1 ’E i teienei, i muri a’era, i tō Moroni fāri’ira’a i teie ’episetole, ’ua itoito ihora tōna ’ā’au, ’e ’ua ’ī ihora ’oia i te ’oa’oa rahi roa nō te ha’apa’o maita’i o Pahorana, ’e nō te mea ’aita ’oia i riro ’ei ta’ata fa’a’ino i te ti’amāra’a o tōna ra fenua.

2 ’Āre’a rā ’ua ’oto rahi roa ’oia nō te mau ’ohipa ’ī’ino rahi a te feiā i tīahi atu ia Pahorana mai ni’a mai i te pārahira’a ha’avāra’a ; ’oia ïa, nō te feiā i ’ōrure i tō rātou fenua e tei pāto’i i tō rātou Atua.

3 ’E i muri a’era, ’ua rave ihora Moroni i te tahi pae iti o tōna mau ta’ata, mai te au i tō Pahorana hina’aro, ’e ’ua hōro’a atu ra i te fa’aterera’a ia Lehi ’e Teanekuma i ni’a i te toe’a o tōna ra nu’u fa’ehau, ’e ’ua haere atu ra i te fenua ra nō Gideona.

4 ’E ’ua fa’ati’a ihora ’oia i te reva nō te ti’amāra’a i te mau vāhi ato’a tāna i tomo atu, ’e ’ua fāri’i mai ’oia i te mau nu’u fa’ehau tē ti’a iāna ’ia fāri’i mai i tōna haerera’a i te fenua ra nō Gideona.

5 ’E i muri a’era, e rave rahi tauatini tei ta’iruru mai i pīha’i iho i tāna ra reva, ’e ’ua rave ihora i tā rātou mau ’o’e nō te pāruru i tō rātou ti’amāra’a, ’ia ’ore rātou ’ia fa’atītīhia.

6 ’E nō reira, ’ia oti a’era tā Moroni ha’aputuputura’a i te mau ta’ata ato’a i roa’a mai iāna i tōna haere’a, ’ua haere atu ra ’oia i te fenua ra nō Gideona ; ’e i ’āmuihia tōna mau nu’u fa’ehau ’e tō Pahorana ato’a, ’ua riro atu ra rātou ’ei mea pūai roa, ’oia ïa, hau atu i te pūai i tō Pakusa, ’oia te ari’i nō te feiā ’ōrurehau i ti’avaru i te feiā-ti’amā i rāpae i te fenua ra nō Zarahemela ’e tei haru ho’i i taua fenua ra.

7 ’E i muri a’era, ’ua haere atu ra Moroni rāua ’o Pahorana ’e tō rāua mau nu’u fa’ehau ato’a i raro i te fenua ra nō Zarahemela, ’e tae a’era rātou i te ’oire, ’e ’ua fārerei atu ra i te mau ta’ata o Pakusa ra, ’e nō reira ’ua ’aro rātou.

8 ’E inaha, ’ua taparahihia ’o Pakusa ’e ’ua ravehia tōna ra mau ta’ata ’ei feiā mau-’āuri, ’e ’ua fa’aho’ihia Pahorana i ni’a i tōna pārahira’a ha’avāra’a.

9 ’E ’ua fāri’i te mau ta’ata o Pakusa i tō rātou ha’avāra’a, mai te au i te ture, ’e te mau ta’ata-hina’aro-ari’i ato’a ’o tei ravehia ’e tei hurihia i roto i te fare tāpe’ara’a ; ’e ’ua taparahihia rātou mai te au i te ture ; ’oia ïa, te mau ta’ata o Pakusa ’e te mau ta’ata-hina’aro-ari’i, ’e rātou ato’a ho’i ’o tē ’ore e rave i te mau mauha’a tama’i nō te pāruru i tō rātou fenua, ’o tei tama’i mai rā i te reira, ’ua taparahihia ïa rātou.

10 ’E nō reira, e mea ti’a roa ’ia ha’apa’o-māite-hia taua ture ra nō te maita’i o tō rātou fenua ; ’oia ïa, ’e ’o rātou ’o tei ’itehia ē ’ua huna i tō rātou ti’amāra’a, ’ua taparahi-vave-hia ïa rātou mai te au i te ture.

11 ’E ’o te hope’a te reira nō te toru ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi ; ’e ’ua fa’atupu Moroni e Pahorana i te hau i ni’a i te fenua ra nō Zarahemela, i rotopū i tō rāua mau ta’ata ; ’e ’ua ha’apohe ho’i i te mau ta’ata ato’a ’o tei ’ore i ha’apa’o maita’i i te parau nō te ti’amāra’a.

