1 ’E i teienei, ’o teie te mau parau a Amona i tōna ra mau taea’e, i te nā-’ō-ra’a ē : E tō’u mau taea’e, inaha, tē parau atu nei au ia ’outou na, e aha te tumu rahi ’ua ’oa’oa tātou ; e ti’a ānei ia tātou ’ia mana’o ē, mai tō tātou ha’amatara’a mai mai te fenua mai ra i Zarahemela, ’e e hōro’a noa mai te Atua i te tahi mau ha’amaita’ira’a rahi roa ia tātou nei ?

2 ’E i teienei, tē ui nei au, e aha ïa te mau ha’amaita’ira’a rahi tāna i hōro’a mai ia tātou nei ? E ti’a ānei ia ’outou ’ia fa’a’ite mai ?

3 Inaha, e pāhono ïa vau nō ’outou ; i vai na ho’i tō tātou mau taea’e, te mau ’āti Lamana i roto i te pōiri, ’oia ïa, i te ’āpo’o pōiri ta’ota’o roa, inaha rā, e hia rahira’a tō rātou tei fa’afāriuhia mai ’ia ’ite i te māramarama māere o te Atua ! ’E ’o teie te ha’amaita’ira’a i hōro’ahia mai ia tātou nei, ’o tātou i riro ’ei mau mauha’a i roto i te rima o te Atua nō te fa’atupu i teie ’ohipa rahi.

4 Inaha, e rave rahi tauatini tō rātou e ’oa’oa nei, ’e tei fa’afāriuhia mai i roto i te nana a te Atua.

5 Inaha, ’ua ineine te ’āua nō te ’auhune, ’e e ao ho’i tō ’outou i te mea ē ’ua fa’a’ohipa ’outou i te mauha’a ’ō’oti, ’e ’ua ’ō’oti ma tō ’outou pūai, ’oia ïa, ’e ’ua rave ’outou i te ’ohipa i te mahana tā’āto’a ; ’e ’a hi’o na i te rahi o tā ’outou mau ruru sītona ! ’E e ha’apu’ehia te reira i roto i te mau fare vaira’a mā’a, ’ia ’ore ’ia māu’a.

6 ’Oia ïa, e’ita rātou e ha’ama’irihia i raro e te vero i te mahana hope’a ra ; ’oia ïa, e’ita ato’a ho’i e mahiti i te mau pūāhiohio ; ’āre’a rā ’ia tae mai te vero e ha’apu’e-’āmui-hia rātou i tō rātou vāhi, ’ia ’ore te vero ’ia tae noa mai i roto ia rātou ra ; ’oia ïa ; ’e e ’ore ho’i rātou e puhipuhihia e te mau mata’i pūai i te vāhi tā te ’enemi e hina’aro ’ia ’āfa’i atu ia rātou.

7 Inaha rā, tei roto rātou i te rima o te Fatu nō te ’auhune, ’e nōna ho’i rātou, ’e nāna rātou e fa’ati’a i ni’a i te mahana hope’a ra.

8 ’Ia fa’ahanahanahia te i’oa o tō tātou Atua ; ’ia hīmene tātou nō te ’ārue iāna, ’oia ïa, ’ia ha’amaita’i tātou i tōna ra i’oa mo’a, e ’ohipa parauti’a tāna e rave i teie nei ē a muri noa atu.

9 ’Āhiri ho’i ’aita tātou i haere mai i rāpae i te fenua ra nō Zarahemela, ’ua ’ī roa ā ïa tō tātou mau taea’e here-rahi-hia, ’o tei here rahi mai ia tātou nei, i te ’ino’ino ia tātou i teienei ā, ’oia ïa, ’e ’ua vai noa ho’i ïa rātou ’ei mau ta’ata ’ē i te Atua i teienei ā.

10 ’E i muri a’era, ’ia fa’aoti a’era Amona i te parau i teie nei mau parau, ’ua ’avau mai ra tōna taea’e o Aarona iāna, ’ua nā ’ō mai ra : E Amona, tē mata’u nei au ’o te ’umehia ’oe e tō ’oe na ’oa’oa i te fa’aahaahara’a.

11 ’Āre’a rā ’ua parau atu ra Amona iāna : ’Aita vau i fa’aahaaha i tō’u iho nei pūai, ’e ’aore ho’i i tō’u iho nei pa’ari ; inaha rā, ’ua ’ī au i te ’oa’oa, ’oia ïa, ’ua ’ī roa tō’u nei ’ā’au i te ’oa’oa, ’e tē poupou nei au i tō’u ra Atua.

