1 I teienei, e ho’i tātou i roto i tā tātou pāpa’a parau nō ni’a ia ’Amalikia ’e ia rātou ho’i ’o tei horo atu nā muri iho iāna i roto i te mēdēbara ; ’E inaha, ’ua rave ’oia ia rātou ’o tei haere mai nā muri iho iāna, ’e ’ua haere atu ra i ni’a i te fenua ra nō Nephi i rotopū i te mau ’āti Lamana, ’e ’ua fa’ati’arepu ihora ’oia i te mau ’āti Lamana ’ia riri atu i te mau ta’ata o Nephi ; ’e nō reira ’ua fa’atae atu ra te ari’i o te mau ’āti Lamana i te hō’ē fa’auera’a ē ’ati roa a’e tōna fenua ato’a, i tōna mau ta’ata ato’a, ’ia ha’aputuputu fa’ahou mai rātou nō te haere atu e ’aro i te mau ’āti Nephi.

2 ’E i muri a’era, ’ia tae a’era taua fa’auera’a ra i rotopū ia rātou, ’ua mata’u roa ihora rātou ; ’oia ïa, ’ua mata’u rātou ’ia riri te ari’i, ’e ’ua mata’u ato’a rātou ’ia haere atu e ’aro i te mau ’āti Nephi ’o te taparahihia rātou. ’E i muri a’era, ’aita rātou, ’oia ho’i te pae rahi, i ha’apa’o i te mau fa’auera’a a te ari’i.

3 ’E i teienei, i muri a’era, ’ua riri roa ihora te ari’i nō tō rātou ha’apa’o ’ore ; nō reira ’ua hōro’a atu ’oia i te fa’aterera’a ia ’Amalikia nō ni’a i taua pae o tōna ra nu’u fa’ehau ’o tei ha’apa’o i tāna mau fa’auera’a, ’e ’ua fa’aue atu ra ’oia iāna ’ia haere atu e ha’avī ia rātou ’ia rave i tā rātou mau mauha’a tama’i.

4 I teienei inaha, ’o teie ïa te hina’aro o ’Amalikia ; nō te mea e ta’ata ’aravihi ’oia i te rave i te ’ohipa ’ino, nō reira ’ua fa’atupu ’oia i te hō’ē ’ōpuara’a i roto i tōna ’ā’au ’ia fa’a’ere i te ari’i o te mau ’āti Lamana i tōna terōno.

5 I teienei, ’ua noa’a iāna te fa’atere i te pae o te mau ’āti Lamana ’o tei hina’aro i te ari’i ; ’e ’ua tītau ’oia ’ia riro iāna te mana’o o te feiā ’o tei ’ore i ha’apa’o ; nō reira ’ua haere atu ra ’oia i te vāhi i ma’irihia te i’oa ’o Onida, i horo atu na ho’i te mau ’āti Lamana ato’a i reira ; ’e ’ua ’ite atu rātou i te nu’u fa’ehau i te haerera’a mai, ’e ’ua mana’o rātou ē, tē haere mai ra rātou e ha’amou ia rātou, nō reira ’ua horo ’ē atu rātou i Onida, i te vāhi nō te mau mauha’a tama’i.

6 ’E ’ua mā’iti rātou i te hō’ē ta’ata ’ei ari’i ’e ’ei ta’ata fa’atere nō rātou, nō te mea ’ua pāpū tō rātou ’ā’au ma te mana’o ’āueue ’ore ē, e’ita roa rātou e haere atu e ’aro i te mau ’āti Nephi.

7 ’E i muri a’era, ’ua ha’aputuputu ’āmui atu ra rātou i ni’a i te tupua’i nō te hō’ē mou’a i ma’irihia te i’oa ’o Anitipa, ’e ’ua ineine rātou nō te ’arora’a.

8 I teienei, e ’ere te ’ōpuara’a a ’Amalikia te ’arora’a ia rātou mai te au i te mau fa’auera’a a te ari’i, inaha rā, ’ua hina’aro ’oia ’ia ’āfaro mai te mau nu’u fa’ehau o te mau ’āti Lamana iāna, ’e ’ia ti’a iāna ’ia riro ’ei upo’o fa’atere ’e ’ia fa’a’ere i te ari’i i tōna terōno, ’e ’ia roa’a iāna iho te bāsileia.