12 ’E i muri a’era, ’ia tae a’era i te ha’amatara’a nō te toru ’ahuru ’e ma hō’ē o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua fa’atae vave atu ra Moroni i te mā’a, ’e ’oia ato’a i te tahi nu’u fa’ehau, e ono tauatini ta’ata, ’ia Helamana ra, nō te tauturu iāna ’ia tāpe’a noa i taua pae o te fenua ra.

13 ’E ’ua tono ato’a atu ra ’oia i te tahi nu’u fa’ehau, e ono tauatini ta’ata, ’e ’ua hāpono ato’a atu i te mā’a e nava’i nā te mau nu’u fa’ehau o Lehi ’e Teanekuma. ’E i muri a’era, ’ua nā-reira-hia nō te pāruru i te fenua i te mau ’āti Lamana.

14 ’E i muri a’era, ’ua vaiiho Moroni rāua ’o Pahorana i te tahi pupu ta’ata rahi i te fenua ra nō Zarahemela, ’e ’ua haere atu ra ’e te tahi pupu ta’ata rahi i te fenua ra nō Nephiha, nō te mea ’ua ’ōpua rāua ’ia ha’amou i te mau ’āti Lamana i roto i taua ’oire ra.

15 ’E i muri a’era, ’a haere atu ai rātou i taua fenua ra, ’ua haru ihora rātou i te tahi pupu ta’ata rahi o te mau ’āti Lamana, ’e ’ua taparahi ihora e rave rahi i rotopū ia rātou, ’e ’ua haru ho’i i tā rātou mau mā’a ’e tā rātou mau mauha’a tama’i.

16 ’E i muri a’era, i muri iho i tō rātou harura’a i te mau ’āti Lamana, ’ua tītau atu ra rātou i taua mau ’āti Lamana ra ’ia fa’aoti i te hō’ē fafaura’a ē, e ’ore roa rātou e rave fa’ahou i tā rātou mau mauha’a tama’i nō te ’aro mai i te mau ’āti Nephi.

17 ’E i muri iho i tō rātou fa’aotira’a i taua fafaura’a ra, ’ua tonohia atu ra rātou ’ia pārahi i rotopū i te mau ta’ata o Amona, ’e ’ua fātata i te maha tauatini ’o tei ’ore i taparahihia.

18 ’E i muri a’era, i muri iho i tō rātou fa’ahaerera’a atu i te mau ’āti Lamana, ’ua ha’amata fa’ahou ihora rātou i tō rātou tere i te fenua ra nō Nephiha. ’E i muri a’era, ’ia tae a’era rātou i te ’oire ra nō Nephiha, ’ua fa’ati’a ihora rātou i tō rātou mau ti’ahapa i ni’a i te mau fenua pāpū ra o Nephiha, tei fātata atu i te ’oire ra nō Nephiha.

19 I teienei, ’ua hina’aro roa Moroni ’ia haere mai te mau ’āti Lamana i rāpae nō te ’aro mai ia rātou i ni’a i te mau fenua pāpū ; ’āre’a rā nō te mea ’ua ’ite mai te mau ’āti Lamana i tō rātou itoito rahi, ’e ’ua ’ite mai ho’i i tō rātou rahi, nō reira ’ua mata’u ihora rātou ’ia haere mai i rāpae nō te ’aro ia rātou ; ’e nō reira ’aita rātou i haere mai nō te ’aro ia rātou i taua mahana ra.

20 ’E ’ia tae mai ra te pō, ’ua haere atu ra Moroni i te taime pōiri roa nō te pō, e pa’uma a’era i ni’a iho i te patu nō te tāmoemoe ē tei hea te pae o te ’oire i pūhapahia e te mau ’āti Lamana ’e tō rātou nu’u fa’ehau.

21 ’E i muri a’era, tē pārahi ra rātou i te pae nō te hiti’a o te rā, fātata i te ’ūputa ; ’e ’ua vare’ahia rātou pā’āto’a i te ta’oto. ’E i teienei ’ua ho’i mai ra Moroni i tōna ra nu’u fa’ehau, ’e ’ua fa’aue atu ra ia rātou ’ia fa’aineine ’oi’oi i te tahi mau taura pa’ari ’e te tahi mau ’ē’a, ’e ’ia tu’uhia atu te reira mai ni’a atu i te patu i te pae roto o te patu.

