1 I teienei, i muri a’era, ’ia pohe a’era Korihora, ’ua fāri’i ihora Alama i te ’ite ē, tē ha’api’o ra te mau ’āti Zorama i te mau haere’a o te Fatu, ’e tē arata’i atu ra Zorama, tō rātou ta’ata fa’atere, i te ’ā’au o te mau ta’ata ’ia pi’o i raro i mua i te mau ’īdolo vāvā ra, ’ua māuiui fa’ahou ihora tōna ’ā’au nō te mau ’ohipa ’ī’ino a te mau ta’ata.

2 ’O te tumu ho’i ïa nō te ’oto rahi o Alama ’ia ’ite i te mau ’ohipa ’ī’ino i rotopū i tōna ra mau ta’ata ; nō reira ’ua ’oto roa tōna ’ā’au nō te fa’ata’a-’ē-ra’a o te mau ’āti Zorama i te mau ’āti Nephi.

3 I teienei, ’ua ha’aputuputu te mau ’āti Zorama ia rātou iho i te fenua ra i ma’irihia e rātou i te i’oa ra ’o Anetionuma, tei te pae i te hiti’a o te rā i te fenua ra nō Zarahemela, tāpiri i te pae miti, ’e tei te pae apato’a i te fenua ra nō Ieresona, tāpiri i te hiti o te mēdēbara i te pae apato’a, ’e ’ua ’ī roa taua mēdēbara ra i te mau ’āti Lamana.

4 I teienei, ’ua mata’u roa te mau ’āti Nephi ’o te fa’ahoa atu te mau ’āti Zorama i te mau ’āti Lamana, ’e e riro ho’i te reira ’ei pau rahi nō te mau ’āti Nephi.

5 ’E i teienei, nō te mea ’ua riro te porora’a i te parau ’ei rāve’a rahi nō te arata’i i te mau ta’ata ’ia rave i te ’ohipa tia—’oia ïa, ’ua hau atu tō te reira mana i ni’a i te ’ā’au o te ta’ata i tō te ’o’e, ’e ’aore rā i tō te tahi atu mau mea ato’a, mai tei tae mai i ni’a ia rātou—no reira ’ua mana’o Alama e mea maita’i ïa ’ia tāmata i te mana nō te parau a te Atua.

6 Nō reira ’ua rave ’oia ia Amona, ’e Aarona, ’e Omonera ; ’e ’ua vaiiho ’oia ia Himeni i roto i te ’ēkālesia i Zarahemela ; ’āre’a rā ’ua rave atu ’oia i nā ta’ata e to’otoru nā muri iho iāna, ’e ’oia ato’a ia Amuleka ’e Zeezeroma, ’o tē pārahi ra i Meleke ; ’e ’ua rave ato’a ’oia e piti o tāna ra mau tamari’i tamāroa.

7 I teienei, ’aita ’oia i rave i te matahiapo o tāna mau tamari’i tamāroa nā muri iho iāna, ’e ’o Helamana tōna i’oa ; ’āre’a rā te i’oa o nā tamaiti ’o tāna i rave nā muri iho iāna ’o Sibelona ïa ’e Korianetona ; ’e ’o teie ïa te mau i’oa o te mau ta’ata i haere atu nā muri iho iāna i rotopū i te mau ’āti Zorama, nō te a’o atu i te parau ia rātou.

8 I teienei, e mau feiā ’ōrurehau te mau ’āti Zorama nō roto mai i te mau ’āti Nephi ; nō reira ’ua a’ohia atu te parau a te Atua ia rātou.

9 ’Āre’a rā i ma’iri na rātou i roto i te mau hapa rahi, ’e ’aita ho’i rātou i ha’apa’o i te mau fa’auera’a a te Atua, ’e tāna mau ture, mai te au i te ture a Mose ra.

10 ’E ’aita ato’a rātou e ha’apa’o i te mau ’ohipa a te ’ēkālesia, ’ia tāmau noa i te pure ’e i te ani i te Atua i te mau mahana ato’a ’ia ’ore rātou ’ia ro’ohia i te fa’ahemara’a.

