1 నా కుమారుడా, నీ సహోదరునికి చెప్పిన దాని కంటే నీకు కొంత ఎక్కువగా నేను చెప్పవలసియున్నది; ఏలయనగా దేవుని ఆజ్ఞలను పాటించుటలో నీ సహోదరుని నిలకడను, అతని విశ్వాస్యతను, శ్రద్ధను నీవు గమనించియుండలేదా? అతడు నీకు మంచి మాదిరిగా ఉండలేదా?

2 జోరమీయుల యొక్క జనుల మధ్య నీ సహోదరుడు లక్ష్యపెట్టినంతగా నీవు నా మాటలను లక్ష్యపెట్టలేదు. ఇప్పుడు నీకు వ్యతిరేకముగా నేను కలిగియున్నది ఇదియే; నీవు నీ బలమందు, జ్ఞానమందు డంబములు పలుకుటకు వెళ్ళియున్నావు.

3 నా కుమారుడా, అంతయు ఇదియే కాదు. నాకు బాధాకరమైన దానిని నీవు చేసియున్నావు; నీవు పరిచర్యను వదిలివేసి, వేశ్యయైన ఇసబెల్ వెనుక లేమనీయుల యొక్క సరిహద్దుల మధ్యనున్న సిరొన్‌ దేశములోనికి వెళ్ళితివి.

4 ఆమె అనేకుల హృదయాలను కొల్లగొట్టినది; కానీ నా కుమారుడా, ఇది నీ కొరకు సాకు కాదు. నీకు అప్పగించబడిన పరిచర్యను నీవు జరిగించవలసినది.

5 నా కుమారుడా, ఈ క్రియలు ప్రభువు దృష్టిలో హేయకరమని నీవెరుగవా? అంతేకాక నిర్దోషమైన రక్తమును చిందించుట లేదా పరిశుద్ధాత్మను తిరస్కరించుట తప్ప, మిగిలిన అన్ని పాపముల కంటే మిక్కిలి హేయకరమని నీవెరుగవా?

6 ఏలయనగా పరిశుద్ధాత్మ ఒకసారి నీలో నివసించిన తరువాత నీవు అతడిని నిరాకరించిన యెడల మరియు నీవు అతడిని నిరాకరించితివని ఎరిగిన యెడల, అది క్షమించరానట్టి పాపమైయున్నది; దేవుని యొక్క వెలుగు మరియు జ్ఞానమునకు వ్యతిరేకముగా హత్య చేయువాడు క్షమాపణ పొందుట సులభము కాదు; నా కుమారుడా, క్షమాపణ పొందుట అతనికి అంత సులభము కాదని నేను నీతో చెప్పుచున్నాను.

7 ఇప్పుడు, నా కుమారుడా, అంత గొప్ప నేరము నిమిత్తము నీవు దోషియై యుండరాదని నేను దేవుడిని అర్థించుచున్నాను. నీ మేలు కొరకు కాని యెడల, నీ ఆత్మను వేధించుటకు నీ నేరములను గూర్చి నేను మాట్లాడను.

8 కానీ నీ నేరములను దేవుని నుండి నీవు దాచలేవు; నీవు పశ్చాత్తాపపడని యెడల, అంత్యదినమున అవి నీకు వ్యతిరేకముగా ఒక సాక్ష్యముగా నిలుచును.

9 నా కుమారుడా, నీవు పశ్చాత్తాపపడి నీ పాపములను విడిచిపెట్టవలెనని, నీ కన్నుల యొక్క కామేచ్ఛల వెనుక ఇక వెళ్ళరాదని, ఈ విషయములన్నిటిని మానివేయవలెనని నేను కోరుచున్నాను; ఏలయనగా దీనిని జరిగించితే తప్ప, నీవు దేవుని రాజ్యమును ఏ విధముగాను స్వతంత్రించుకొనలేవు. ఓ జ్ఞాపకముంచుకొనుము, దీనిని చేయుము మరియు ఈ విషయములను మానివేయుము.