22 ’E i muri a’era, ’ua fa’aue atu ra Moroni i tōna mau ta’ata ’ia haere atu rātou, ’e ’ia pa’uma i ni’a i te patu, ’e ’ia ha’apou ia rātou i raro i te pae o te ’oire, ’oia ïa, i te pae tō’o’a o te rā, i te vāhi ’aita i pūhapahia e te mau ’āti Lamana ’e tō rātou ra mau nu’u fa’ehau.

23 ’E i muri a’era, ’ua tu’uhia rātou pā’āto’a i raro i roto i te ’oire i te pō, ma te fa’a’ohipa i tā rātou mau taura pa’ari ’e tā rātou mau ’ē’a ; ’e nō reira ’ia tae a’era i te ao tei roto mai rātou pā’āto’a i te patu o taua ’oire ra.

24 ’E i teienei, ’ia ara a’era te mau ’āti Lamana, ’e ’ia ’ite atu rātou i te mau nu’u fa’ehau o Moroni i roto i te ’āua, ’ua mata’u roa ihora rātou, ’e nō reira ho’i ’ua horo atu ra rātou i rāpae nā roto i te ’ūputa.

25 ’E i teienei, ’ia ’ite a’era Moroni ē, tē horo ’ē atu ra rātou mai mua atu iāna, ’ua fa’aue atu ra ’oia i tōna mau ta’ata ’ia haere e ’aro ia rātou, ’e ’ua taparahi ia rātou e rave rahi, ’e ’ua ha’a’ati i te tahi pae e rave rahi, ’e ’ua haru ia rātou ’ei feiā mau-’āuri ; ’e ’ua horo atu ra te toe’a i te fenua ra nō Moroni, i te mau fenua i te hiti nō te pae tahatai.

26 ’E ’ua nā reira Moroni rāua ’o Pahorana i te haru mai i taua ’oire ra nō Nephiha, ’e ’aita roa te hō’ē ta’ata i pohe ; ’e e rave rahi ho’i tō te mau ’āti Lamana i taparahihia.

27 I teienei, e rave rahi feiā mau-’āuri ’āti Lamana tei hina’aro ’ia ’āmui atu i te mau ta’ata o Amona ’e ’ia riro ’ei feiā ti’amā.

28 ’E i muri a’era, te mau ta’ata ato’a e rave rahi ’o tei hina’aro, ’ua fa’ati’ahia atu te reira mai te au i tō rātou mau hina’aro.

29 Nō reira, ’ua ’āmui atu te feiā mau-’āuri o te mau ’āti Lamana ato’a i te mau ta’ata o Amona, ’e ’ua ha’amata ihora rātou i te rave i te ’ohipa ma te itoito rahi, i te fa’aineinera’a i te repo, i te fa’atupura’a i te mau huru sītona ato’a, ’e te fa’a’amura’a i te mau huru nana māmoe ato’a ’e te mau huru nana pua’atoro ato’a ; ’e nō reira, ’ua fa’aitihia ïa te hōpoi’a rahi i ni’a i te mau ’āti Nephi, ’oia ïa, ’ua fa’aitihia tā rātou hōpoi’a nō ni’a i te feiā mau-’āuri o te mau ’āti Lamana.

30 I teienei, i muri a’era, i muri iho i tō Moroni ravera’a mai i te ’oire ra nō Nephiha, ’e i muri iho i tōna ravera’a mai i te feiā mau-’āuri e rave rahi, ’o tei fa’aiti roa ho’i i te mau nu’u fa’ehau o te mau ’āti Lamana, ’e i muri iho i tōna fāri’ira’a mai i te mau ’āti Nephi e rave rahi ’o tei hōpoihia ’ei feiā mau-’āuri, ’e ’o tei ha’apūai i te nu’u fa’ehau o Moroni ; nō reira ’ua haere atu ra Moroni mai te fenua ra nō Nephiha ē tae atu i te fenua ra nō Lehi.

31 ’E i muri a’era, ’ia ’ite a’era te mau ’āti Lamana ia Moroni i te haerera’a mai e ’aro ia rātou, ’ua mata’u fa’ahou ihora rātou ’e ’ua horo ’ē atu ra mai mua atu i te nu’u fa’ehau o Moroni.

32 ’E i muri a’era, ’ua a’ua’u atu ra Moroni ’e tōna nu’u fa’ehau ia rātou i terā ’oire ’e i terā ’oire, ē tae noa atu ’ua fārereihia mai rātou e Lehi rāua ’o Teanekuma ; ’e ’ua horo ’ē atu ra te mau ’āti Lamana mai mua atu ia Lehi rāua ’oTeanekuma i te mau ’ōti’a i te pae tahatai, ē tae roa atu ra i te fenua ra nō Moroni.

