1 ’E inaha, i teienei, i muri a’era, tā mātou ’ōpuara’a i muri iho ’o te rave mai ïa i te ’oire ra nō Maniti ; inaha rā, ’aita roa tā mātou e rāve’a nō te arata’i ia rātou i rāpae i taua ’oire ra nā roto i tā mātou mau pupu fa’ehau iti. Inaha ho’i, ’ua ha’amana’o rātou i tā mātou i rave na ; nō reira ’aita roa e ti’a ia mātou ’ia rāmā atu ia rātou ’ia haere i rāpae i tō rātou mau ha’apūra’a pa’ari.

2 ’E e mea rahi roa atu rātou i tō mātou nu’u fa’ehau iti, ’e nō reira ’ua mata’u mātou ’ia haere atu e ’aro ia rātou i roto i tō rātou mau ha’apūra’a pa’ari.

3 ’Oia ïa, e mea tītau-roa-hia ia mātou ’ia fa’a’ohipa i tō mātou mau ta’ata nō te ha’apa’o i taua mau tufa’a nō te fenua i roa’a mai ’ei ’āi’a nō mātou ; nō reira e mea ti’a roa ia mātou ia tīa’i i te tau e fāri’i ai mātou i te tahi atu ā mau nu’u fa’ehau nō te fenua Zarahemela mai ’e te tautura’a ato’a nō te pae mā’a.

4 ’E i muri a’era, ’ua tono atu ra vau i te hō’ē ve’a i te tāvana o tō tātou fenua nō te fa’a’ite atu iāna i te huru o te mau ’ohipa nō ni’a i tō mātou mau ta’ata. ’E i muri a’era, ’ua tīa’i mātou nō te fāri’i i te mā’a ’e te nu’u fa’ehau nō te fenua mai o Zarahemela.

5 Inaha rā, e ’ere te reira i te mea faufa’a rahi roa nō mātou ; nō te mea ’ua fāri’i ato’a te mau ’āti Lamana i te nu’u fa’ehau i terā mahana ’e i terā mahana, ’e i te mau mā’a e rave rahi ; ’e te reira ïa tō mātou huru i taua taime ra.

6 ’E tē aro mai ra te mau ’āti Lamana ia mātou i terā taime ’e i terā taime, ma te ’ōpua ’ia ha’amou ia mātou nā roto i tā rātou rāmāra’a ; ’aita rā i ti’a ia mātou ’ia ’aro atu ia rātou, nō te pa’ari o tō rātou mau vāhi tāpunira’a ’e tō rātou mau ha’apūra’a pa’ari.

7 ’E i muri a’era, ’ua pārahi noa mātou i roto i taua mau huru ’ati ra nō te ārea e rave rahi ’āva’e te maoro, ē tae noa atu ’ua fātata roa mātou i te pohe nō te mā’a ’ore.

8 ’Āre’a rā i muri a’era, ’ua fāri’i mātou i te mā’a ’o tei hōpoihia mai e te hō’ē nu’u fa’ehau, e piti tauatini ta’ata, nō te tauturu ia mātou ; ’e ’o teie ana’e te tauturura’a tā mātou i fāri’i, nō te pāruru ia mātou iho ’e tō tātou fenua, ’ia ’ore ’ia ma’iri atu i roto i te rima o tō tātou mau ’enemi ; ’oia ïa, nō te ’aro atu i te ’enemi ’o tē ’ore e hope ’ia tai’o.

9 ’E i teienei, te tumu nō tō mātou mau fifi, ’oia ho’i te tumu ’aita rātou i fa’atae mai i te tahi atu ā nu’u fa’ehau, ’aita roa ïa mātou i ’ite ; nō reira ’ua ’oto roa mātou ’e ’ua mata’u ho’i ’o te tae mai te mau ha’avāra’a a te Atua i ni’a iho i tō tātou fenua, nō te ha’avī ’e nō te ha’amou roa ho’i ia tātou.

10 Nō reira ’ua pure atu ra mātou i te Atua ma tō mātou ’ā’au ato’a, ’ia ha’apūai mai ’e ’ia fa’aora mai ho’i ’oia ia mātou i te rima o tō tātou mau ’enemi ; ’oia ïa, ’ia hōro’a mai ’oia i te pūai ’ia ti’a ia mātou ’ia tāpe’a noa i tō tātou mau ’oire, e tō tātou mau fenua, e tā tātou mau tao’a, nō te pāturu i tō tātou mau ta’ata.

