1 ’E i muri a’era, ’ia fa’atupuhia te riri i roto i te mau ’āti Amaleka, ’e te mau ’āti Amulona, ’e te mau ’āti Lamana, ’o tei pārahi i te fenua ra nō Amulona, ’e i te fenua ato’a ra i Helama, ’e tei pārahi ato’a i te fenua ra nō Ierusalema, ’oia ho’i, tei pārahi i te mau fenua ato’a ē ’ati noa a’e, ’o tei ’ore i fa’afāriuhia ’e tei ’ore i rave i te i’oa o Aneti-Nephi-Lehi i ni’a iho ia rātou, ’oia ïa, ’ua fa’ati’arepu te mau ’āti Amaleka ’e te mau ’āti Amulona i te riri i roto i tō rātou ra mau taea’e.

2 ’E ’ua rahi roa tō rātou ’ino’ino ia rātou, ’e nō reira ’ua ha’amata ihora rātou i te mārō atu i tō rātou ari’i, ’e nō reira ’aita atu ra rātou i hina’aro ’ia riro noa ’oia ’ei ari’i nō rātou ; nō reira, ’ua rave ihora rātou i tā rātou mau mauha’a tama’i nō te ’aro atu i te mau ta’ata o Aneti-Nephi-Lehi.

3 I teienei, ’ua hōro’a atu ra te ari’i i te mana nō tōna bāsileia i ni’a i tāna tamaiti, ’e ’ua ma’iri atu ra ’oia i tōna i’oa ’o Aneti-Nephi-Lehi.

4 ’E ’ua pohe ihora te ari’i i taua ihora matahiti i ha’amata ai te mau ’āti Lamana i te fa’aineine ia rātou iho nō te ’aro mai i te mau ta’ata o te Atua.

5 I teienei, ’ia ’ite a’era Amona ’e tōna ra mau taea’e ’e rātou ato’a i pīha’i iho iāna ra i te mau fa’aineinera’a a te mau ’āti Lamana nō te ha’amou i tō rātou mau taea’e, ’ua haere atu ra rātou i te fenua ra nō Midiana, ’e i reira ’ua fārerei atu ra Amona i tōna ato’a ra mau taea’e ; e mai reira ’ua haere atu ra rātou i te fenua ra nō Isema’ela, ’ia ti’a ia rātou ’ia fa’atupu i te hō’ē ’āpo’ora’a ’e Lamoni ’e tōna taea’e ato’a o Aneti-Nephi-Lehi, nō te fa’anaho i te mau mea tā rātou e rave nō te pāruru ia rātou iho i te mau ’āti Lamana.

6 I teienei, ’aita roa te hō’ē a’e ta’ata i rotopū i te mau ta’ata ato’a ’o tei fa’afāriuhia i te Fatu i hina’aro ’ia rave i te mauha’a tama’i nō te ’aro atu i tō rātou mau taea’e ; ’oia ïa, ’aita roa rātou i hina’aro ’ia fa’aineine nō te ’arora’a ; ’oia ïa, ’ua fa’aue ato’a mai ra tō rātou ari’i ia rātou ē ’eiaha rātou e nā reira.

7 I teienei, ’o teie te mau parau tāna i parau atu i tōna ra mau ta’ata nō ni’a i taua mea ra : Tē ha’amāuruuru nei au i tō’u Atua, e tō’u mau ta’ata here, nō te maita’i o tō tātou Atua rahi ’ua tono mai ’oia i teie mau taea’e tō tātou, te mau ’āti Nephi, nō te a’o mai ia tātou, ’e nō te fa’a’ite pāpū mai ia tātou nō ni’a i te mau peu tumu a tō tātou mau metua parauti’a ’ore.

8 ’E inaha, tē ha’amāuruuru nei au i tō’u Atua rahi nō te mea ’ua hōro’a mai ’oia i te hō’ē tufa’a nō tōna Vārua ia tātou nei nō te tāmarū i tō tātou ’ā’au, i ti’a ai ia tātou ’ia fa’ahoa atu i teie mau taea’e, te mau ’āti Nephi.