12 ’Oia ïa, ’ua ’ite au ē, e mea faufa’a ’ore au ; i tō’u nei pūai e mea paruparu vau ; nō reira, e ’ore roa vau e fa’aahaaha i roto iā’u iho, e fa’ahanahana rā vau i tō’u ra Atua, nā roto ho’i i tōna ra pūai ’ua ti’a iā’u ’ia rave i te mau mea ato’a ; ’oia ïa, inaha, e rave rahi mau semeio tā tātou i rave i teie nei fenua, ’e nō reira e ’ārue tātou i tōna i’oa ē a muri noa atu.

13 Inaha, e hia rahira’a tauatini o tō tātou mau taea’e tei tātarahia mai e ana i te mau ’ati o hade ra ; ’e ’ua roa’a ia rātou te hina’aro ’ia hīmene i te aroha fa’aora, nō te mea tei roto ia tātou nei te mana nō tāna ra parau ; nō reira, ’aita ānei e tumu rahi e ti’a ai ia tātou ’ia ’oa’oa ?

14 ’Oia ïa, tē vai nei te tumu ’ua ti’a roa ia tātou ia ’ārue iāna ē a muri noa atu, ’o ’oia ho’i te Atua Teitei Roa, ’e nāna i tātara mai i tō tātou mau taea’e i te ru’uru’ura’a nō te mau fifi o hade ra.

15 ’Oia ïa, ’ua ha’a’ati-roa-hia na rātou i te pōiri ’e te pohe mure ’ore ; inaha rā, ’ua arata’i mai ’oia ia rātou i roto i tōna ra māramarama mure ’ore, ’oia ïa, i roto i te fa’aorara’a mure ’ore ; ’e ’ua ha’a’ati-roa-hia rātou i te maita’i fāito ’ore o tōna ra aroha ; ’oia ïa, i riro na ho’i tātou ’ei mau mauha’a i roto i tōna ra rima i te ravera’a i teie ’ohipa rahi ’e te māere.

16 Nō reira, ’ia fa’ahanahana tātou, ’oia ïa, e fa’ahanahana tātou i te Fatu ; ’oia ïa, e ’oa’oa tātou, i te mea ’ua ’ī roa tō tātou ’ā’au i te ’oa’oa ; ’oia ïa, e ’ārue tātou i tō tātou Atua ē a muri noa atu. Inaha, ’o vai ïa te ti’a iāna ’ia fa’arahi roa atu i te fa’ahanahanara’a i te Fatu ? ’Oia ïa, ’o vai ho’i ïa tē ti’a ’ia fa’arahi roa atu i te parau maita’i nō tōna ra mana rahi, ’e tōna ra aroha, ’e tōna ra fa’a’oroma’ira’a roa i te mau tamari’i a te ta’ata nei ? Inaha, tē parau atu nei au ia ’outou, e ’ore roa e ti’a iā’u ’ia fa’a’ite atu i te hō’ē vāhi iti a’e nō tō’u nei mana’o.

17 ’O vai ïa te ta’ata i mana’o na ē, ’ua aroha rahi roa mai te Atua ia tātou, ’e nō reira ’ua haru mai ’oia ia tātou mai roto mai i tō tātou huru ’ino rahi, ’e te hara, ’e te vi’ivi’i ?

18 Inaha, ’ua haere ti’a noa atu tātou i roto i te riri ’ū’ana, ’e te parau ha’amata’u rahi nō te ha’amou i tāna ’ēkālesia.

19 ’E teienei, nō te aha ho’i ïa ’aita ’oia i tu’u noa atu ia tātou i te pohe ri’ari’a, ’oia ïa, nō te aha ho’i ’aita ’oia i tu’u noa mai i te ’o’e nō tāna ra parauti’a ’ia ma’iri mai i ni’a iho ia tātou, ’e ’ia huri atu ia tātou i roto i te ’ati mure ’ore ?

20 ’Auē ho’i ē, e au atu ra ē tē fa’ata’a-’ē-hia nei tō’u nei ’ā’au i tō’u nei mana’ora’a. Inaha, ’aita roa ’oia i fa’atae mai i tāna ra utu’a parauti’a i ni’a iho ia tātou, nā roto rā i tōna ra aroha rahi ’ua arata’i mai ’oia ia tātou i rāpae i taua ’āpo’o mure ’ore nō te pohe ’e te mamae, ē tae atu ai i te fa’aorara’a o tō tātou vārua.

21 ’E i teienei, inaha, e tō’u mau taea’e, ’o vai ho’i ïa te ta’ata nei tei ’ite i teie mau mea ? Tē parau atu nei au ia ’outou na, ’aita roa ïa e ta’ata tei ’ite i teie mau mea, maori rā ’o te ta’ata ’ā’au tātarahapa.

