te Fatu ra.

24 ’E i muri a’era, ’ia ’ite a’era te mau ta’ata ē, ’ua pohe roa taua ta’ata i fa’ateitei i te ’o’e nō te taparahi ia Amona, ’ua mata’u ihora rātou ato’a, ’e ’aita atu ra rātou i fa’atoro noa atu i tō rātou rima nō te taparahi iāna, ’e ’aita ato’a i te hō’ē noa atu o rātou ’o tei ma’iri i raro ; ’e ’ua ha’amata ihora rātou i te māere fa’ahou i rotopū ia rātou iho i te tumu nō taua mana rahi ra, ’e ’aore rā i te aura’a nō taua mau mea ra.

25 ’E i muri a’era, e rave rahi tō rotopū ia rātou ’o tei parau ē : E Vārua Rahi ’o Amona ; ’e ’ua parau ho’i te tahi atu pae ē, ’ua tonohia mai ’oia e te Vārua Rahi ;

26 ’Āre’a rā, ’ua ’avau te tahi atu pae ia rātou ato’a, i te nā-’ō-ra’a ē : E demoni ’oia tei tonohia mai nō ’ō mai i te mau ’āti Nephi nō te ha’amāuiui ia rātou.

27 ’E tē vai ra te tahi pae ’o tei parau ē, ’ua tonohia mai Amona e te Vārua Rahi nō te ha’ape’ape’a ia rātou nō tā rātou mau ’ohipa ’ī’ino ; ’e ’ua pārahi tāmau noa taua Vārua Rahi ra i rotopū i te mau ’āti Nephi, ’e nāna i fa’aora atu ia rātou i tō rātou ra rima ; ’e ’ua parau ho’i rātou ē, nā teie Vārua Rahi i ha’amou i tō rātou mau taea’e e rave rahi, i te mau ’āti Lamana.

28 ’E ’ua nā reira te mārōra’a rahi i te tupu i rotopū ia rātou. ’E ’a mārō noa ai rātou, ’ua haere mai ra te tāvini vahine i ha’aputuputu ’āmui mai ia rātou, ’e ’ia ’ite a’era ’oia i te mārōra’a i rotopū i te mau ta’ata, ’ua ’oto roa ihora ’oia, ’e ’ua tahe noa ihora tōna roimata.

29 ’E i muri a’era, ’ua haere atu ra ’oia ’e ’ua rave atu ra i te rima o te ari’i vahine, penei a’e ’o te fa’ati’a mai ’oia iāna i ni’a mai raro mai i te repo ; e i tōna iho tāpe’ara’a atu i tōna rima, ’ua ti’a mai ra ’oia i ni’a i tōna nā ’āvae, ’e ’ua pi’i mai ra ma te reo pūai, i te nā-’ō-ra’a ē : ’Ia fa’ahanahanahia Iesu, ’o tei fa’aora mai iā’u nei i te hade ri’ari’a rahi ! E te Atua hanahana, ’a aroha mai i teie nei mau ta’ata !

30 ’E ’ia oti a’era tāna paraura’a i teie, ’ua tuiau ihora ’oia i tōna nā rima, nō te mea ’ua ’ī roa ’oia i te ’oa’oa, ’e ’ua parau atu ra ’oia i te mau parau e rave rahi ’aita i ’ite-pāpū-hia ; ’e ’ia oti a’era tāna paraura’a i teie, ’ua rave ihora ’oia i te rima o te ari’i ra o Lamoni, ’E inaha, ’ua ti’a ihora ’oia i ni’a i tōna ’āvae.

31 ’E ’ia ’ite ’oi’oi a’era ’oia i te mārōra’a i rotopū i tōna ra mau ta’ata, ’ua haere atu ra ’oia ’e ha’amata ihora i te ’avau atu ia rātou, ’e i te ha’api’i ia rātou i te mau parau tāna i fa’aro’o nō roto mai i te vaha o Amona ; ’e ’ua ti’aturi te mau ta’ata e rave rahi ’o tei fa’aro’o i tāna mau parau, ’e ’ua fa’afāriuhia mai rātou i te Fatu.

32 ’Āre’a rā tē vai ra e rave rahi i rotopū ia rātou ’o tei ’ore i hina’aro ’ia fa’aro’o i tāna mau parau ; nō reira ’ua haere ’ē atu rātou i tō rātou haere’a.

33 ’E i muri a’era, ’ia ti’a a’era Amona i ni’a, ’ua tauturu atu ra ’oia ia rātou, ’e ’ua nā reira ato’a ho’i te mau tāvini ato’a o Lamoni ; e hō’ē ā huru te mea tā rātou ato’a i fa’a’ite atu i te mau ta’ata—’e ’ua fa’ahuru-’ē-hia tō rātou ’ā’au ; ’e ’aita tō rātou e hina’aro fa’ahou nō te rave i te ’ino.

34 ’E inaha, e rave rahi tei fa’a’ite i te mau ta’ata ē, ’ua ’ite rātou i te mau melahi ’e ’ua paraparau atu ho’i ia rātou ; ’e ’ua nā reira rātou i te fa’a’ite atu ia rātou i te mau mea a te Atua, e tōna ra parauti’a.

35 ’E i muri a’era, e rave rahi tei ti’aturi mai i tā rātou mau parau ; ’e ’o rātou ’o tei ti’aturi mai ’ua bāpetizohia ïa ; ’e ’ua riro atu ra rātou ’ei feiā parauti’a, ’e ’ua fa’ati’a rātou i te ’ēkālesia i rotopū ia rātou.

36 ’E ’ua nā reira te ’ohipa a te Atua i te tupu i rotopū i te mau ’āti Lamana ; ’e ’ua nā reira ho’i te Fatu i te ha’amata i te nīni’i mai i tōna Vārua i ni’a iho ia rātou ; e tē ’ite nei tātou ē, ’ua fa’atorohia tōna rima i te mau ta’ata pā’āto’a ’o tē tātarahapa ’e ’o tē ti’aturi i tōna ra i’oa.