1 ’E i teienei, i muri a’era, ’ia fa’aoti a’era Alama i te paraparau atu i te mau ta’ata o te ’ēkālesia ’o tei fa’ati’ahia i te ’oire ra nō Zarahemela, ’ua fa’atōro’a ihora ’oia i te mau tahu’a ’e te mau peresibutero, nā roto i te tu’ura’a i tōna nā rima mai te au i te fa’anahora’a a te Atua, ’ia peresideni rātou ’e ’ia tīa’i māite ho’i i te ’ēkālesia.

2 ’E i muri a’era, ’o rātou ato’a e ’ere i tō te ’ēkālesia ’e ’o tei tātarahapa i tā rātou mau hara, ’ua bāpetizohia rātou nō te tātarahapara’a, ’e ’ua fāri’ihia rātou i roto i te ’ēkālesia.

3 ’E i muri ato’a a’era, ’o rātou ato’a nō roto i te ’ēkālesia ’o tei ’ore i tātarahapa i tā rātou mau ’ohipa ’ī’ino ’e tei ’ore ho’i i fa’aha’eha’a ia rātou iho i mua i te Atua—tē parau nei au nō ni’a i te feiā tei fa’ateiteihia i roto i te te’ote’o o tō rātou ’ā’au—’ua fa’aru’ehia rātou, ’e ’ua paraihia tō rātou mau i’oa, ’e ’aita tō rātou mau i’oa i tai’ohia i rotopū i tō te feiā parauti’a ra.

4 ’E ’ua nā reira rātou i te ha’amata i te fa’ati’a i te fa’anahora’a o te ’ēkālesia i te ’oire nō Zarahemela.

5 I teienei ’ua hina’aro vau ’ia ’ite ’outou ē, e mea hōro’a-noa-hia te parau a te Atua i te mau ta’ata ato’a, ’e ’aita roa te ta’ata i ’ōpanihia ’ia ha’aputuputu ia rātou iho nō te fa’aro’o i te parau a te Atua.

6 ’Āre’a rā ’ua fa’auehia mai te mau tamari’i a te Atua ’ia ha’aputuputu pinepine rātou ia rātou iho, ’e ’ia ’āmui ia rātou iho ma te ha’apae i te mā’a ’e ma te pure fa’a’ū’ana ’ia roa’a te maita’i i te mau ta’ata ’o tei ’ore i ’ite i te Atua.

7 ’E i teienei, i muri a’era, ’ia fa’aoti a’era Alama i te hōro’a atu i teie nei mau arata’ira’a, ’ua fa’aru’e mai ra ’oia ia rātou, ’oia ïa, i te ’ēkālesia i te ’oire ra nō Zarahemela, ’e ’ua haere atu ra i te pae i te hiti’a o te rā o te ’ānāvai ra Sidona, ’e tae atu ra i roto i te peho nō Gideona, i fa’ati’ahia na te hō’ē ’oire i reira ’o tei pi’ihia te ’oire nō Gideona, ’e tei roto te reira i te peho i pi’ihia ’o Gideona, ’e ’ua topahia tōna i’oa i te i’oa o te ta’ata i taparahihia i te ’o’e e te rima o Nehora.

8 ’E ’ua haere atu ra Alama ’e ’ua ha’amata ihora i te a’o atu i te parau a te Atua i te ’ēkālesia i fa’ati’ahia i te peho nō Gideona, mai te au i te parau mau i heheuhia mai ’e tei parauhia mai e tōna ra mau metua, ’e mai te au i te vārua nō te heheura’a i roto iāna ra, ’e mai te au ho’i i te ’itera’a pāpū o Iesu Mesia, te Tamaiti a te Atua, ’o tē haere mai nō te fa’aora i tōna mau ta’ata i tā rātou mau hara, e mai te au ho’i i te fa’anahora’a mo’a i pi’ihia ai ’oia ra. ’E te reira ïa tei pāpa’ihia. ’Āmene.