Kĩlungu kya 25
Mwĩao wa Mwĩkalĩle Mũtheu
Asa waitũ wa Ĩtunĩ nũtũnengete vinya mũtheu wa kwĩthĩwa na syana. Nũtũtavĩtye ũndũ wa kũtũmĩa ũtonyi ũũ. Ethĩwa tũkaũtũmĩa nesa, nĩtũtonya kwĩthĩwa na ũtanu.
Asa Waitũ wa Ĩtunĩ Nũtũtavĩtye Twĩthĩwe na Syana na Tũyĩw’a Mwĩao wa Mwĩkalĩle Mũtheu
Ĩtina wa Atamu na Eva kũtwaana, Asa waitũ wa Ĩtunĩ nĩwameie methĩwe na syana. Eeie Atamu na mũka wake, Eva, methĩwe na syana nĩ kana maveva ala me ĩtunĩ moke kũũ nthĩ na kũkwata mĩĩ ya nyama na mavĩndĩ. