1 ’E i teienei, e tā’u tamaiti, ’ua rahi atu te mau mea tā’u e parau atu ia ’oe i tā’u i parau atu i tō ’oe taea’e, inaha ho’i, ’aita ānei ’oe i ha’apa’o i te huru ’āueue ’ore o tō ’oe taea’e, i tōna ha’apa’o maita’i ’e te itoito i te ha’apa’ora’a i te mau fa’auera’a a te Atua ? Inaha, ’aita ānei ’oia i hōro’a mai i te hi’ora’a maita’i ia ’oe ?

2 ’E ’aita ho’i ’oe i ha’apa’o māite i tā’u mau parau mai tā tō ’oe taea’e i ha’apa’o i rotopū i te mau ’āti Zorama. I teienei, teie tā’u parau fa’ahapa ia ’oe na ; ’ua tāmau noa ’oe i te fa’aahaaha i tō ’oe iho pūai ’e tō ’oe iho ’aravihi.

3 E ’ere ho’i ’o te reira ana’e, e tā’u tamaiti. ’Ua rave ho’i ’oe i te hō’ē mea ’oto roa iā’u nei ; i te mea ’ua fa’aru’e ’oe i te ’ohipa ha’api’i ’evanelia, ’e ’ua haere atu ’oe i te fenua ra nō Sirona i rōpū i te mau hiti fenua o te mau ’āti Lamana, i te vahine tai’ata ra ’o Isabela.

4 ’Oia ïa, ’ua haru ’ē atu ’oia i te ’ā’au o te mau ta’ata e rave rahi, ’aore roa rā o ’oe ’ōtohera’a, e tā’u tamaiti. ’Āhiri ’oe i ha’apa’o i te tōro’a i hōro’ahia mai ia ’oe ra.

5 ’Aita ānei ’oe i ’ite e tā’u tamaiti ē, e mea vi’ivi’i roa teie mau mea i mua i te aro o te Fatu ; ’oia ïa, e mea vi’ivi’i roa a’e te reira i te mau huru hara ato’a, maori rā te ha’amani’ira’a i te toto hara ’ore ’e ’aore rā te hunara’a i te Vārua Maita’i ?

6 Inaha ho’i, mai te mea e huna ’oe i te Vārua Maita’i ’o tei pārahi na i roto ia ’oe, ’e ’ua ’ite ’oe ē ’ua huna ’oe i te reira, inaha, e hara matara ’ore ho’i te reira ; ’oia ïa, ’e ’o ’oia ’o tē taparahi pohe i te ta’ata noa atu te māramarama ’e te ’ite nō ’ō mai i te Atua ra, e’ita roa ïa i te mea ’ōhie iāna ’ia fāri’i i te fa’a’orera’a hara ; ’oia ïa, tē parau atu nei au ia ’oe na, e tā’u tamaiti, e’ita roa ïa i te mea ’ōhie iāna ’ia fāri’i i te fa’a’orera’a hara.

7 ’E i teienei, e tā’u tamaiti, teie tō’u hina’aro rahi i te Atua, ’āhiri ho’i ’aita ’oe i hapa i taua hara rahi ra. E’ita vau e fa’aea noa i ni’a i tā ’oe mau hara nō te fa’aahoaho i tō ’oe na vārua ’āhiri e’ita te reira e riro ’ei maita’i nō ’oe.

8 Inaha ho’i, ’aita e ti’a ia ’oe ’ia huna i tā ’oe mau hara i te Atua ; ’e ’ia ’ore ’oe e tātarahapa, e riro ïa te reira ’ei ’itera’a pāpū i ni’a ia ’oe i te mahana hope’a ra.

9 ’E i teienei, e tā’u tamaiti, ’ua hina’aro vau ’ia tātarahapa ’oe ’e ’ia fa’aru’e ’ē atu i tā ’oe mau hara, ’e ’eiaha e pe’e fa’ahou atu i te mau hina’aro vi’ivi’i o tō ’oe mata, ’a ha’apae rā ia ’oe iho i roto i teie nei mau mea ato’a ; ’ia ’ore ho’i ’oe ’ia nā reira, e ’ore roa ïa e roa’a ia ’oe te bāsileia o te Atua. ’A ha’amana’o na ïa ’e ’a rave i te reira i ni’a ia ’oe, ’e ’a ha’apae ia ’oe iho i roto i taua mau mea nei.