33 ’E ’ua ha’aputuputuhia te mau nu’u fa’ehau o te mau ’āti Lamana i te vāhi hō’ē, ’e nō reira ho’i ’ua riro rātou pā’āto’a ’ei nu’u fa’ehau hō’ē i te fenua ra nō Moroni. I teienei tei rotopū ato’a ho’i ia rātou te ari’i o te mau ’āti Lamana, ’o Amorona.

34 ’E i muri a’era, ’ua pūhapa ihora Moroni, ’e Lehi, ’e Teanekuma ’e tō rātou mau nu’u fa’ehau ato’a ē ’ati noa a’e te fenua i te hiti nō te fenua ra nō Moroni, ’e nō reira ho’i ’ua ha’a’atihia te mau ’āti Lamana i te mau fenua i te hiti nō te mēdēbara i te pae apato’a ’e i te mau fenua ho’i i te hiti nō te mēdēbara i te pae nō te hiti’a o te rā.

35 ’E ’ua nā reira rātou i te pūhapa i taua pō ra. Inaha ho’i, ’ua rohirohi te mau ’āti Nephi ’e te mau ’āti Lamana ato’a nō te maoro o tō rātou tere ; nō reira, ’aita rātou i fa’atupu i te rāmā i taua pō ra, maori rā ’o Teanekuma ; ’e ’ua riri roa ho’i ’oia ia Amorona, ’e nō reira ho’i ’ua mana’o ihora ’oia ē, nā Amorona ’e ’Amalikia, tōna taea’e, i fa’atupu i taua ’arora’a rahi ’e te maoro i rotopū ia rātou ’e te mau ’āti Lamana, ’o te reira ho’i te tumu nō te ’arora’a rahi ’e te ha’amani’ira’a toto, ’oia ïa, ’e te o’e rahi ho’i.

36 ’E i muri a’era, ’ua haere atu ra Teanekuma ma tōna riri rahi i roto i te pūhapara’a o te mau ’āti Lamana, ’e ’ua tu’u ihora iāna iho i raro nā ni’a mai i te mau patu o te ’oire. ’E ’ua haere atu ra ’oia ma te taura i terā vāhi ’e i terā vāhi, ’e ’ua ’itehia a’era iāna te ari’i, ’e ’ua pātia atu ra iāna i te tāvero, ’e ’ua puta ’oia i te vāhi fātata i te māfatu. Inaha rā, ’ua fa’aara te ari’i i tōna mau tāvini nā mua ’oia i pohe ai, ’e nō reira ho’i ’ua a’ua’u atu rātou ia Teanekuma, ’e ’ua taparahi ihora iāna.

37 I teienei, i muri a’era, ’ia ’ite a’era Lehi ’e Moroni ē ’ua pohe roa Teanekuma, ’ua ’oto roa rāua ; inaha ho’i, e ta’ata teie ’o tei ’aro māite nō tōna nūna’a, ’oia ïa, e hoa mau ’oia nō te ti’amāra’a ; ’e ’ua fāri’i ’oia e rave rahi mau ’ati rahi. Inaha rā, ’ua pohe ’oia, ’e i haere na ho’i ’oia nā te ’ē’a o te ao ato’a nei.

38 I teienei, i muri a’era, ’ua haere atu ra Moroni i te po’ipo’i a’e nō te ’aro atu i te mau ’āti Lamana, ’e nō reira ho’i ’ua taparahi ia rātou e rave rahi ; ’e ’ua ti’avaru atu ho’i ia rātou i rāpae i taua fenua ra ; ’e ’ua horo ’ē atu ra rātou, ’e ’aita a’era rātou i ho’i fa’ahou mai nō te ’aro i te mau ’āti Nephi.

39 ’E ’o te hope’a te reira nō te toru ’ahuru ’e ma hō’ē matahiti nō te fa’aterera’a a te mau ha’avā i ni’a i te mau ta’ata o Nephi ; ’e nō reira ’ua vai noa te mau tama’i, ’e te mau ha’amani’ira’a toto, ’e te o’e, ’e te ’ati, nō te ārea e rave rahi matahiti te maoro.

40 ’E ’ua tupu ho’i te mau taparahira’a ta’ata, te mau mārōra’a, ’e te mau ’āmahamahara’a, ’e te mau huru ’ohipa ’ī’ino ato’a i rotopū i te mau ta’ata o Nephi ; ’āre’a rā nō te parauti’a, ’oia ïa, te mau pure a te feiā parauti’a, ’ua fa’aorahia ïa rātou.