9 ’E inaha, tē ha’amāuruuru ato’a nei au i tō’u Atua, i te mea ē nā roto i teie fa’ahoara’a ’ua fa’a’ite-pāpū-hia mai tātou nō ni’a i tā tātou mau hara, ’e nō te mau taparahira’a ta’ata tā tātou i rave.

10 ’E tē ha’amāuruuru ato’a nei au i tō’u Atua, ’oia ïa, i tō’u Atua rahi, ’o ’oia i fa’ati’a mai ia tātou ’ia tātarahapa i teie mau mea, ’e ’oia ato’a ’ua fa’a’ore ’oia i tā tātou mau hara e rave rahi ’e te mau taparahira’a ta’ata tā tātou i rave, ’e ’ua ’īriti ’ē atu ’oia i te hara i tō tātou ’ā’au, nā roto i te mau maita’i rahi o tāna ra Tamaiti.

11 ’E i teienei, inaha, e tō’u mau taea’e, nō te mea ’o te reira ana’e tē ti’a ’ia tātou ’ia rave (’a riro ai tātou ’ei mea ’ino roa atu i te mau ta’ata ato’a ra) nō te tātarahapa i tā tātou mau hara ato’a ’e te mau taparahira’a ta’ata e rave rahi tā tātou i rave, ’e nō te ani atu i te Atua ’ia ’īriti ’ē atu i te reira mau hara i tō tātou nei ’ā’au, nō te mea ’o te reira ana’e ho’i tē ti’a ’ia tātou ’ia rave nō te tātarahapa māite i mua i te Atua ’ia ti’a iāna ’ia horoi atu i tō tātou tāfetafeta—

12 I teienei, e tō’u mau taea’e here rahi, nō te mea ’ua horoi atu te Atua i tō tātou mau tāfetafeta, ’e ’ua riro mai ïa tā tātou mau ’o’e ’ei mea ’ana’ana, nō reira ’eiaha tātou e fa’atāfetafeta fa’ahou i tā tātou mau ’o’e i te toto o tō tātou ra mau taea’e.

13 Inaha, tē parau atu nei au ia ’outou na ē, ’Eiaha roa, ’a tāpe’a noa tātou i tā tātou mau ’o’e ’ia ’ore te reira ’ia vi’ivi’i i te toto o tō tātou mau taea’e ; ’e penei a’e, mai te mea e fa’atāfetafeta fa’ahou tātou i tā tātou mau ’o’e, e’ita roa te reira e ti’afa’ahou ’ia horoi-’ana’ana-hia i te toto o te Tamaiti a tō tātou Atua rahi, ’o tē ha’amani’ihia ’ei tāra’ehara nō tā tātou mau hara.

14 ’E ’ua aroha mai te Atua rahi ia tātou, ’e ’ua fa’a’ite mai i teie mau mea ia tātou ’ia ’ore tātou ’ia pohe ; ’oia ïa, ’e ’ua fa’a’ite ātea mai ’oia i teie mau mea ia tātou, nō te mea ’ua here ’oia i tō tātou vārua mai tāna i here ato’a i tā tātou mau tamari’i ; nō reira, nā roto i tōna ra aroha, ’ua tono mai ’oia i tāna mau melahi ia tātou nei, nō te fa’a’ite mai i te ’ōpuara’a nō te fa’aorara’a ia tātou nei ē tae noa atu i te mau u’i i mua nei.

15 ’Auē ho’i te aroha o tō tātou Atua ē ! ’E i teienei, inaha, nō te mea ’ua horoi-’ē-hia atu tō tātou mau tāfetafeta ia tātou, ’e ’ua fa’a’ana’anahia tā tātou mau ’o’e, ’ia huna tātou i te reira, ’ia vai ’ana’ana noa, ’ei fa’a’itera’a pāpū i tō tātou Atua i te mahana hope’a, ’oia te mahana e arata’ihia ai tātou ’ia ti’a i mua iāna ’ia ha’avāhia, ’e ’aita tātou i fa’atāfetafeta i tā tātou mau ’o’e i te toto o tō tātou mau taea’e mai te mahana mai ā i fa’a’ite mai ai ’oia i tāna parau ia tātou ’e i tāmā ai ia tātou.

