1 ’E i teienei, e tā’u tamaiti, tē ’ite nei au ē, tē vai noa na te tahi atu ā mea ’o tē ha’ape’ape’a nei i tō ’oe ferurira’a, ’e ’aita i ’ite-pāpū-hia ia ’oe—’e nō ni’a te reira i te parauti’a o te Atua i te fa’autu’ara’a mai i te feiā hara ; nō te mea tē mana’o nei ’oe ē, e ’ere i te mea ti’a ’ia tu’uhia atu te feiā hara i roto i te vāhi nō te mamae.

2 I teienei, inaha, e tā’u tamaiti, e ha’amāramarama atu vau i te reira ia ’oe na. Inaha ho’i, i muri iho i tō te Fatu te Atua ti’avarura’a atu i tō tātou nā metua mātāmua i rāpae i te ’ō i Edene ra, nō te fa’a’apu i te fenua nō reira mai ho’i rāua ra—’oia ïa, ’ua tīahi atu ra ’oia i te ta’ata, ’e ’ua tu’u atu ra i te pae nō te hiti’a o te rā i taua ’ō i Edene i te mau kerubi, ’e te hō’ē ’o’e ura ’o tē fāriuriu haere nō te tīa’i i taua tumu rā’au nō te ora ra—

3 I teienei, ’ua ’ite tātou ē, ’ua riro te ta’ata mai te Atua te huru i te ’ite i te maita’i ’e te ’ino ; ’e nō te pāruru ’ia ’ore ’oia ’ia fa’atoro atu i tōna rima nō te rave mai i tō te tumu rā’au nō te ora, ’e ’a ’amu ai ’e ’a ora noa ai ē a muri noa atu, ’ua tu’u mai ra te Fatu te Atua i te kerubi ’e te ’o’e ura, ’ia ’ore ’oia ’ia ’amu i taua hotu ra—

4 ’E nō reira tē ’ite nei tātou ē, tē vai ra te taime i hōro’ahia i te ta’ata nō te tātarahapa, ’oia ïa, e taime tāmatara’a, e taime nō te tātarahapa ’e nō te tāvini i te Atua.

5 Inaha ho’i, ’āhiri Adamu i fa’atoro ’oi’oi atu i tōna rima nō te rave i tō te tumu rā’au nō te ora, ’ua ora ïa ’oia ē a muri noa atu, mai te au i te parau a te Atua, ’e ’aita tōna e taime ’ia tātarahapa ; ’oia ïa, ’ua faufa’a ’ore ïa te parau a te Atua, ’e ’ua fa’a’orehia ho’i ïa te ’ōpuara’a rahi nō te fa’aorara’a.

6 Inaha rā, ’ua fa’ata’ahia ’ia pohe te ta’ata—nō reira, mai ia rātou ho’i i tāpū-’ē-hia atu i te tumu rā’au nō te ora ra, ’ia tāpū-’ē-hia atu ho’i rātou mai ni’a atu i te fenua nei—’e ’ua mo’e atu ra te ta’ata ē a muri noa atu, ’oia ïa, ’ua riro ihora rātou ’ei feiā hi’a.

7 ’E i teienei, tē ’ite nei ’outou ē, ’ua tāpū-’ē-hia tō tātou nā metua mātāmua i te pae tino ’e i te pae vārua ato’a mai mua mai i te aro o te Fatu ; ’e nō reira tē ’ite nei tātou ē, e ti’amāra’a tō rāua ’ia pe’e i tō rāua iho hina’aro.

8 I teienei, inaha, e ’ere i te mea ti’a ’ia fa’aorahia te ta’ata i tōna pohe pae tino, nō te mea e fa’a’ore te reira i te ’ōpuara’a rahi nō te ’oa’oa.

9 Nō reira, nō te mea ’aita roa te vārua e pohe, ’e ’ua fa’atae mai ho’i te hi’ara’a i te pohe pae vārua ’e te pohe pae tino ato’a i ni’a iho i te mau ta’ata ato’a, ’oia ho’i, ’ua tāpū-’ē-hia rātou mai mua atu i te aro o te Fatu, e mea ti’a roa ïa ’ia fa’aorahia te ta’ata i taua pohe pae vārua ra.

10 Nō reira, nō te mea ’ua riro rātou ’ei mea tāhuti noa, ’ei mea hina’aro i tā te tino, ’e i te huru diabolo, i roto i tō rātou nātura, ’ua riro atu ra teie nei vai-tāmata-ra’a ’ei vaira’a nō rātou nō te fa’aineine ; ’oia ho’i ’ei vaira’a fa’aineinera’a.

