1 ’E i teienei, i muri a’era, i te ha’amatara’a nō te toru ’ahuru o te matahiti nō te fa’aterera’a a te mau ha’avā, i te piti o te mahana nō te ’āva’e mātāmua, ’ua fāri’i Moroni te hō’ē ’episetole nō ’ō mai ia Helamana ra, ma te fa’a’ite mai i te huru o te mau ’ohipa a te mau ta’ata i taua tufa’a fenua ra.

2 ’E ’o teie te mau parau tāna i pāpa’i, i te nā-’ō-ra’a ē : E tō’u taea’e here-rahi-hia, e Moroni, tō’u taea’e i te Fatu ’e i roto te mau ’ati nō tā tātou mau ’arora’a ; inaha, e tō’u taea’e herehia, e parau ri’i tā’u e fa’a’ite atu ia ’oe nō ni’a i tā mātou mau ’arora’a i teie pae nō te fenua.

3 Inaha, tē vai nei e piti tauatini mau tamari’i tamāroa a taua mau ta’ata ra tei arata’ihia mai e Amona mai te fenua mai ra o Nephi—i teienei ’ua ’ite na ho’i ’oe ē, e mau hua’ai teie nō Lamana, te tamaiti matahiapo a tō tātou metua tāne ra ’o Lehi.

4 I teienei ’aita e faufa’a iā’u ’ia fa’a’ite atu ia ’oe i tā rātou mau peu tumu ’e tō rātou ti’aturi ’ore, ’ua ’ite ho’i ’oe i taua mau mea nei—

5 Nō reira, ’ua nava’i noa iā’u ’ia fa’a’ite atu ia ’oe ē, ’ua rave teie feiā ’āpī tāne e piti tauatini i tā rātou mau mauha’a tama’i, ’e ’ua hina’aro ho’i rātou iā’u ’ia riro ’ei ta’ata fa’atere nō rātou ; ’e ’ua haere mai mātou nō te pāruru i tō tātou fenua.

6 ’E i teienei ’ua ’ite ato’a ’oe i te fafaura’a i fafauhia ’e tō rātou mau metua, ’oia ho’i e’ita rātou e rave fa’ahou i tā rātou mau mauha’a tama’i nō te ’aro atu i tō rātou mau taea’e nō te ha’amani’i i te toto.

7 ’Āre’a rā i te piti ’ahuru ’e ma ono o te matahiti, ’a ’ite ai rātou i tō tātou mau ’ati ’e tō tātou mau ahoaho nō rātou, ’ua fātata roa rātou i te ’ōfati i te fafaura’a tā rātou i fafau ’e ’ia rave i tā rātou mau mauha’a tama’i nō te pāruru ia tātou.

8 ’Āre’a rā ’aita vau i fa’ati’a ia rātou ’ia ’ōfati i teie fafaura’a ’o tā rātou i fafau, i ti’aturi ho’i au e ha’apūai mai te Atua ia tātou nei, ’e nō reira ho’i e ’ore roa tātou e māuiui rahi atu ā nō te ha’apa’ora’a rātou i te tapu ’o tā rātou i tapu.

9 Inaha rā, teie te hō’ē mea e ’oa’oa rahi ai tātou. Inaha ho’i, i te piti ’ahuru ’e ma ono o te matahiti, ’ua arata’i atu vau, ’o Helamana, i teie feiā ’āpī tāne e piti tauatini i te ’oire ra nō Iudea, nō te tauturu ia Anitipusa, ’o tā ’oe i fa’ata’a ’ei ta’ata fa’atere i ni’a a’e i te mau ta’ata nō taua pae o te fenua ra.

10 ’E ’ua ’āmui atu vau i tā’u mau tamaiti e piti tauatini, (ua au ho’i ’ia parauhia rātou e mau tamaiti) i te nu’u fa’ehau o Anitipusa, ’e ’ua oaoa roa Anitipusa nō teie ha’apūaira’a ; inaha ho’i, ’ua fa’aitihia tōna ra nu’u fa’ehau ’e te mau ’āti Lamana nō te mea ’ua taparahi tō rātou mau nu’u fa’ehau i tō mātou mau ta’ata e rave rahi, ’e nō te reira ’ua ’oto mātou.