22 ’Oia ïa, ’o ’oia ’o tē tātarahapa ’e tē fa’a’ohipa i te fa’aro’o, ’e ’o tē fa’atupu mai i te ’ohipa maita’i, ’e ’o tē pure tāmau noa ma te fa’aea ’ore—e hōro’ahia ïa iāna ’ia ’ite i te mau parau ’aro a te Atua ; ’oia ïa, e hōro’ahia ïa iāna ’ia heheu mai i te mau mea ’o tei ’ore ā i heheuhia mai ; ’oia ïa, ’e e hōro’ahia mai ïa iāna ’ia fa’afāriu mai i te mau ta’ata e rave rahi tauatini i te tātarahapara’a, mai tei hōro’ahia mai ia tātou ’ia fa’afāriu mai i teie mau taea’e tō tātou i te tātarahapara’a.

23 I teienei, tē ha’amana’o ra ānei ’outou, e tō’u mau taea’e ē, ’ua parau atu tātou i tō tātou mau taea’e i te fenua ra nō Zarahemela, ’e e haere atu tātou i te fenua ra nō Nephi, nō te a’o atu i tō tātou mau taea’e i te mau ’āti Lamana, ’e ’ua ’ata’ata mai ra rātou ma te tāhitohito mai ia tātou ?

24 ’E ’ua parau mai ho’i rātou ia tātou ē : tē mana’o ra ānei ’outou ē, e ti’a ia ’outou ’ia fa’afāriu mai i te mau ’āti Lamana ’ia ’ite i te parau mau ? Tē mana’o ra ānei ’outou ē, e ti’a ia ’outou ’ia fa’afāriu mai i te mau ’āti Lamana ’ia ’ite i te tano ’ore nō te mau peu tumu a tō rātou mau metua, ’a riro ai rātou ’ei feiā ’ā’au ’eta’eta ; tei ’oa’oa tō rātou ’ā’au ’ia ha’amani’i i te toto ; e tei rave noa i te mau ’ohipa ’ī’ino roa i te mau mahana nō tō rātou orara’a ; ’e tō rātou mau ’ē’a ’o te ’ē’a ïa o te ta’ata ’ōfati ture mai te ha’amatara’a mai ā ? I teienei, e tō’u mau taea’e, ’a ha’amana’o ’outou ē, ’o teie ïa tā rātou parau.

25 ’E ’oia fa’ahou, ’ua parau ato’a mai rātou : E rave tātou i te mau mauha’a tama’i nō te ’aro atu ia rātou, ’ia ha’amou tātou ia rātou ’e tā rātou mau ’ohipa ’ī’ino i te fenua nei, ’o te tae mai rātou nō te ha’avī ’e nō te ha’amou ia tātou.

26 Inaha rā, e tō’u mau taea’e here, ’ua haere mai tātou i roto i te mēdēbara nei, ’eiaha nō te ’ōpua ’ia taparahi i tō tātou mau taea’e, nō te ’ōpua rā penei a’e ’o te fa’aora tātou i te tahi pae iti o rātou.

27 I teienei, ’ua ’oto a’era tō tātou ’ā’au, ’e ’ua fātata a’era tātou i te ho’i, inaha, ’ua tāmāhanahana mai ra te Fatu ia tātou, ’e ’ua nā ’ō mai ra : ’A haere atu i rotopū i tō ’outou mau taea’e i te mau ’āti Lamana, ’e ’a fa’a’oroma’i i tō ’outou mau ’ati, ’e nā’u ’outou e ha’amanuia i reira.

28 ’E i teienei, inaha, ’ua haere mai nei tātou, ’e tei rotopū ho’i tātou ia rātou ; ’e ’ua fa’a’oroma’i māite ho’i tātou i tō tātou mau ’ati, ’e ’ua fa’a’oroma’i tātou i te mau huru pohe ato’a ; ’oia ïa, ’ua hāhaere ho’i tātou i terā fare ’e i terā fare, i te ti’aturira’a i te aroha o tō teie nei ao—’eiaha i te aroha o teie nei ao ana’e, i te aroha rā o te Atua.

29 ’E ’ua tomo atu tātou i roto i tō rātou mau fare ’e ’ua ha’api’i ia rātou, ’e ’ua ha’api’i tātou ia rātou i roto i tō rātou mau aroā ; ’oia ïa, ’ua ha’api’i tātou ia rātou i ni’a i tō rātou mau ’āivi ; ’e ’ua tomo ato’a atu tātou i roto i tō rātou mau hiero ’e tō rātou mau sunago ’e ’ua ha’api’i ia rātou ; ’e ’ua ti’avaruhia tātou i rāpae, ’e ’ua vahavahahia, ’e ’ua tūtuhahia mai tātou, ’e ’ua tā’irihia tō tātou mau pāpāri’a ; ’e ’ua pēhihia tātou i te ’ōfa’i, ’e ’ua ru’uru’uhia i te mau taura pa’ari, ’e ’ua hurihia i roto i te fare tāpe’ara’a ; ’e nā roto i te mana ’e te pa’ari o te Atua ’ua fa’aora-fa’ahou-hia mai tātou nei.