11 ’Oia ïa, ’e i muri a’era, ’ua fa’a’ite pāpū mai ra te Fatu tō tātou Atua ē, e fa’aora ’oia ia mātou ; ’oia ïa, ’e nō reira ho’i ’ua parau mai ra ’oia i te parau hau i tō mātou ’ā’au, ’e ’ua hōro’a mai ’oia i te fa’aro’o rahi ia mātou, ’e ’ua fa’aitoito mai ra ’oia ia mātou ’ia ti’aturi iāna nō tō mātou fa’aorara’a.

12 ’E ’ua fāri’i mātou i te itoito nō te nu’u fa’ehau iti i roa’a ia mātou, ’e ’ua ’ōpua pāpū ho’i mātou ’ia ha’avī i tō tātou mau ’enemi, ’e ’ia tāpe’a noa i tō tātou mau fenua, ’e tā tātou mau tao’a, ’e tā tātou mau vahine, ’e tā tātou mau tamari’i, ’e te tumu nō tō tātou ti’amāra’a.

13 ’E ’ua nā reira mātou i te haere i mua ma tō mātou pūai ato’a nō te ’aro atu i te mau ’āti Lamana, ’o tei pārahi i roto i te ’oire ra nō Maniti ; ’e ’ua fa’ati’a ihora mātou i tō mātou mau ti’ahapa i te pae mēdēbara, fātata atu i te ’oire.

14 ’E i muri a’era, ’ia ao a’era, ’ia ’ite mai ra te mau ’āti Lamana ē, tē pārahi ra mātou i te mau fenua i te hiti nō te mēdēbara, fātata atu i te ’oire, ’ua tono mai ra rātou i tō rātou mau ta’ata tāmoemoe ē ’ati noa a’e ia mātou, ’ia ’ite rātou i te rahi ’e te pūai ho’i o tō mātou nu’u fa’ehau.

15 ’E i muri a’era, ’ia ’ite a’era rātou ē, e ’ere mātou i te mea pūai, ’ia au i tō mātou rahira’a, ’e nō te mea ho’i ’ua mata’u rātou ’o te tāpe’a mātou i te tauturura’a tā rātou e fāri’i ra, maori rā ’ia haere mai rātou e ’aro ia mātou ’e ’ia taparahi ia mātou ; ’e nō tō rātou ho’i mana’ora’a ē, e mea ’ōhie ia rātou ’ia taparahi ia mātou nō te rahi o tō rātou mau nu’u fa’ehau, nō reira ’ua ha’amata ihora rātou i te fa’aineine nō te haere mai e ’aro ia mātou.

16 ’E ’ia ’ite a’era mātou ē, tē fa’aineine ra rātou nō te haere mai e ’aro mai ia mātou, inaha, ’ua fa’aue atu ra vau ia Gida ’e te tahi pupu ta’ata iti ’ia tāpuni iāna iho i roto i te mēdēbara, ’e ’ia Teomenera ato’a ’e te tahi pupu ta’ata iti ’ia tāpuni ato’a ia rātou iho i roto i te mēdēbara.

17 I teienei, tei te pae ’atau Gida ’e tōna ra mau ta’ata, ’e tei te pae ’aui te tahi pae ; ’e ’ia tāpuni a’era rātou ia rātou iho, inaha, tē pārahi ra vau ’e te toe’a o tō’u ra nu’u fa’ehau i taua iho vāhi tā mātou i fa’ati’a mātāmua i tō mātou mau ti’ahapa, nō te fa’aineine i te taime e haere mai ai te mau ’āti Lamana e ’aro mai ia mātou.

18 ’E i muri a’era, ’ua haere mai ra te mau ’āti Lamana ’e tō rātou nu’u fa’ehau rahi nō te ’aro mai ia mātou. ’E ’ua tae mai ra rātou ’e ’ua fātata ho’i i te taparahi ia mātou i te ’o’e, ’ua fa’aue atu ra vau i tō’u mau ta’ata, ’o rātou ’o tei fa’aea mai i pīha’i iho iā’u, ’ia ’ōtohe atu i roto i te mēdēbara.

19 ’E i muri a’era, ’ua a’ua’u mai ra te mau ’āti Lamana ia mātou ma te ’oi’oi rahi, ’e ’ua hina’aro roa rātou ’ia roa’ahia mātou ’e ’ia ti’a ia rātou ’ia taparahi ia mātou ; nō reira ’ua a’ua’u mai rātou ia mātou i roto i te mēdēbara ; ’e ’ua haere atu mātou nā rōpū ia Gida ’e Teomenera, ’e nō reira ho’i ’aita roa rātou i ’itehia e te mau ’āti Lamana.