11 ’E i teienei, ’a ha’amana’o na, e tā’u tamaiti, ’āhiri ’aita e ’ōpuara’a nō te fa’aorara’a, (’ia ha’apaehia te reira) ’ia pohe atu te ta’ata, e vai ā te māuiui rahi nō tō rātou vārua, nō te tāpū-’ē-ra’a-hia mai mua atu i te aro o te Fatu.

12 ’E i teienei, ’aita atu ā e rāve’a e ora ai te ta’ata nei i taua hi’ara’a ra, ’o tā te ta’ata i fa’atae mai i ni’a iho iāna nō tōna iho ha’apa’o ’ore.

13 Nō reira, mai te au i te parauti’a, ’aita roa te ’ōpuara’a nō te fa’aorara’a e tupu, maori rā nā roto i tō te ta’ata tātarahapara’a i roto i teie vaira’a tāmatara’a ; ’oia ïa, teie vaira’a fa’aineinera’a ; ’e ’āhiri ’aita teie nei mau rāve’a, ’aita roa te aroha e upo’oti’a, maori rā e fa’a’ore te reira i te ’ohipa nō te parauti’a. I teienei, ’aita roa te ’ohipa nō te parauti’a e ti’a ’ia ha’amouhia ; ’e ’āhiri e ti’a ’ia nā-reira-hia, e’ita ïa te Atua e riro ’ei Atua.

14 ’E nō reira ’ua ’ite tātou ē, ’ua hi’a te ta’ata ato’a, ’e tei roto rātou i te rima o te parauti’a ; ’oia ïa, te parauti’a a te Atua, ’o tei tāpū ’ē atu ia rātou i tōna ra aro ē a muri noa atu.

15 ’E i teienei, ’aita roa te ’ōpuara’a nō te aroha e tupu, maori rā nā roto i te hō’ē tāra’ehara ; nō reira ’ua riro te Atua iho ’ei tāra’ehara nō te mau hara a tō te ao nei, nō te fa’atupu i te ’ōpuara’a nō te aroha, nō te fa’ati’a i te mau tītaura’a nō te parauti’a, ’ia vai ā te Atua ’ei Atua maita’i roa, ’ei Atua parauti’a, ’e ’ei Atua aroha ho’i.

16 I teienei, ’aita roa te tātarahapa e tae mai i te ta’ata nei, maori rā tē vai ra te hō’ē fa’autu’ara’a i te hō’ē pae, ’e te ’ōpuara’a nō te ’oa’oa i te tahi pae, ’o tei riro ato’a ’ei mea mure ’ore, mai te ora o te vārua e mea mure ’ore.

17 I teienei, nō te aha te ta’ata e tātarahapa ai, maori rā ’ua hara ’oia ? Nāhea ’oia e hara ai, mai te mea ’aita e ture ? Nāhea ho’i e ti’a ai ’ia vai te ture maori rā tē vai ra te fa’autu’ara’a ?

18 I teienei, ’ua fa’aauhia te fa’autu’ara’a, ’e ’ua tu’uhia mai ho’i te ture ti’a, ’e ’ua fa’atupu te reira i te māuiui i roto i te ’ā’au o te ta’ata.

19 I teienei, ’āhiri ’aita te ture i tu’uhia mai—’e ’ia taparahi pohe te ta’ata i te tahi atu ta’ata ra, e ha’apohe-ato’a-hia ïa ’oia—e mata’u ānei ’oia i te pohe mai te mea ē, e taparahi ’oia i te ta’ata ?

20 ’E ’oia ato’a, ’āhiri ’aita e ture nō te hara, ’aita ato’a ïa te ta’ata e mata’u ’ia rave i te hara.

21 ’E ’āhiri ’aita te ture i tu’uhia mai, ’e ’ua hara te ta’ata e aha ïa tā te parauti’a ’e tā te aroha rāve’a, ’aita ho’i o te reira e mana i ni’a i te ta’ata ?

22 ’Ua tu’uhia mai rā te ture, ’e ’ua fa’aauhia ho’i te fa’autu’ara’a, ’e ’ua hōro’ahia mai te tātarahapara’a ; ’e nā roto i te tātarahapara’a e roa’a ai tō te aroha mana ; ’e mai te mea ē ’aita, ’ua noa’a ïa tō te parauti’a mana i ni’a i te ta’ata ’e ’ua fa’ati’a ho’i te reira i te ture, ’e nā te ture e fa’ati’a i te fa’autu’ara’a ; ’āhiri ’aita ra, ’ua ’ore ïa te mau ’ohipa a te parauti’a, ’e e’ita ïa te Atua e riro ’ei Atua.