9 ’E inaha, i muri a’era, ’ua fa’aue atu ra ’oia i tōna nu’u fa’ehau ’ia fa’ati’a i tō rātou mau ti’ahapa i roto i te hō’ē peho i pīha’i iho i te mou’a nō Anitipa.

10 ’E i muri a’era, i taua iho pō ra, ’ua tono atu ra ’oia i te mau ve’a huna i ni’a i te mou’a ra nō Anitipa, nō te ani atu i te ta’ata fa’atere o te mau ta’ata i ni’a i te mou’a, ’o Lihoniti tōna i’oa, ’ia haere mai ’oia i raro i te pae mou’a, nō te mea ’ua hina’aro ’oia ’ia paraparau atu iāna.

11 ’E i muri a’era, i tō Lihoniti fāri’ira’a i taua parau ra, ’aita roa ’oia i hina’aro ’ia haere atu i raro i te pae mou’a. ’E i muri a’era, ’ua tono fa’ahou atu ra ’Amalikia, i te piti o te taime, nō te ani iāna ’ia haere mai i raro. ’E i muri a’era, ’aita roa ’o Lihoniti i nā reira ; ’e ’ua tono fa’ahou atu ra ’oia i te toru o te taime.

12 ’E i muri a’era, ’ia ’ite a’era ’Amalikia ē, ’aita roa e ti’a iāna ’ia tāparu ia Lihoniti ’ia haere mai i raro mai ni’a mai i te mou’a, ’ua haere atu ra ’oia i ni’a i te mou’a, fātata roa i tō Lihoniti pūhapara’a ; ’e ’ua tono fa’ahou atu ra ’oia, i te maha o te taime i tāna ve’a ia Lihoniti ra, ma te ani atu iāna ’ia haere mai i raro, ’e ’ia ’āfa’i mai i tōna mau fa’ehau tīa’i nā muri iho iāna.

13 ’E i muri a’era, ’ia tae mai ra Lihoniti ’e tōna mau fa’ehau tīa’i ato’a i raro ia ’Amalikia ra, ’ua hina’aro ’Amalikia ’ia haere mai ’oia i tōna nu’u fa’ehau i raro i te pō, ’e ’ia ha’a’ati i te mau ta’ata i roto i tō rātou mau pūhapara’a, ’oia i te mau ta’ata tā te ari’i i fa’ariro iāna ’ei ra’atira nō rātou, ’e i reira ’oia e tu’u atu ai ia rātou i roto i tō Lihoniti rima, mai te mea e fa’ariro ’oia iāna (ia ’Amalikia) ’ei ta’ata fa’atere piti i ni’a i te nu’u fa’ehau pā’āto’a.

14 ’E i muri a’era, ’ua haere mai ra Lihoniti ’e tōna mau ta’ata i raro ’e ’ua ha’a’ati a’era i te mau ta’ata o ’Amalikia, ’e hou tō rātou arara’a mai i te ’ā’ahiata, ’ua ha’a’atihia rātou e te mau nu’u fa’ehau o Lihoniti.

15 ’E i muri a’era, ’ia ’ite a’era rātou ē, ’ua ha’a’atihia rātou, ’ua ani atu ra rātou ia ’Amalikia ’ia fa’ati’a ia rātou ’ia ’āmui atu i tō rātou mau taea’e, ’ia ’ore rātou ’ia taparahihia. I teienei, ’o teie mau ho’i te mea tā ’Amalikia i hina’aro.

16 ’E i muri a’era, ’ua tu’u atu ra ’oia i tōna mau ta’ata, mai te au ’ore i te fa’auera’a a te ari’i. I teienei, ’o teie te mea tā ’Amalikia i hina’aro, ’ia ti’a iāna ’ia fa’atupu i tāna mau ’ōpuara’a nō te fa’a’ere i te ari’i i tōna ra terōno.

17 I teienei, teie te peu i rotopū i te mau ’āti Lamana, ’ia taparahihia te ta’ata fa’atere rahi, e mā’itihia te ta’ata fa’atere piti ’ei ta’ata fa’atere rahi nō rātou.