20 ’E i muri a’era, ’ia mahemo ri’i a’era te mau ’āti Lamana, ’e ’aore rā ia mahemo ri’i a’era te nu’u fa’ehau, ’ua ti’a a’era Gida ’e Teomenera mai tō rāua mau vāhi tāpunira’a, ’e ’ua tāpe’a ihora i te mau ta’ata tāmoemoe o te mau ’āti Lamana, ’ia ’ore rātou ’ia ho’i atu i te ’oire.

21 ’E i muri a’era, i muri iho tō rātou tāpe’ara’a ia rātou, ’ua horo atu ra rātou i te ’oire ’e ’ua taparahi ihora i te mau tīa’i i vaiihohia nō te tīa’i i te ’oire, ’e nō reira ho’i ’ua taparahi ihora rātou ia rātou ’e ’ua haru ihora i taua ’oire.

22 I teienei ’ua nā-reira-hia nō te mea ’ua fa’ati’a te mau ’āti Lamana ’ia arata’ihia tō rātou nu’u fa’ehau pā’āto’a i roto i te mēdēbara, maori rā te tahi noa mau tīa’i.

23 ’E i muri a’era, nā roto i te reira ’ua roa’a ia Gida ’e ia Teomenera tō rātou mau ha’apūra’a pa’ari. ’E i muri a’era, ’ia maoro a’era tō mātou haerera’a i roto i te mēdēbara, ’ua ha’amata ihora mātou i te haere i te fenua ra nō Zarahemela.

24 ’E ’ia ’ite a’era te mau ’āti Lamana ē, tē haere ti’a ra rātou i te fenua ra nō Zarahemela, ’ua mata’u roa ihora rātou, penei a’e tē vai ra te hō’ē ’ōpuara’a i mana’ohia nō te ha’amou ia rātou ; nō reira ’ua ha’amata ihora rātou i te ’ōtohe fa’ahou i roto i te mēdēbara, ’oia ïa, nā ni’a i taua iho ’ē’a tā rātou i haere mai.

25 ’E inaha, ’ua pō ’e ’ua fa’ati’a ihora rātou i tō rātou mau ti’ahapa, ’e ’ua mana’o ho’i te mau ra’atira rahi o te mau ’āti Lamana ē, ’ua rohirohi te mau ’āti Nephi nō tō rātou haerera’a ; ’e nō tō rātou ho’i mana’ora’a ē, ’ua tīahi ’ē atu rātou i tō rātou nu’u fa’ehau tā’āto’a, nō reira ’aita atu ra rātou i feruri nō ni’a i te ’oire ra nō Maniti.

26 ’E i muri a’era, ’ia tae mai te pō, ’ua fa’aue atu ra vau i tō’u ra mau ta’ata ’eiaha rātou e ta’oto, ’āre’a rā ’ia haere rātou nā te tahi ’ē’a ’ē atu e tae atu ai i te ’oire ra nō Maniti.

27 ’E nō tō mātou haerera’a i te pō, inaha, ’ia ao a’era, ’ua tae mai mātou i teie pae o te mau ’āti Lamana, ’e nō reira ho’i ’ua tae mātou nā mua ia rātou i te ’oire ra nō Maniti.

28 ’E nō reira, i muri a’era, nā roto i taua rāve’a ’aravihi ra ’ua roa’a mai ia mātou te ’oire ra nō Maniti ma te ha’amani’i ’ore i te toto.

29 ’E i muri a’era, ’ia fātata mai ra te mau nu’u fa’ehau o te mau ’āti Lamana i te ’oire, ’e ’ia ’ite mai ra ho’i ē ’ua ineine mātou nō te ’aro atu ia rātou, ’ua māere roa ihora rātou ’e ’ua ro’ohia ihora rātou i te mata’u rahi, ’e nō reira ho’i ’ua horo ’ē atu ra rātou i roto i te mēdēbara.

30 ’Oia ïa, i muri a’era, ’ua horo ’ē atu ra te mau nu’u fa’ehau o te mau ’āti Lamana i rāpae i taua pae fenua ato’a ra. Inaha rā, ’ua hōpoi atu ra rātou i te mau vahine ’e te mau tamari’i e rave rahi i rāpae i taua fenua ra.