11 ’Āre’a rā, ’ua ti’a ia tātou ia tāmāhanahana ia tātou iho i te mea ē, ’ua pohe rātou nō te aroha i tō rātou ra fenua ’e nō tō rātou Atua, ’oia ïa, ’e ’ua ’oa’oa rātou.

12 ’E ’ua tāpe’a noa ato’a ho’i te mau ’āti Lamana e rave rahi feiā mau-’āuri, ’e e mau ra’atira rahi ana’e rātou, ’e ’aita roa rātou i fa’aora noa ia vetahi ’ē atu. ’E tē mana’o nei mātou ē, tei te fenua ra nō Nephi rātou i teienei ā ; ’o te reira ïa mai te mea ’aita rātou i taparahihia.

13 ’E i teienei o teie te mau ’oire tei roa’a i te mau ’āti Lamana nā roto i te ha’amani’ira’a i te toto o tō mātou mau ta’ata mata’u ’ore e rave rahi :

14 Te fenua ra nō Maniti, ’oia ho’i, te ’oire ra nō Maniti, te ’oire ra nō Zeezeroma, te ’oire ra nō Kumeni, ’e te ’oire ra nō Anetipara.

15 ’E ’o teie te mau ’oire tei roa’a ia rātou ’a tae atu ai au i te ’oire ra nō Iudea ; ’e ’ua ’ite atu ra vau ia Anitipusa ’e tōna ra mau ta’ata i te ’ohipara’a ma tō rātou pūai ato’a nō te ha’apa’ari i te ’oire.

16 ’Oia ïa, ’e ’ua teimaha rātou i te tino ’e te vārua ato’a ho’i, ’e ’ua tama’i pūai rātou i te ao ’e ’ua ’ohipa pūai i te pō nō te tāpe’a noa i tō rātou mau ’oire ; ’e ’ua nā reira ho’i rātou i te fa’a’oroma’i i te mau huru ’ati rahi ato’a ra.

17 ’E i teienei ’ua ’ōpua pāpū rātou ’ia upo’oti’a i taua vāhi ra ’e ’aore rā ’ia pohe ; nō reira e ti’a iho ā ïa ia ’oe ’ia mana’o ē, nā teie nu’u fa’ehau iti tā’u i arata’i mai nā muri iā’u, ’oia ïa, teie mau tamaiti nā’u ra, i fa’aitoito rahi ia rātou ’e i fa’a’oa’oa rahi ia rātou.

18 ’E i muri a’era, ’ia ’ite a’era te mau ’āti Lamana ē, ’ua fāri’i Anitipusa i te pūai rahi nō tāna nu’u fa’ehau, ’ua fa’auehia rātou e te mau parau a Amorona, ’eiaha rātou e haere mai e ’aro i te ’oire ra nō Iudea, ’oia ho’i ia mātou.

19 ’E ’ua nā-reira-hia mātou i te arohahia e te Fatu ; ’e ’āhiri ho’i rātou i ’aro mai ia mātou i tō mātou vai-paruparu-ra’a, ’ua ha’amou paha ïa rātou i tō mātou nu’u fa’ehau iti ; ’ua nā-reira-hia rā mātou i te fa’aorahia.

20 ’Ua fa’auehia ho’i rātou e Amorona ’ia tāpe’a noa i taua mau ’oire i roa’a mai ia rātou. ’E ’o te hope’a te reira nō te piti ’ahuru ’e ma ono o te matahiti. ’E ’ia tae a’era i te ha’amatara’a nō te piti ’ahuru ’e ma hitu o te matahiti ’ua fa’aineine mātou i tō mātou ’oire ’e ia mātou ato’a iho nō te pāruru atu.