23 ’Āre’a rā e vai noa te Atua ’ei Atua, ’e e mana tō te aroha i ni’a i te feiā tātarahapa, ’e ’ua tae mai te aroha nā roto i te tāra’ehara ; ’e nā te tāra’ehara i fa’atae mai i te ti’afa’ahoura’a o te feiā pohe ra ; ’e nā te ti’afa’ahoura’a o te feiā pohe ra e fa’aho’i atu i te ta’ata i mua i te aro o te Atua ; ’e nā reira rātou i te fa’aho’ihia atu i mua i tōna ra aro, ’ia ha’avāhia mai te au i tā rātou mau ’ohipa ; mai te au ho’i i te ture ’e te parauti’a.

24 Inaha ho’i, tē tītau ra te parauti’a i tāna ihora, ’e e mana ho’i tō te aroha i ni’a i tāna ihora ; ’e nō reira, ’aita roa te hō’ē ta’ata e fa’aorahia, maori rā te feiā tātarahapa mau.

25 E aha, tē mana’o ra ānei ’oe ē, e ti’a i te aroha ’ia haru i tā te parauti’a ? Tē parau atu nei au ia ’oe, ’Aita roa ; ’aita roa te hō’ē noa a’e vāhi iti. ’E ’āhiri ē ’oia, e’ita ïa te Atua e riro ’ei Atua.

26 ’E nō reira ’ua fa’atupu te Atua i tāna mau ’ōpuara’a rahi ’e te mure ’ore, ’o tei fa’aineinehia mai te ha’amatara’a mai ā o te ao nei. ’E nō reira e tae mai te fa’aorara’a ’e te ora o te ta’ata nei, ’e tō rātou ato’a pohe ’e te mamae.

27 Nō reira, e tā’u tamaiti, ’o tei hina’aro i te haere mai, e ti’a iāna ’ia haere mai ’e ’ia inu noa i te mau pape nō te ora ; ’e ’o tei ’ore e hina’aro ’ia haere mai, ’aita roa ïa ’oia e ha’avīhia ’ia haere mai ; ’āre’a rā ’ia tae i te mahana hope’a ra e fa’aho’ihia mai ïa tāna mai te au i tāna ra mau ’ohipa.

28 ’E mai te mea ’ua hina’aro ’oia i te rave i te ’ino, ’e ’aita ’oia i tātarahapa i tōna ra pu’e mahana, inaha, e tāho’ohia ’oia i te ’ino, mai te au i te fa’aho’ira’a a te Atua ra.

29 ’E i teienei, e tā’u tamaiti, ’ua hina’aro vau ’eiaha ’oe e vaiiho i teie mau mea ’ia ha’ape’ape’a fa’ahou ia ’oe, ’e ’ia vaiiho i tā ’oe mau hara ’ia ha’ape’ape’a ia ’oe, ’oia i taua pe’ape’a ra ’o tē fa’aha’eha’a ia ’oe ’ia tātarahapa.

30 E tā’u tamaiti, ’ua hina’aro vau ’eiaha ’oe e huna fa’ahou i te parauti’a a te Atua. ’Eiaha roa ho’i ’oe e fa’ati’a ia ’oe iho i tā ’oe ra mau hara i te hō’ē vāhi iti noa a’e ma te huna i te parauti’a a te Atua ra ; ’āre’a rā ’a vaiiho i te parauti’a a te Atua, ’e tōna aroha, ’e tōna fa’a’oroma’ira’a roa ’ia fa’auru i tō ’oe ’ā’au ; ’e ’a vaiiho ato’a i te reira ’ia ’ume ia ’oe i raro i te repo i roto i te ha’eha’a.

31 ’E i teienei, e tā’u tamaiti, ’ua pi’ihia ’oe e te Atua ’ia a’o atu i te parau i teie nei feiā. ’E i teienei, e tā’u tamaiti, ’a haere i tō ’oe tere, ’e ’a a’o atu i te parau ma te parau mau ’e te ha’apa’o maita’i, ’ia ti’a ia ’oe ’ia arata’i mai i te mau ta’ata i te tātarahapa, ’ia roa’a ia rātou te mana nō te ’ōpuara’a rahi nō te aroha. ’E ’ia hōro’a mai te Atua ia ’oe mai te au i tā’u mau parau. ’Āmene.