41 Inaha rā, nō te maoro rahi o te ’arora’a i rotopū i te mau ’āti Nephi ’e te mau ’āti Lamana, e rave rahi tei fa’a’eta’eta i tō rātou ’ā’au, nō te maoro rahi o te ’arora’a ; ’e e rave rahi tei fa’aha’eha’ahia nō tō rātou mau ’ati, ’e nō reira ho’i ’ua fa’aha’eha’a rātou ia rātou iho i mua i te Atua, ma te ha’eha’a rahi roa.

42 ’E i muri a’era, i muri iho i tō Moroni ha’apa’arira’a i taua mau tufa’a nō te fenua i te pae fātata atu i te mau ’āti Lamana, ē tae noa atu ’ua pa’ari maita’i te reira, ’ua ho’i mai ra ’oia i te ’oire ra nō Zarahemela ; ’e ’ua ho’i ato’a mai ra Helamana i tōna ra fenua ’āi’a ; ’e ’ua tupu fa’ahou te hau i rotopū i te mau ta’ata o Nephi.

43 ’E ’ua hōro’a atu ra Moroni i te fa’aterera’a o te mau nu’u fa’ehau i roto i te rima o tāna tamaiti, ’o Moroniha tōna i’oa ; ’e ’ua ho’i mai ra ’oia i tōna ihora ’utuāfare ’ia ti’a iāna ’ia ora noa i te toe’a o tōna pu’e mahana i roto i te hau.

44 ’E ’ua ho’i mai ra ho’i Pahorana i ni’a i tōna pārahira’a ha’avāra’a ; ’e ’ua ha’amata fa’ahou Helamana i te a’o i te parau a te Atua i te mau ta’ata ; nō te mau ’arora’a e rave rahi ’e te mau mārōra’a e rave rahi ’ua ti’a roa ’ia fa’atupu-fa’ahou-hia te fa’a’āfarora’a i roto i te ’ēkālesia.

45 Nō reira, ’ua haere atu Helamana ’e tōna mau taea’e, ’e ’ua a’o atu i te parau a te Atua ma te mana rahi, i te fa’a’ite-pāpū-ra’a atu i te mau ta’ata e rave rahi nō ni’a i tā rātou mau ’ohipa ’ī’ino, ’e ’ua tātarahapa ihora rātou i tā rātou mau hara, ’e ’ua bāpetizohia ho’i i te Fatu tō rātou Atua.

46 ’E i muri a’era, ’ua fa’ati’a-fa’ahou-hia te ’ēkālesia a te Atua ē ’ati noa a’e te fenua.

47 ’Oia ïa, ’e ’ua ravehia te mau arata’ira’a nō ni’a i te mau ture. ’E ’ua mā’itihia tō rātou mau ha’avā, ’e tō rātou mau ha’avā rahi.

48 ’E ’ua ha’amata ihora te mau ta’ata o Nephi i te manuia fa’ahou i ni’a i te fenua, ’e ’ua ha’amata rātou i te tupu i te rahi ’e ’ia riro fa’ahou ’ei feiā pūai roa i ni’a i te fenua. ’E ’ua riro ho’i rātou ’ei feiā tao’a rahi roa.

49 ’E noa atu ā tā rātou mau tao’a rahi, ’e ’aore rā tō rātou pūai, ’e ’aore rā tō rātou manuia, ’aita roa rātou i fa’ateiteihia i te te’ote’o o tō rātou ’ā’au ; ’e ’aita ho’i rātou i tāere i te ha’amana’o i te Fatu tō rātou Atua ; ’āre’a rā ’ua fa’aha’eha’a māite rātou ia rātou iho i mua iāna.

50 ’Oia ïa, ’ua ha’amana’o rātou i te mau mea rahi tā te Fatu i rave nō rātou, ’oia ho’i, ’ua fa’aora ’oia ia rātou i te pohe, ’e i te fa’atītīra’a, ’e i te fare tāpe’ara’a, ’e i te mau huru ’ati ato’a, ’e ’ua fa’aora ho’i ’oia ia rātou i te rima o tō rātou mau ’enemi.

51 ’E ’ua pure tāmau noa rātou i te Fatu tō rātou Atua, ’e nō reira ho’i ’ua ha’amaita’i mai te Fatu ia rātou, mai te au i tāna parau, ’e nō reira ’ua pūai roa rātou ’e ’ua manuia ho’i i ni’a i te fenua.

52 ’E i muri a’era, ’ua oti teie mau mea ato’a i te ravehia. ’E ’ua pohe atu ra Helamana i te toru ’ahuru ’e ma pae o te matahiti nō te fa’aterera’a a te mau ha’avā i ni’a i te mau ta’ata o Nephi.