11 ’Oia mau roa ïa, ’ua ha’api’o rātou i te mau haere’a o te Fatu i te mau vāhi e rave rahi ; nō reira, teie ïa te tumu i haere atu ai Alama ’e tōna ra mau taea’e i roto i taua fenua ra nō te a’o atu i te parau ia rātou.

12 I teienei, ’ia tae atu rā rātou i taua fenua ra, inaha, ’ua māere roa rātou ’a ’ite ai rātou ē, ’ua fa’ati’a te mau ’āti Zorama i te mau sunago, ’e ’ua ha’aputuputu mai rātou ia rātou i te hō’ē mahana i te hepetoma, ’e ’ua parau rātou i taua mahana ra te mahana o te Fatu ; ’e ’ua ha’amori rātou i te ha’amorira’a huru ’ē roa, ’e ’o tei ’ore i ’itea ia Alama ’e tōna ra mau taea’e.

13 ’Ua hāmani ho’i rātou i te hō’ē terōno i rōpū maita’i i tā rātou sunago, te hō’ē vāhi nō te ti’ara’a, ’e e mea teitei a’e i te upo’o ta’ata ; ’e i ni’a i te reira hō’ē noa iho ta’ata tē ti’a ’ia haere atu.

14 Nō reira, e mea ti’a i te ta’ata ’o tei hina’aro ’ia ha’amori ’ia haere atu ’e ’ia ti’a i ni’a iho i te reira, ’e ’ia fa’atoro atu i tōna rima i ni’a i te ra’i, ’e ’a ti’aoro ai ma te reo pūai, i te nā-’ō-ra’a ē :

15 E te Atua mo’a, e te Atua mo’a ; ’ua ti’aturi mātou ē, ’o te Atua ’oe, ’e ’ua ti’aturi mātou ē, e mea mo’a ’oe, ’e i vai na ’oe ’ei vārua, ’e tē vai nei ’oe ’ei vārua, ’e e vai ā ’oe ’ei vārua ē a muri noa atu.

16 E te Atua mo’a ē, ’ua ti’aturi mātou ē, ’ua fa’ata’a ’ē atu ’oe ia mātou i tō mātou mau taea’e ; ’e ’aita mātou i ti’aturi i te peu tumu a tō mātou mau taea’e, tei tu’uhia mai ia rātou nā roto i te mau peu tamari’i a tō rātou mau metua ; ’āre’a rā ’ua ti’aturi mātou ē, ’ua mā’itihia mātou e ’oe na ’ia riro ’ei mau tamari’i mo’a nā ’oe na ; ’e ’ua fa’a’ite ato’a mai ’oe ia mātou ē, ’aita e Mesia.

17 ’Āre’a rā hō’ē ā tō ’oe huru i nanahi ra, i teie nei mahana, ē a muri noa atu ; ’e ’ua mā’iti ’oe ia mātou ’ia fa’aorahia, ’a mā’itihia ai rātou ato’a ē ’ati noa a’e ia mātou nei ’ia hurihia e tō ’oe riri ’ū’ana i raro i hade ; ’e nō teie nei ’ohipa mo’a, e te Atua, tē ha’amāuruuru nei mātou ia ’oe ; ’e tē ha’amāuruuru ato’a nei mātou ia ’oe i te mea ’ua mā’iti ’oe ia mātou, ’ia ’ore mātou ’ia pe’e atu i te mau peu tumu ma’ama’a a tō mātou mau taea’e, ’o tei tāpe’a ia rātou i raro ’ia ti’aturi i te Mesia, ’e nā te reira i arata’i i tō rātou ’ā’au ’ia haere ’ē atu ia ’oe, e tō mātou Atua.

18 ’E tē ha’amāuruuru fa’ahou nei mātou ia ’oe, e te Atua, i te mea e feiā mā’itihia ’e e feiā mo’a mātou. ’Āmene.