21 I teienei ’ua hina’aro mātou ’ia haere mai te mau ’āti Lamana e ’aro ia mātou ; ’e ’aita roa mātou i hina’aro ’ia ’aro atu ia rātou i roto i tō rātou mau ha’apūra’a pa’ari.

22 ’E i muri a’era, ’ua tono atu mātou i te mau ta’ata tāmoemoe ē ’ati noa a’e, nō te tāmoemoe i te mau haere’a o te mau ’āti Lamana, ’ia ’ore rātou ’ia haere nā tō mātou vāhi i te pō ’e ’aore rā i te ao, nō te ’aro atu i te tahi atu o tō tātou mau ’oire i te pae apato’erau.

23 ’Ua ’ite ho’i mātou ē, e ’ere taua mau ’oire ra i te mea pūai roa nō te ’aro atu ia rātou ; nō reira ’ua hina’aro mātou ē mai te mea e haere mai rātou nā tō mātou vāhi, e ’aro atu ïa mātou ia rātou nā muri atu, ’e nō reira e ’arohia atu rātou nā muri atu ’e i taua ato’a ihora taime e ’arohia mai rātou nā mua mai. ’Ua mana’o mātou ē, e ti’a ia mātou ’ia ha’avī ia rātou ; inaha rā, ’ua māere roa mātou i roto i tō mātou nei hina’aro.

24 ’Ua mata’u rātou ’ia haere mai nā tō mātou nei vāhi ’e tō rātou nu’u fa’ehau tā’āto’a, ’e ’ua mata’u ato’a rātou ’ia ’āfa’i mai i te tahi pae, ’o te ’ore e nava’i tō rātou pūai ’e ’o te mou atu rātou.

25 ’Ua mata’u ato’a rātou ’ia haere atu e ’aro i te ’oire ra nō Zarahemela ; ’e ’ua mata’u ato’a ho’i rātou ’ia haere atu i te tahi pae mai nō te ha’amatara’a o te ’ānāvai ra Sidona, ē tae atu ai i te ’oire ra nō Nephiha.

26 ’E nō reira, ma tō rātou mau nu’u fa’ehau ’ua ’ōpua pāpū rātou ’ia tāpe’a noa i taua mau ’oire i noa’a mai ia rātou.

27 ’E i teienei, i muri a’era, i te piti o te ’āva’e o taua matahiti ra, ’ua ’āfa’ihia mai ia mātou te mau mā’a e rave rahi nō ’ō mai i te mau metua o taua mau tamaiti e piti tauatini ra.

28 ’E ’oia ato’a ’ua tonohia mai e piti tauatini ta’ata ia mātou ra nō te fenua mai ra o Zarahemela. ’E nō reira ’ua ineine mātou ’e tō mātou mau ta’ata hō’ē ’ahuru tauatini, ’e te mau huru mā’a nā rātou, ’e nā tā rātou ato’a mau vahine ’e tā rātou mau tamari’i.

29 ’E ’ia ’itea a’era te mau ’āti Lamana ē tē rahi noa atu ra tō mātou mau nu’u fa’ehau i terā mahana ’e i terā mahana, ’e tē tae mai ra te mau huru mā’a ato’a nō te tauturu ia mātou, ’ua mata’u ihora rātou, ’e ’ua ha’amata ihora i te haere ’oi’oi mai nō te ’aro mai, penei a’e ’o te tāpe’a te reira i te mau mā’a ’e te pūai ’o tā mātou e fāri’i ra.

30 I teienei, ’ia ’ite a’era mātou ē tē tupu ra tō te mau ’āti Lamana tapitapi i te reira, ’ua hina’aro ihora mātou ’ia fa’atupu i te hō’ē ’ōpuara’a nō te rāmā ia rātou ; nō reira ’ua fa’aue mai Anitipusa ’ia haere atu vau ’e tā’u mau tamaiti iti i te hō’ē ’oire tāpiri mai, ma te fa’ahua ē tē hōpoi ra mātou i te mā’a i te ’oire tāpiri mai.