16 ’E i teienei, e tō’u mau taea’e, mai te mea e tītau tō tātou mau taea’e ’ia ha’amou ia tātou, inaha, e huna tātou i tā tātou mau ’o’e, ’oia ïa, e tanu tātou i te reira i raro roa i te repo, ’ia vai ’ana’ana noa te reira, ’ei fa’a’itera’a pāpū i te mahana hope’a ’e ’aita roa tātou i fa’a’ohipa i te reira ; ’e mai te mea e ha’amou tō tātou mau taea’e ia tātou, inaha, e haere atu tātou i tō tātou Atua ’e e fa’aorahia ho’i i reira.

17 ’E i teienei, i muri a’era, ’ia oti a’era tā te ari’i paraura’a atu i teie mau parau, ’e ’ua ha’aputuputu ’āmui mai ra te mau ta’ata, ’e ’ua rave ihora rātou i tā rātou mau ’o’e, ’e te mau mauha’a tama’i ato’a i ravehia nō te ha’amani’ira’a i tō te ta’ata toto, ’e ’ua tanu ihora rātou i te reira i raro roa i te repo.

18 ’E ’ua nā reira rātou ma te mana’o ē, e fa’a’itera’a pāpū te reira i te Atua, ’e i te mau ta’ata ato’a ho’i ē, ’e ’aita roa rātou e fa’a’ohipa fa’ahou i te mau mauha’a tama’i nō te ha’amani’i i te toto o te ta’ata ; ’e ’ua nā reira rātou ma te tapu ’e ma te fafau i te Atua, i te nā-’ō-ra’a ē, e mea maita’i a’e ia rātou ’ia hōro’a i tō rātou iho ora, i te ha’amani’i i te toto o tō rātou mau taea’e ; ’e e mea maita’i a’e ho’i ia rātou i te hōro’a atu i te hō’ē mea nā tō rātou taea’e, i te rave mai i te reira mai ’ō mai iāna ra ; ’e e mea maita’i a’e ho’i ia rātou ’ia rave rahi i te ’ohipa i tō rātou iho rima, i te ha’amāu’a i tō rātou mau mahana i roto i te fa’atau.

19 ’E nō reira ’ua ’ite ho’i tātou ē, i tō te mau ’āti Lamana fa’afāriuhia ’ia ti’aturi ’e ’ia ’ite i te parau mau, ’ua ha’apa’o maita’i rātou, ’e ’ua ti’a ia rātou ’ia fa’a’oroma’i i te māuiui ē tae roa atu i te pohera’a, ma te rave ’ore i te hara ; ’e nō reira ’ua ’ite tātou ē, ’ua tanu rātou i tā rātou mau mauha’a nō te hau, ’oia ho’i ’ua tanu rātou i tā rātou mau mauha’a tama’i ’ia tupu te hau.

20 ’E i muri a’era, ’ua fa’aineine tō rātou mau taea’e, te mau ’āti Lamana nō te ’arora’a, ’e ’ua haere atu rātou i ni’a i te fenua ra nō Nephi nō te ’ōpua ’ia taparahi i te ari’i, ’e nō te tu’u i te tahi ’ē ’ei mono nōna, ’e nō te ha’amou ato’a i te mau ta’ata o Aneti-Nephi-Lehi i ni’a i te fenua.

21 I teienei, ’ia ’ite a’era te mau ta’ata ē, tē haere mai ra rātou nō te tama’i ia rātou, ’ua haere atu ra rātou nō te fārerei ia rātou, ’e ’ua tāhopu ihora rātou i raro i te repo i mua ia rātou ra, ’e ’ua ha’amata ihora i te pi’i atu i te i’oa o te Fatu ; ’e ’ua nā reira ho’i rātou ’a ha’amata ai te mau ’āti Lamana i te tā’iri mai ia rātou ’e i te taparahi mai ia rātou i te ’o’e.