19 I teienei, i muri a’era, ’ia fa’aro’o a’era Alama ’e tōna ra mau taea’e, ’e tāna nā tamari’i tamāroa i taua mau pure ra, ’ua māere roa ihora rātou.

20 Inaha ho’i, ’ua haere atu te mau ta’ata ato’a, ’e ’ua pūpū atu i te hō’ē ā huru pure.

21 I teienei ’ua parauhia taua vāhi e rātou, ’o Rameumepitoma, ’e terā te aura’a ’ia ’īritihia, te terōno mo’a.

22 I teienei, i ni’a iho i teie terōno ’ua pure atu te mau ta’ata ato’a i te hō’ē ā huru pure i te Atua, ma te ha’amāuruuru atu i tō rātou Atua i te mea ’ua mā’itihia rātou e ana, ’e ’aita ’oia i arata’i ’ē atu ia rātou ’ia pe’e atu i te peu tumu a tō rātou mau taea’e ; ’e ’aita tō rātou ’ā’au i fa’afāriu-’ē-hia ’ia ti’aturi i te mau mea e tupu a muri atu, ’o tei ’ore i ’iteahia e rātou ra.

23 I teienei, i muri iho i tō te mau ta’ata pūpūra’a atu i tā rātou mau ha’amāuruurura’a mai te reira huru, ’ua ho’i atu ra rātou i tō rātou iho mau fare, ’e ’aita rātou i paraparau fa’ahou nō ni’a i tō rātou Atua ē tae roa atu ’ua ha’aputuputu fa’ahou mai rātou i taua terōno mo’a ra, nō te ha’amāuruuru atu mai te au i tā rātou huru ravera’a.

24 I teienei, ’ia ’ite a’era Alama i te reira, ’ua ’oto roa ihora tōna ra ’ā’au ; nō te mea ’ua ’ite ’oia ē, e feiā parauti’a ’ore ’e e feiā ha’api’o rātou ; ’oia ïa, ’ua ’ite ’oia ē, ’ua onoono noa tō rātou ’ā’au i te ’auro, ’e te ’ārio, ’e te mau huru tao’a maitata’i ato’a.

25 ’Oia ïa, ’ua ’ite ato’a ’oia ē, ’ua fa’ateiteihia tō rātou ’ā’au i te fa’aahaaha rahi i roto i tō rātou ra te’ote’o.

26 ’E ’ua fa’ateitei a’era ’oia i tōna reo i ni’a i te ra’i, ’e ’ua ti’aoro atu ra, i te nā-’ō-ra’a ē : E aha te maoro, e te Fatu, ’o tā ’oe i hina’aro ’ia ora noa tō ’oe mau tāvini i raro nei i te tino nei, nō te hi’o atu i teie nei mau ’ohipa ’ino rahi i rotopū i te mau tamari’i a te ta’ata nei ?

27 Inaha, e te Atua, tē ti’aoro atu nei rātou ia ’oe ; ’ua horomi’ihia rā tō rātou ’ā’au i roto i tō rātou te’ote’o. Inaha, e te Atua, tē ti’aoro atu nei rātou ia ’oe i tō rātou vaha, ’ua ’ī roa rā rātou i te te’ote’o, i te mau mea faufa’a ’ore o te ao nei.

28 ’A hi’o na, e tō’u Atua, i tō rātou ’ahu moni rahi, ’e tō rātou mau tāpe’a, ’e tō rātou mau fa’a’una’una rima, ’e tā rātou mau mea fa’a’una’unara’a ’auro, ’e tā rātou mau mea maitata’i ato’a nō te fa’a’una’una ia rātou ; ’e inaha, ’ua nounou tō rātou ’ā’au i te reira, ’e tē ti’aoro nei rā rātou ia ’oe, ma te parau ē—Tē ha’amāuruuru nei mātou ia ’oe, e te Atua, nō te mea e feiā mā’itihia mātou nō ’oe, e pohe ho’i te tahi atu pae.

29 ’Oia ïa, tē parau nei rātou ē, ’ua fa’a’ite mai ’oe ia rātou ē ’aita e Mesia.