18 ’E i muri a’era, ’ua fa’aue atu ra ’Amalikia i te hō’ē o tōna ra mau tāvini ’ia fa’a’amu ri’iri’i i te mea ta’ero ia Lihoniti, ’e ’ua pohe atu ra ’oia.

19 I teienei, ’ia pohe a’era Lihoniti, ’ua mā’iti ihora te mau ’āti Lamana ia ’Amalikia ’ei ta’ata fa’atere ’e ’ei ra’atira rahi nō rātou.

20 ’E i muri a’era, ’ua arata’i atu ra ’Amalikia i tōna mau nu’u fa’ehau (’ua manuia ho’i tōna hina’aro) i te fenua ra nō Nephi, i te ’oire ra nō Nephi, ’oia te ’oire rahi.

21 ’E ’ua haere mai ra te ari’i ’e tōna mau fa’ehau tīa’i nō te fārerei iāna, i mana’o ho’i ’oia ē, ’ua ha’apa’o ’Amalikia i tāna mau fa’auera’a, ’e ’ua ha’aputuputu ’Amalikia i teie nu’u fa’ehau rahi nō te haere atu e ’aro i te mau ’āti Nephi.

22 Inaha rā, ’a haere mai ai te ari’i e fārerei iāna, ’ua fa’aue atu ra ’Amalikia i tōna mau tāvini ’ia haere atu e fārerei i te ari’i. ’E ’ua haere atu ra rātou ’e ’ua tīpapa ihora i raro i mua i te ari’i, mai te mea ra tē fa’ahanahana ra rātou iāna nō tōna ti’ara’a rahi.

23 ’E i muri a’era, ’ua fa’atoro mai ra te ari’i i tōna rima nō te fa’ati’a ia rātou i ni’a, mai te au i te peu a te mau ’āti Lamana, ’ei tāpa’o nō te hau, ’e e peu ho’i teie i ravehia mai e rātou nō ’ō mai i te mau ’āti Nephi ra.

24 ’E i muri a’era, ’ia fa’ati’a a’era ’oia i te ta’ata mātāmua mai te repo mai, inaha, ’ua pātia atu ra ’oia i te ari’i i te māfatu ; ’e ’ua marua ihora ’oia i raro i te repo.

25 I teienei, ’ua horo atu ra te mau tāvini o te ari’i, ’e ’ua pi’i a’era te mau tāvini o ’Amalikia, i te nā-’ō-ra’a ē :

26 Inaha, ’ua pātia tō te ari’i ra mau tāvini iāna i te māfatu, ’e ’ua ma’iri ’oia i raro, ’e ’ua horo rātou ; inaha, ’a haere mai na e hi’o.

27 ’E i muri a’era, ’ua fa’aue ihora ’Amalikia i tōna ra mau nu’u fa’ehau ’ia haere atu e hi’o i te mea i tupu i te ari’i ; ’e ’ia tae atu ra rātou i taua vāhi ra, ’e ’ia ’ite atu ra i te ari’i i te vai-noa-ra’a i roto i tōna ihora toto, ’e ’ua fa’ahua riri ihora o ’Amalikia, ’e ’ua nā ’ō a’era ’oia ē : ’O ’oia ’o tei here i te ari’i, ’a haere atu ’oia ’e ’a a’ua’u i tōna ra mau tāvini ’e ’ia taparahihia rātou.

28 ’E i muri a’era, ’ia fa’aro’o a’era rātou ato’a ’o tei here i te ari’i i teie nei mau parau, ’ua haere atu ra rātou ’e ’ua a’ua’u atu ra i te mau tāvini o te ari’i.

29 I teienei, ’ia ’ite mai ra te mau tāvini o te ari’i i te hō’ē nu’u fa’ehau i te a’ua’ura’a mai ia rātou, ’ua mata’u fa’ahou ihora rātou, ’e ’ua horo atu ra rātou i roto i te mēdēbara, ’e tae atu ra i te fenua ra nō Zarahemela, ’e ’ua ’āmui a’era ia rātou iho i te mau ta’ata o Amona.

30 ’E ’ua ho’i mai ra te nu’u fa’ehau i a’ua’u atu ia rātou, i muri iho i tō rātou a’ua’ura’a atu ia rātou ma te manuia ’ore ; ’e nō reira nā roto i tā ’Amalikia ’ohipa ha’avare, ’ua riro iāna te ’ā’au o te mau ta’ata.

