Ilungu sya Wambĩlĩlyo
Ilungu sya Mũĩkĩĩo

Ilungu sya Mũĩkĩĩo

Nthĩnĩ wa ĩvinda ya mbua ya 1842, Mwathani Joseph Smith atũmie valũa kwa John Wentworth, ũla waĩ mũandĩki wa ĩthangũ ya maũvoo yeetawa Chicago Democrat. Valũa ũũ waĩna ũvoo wa maũndũ maingĩ ma isitolia ya Ĩkanisa ya tene. Valũa ũsu oĩngĩ waĩna maũneeni 13 maeleetye mĩĩkĩĩo ya Atheu ma Mĩthenya ya Mũminũkĩlyo. Maũneeni aa masyokie kwĩtwa Ilungu sya Mũĩkĩĩo, ila inenganĩtwe vaa ĩtheo.

Ilungu sya Mũĩkĩĩo nĩ ũmanyĩsyo mwĩtĩkĩlye wa Ĩkanisa na nĩmwĩtĩkĩlye ta kĩlungu kya maandĩko matheu ma mĩthenya ya mũminũkĩlyo. Nĩ maũneeni malũngalu ma mũĩkĩĩo ala matethasya athaithi kũelewa mĩĩkĩĩo ya mũsingi ya Ĩkanisa na kũelesya mĩĩkĩĩo ĩno kwa angĩ. Onavala, ti, ũelesyo mwĩanu wa ũmanyĩsyo wa Ĩkanisa. Kwĩsĩla athaninĩ me thayũ, Ĩkanisa nĩtongoeaw’a nĩ ũvuan’yo wa kũendeea na ũveveeo.

  1. Nĩtũĩkĩĩaa nthĩnĩ wa Ngai, Asa wa Tene na Tene, na nthĩnĩ wa Mwana Wake Yesũ Klĩsto, na nthĩnĩ wa Veva Mũtheu.

  2. Nĩtũĩkĩĩaa kana andũ makasilĩlwa kwondũ wa naĩ syoo ene, na tiũndũ wa ĩvĩtyo ya Atamu.

  3. Nĩtũĩkĩĩaa kana kwĩsĩla nthĩnĩ wa Wĩw’anĩthyo wa Klĩsto, andũ onthe nĩmatonya kũtangĩĩwa, kwa wĩwi wa mĩao na maũtw’io ma Ũvoo Mũseo.

  4. Nĩtũĩkĩĩaa kana maũmanyĩsyo na maũtw’io ma mbee ma Ũvoo Mũseo nĩ: mbee, Mũĩkĩĩo nthĩnĩ wa Mwĩaĩi Yesũ Klĩsto; kelĩ, Kũalyũla Ngoo; katatũ, Ũvatiso kwa kũindwa kwondũ wa ũekeo wa naĩ; kana, Kwilĩĩlwa kwa moko kwondũ wa mũthĩnzĩo wa Veva Mũtheu.

  5. Nĩtũĩkĩĩaa kana mũndũũme no nginya etwe nĩ Ngai, kwĩsĩla wathani, na kwilĩĩlwa kwa moko nĩ ala mena ũkũmũ, nĩkana atavanie Ũvoo Mũseo na kũtũmĩka nthĩnĩ wa maũtw’io ala mevo.

  6. Nĩtũĩkĩĩaa nthĩnĩ wa walan’yo ũla waĩvo Ĩkanisanĩ ya Tene, ta, atũmwa, athani, aĩthi, amanyĩsya, atavania ma ũvoo mũseo, na angĩ.

  7. Nĩtũĩkĩĩaa nthĩnĩ wa mũthĩnzĩo wa ithyomo, wathani, ũvuan’yo, mawoni, ũvosyo, ũalyũlo wa ithyomo, na angĩ.

  8. Nĩtũĩkĩĩaa Mbivilia kwĩthĩwa yĩ ndeto ya Ngai ethĩwa nĩmbalyũle kwa ũw’o; na ĩngĩ nĩtũĩkĩĩaa Ĩvuku ya Momoni kwĩthĩwa yĩ ndeto ya Ngai.

  9. Nĩtũĩkĩĩaa kĩla kyonthe Ngai ũvuanĩtye, na kĩla kyonthe Ekũvuan’ya yu, na nĩtũĩkĩĩa kana Nũkũthi kũvuan’ya maũndũ manene na mavata makonetye Ũsumbĩ wa Ngai.

  10. Nĩtũĩkĩĩaa nthĩnĩ wa wũmban’ya wa Isilaeli na kũtũngĩĩwa kwa Mbaĩ ila Ĩkũmi; kana Saioni (Yelusaleme Nzaũ) ĩkaakwa ĩlembetanĩ ya Amelika; kana Klĩsto akasumbĩka ewe mwene ĩũlũ wa nthĩ; na kana nthĩ ĩkaalyũlwa na kũkwata ũtheu wa Ũseonĩ.

  11. Nĩtũwetaa kwĩthĩwa na ĩvuso ya kũmũthaitha Ngai Mwene ũtonyi kwĩanana na welekelyo wa wasya wa ngoo sitũ, na kũmaekea andũ onthe kwĩthĩwa na ĩvuso oyĩu, eka mathaithe oũndũ, ovala, kana okĩla mekwenda.

  12. Nĩtũĩkĩĩaa kwĩthĩwa twĩ ungu wa asumbĩ, atongoi, asumbĩki, na ala mena ũkũmũ wa kũsilĩla, nthĩnĩ wa wĩwi, kũnenga ndaĩa, na kũtwĩĩkĩla mĩao.

  13. Nĩtũĩkĩĩaa nthĩnĩ wa kwĩthĩwa twĩ aĩkĩĩku, maw’o, mamĩkalĩle mĩtheu, alau, aĩlu, na nthĩnĩ wa kwĩka ũseo kwa andũ onthe; na ũw’o ki, notwasye kana nĩtũatĩĩaa ũtai wa Vaũlo—Nĩtũĩkĩĩaa maũndũ onthe, nĩtwĩĩkwatasya maũndũ onthe, nĩtũmĩĩsye maũndũ maingĩ, na twĩĩkwatĩsya kwĩthĩwa tũtonya kũmĩĩsya maũndũ onthe. Ethĩwa ve ũndũ ona wĩva mwaĩlu, wa kwendeesya, kana wa nguma nzeo kana ũkumw’a, nĩtũmanthaa syĩndũ ii.