22 ’E ’aita roa rātou i ’aro atu, ’e nō reira ’ua taparahi rātou hō’ē tauatini ’e e pae o tō rātou mau ta’ata ; ’e ’ua ’ite tātou ē, ’ua ha’amaita’ihia rātou, i te mea ē ’ua haere atu rātou e pārahi i pīha’i iho i tō rātou ra Atua.

23 I teienei, ’ia ’ite a’era te mau ’āti Lamana ē ’aita roa tō rātou mau taea’e e horo ’ē atu i te ’o’e, ’e ’aita ato’a rātou e fāriu i te rima ’atau ’e i te rima ’aui, ’āre’a rā ’ua tīpapa noa rātou i raro ’e ’ia pohe, ’e ’ia ha’amaita’i noa i te Atua ’a pohe ai rātou i te ’o’e ra—

24 I teienei, ’ia ’ite a’era te mau ’āti Lamana i te reira, ’ua fa’aea ihora rātou i te taparahi ia rātou ; ’e e rave rahi ’o tei ’oto rahi tō rātou ’ā’au nō tō rātou mau taea’e i pohe i te ’o’e, ’e ’ua tātarahapa ihora rātou i te mau mea tā rātou i rave.

25 ’E i muri a’era, ’ua fa’aru’e ihora rātou i tā rātou mau mauha’a tama’i i raro, ’e ’aita rātou e rave fa’ahou i te reira, nō te mea ’ua putapū roa rātou nō te mau taparahira’a ta’ata tā rātou i rave ; ’e ’ua tāhopu ihora rātou mai tō rātou mau taea’e i tāhopu ra, ma te ti’aturi i te aroha o te feiā i fa’ateitei i tō rātou rima nō te taparahi mai ia rātou.

26 ’E i muri a’era, i taua mahana ra, ’ua hau atu te rahi o te mau ta’ata i ’āmui mai i te feiā o te Atua i te mau ta’ata i taparahihia ; ’e te feiā i taparahihia e feiā parauti’a ïa rātou, nō reira ’ua ’ite pāpū tātou ē ’ua fa’aorahia rātou.

27 ’E ’aita roa te hō’ē ta’ata parauti’a ’ore i taparahihia i rotopū ia rātou ; ’āre’a rā ’ua hau atu i te tauatini ta’ata tei fa’afāriuhia mai i te ’ite i te parau mau ; nō reira tē ’ite nei tātou ē, tē ’ohipa ra te Fatu nā roto i te mau rāve’a e rave rahi nō te fa’aorara’a i tōna mau ta’ata.

28 I teienei, te pae rahi roa o te mau ’āti Lamana i taparahi i tō rātou ra mau taea’e, e mau ’āti Amaleka ’e e mau ’āti Amulona rātou, ’e nō te fa’anahora’a a tō Nehora ho’i te pae rahi o rātou.

29 I teienei, i rotopū i te mau ta’ata ato’a i ’āmui mai i te mau ta’ata o te Fatu, ’aita roa ïa te hō’ē nō roto mai i te mau ’āti Amaleki, ’e te mau ’āti Amulona, ’e nō te fa’anahora’a a Nehora, e mau hua’ai mau rā rātou nō Lamana ’e Lemuela.

30 ’E nō te reira tē ’ite pāpū nei tātou ē, ’ia ha’amāramarama-ana’e-hia te tahi mau ta’ata e te Vārua o te Atua, ’e ’ia noa’a ia rātou te ’ite rahi i te mau mea nō te parauti’a, ’e i muri iho ’a topa ai i roto i te hara ’e te ’ōfatira’a ture, e riro rātou ’ei feiā ’eta’eta atu, ’e e riro tō rātou huru ’ei mea ’ino roa atu i tō rātou huru hou rātou i ’ite ai i teie nei mau mea.