10 నీ ప్రయత్నములలో నీ అన్నలతో ఆలోచన చేయుటకు తీర్మానించుకోమని నేను నిన్ను ఆజ్ఞాపించుచున్నాను; ఏలయనగా నీవు నీ యౌవనమందున్నావు మరియు నీ సహోదరుల చేత పోషించబడవలసియున్నావు. కావున వారి సలహాకు చెవియొగ్గుము.

11 వ్యర్థమైన లేదా మూర్ఖపు విషయము చేత నడిపించి వేయబడుటకు నిన్ను అనుమతించుకొనవద్దు; దుష్టులైన ఆ వేశ్యల వెనుక నీ హృదయమును తిరిగి నడిపించివేయుటకు అపవాదిని అనుమతించవద్దు. నా కుమారుడా, జోరమీయులపై నీవు ఎంత గొప్ప దుర్నీతిని తెచ్చియున్నావో చూడుము; వారు నీ నడవడిని చూచినప్పుడు, నా మాటలయందు విశ్వసించలేదు.

12 ఇప్పుడు ప్రభువు యొక్క ఆత్మ నాతో ఇట్లు చెప్పెను: మేలు చేయుటకు నీ సంతానమునకు ఆజ్ఞ ఇమ్ము, లేని యెడల వారు అనేకుల హృదయములను నాశనమునకు నడిపించివేయుదురు; కావున నా కుమారుడా, నీ దోషములను మానివేయమని;

13 నీ పూర్ణ మనస్సు, బలము మరియు శక్తితో ప్రభువు వైపుకు తిరుగమని; దుర్మార్గము జరిగించుటకు ఇక నీవు ఎవరి హృదయములను నడిపించివేయరాదని; బదులుగా వారి యొద్దకు తిరిగివెళ్ళి నీ పొరపాట్లను మరియు నీవు చేసిన ఆ తప్పును ఒప్పుకొనమని దేవుని భయమందు నేను నిన్ను ఆజ్ఞాపించుచున్నాను.

14 సంపదలను లేదా ఈ లోకము యొక్క వ్యర్ధమైన విషయములను కోరకుము; ఏలయనగా నీవు వాటిని నీతో తీసుకొనిపోలేవు.

15 ఇప్పుడు, నా కుమారుడా, క్రీస్తు యొక్క రాకడను గూర్చి నేను నీకు కొంత చెప్పెదను. లోకము యొక్క పాపములను తీసివేయుటకు నిశ్చయముగా రాబోవు వ్యక్తి ఆయనేనని నేను నీతో చెప్పుచున్నాను; తన జనులకు రక్షణ యొక్క సువర్తమానములను ప్రకటించుటకు ఆయన వచ్చును.

16 నా కుమారుడా, ఈ సువర్తమానములను ఈ జనులకు ప్రకటించుటకు, వారి మనస్సులను సిద్ధపరచుటకు లేదా మరొక మాటలో, రక్షణ వారి యొద్దకు వచ్చునట్లు ఆయన రాకడ సమయమున వాక్యమును వినుటకు వారు తమ సంతానము యొక్క మనస్సులను సిద్ధపరచునట్లు చేయుటకే నీవు పిలువబడినది.

17 ఇప్పుడు ఈ విషయముపై నీ మనస్సుకు కొంత ఊరటనిచ్చెదను. ఇంత ముందుగా ఈ క్రియలు ఎందుకు తెలియజేయబడవలెనని నీవు ఆశ్చర్యపడుచుండవచ్చు. నేను నీతో చెప్పుచున్నాను, ఒక ఆత్మ ఆయన రాకడ సమయమున ఎంత విలువైనదో, అదేవిధముగా ఈ సమయమున ఒక ఆత్మ దేవునికి విలువైనది కాదా?

18 వారి సంతానముతో పాటు, ఈ జనులకు కూడా విమోచన ప్రణాళిక తెలియజేయబడుట అవసరము కాదా?

19 ఆయన రాకడ తర్వాత మన సంతానమునకు తెలియజేసినట్లు, ఈ సమయమున మనకు ఈ సువర్తమానములను తెలియజేయుటకు తన దేవదూతను పంపుట ప్రభువుకు సులభము కాదా?