31 ’E i muri a’era, ’ia ao a’era, ’ua tomo atu ra ’oia i roto i te ’oire ra nō Nephi ’e tōna mau nu’u fa’ehau, ’e ’ua haru ihora i te ’oire.

32 ’E i teienei, i muri a’era, ’ia fa’aro’o a’era te ari’i vahine ē, ’ua taparahihia te ari’i—i tono atu na ho’i ’Amalikia i te mau ve’a nō te fa’a’ite i te ari’i vahine ē, ’ua taparahihia te ari’i e tōna iho mau tāvini, ’e i a’ua’u na ho’i ’oia ’e tōna nu’u fa’ehau ia rātou, ’aita rā rātou i manuia, ’e ’ua mahemo atu rātou—

33 Nō reira, i tō te ari’i vahine fāri’ira’a i teie parau, ’ua tono mai ra ’oia i te hō’ē ve’a ia ’Amalikia, nō te ani iāna ’ia fa’aora noa i te mau ta’ata o te ’oire ; ’e ’ua ani ato’a ’oia iāna ’ia haere mai iāna ra ; ’e ’ua hina’aro ato’a ’oia iāna ’ia ’āfa’i mai i te mau ’ite nā muri iho iāna nō te fa’a’ite pāpū i te huru nō te pohera’a o te ari’i.

34 ’E i muri a’era, ’ua rave ihora ’Amalikia i te tāvini iho i taparahi i te ari’i, ’e te mau ta’ata ato’a i pīha’i iho iāna, ’e ’ua haere atu ra i te ari’i vahine ra, i te vāhi tāna e pārahi ra ; ’e ’ua fa’a’ite atu ra rātou ato’a iāna ē, ’ua taparahihia te ari’i e tōna iho mau tāvini ; ’e ’ua parau ato’a atu rātou ē : ’Ua horo ’ē atu rātou ; ’aita ānei te reira e fa’ahapa mau nei ia rātou ? ’E ’ua nā reira rātou i te fa’atopa i te mana’o o te ari’i vahine nō ni’a i te pohera’a o te ari’i.

35 ’E i muri a’era, ’ua ’imi ihora ’Amalikia i te rāve’a ’ia ti’aturi mai te ari’i vahine iāna, ’e ’ua rave ihora iāna ’ei vahine nāna ; ’e nā roto i tāna ’ohipa ha’avare ’e te tauturura’a a tōna mau tāvini ’ohipa ’ino, ’ua roa’a te bāsileia iāna ; ’oia ïa, ’ua fāri’ihia ’oia ’ei ari’i i te fenua tā’āto’a ē ’ati noa a’e, i rotopū i te mau ta’ata ato’a o te mau ’āti Lamana, ’e tei roto ho’i i te reira te mau ’āti Lamana ’e te mau ’āti Lemuela ’e te mau ’āti Isema’ela, ’e te feiā ’ōrurehau ato’a o te mau ’āti Nephi, mai te taime fa’aterera’a a Nephi ē tae roa mai i teie taime.

36 I teienei, ’ua fāri’i teie feiā ’ōrurehau i te hō’ē ā ha’api’ira’a ’e te hō’ē ā ha’amāramaramara’a nō ’ō mai i te mau ’āti Nephi, ’oia ïa, ’ua ha’api’ihia rātou i te hō’ē ā ’ite nō ni’a i te Fatu, terā rā, te mea māere ’ia parau atu, i muri noa a’e i tā rātou mau tāivara’a, ’ua riro rātou ’ei feiā hau atu i te ’ā’au ’eta’eta ’e te tātarahapa ’ore, e hau atu i te ’ōviri, te parauti’a ’ore ’e te taehae, i te mau ’āti Lamana—’e ’ua rave noa mai rātou i te mau peu tumu a te mau ’āti Lamana ; ’e ’ua riro ’ei feiā fa’atau, ’e te rave i te mau huru ’ohipa vi’ivi’i ato’a ; ’oia ïa, ’ua ha’amo’e roa rātou i te Fatu tō rātou Atua.