31 ’E taua mau ’oire ra i haruhia ’e te mau ’āti Lamana, tei roto ïa i tō mātou rima i teienei ; ’e tē ho’i mai ra ho’i tō mātou mau metua, ’e tā mātou mau vahine, ’e tā mātou mau tamari’i i tō rātou mau fare, maori rā ’o rātou ’o tei ravehia ’ei feiā mau-’āuri ’e ’o tei hōpoi-tītī-hia atu e te mau ’āti Lamana.

32 Inaha rā, e mea iti ho’i tō mātou mau nu’u fa’ehau nō te tāpe’a noa i teie mau ’oire e rave rahi ’e te mau fenua rahi ato’a ho’i.

33 Inaha rā, tē ti’aturi nei mātou i tō tātou Atua ’o tei hōro’a mai ia mātou i te rē i ni’a iho i taua mau fenua nei, ’e nō reira ho’i ’ua roa’a mai ia tātou taua mau ’oire ra ’e taua mau fenua ra, ’e nō tātou iho ho’i te reira.

34 I teienei, ’aita mātou i ’ite i te tumu i ’ore ai te hau fenua i hōro’a rahi mai i te nu’u fa’ehau nō te tauturu ia mātou ; ’e ’aita ato’a te mau ta’ata i haere mai ia mātou ra i ’ite ē nō te aha ’aita mātou i fāri’i rahi i te nu’u fa’ehau nō te tauturu ia mātou.

35 Inaha, ’aita mātou i ’ite ē, ’ua manuia ānei ’outou, ’e ’ua arata’i atu ho’i ’outou i te mau nu’u fa’ehau i terā pae o te fenua ; ’e mai te mea ē ’o te reira iho ā, ’aita mātou i hina’aro ’ia amuamu.

36 ’E mai te mea ē ’aita rā, inaha, tē mata’u nei mātou penei a’e tē vai ra te ’āmahamaha i roto i te hau fenua, nō reira ’aita rātou i tono rahi mai i te ta’ata nō te tauturu ia mātou ; ’ua ’ite ho’i mātou ē, e mea rahi roa atu rātou i tā rātou i tono mai.

37 ’Āre’a rā, inaha, ’aita e pe’ape’a—tē ti’aturi nei mātou e fa’aora te Atua ia mātou, noa atu ā te paruparu o tō mātou mau nu’u fa’ehau, ’oia ïa, e fa’aora ’oia ia mātou i te rima o tō tātou mau ’enemi.

38 Inaha, ’o te pae hope’a teie o te matahiti e piti ’ahuru ’e ma iva, ’e ’ua roa’a mai ia mātou tō tātou mau fenua ; ’e ’ua horo ’ē atu te mau ’āti Lamana i te fenua ra nō Nephi.

39 ’E tei iā’u nei i te ’oire nō Maniti te mau tamaiti a te mau ta’ata o Amona, ’o tei parau-maita’i-hia e au ra ; ’e ’ua tauturu mai te Fatu ia rātou, ’oia ïa, ’e ’ua fa’aora ho’i ia rātou i te ’o’e, ’e nō reira ho’i ’aita roa te hō’ē a’e ta’ata i taparahihia.

40 Inaha rā, ’ua fāri’i rātou e rave rahi mau puta ; ’āre’a rā ’ua tāpe’a māite rātou i te ti’amāra’a tā te Atua i fa’ati’amā ia rātou ; ’e ’ua itoito rātou i te ha’amana’o i te Fatu tō rātou Atua i terā mahana ’e i terā mahana ; ’oia ïa, ’ua ha’apa’o tāmau māite rātou i tāna mau ture, ’e tāna mau parau, ’e tāna mau fa’auera’a ; ’e e mea pūai ho’i tō rātou fa’aro’o i te mau parau tohu nō ni’a i te mau mea e tupu a muri atu.

41 ’E i teienei, e tō’u taea’e here, e Moroni, ’ia tāpe’a māite noa te Fatu ra tō tātou Atua, ’o tei fa’aora ’e ’o tei fa’ati’amā ia tātou, ’ia ’oe i mua i tōna ra aro ; ’oia ïa, ’e ’ia ha’amaita’i mai ’oia i teie nei feiā, ’e ’ia manuia ’oe nō te fāri’i mai i te mau fenua ato’a tā te mau ’āti Lamana i rave ’ē atu mai ia tātou nei, ’o tei riro ho’i ’ei tauturu nō tātou. ’E i teienei, inaha, te fa’aoti nei au i tā’u ’episetole. ’O vau o Helamana, te tamaiti a Alama.