10 ’E tē fa’aue atu nei au ia ’oe na, ’ia paraparau atu ’oe i tō ’oe nā tua’ana nō ni’a i tā ’oe mau ’ohipa e rave ra ; inaha ho’i, tē vai ’āpī nei ā ’oe, ’e ’ia fa’a’amu tō ’oe nā taea’e ia ’oe e au ai. ’E ’a fa’aro’o māite na ’oe i tā rāua parau a’o.

11 ’Eiaha ’oe e vaiiho ia ’oe ’ia arata’i-’ē-hia atu e te mea faufa’a ’ore ’e te ma’ama’a ; ’eiaha ’oe e fa’ati’a i te diabolo ’ia arata’i ’ē fa’ahou atu i tō ’oe ’ā’au ’ia pe’e atu i taua mau vahine tai’ata vi’ivi’i ra. Inaha, e tā’u tamaiti, ’ua rahi roa te mau ’ohipa ’ī’ino tā ’oe i fa’atae atu i ni’a i te mau ’āti Zorama ; i tō rātou ’itera’a i tō ’oe hi’ora’a tano ’ore, ’aita atu ra rātou i ti’aturi mai i tā’u ra mau parau.

12 ’E i teienei, tē parau mai ra te Vārua o te Fatu iā’u : ’A fa’aue atu ’oe i tā ’oe mau tamari’i ’ia rave i te ’ohipa maita’i, ’ia ’ore rātou ’ia arata’i ’ē atu i te ’ā’au o te mau ta’ata e rave rahi i te pohe ; nō reira tē fa’aue atu nei au ia ’oe na, e tā’u tamaiti, nō tō’u mata’u i te Atua ra, ’ia fa’aea ’oe i te rave i tā ’oe ra mau ’ohipa ’ī’ino.

13 ’E ’ia fāriu mai ’oe i te Fatu ma tō ’oe ’ā’au ato’a, ’e tō ’oe mana ato’a, ’e tō ’oe pūai ato’a ; ’ia ’ore ’oe ’ia arata’i ’ē atu i te ’ā’au o te tahi atu ā mau ta’ata ’ia rave i te parauti’a ’ore ; ’ia ho’i fa’ahou rā ’oe ia rātou ra, ’e ’ia fā’i atu i tā ’oe mau hapa ’e te hape ’o tā ’oe i rave.

14 ’Eiaha e ’imi i te mau tao’a ’e te mau mea faufa’a ’ore nō teie nei ao, inaha ho’i, ’aita e ti’a ia ’oe ’ia ’āfa’i atu i te reira nā muri iho ia ’oe.

15 ’E i teienei, e tā’u tamaiti, e parau ri’i atu ā vau ia ’oe na nō ni’a i te taera’a mai o te Mesia. Inaha, tē parau atu nei au ia ’oe, ’o ’oia mau iho tē tae mai nō te hōpoi ’ē atu i te mau hara a tō te ao nei ; ’oia ïa, e tae mai ’oia nō te fa’a’ite mai i te mau parau ’oa’oa nō te fa’aorara’a i tōna ra mau ta’ata.

16 ’E i teienei, e tā’u tamaiti, ’o te tōro’a teie i pi’ihia ai ’oe ra, nō te a’o atu i teie nei mau parau ’oa’oa i teie nei feiā, nō te fa’aineine i tō rātou ferurira’a ; hau atu, ’ia tae mai ho’i te fa’aorara’a ia rātou ra, ’ia fa’aineine rātou i te ferurira’a o tā rātou ra mau tamari’i ’ia fa’aro’o i te parau i te taime nō tōna ra taera’a mai.

17 ’E i teienei, e ha’amarū vau i tō ’oe ferurira’a nō ni’a i teie nei tumu parau. Inaha, tē māere na ’oe i te mea ē, ’ua ’iteahia taua mau mea ra nā mua roa i te tupura’a. Inaha, tē parau atu nei au ia ’oe na, e ’ere ānei hō’ē ā te faufa’a rahi o te hō’ē vārua i te Atua i teie nei tau i tō te tahi atu vārua i te tau e tae mai ai ’oia ra ?

18 E ’ere ānei i te mea ti’a ’ia fa’a’itehia atu teie nei ’ōpuara’a nō te fa’aorara’a i teie nei feiā, ’e i tā rātou ato’a ra mau tamari’i ?

19 E ’ere ānei i te mea ’ōhie i teie nei tau ’ia tono mai te Fatu i tāna ra melahi nō te fa’a’ite mai i teie nei mau parau ’oa’oa ia tātou, ’e i tā tātou mau tamari’i ato’a, ’e i tō muri a’e i tōna ra taera’a mai ?