1 ’E i teienei, i muri a’era, ’ia oti a’era tō te feiā o Amona fa’ati’ara’a i tō rātou fa’aeara’a i te fenua ra nō Ieresona ; ’e i te fa’ati’a-ato’a-ra’a i te hō’ē ’ēkālesia i te fenua i Ieresona ; ’e ’ua ha’a’ati a’era te mau nu’u fa’ehau o te mau ’āti Nephi i te fenua ra nō Ieresona ē ’ati noa a’e, ’oia ïa, i te mau hiti ato’a nō te fenua ra nō Zarahemela ; inaha, ’ua pe’e mai te mau nu’u fa’ehau o te mau ’āti Lamana i tō rātou mau taea’e i roto i te mēdēbara.

2 ’E ’ua tupu te hō’ē ’arora’a rahi ; ’oia ïa, ’aita te reira huru fāito i ’itehia i rotopū i te mau ta’ata i ni’a iho i te fenua mai te tau i fa’aru’e ai Lehi i Ierusalema ; ’oia ïa, ’ua hau te ’ahuru o te tauatini o te mau ’āti Lamana i taparahihia ’e i ha’apurarahia i te ātea.

3 ’Oia ïa, e rave rahi ato’a tei taparahihia i rotopū i te mau ta’ata o Nephi ; ’āre’a rā ’ua tīahihia ’e ’ua ha’apurara-’ē-hia te mau ’āti Lamana, ’e ’ua ho’i fa’ahou te mau ta’ata o Nephi i tō rātou iho fenua.

4 ’E i teienei, ’o te hō’ē tau teie i fa’aro’ohia ai te ’oto rahi ’e te auē rahi ē ’ati noa a’e te fenua tā’āto’a, i rotopū i te mau ta’ata ato’a o Nephi—

5 ’Oia ïa, te ’auē a te mau vahine ’ivi ma te autā nō tā rātou mau tāne, ’e ’oia ato’a i te autā a te mau metua nō tā rātou mau tamari’i tamāroa, ’e te autā a te tamāhine nō te taea’e ; ’oia ïa, te autā a te taea’e nō te metua tāne ; ’e ’ua fa’aro’ohia te ’auē nō te autā i rotopū ia rātou ato’a ; te autā nō tō rātou mau fēti’i i taparahihia.

6 ’E i teienei, e mahana ’oto rahi teie ; ’oia ïa, e taime mana’o ’oto, ’e te taime nō te ha’apaera’a mā’a rahi ’e te pure rahi.

7 ’E ’o te hope’a ïa nō te matahiti hō’ē ’ahuru ’e ma pae nō te fa’aterera’a a te mau ha’avā i ni’a i te mau ta’ata o Nephi.

8 ’E ’o teie te ’ā’amu o Amona ’e tōna ra mau taea’e, nō tō rātou mau haere’a nā roto i te fenua ra nō Nephi, ’e tō rātou mau fifi i taua fenua ra, ’e tō rātou mau ’oto, ’e tō rātou mau ’ati, ’e tō rātou ’oa’oa fāito ’ore, ’e te tomora’a ’e te pārahira’a hau o te mau taea’e i te fenua ra nō Ieresona. ’E i teienei, ’ia ha’amaita’i mai te Fatu, te Tāra’ehara o te mau ta’ata ato’a, i tō rātou mau vārua ē a muri noa atu.

9 ’E ’o te ’ā’amu teie nō te mau tama’i ’e te mau mārōra’a i rotopū i te mau ’āti Nephi, ’e te mau tama’i ato’a i rotopū i te mau ’āti Nephi ’e te mau ’āti Lamana ; ’e ’ua hope ihora te ’ahuru ma pae o te matahiti nō te fa’aterera’a a te mau ha’avā.

10 ’E mai te matahiti mātāmua ē tae roa mai i te matahiti hō’ē ’ahuru ’e ma pae, ’ua pohe te mau ta’ata e rave rahi tauatini ; ’oia ïa, ’ua tupu te ha’amani’ira’a toto ri’ari’a rahi.

11 ’E ’ua vaiihohia te mau tino e rave rahi tauatini i raro roa i te repo, ’a pē ai te mau tino e rave rahi tauatini i roto i te mau ha’apu’era’a i ni’a i te fenua ; ’oia ïa, e rave rahi tauatini ’o rātou tei autā nō te pohe o tō rātou mau fēti’i, nō te mea tē vai ra tō rātou tumu nō te mata’u, mai te au i te mau fafaura’a a te Fatu, ’ua tu’uhia rātou nō te fāri’i i te ’oto hope ’ore.

12 ’E ’ua autā te mau ta’ata e rave rahi tauatini nō te pohe o tō rātou mau fēti’i, ’āre’a rā ’ua ’oa’oa rātou ’e ’ua ’ūmere ho’i i te ti’aturi ’e i te ’ite, mai te au i te mau fafaura’a a te Fatu, ’e ’ua fa’ateiteihia rātou ’ia pārahi i te rima ’atau o te Atua, ’e i reira ’a fāri’i noa ai i te ’oa’oa hope ’ore.

13 ’E nō reira ’ua ’ite tātou ē, ’ua rahi roa te ’aifāito ’ore o te tahi pae ta’ata i te tahi atu, nō te hara ’e te ha’apa’o ’ore, ’e te mana o te diabolo i tae mai nā roto i te mau ’ōpuara’a ha’avare o tāna i fa’atupu nō te mārei i te ’ā’au o te ta’ata nei.

14 ’E nō reira ’ua ’ite tātou ē, e mea ti’a roa ’ia rave itoito te ta’ata i te ’ohipa i roto i te mau ’ō vine a te Fatu ; ’e nō reira ’ua ’ite tātou i te tumu rahi nō te ’oto ’e nō te ’oa’oa ato’a—te ’oto nō te pohe ’e te ha’amoura’a i rotopū i te mau ta’ata, ’e te ’oa’oa nō te māramarama o te Mesia ē tae atu ai i te ora.