30 E te Fatu e te Atua ē, e aha te maorora’a tā ’oe e fa’a’oroma’i ’ia vai noa teie nei ’ohipa ’ī’ino ’e teie nei hara i roto i teie nei feiā ? E te Fatu, ’a hōro’a mai i te pūai iā’u, ’ia ti’a iā’u ’ia fa’a’oroma’i i tō’u nei mau paruparu ? E mea paruparu ho’i au, ’e nā roto i teie mau ’ohipa ’ī’ino i rotopū i teie nei mau ta’ata tē māuiui nei tō’u nei vārua.

31 E te Fatu, tē ’oto rahi nei tō’u ’ā’au ; ’a ha’amāhanahana mai ’oe i tō’u nei vārua i roto i te Mesia ? E te Fatu, ’a hōro’a mai ’oe i te pūai iā’u, ’ia ti’a iā’u ’ia fa’a’oroma’i i teie mau ’ati e tae mai i ni’a iā’u nei, nō te mau ’ohipa ’ī’ino a teie nei feiā.

32 E te Fatu, ’a ha’amāhanahana mai ’oe i tō’u nei vārua, ’e ’a ha’amanuia mai iā’u ’e te mau ta’ata rave ’ohipa i pīha’i iho iā’u nei—’oia ho’i ia Amona, ’e ia Aarona, ’e ia Omonera, ’e ’oia ato’a ia Amuleka, ’e ia Zeezeroma, ’e i tā’u nā tamari’i tamāroa to’opiti ato’a ho’i—’oia ïa, ’a ha’amāhanahana mai ’oe ia rātou ato’a, e te Fatu. ’Oia ïa, ’a ha’amāhanahana mai ’oe i tō rātou vārua i roto i te Mesia.

33 ’A tauturu mai ’oe ia rātou ’ia fāri’i i te pūai, ’ia ti’a ia rātou ’ia fa’a’oroma’i i tō rātou mau ’ati ’o tē tae mai i ni’a ia rātou nō te mau ’ohipa ’ī’ino a teie nei feiā.

34 E te Fatu, ’a tauturu mai ’oe ia mātou, ’ia manuia mātou ’ia arata’i fa’ahou mai ia rātou ia ’oe na i roto i te Mesia.

35 Inaha, e te Fatu, e mea faufa’a rahi tō rātou vārua, e mau taea’e ho’i rātou e rave rahi nō mātou, nō reira, ’a hōro’a mai ia mātou, e te Fatu, i te mana ’e te pa’ari ’ia ti’a ia mātou ’ia arata’i fa’ahou mai ia rātou, i tō mātou mau taea’e, ia ’oe na.

36 I teienei, i muri a’era, ’ia oti a’era tā Alama paraura’a atu i teie mau parau, ’ua tu’u atu ra ’oia i tōna nā rima i ni’a iho ia rātou ato’a ’o tei pīha’i iho iāna ra. ’E inaha, ’a tu’u ai ’oia i tōna ra nā rima i ni’a iho ia rātou, ’ua ’ī ihora rātou i te Vārua Mo’a.

37 ’E i muri iho i tō rātou fa’ata’a-’ē-ra’a ia rātou iho te tahi ’e i te tahi, ma te feruri ’ore e aha tā rātou e ’amu, ’e e aha tā rātou e inu, ’e e aha tā rātou e ’ō’omo.

38 ’E ’ua tauturu mai te Fatu ia rātou ’ia ’ore rātou ’ia po’ia, ’ia ’ore ho’i ia po’ihā ; ’oia ïa, ’ua hōro’a ato’a ’oia i te pūai i roto ia rātou ’ia ’ore rātou ’ia ro’ohia i te mau huru ’ati, maori rā ’ia horomi’ihia tō rātou mau ’ati i roto i te ’oa’oa o te Mesia. I teienei, ’ua au teie i te pure a Alama ; ’e ’ua nā-reira-hia ïa, nō te mea ’ua pure ’oia ma te fa’aro’o.