31 ’E ’ia haere atu mātou nā pīha’i iho i te ’oire ra nō Anetipara, ma te fa’ahua ē tē haere ra mātou i te tahi atu ’oire, i te mau fenua i te hiti nō te pae miti.

32 ’E i muri a’era, ’ua haere ti’a atu ra mātou ma te fa’ahua ē tē hōpoi ra mātou i te mā’a, i taua ’oire ra.

33 ’E i muri a’era, ’ua haere atu ra Anitipusa ’e te tahi pae o tōna ra nu’u fa’ehau, ma te vaiiho atu i te tahi pae nō te tāpe’a noa i te ’oire. ’Āre’a rā ’aita ’oia i haere mai, ē tae roa atu ’ua fātata atu tō’u ra nu’u fa’ehau iti i te ’oire ra nō Anetipara.

34 ’E i teienei, i roto i te ’oire ra nō Anetipara ’ua tu’uhia te nu’u fa’ehau pūai roa a’e o te mau ’āti Lamana ; ’oia ïa, te mea rahi roa atu.

35 ’E i muri a’era, ’ia fa’a’itehia te reira ia rātou e tō rātou mau ta’ata hi’ohi’o, ’ua haere mai ra rātou ’e tō rātou nu’u fa’ehau nō te ’aro ia mātou.

36 ’E i muri a’era, ’ua horo ’ē atu ra mātou i te pae apato’erau mai mua atu ia rātou. ’E ’ua nā reira ho’i mātou i te arata’i ’ē atu i te nu’u fa’ehau pūai roa o te mau ’āti Lamana.

37 ’Oia ïa, e tae atu i te vāhi ātea roa, ’e nō reira ho’i i tō rātou ’itera’a atu i te nu’u fa’ehau o Anitipusa i te tāpapara’a mai ia rātou, ma tō rātou pūai ato’a, ’aita rātou i tīpu’u i te pae ’atau ’e ’aita ato’a i te pae ’aui, ’ua tāpapa ’āfaro noa mai rātou nā muri ia mātou ; ’e ’ua mana’o mātou, tē ’ōpua ra rātou ’ia taparahi ia mātou hou rātou e roa’ahia mai ai e Anitipusa, ’e ’ia ’ore ho’i rātou ’ia ha’a’atihia ’e tō mātou ra mau ta’ata.

38 ’E i teienei, ’ia ’ite a’era Anitipusa i tō mātou fifi, ’ua fa’a’oi’oi mai ra ’oia i te haerera’a mai o tōna nu’u fa’ehau. Inaha rā, ’ua tae mai te pō, nō reira ’aita mātou i roa’ahia ia rātou, ’e ’aita ato’a rātou i roa’ahia ia Anitipusa ; nō reira ’ua fa’ati’a ihora mātou i tō mātou ti’ahapa i taua pō ra.

39 ’E i muri a’era, i te ’ā’ahiata roa nō taua po’ipo’i ra, inaha, ’ua tāpapa mai ra te mau ’āti Lamana ia mātou. I teienei ’aita roa i nava’i tō mātou pūai nō te ’aro atu ia rātou ; ’oia ïa, ’aita roa vau i hina’aro ’ia ma’iri atu tā’u mau tamaiti ’āpī i roto i tō rātou rima ; nō reira ’ua tāmau noa mātou i tō mātou haere’a, ’e ’ua haere atu mātou i roto i te mēdēbara.

40 I teienei ’ua mata’u rātou ’ia tīpu’u i te pae ’atau ’e i te pae ’aui ’o te ha’a’atihia rātou ; ’e ’aita ato’a vau i tīpu’u i te pae ’atau ’e i te pae ’aui ’o te roa’ahia mātou ia rātou, ’e ’aita ho’i e ti’a ia mātou ’ia ’aro atu ia rātou, nō te mea e taparahihia mātou ’e e ora atu rātou ; ’e ’ua nā reira atu ra mātou i te horo atu i taua mahana ato’a ra i roto i te mēdēbara, ē tae noa atu ’ua pōiri.