30 ’E ’ua fa’a’oroma’i tātou i te mau huru ’ati ato’a, penei a’e ’o te riro tātou ’ei rāve’a nō te fa’aora i te tahi mau ta’ata ; ’e ’ua mana’o ihora tātou ē, e ’ī roa tātou i te ’oa’oa mai te mea e riro noa atu tātou ’ei rāve’a nō te fa’aora i te tahi mau ta’ata.

31 I teienei, inaha, e ti’a ia tātou ’ia hi’o atu ’e ’ia ’ite i te mau hotu nō tā tātou mau ’ohipa ; e mea iti ānei te reira ? Tē parau atu nei au ia ’outou na, ’Aita roa, e rave rahi rā, ’oia ïa e ti’a ia tātou ’ia ’ite i tō rātou ha’avare ’ore, nō tō rātou here i tō rātou mau taea’e ’e ia tātou ato’a ho’i.

32 Inaha ho’i, ’ua ti’a roa ia rātou ’ia pūpū i tō rātou ihora ora, i te taparahi atu i te hō’ē noa atu o tō rātou ’enemi ; ’e ’ua tanu rātou i tā rātou mau mauha’a tama’i i raro roa i te repo, nō tō rātou i here i tō rātou ra mau taea’e.

33 ’E i teienei, inaha, tē parau atu nei au ia ’outou, tē vai ra ānei te aroha rahi mai te reira i te fenua ato’a nei ? Inaha, tē parau atu nei au ia ’outou, ’Aita, ’aita roa ïa e aroha rahi mai te reira i rotopū i te mau ’āti Nephi.

34 Inaha ho’i, e rave rātou i tā rātou mau mauha’a tama’i nō te ’aro atu i tō rātou mau taea’e ; ’aita rātou i tu’u ia rātou iho ’ia taparahihia. Inaha rā, e hia rahira’a tō teie nei mau ta’ata tei tu’u ia rātou iho ’ia taparahihia ; ’e ’ua ’ite tātou ē, ’ua reva atu rātou i tō rātou ra Atua, nō tō rātou aroha ’e te au ’ore i te hara.

35 I teienei, ’aita ānei e tumu ti’a roa ia tātou ’ia ’oa’oa ? ’Oia ïa, tē parau atu nei au ia ’outou na, ’aita roa e ti’a i te mau ta’ata mai te ha’amatara’a mai ā o te ao nei ’ia ’oa’oa mai tā tātou e ’oa’oa nei ; ’oia ïa, tē tupu noa ra tō’u ’oa’oa ē tae atu i te fa’ateiteira’a i tō’u ra Atua ; tei iāna ho’i te mana pā’āto’a, ’e te pa’ari pā’āto’a, ’e te ’ite pā’āto’a ; ’ua māramarama ’oia i te mau mea pā’āto’a, ’e e Atua aroha ’oia, ē tae atu i te fa’aorara’a ia rātou ’o tē tātarahapa ’e tē ti’aturi i tōna ra i’oa.

36 I teienei, mai te mea e parau fa’ateitei te reira, e nā reira ā vau i te fa’ateitei ; o teie ho’i tō’u ora ’e tō’u māramarama, tō’u ’oa’oa ’e tō’u fa’aorara’a, ’e te rāve’a nō te fa’aora iā’u i te ’ati mure ’ore. ’Oia ïa, ’ia fa’ahanahanahia te i’oa o tō’u ra Atua ’o tei ha’amana’o i teie nei feiā, te hō’ē ’āma’a nō te tumu rā’au o ’Īserā’ela, ’e tei mo’e na i te tumu mau i te hō’ē fenua ’ē ; ’oia ïa, tē parau nei au, ’ia fa’ahanahanahia te i’oa o tō’u ra Atua ’o tei ha’amana’o māite ia tātou, te mau ta’ata purutia i te hō’ē fenua ’ē.

37 I teienei, e tō’u mau taea’e, tē ’ite nei tātou ē, tē ha’amana’o ra te Atua i te mau ta’ata ato’a i te mau fenua ato’a ; ’oia ïa, ’ua tai’ohia tōna ra mau ta’ata e ana, ’e tei ni’a iho tōna ra ’ā’au aroha i te mau fenua ato’a. I teienei, ’o teie tō’u nei ’oa’oa, ’e tā’u ra ho’i ha’amāuruurura’a rahi ; ’oia ïa, e ha’amāuruuru atu ā vau i tō’u ra Atua ē a muri noa atu. ’Āmene.