41 ’E i muri a’era, teie fa’ahou ā, ’ia hiti mai ra te māramarama o te po’ipo’i ’ua ’ite atu ra mātou i te mau ’āti Lamana i te ha’afātātara’a mai ia mātou, ’e ’ua horo ’ē atu ra mātou mai mua atu ia rātou.

42 ’Āre’a rā i muri a’era, ’aita rātou i tāpapa ātea mai ia mātou ’e ’ua fa’aea ihora ; ’e ’o te po’ipo’i teie nō te toru o te mahana nō te hitu o te ’āva’e.

43 ’E i teienei, ’aita mātou i ’ite ē ’ua roa’ahia ānei rātou ia Anitipusa, ’āre’a rā ’ua parau atu ra vau i tō’u mau ta’ata : Inaha, ’aita tātou i ’ite ē ’ua fa’aea ānei rātou ’ei ’ōpuara’a ’ia haere atu tātou e ’aro ia rātou, ’ia ti’a ia rātou ’ia haru ia tātou i roto i tā rātou mārei.

44 Nō reira, e aha tā ’outou parau, e tā’u mau tamaiti, e haere ānei ’outou e ’aro atu ia rātou ?

45 ’E tē parau atu nei au ia ’oe, e tō’u taea’e herehia e Moroni, ’aita ā vau i ’ite atu ra i te itoito rahi mai te reira, ’aita, ’aita roa i rotopū i te mau ’āti Nephi ato’a.

46 Mai tā’u ho’i i pi’i ia rātou e mau tamaiti nā’u (e mea ’āpī roa ho’i rātou pā’āto’a) ’oia ato’a ’ua parau mai rātou iā’u : ’E tō mātou metua, inaha, tei pīha’i iho tō tātou Atua ia tātou, ’e e’ita roa ’oia e vaiiho ia tātou ’ia ma’iri ; haere ana’e ïa i mua ; e’ita tātou e taparahi i tō tātou mau taea’e ’āhiri ’ua vaiiho noa mai rātou ia tātou, nō reira haere ana’e, ’o te ha’avī rātou i te nu’u fa’ehau o Anitipusa.

47 I teienei ’aita ā rātou i tama’i, ’aita rā rātou i mata’u i te pohe ; ’e ’ua feruri rahi atu rātou i te ti’amāra’a o tō rātou mau metua i tō rātou iho ora ; ’oia ïa, ’ua ha’api’ihia rātou e tō rātou mau metua vahine, ’e mai te mea ’aita rātou e fē’a’a, e fa’aora te Atua ia rātou.

48 ’E ’ua fa’ati’a mai ra rātou iā’u i te mau parau a tō rātou mau metua vahine, i te nā-’ō-ra’a mai ē : ’Aita roa mātou i fē’a’a ē ’ua ’ite tō mātou mau metua vahine i te reira.

49 ’E i muri a’era, ’ua ho’i atu vau e tā’u mau tamaiti e piti tauatini nō te ’aro i teie mau ’āti Lamana ’o tei a’ua’u noa mai ia mātou. ’E i teienei inaha, ’ua roa’ahia rātou e te mau nu’u fa’ehau o Anitipusa, ’e ’ua tupu ihora te hō’ē ’arora’a rahi roa.

50 ’Ua rohirohi te nu’u fa’ehau o Anitipusa, nō te mea e mea ātea te vāhi i haerehia mai e rātou i roto i te hō’ē taime poto, ’e ’ua fātata roa rātou i te ma’iri atu i roto i te rima o te mau ’āti Lamana ; ’e ’āhiri ’aita vau i ho’i atu e tā’u mau tamaiti e piti tauatini ’ua manuia tā rātou ’ōpuara’a.

51 ’Ua pohe ho’i Anitipusa i te ’o’e ’e tōna ato’a mau ta’ata fa’atere e rave rahi, nō tō rātou rohirohi i tō rātou haere-’oi’oi-ra’a—no reira ’ua hepohepo roa te mau ta’ata o Anitipusa nō te pohe o tō rātou mau ra’atira rahi, ’e ’ua ’ōtohe rātou mai mua atu i te mau ’āti Lamana.

52 ’E i muri a’era, ’ua itoito ihora te mau ’āti Lamana, ’e ’ua ha’amata ihora rātou i te a’ua’u mai ia rātou ; ’e nō reira ’ua a’ua’u pūai mai ra te mau ’āti Lamana ia rātou ’a ’aro atu ai Helamana ’e tōna mau ta’ata e piti tauatini i te mau ta’ata i muri, ’e ’ua ha’amata ihora i te taparahi pūai atu ia rātou, ’e nō reira ho’i ’ua fa’aea ihora te nu’u fa’ehau pā’āto’a o te mau ’āti Lamana ’e ’ua fāriu mai ra nō te ’aro ia Helamana.

53 I teienei, ’ia ’ite a’era te mau ta’ata o Anitipusa ē, ’ua fāriu te mau ’āti Lamana i muri, ’ua ha’aputuputu ihora rātou i tō rātou mau ta’ata, ’e ’ua haere atu ra nā muri atu i te mau ’āti Lamana.

54 ’E i teienei, i muri a’era, ’ua ha’a’ati ihora mātou, te mau ta’ata o Nephi, te mau ta’ata o Anitipusa, ’e ’o vau ’e tā’u mau tamaiti e piti tauatini ato’a ho’i, i te mau ’āti Lamana, ’e ’ua taparahi atu ia rātou ; ’oia ïa, ’e nō reira ho’i, ’ua ha’avīhia rātou ’ia hōro’a mai i tā rātou mau mauha’a tama’i ’e ia rātou iho ho’i ’ei feiā mau-’āuri tau tama’i.

55 ’E i teienei, i muri a’era, i tō rātou tu’ura’a mai ia rātou iho i roto i tō mātou rima, inaha, ’ua tai’o ihora vau i taua feiā ’āpī tāne ra tei ’aro atu nā muri iho iā’u ; nō tō’u mata’u ē ’ua pohe rātou e rave rahi i te taparahihia.

56 Inaha rā, ’ua ’oa’oa roa vau, i te mea ē ’aita roa te hō’ē a’e o rātou i ma’iri i raro i te repo ; ’oia ïa, ’ua ’aro rātou mai te mea ra ē, tei roto ia rātou te pūai o te Atua ; ’oia ïa, ’aita roa i ’itea na te mau ta’ata pūai rahi māere i te tama’i mai ia rātou ; ’e ma te pūai rahi roa ’ua ’aro atu rātou i te mau ’āti Lamana, ’e ’ua ha’amata’u roa atu ia rātou ; ’e nō reira ’ua hōro’a mai te mau ’āti Lamana ia rātou iho ’ei feiā mau-’āuri tau tama’i.

57 ’E nō te mea ’aita tā mātou e vāhi nō tā mātou feiā mau-’āuri, ’ia ti’a ia mātou ’ia tāpe’a ia rātou nō te pāruru ia rātou i te mau nu’u fa’ehau o te mau ’āti Lamana, nō reira ’ua hōpoi atu ra mātou ia rātou i te fenua ra nō Zarahemela, ’e te tahi pae o te mau ta’ata nō Anitipusa ’o tei ’ore i taparahihia nā muri ia rātou ; ’e ’ua rave ihora vau i te toe’a ’e ’ua ’āmui atu ra ia rātou i tō’u ra mau ta’ata ’āpī nō te mau ’āti Amona, ’e ’ua ho’i atu ra mātou i te ’oire ra nō Iudea.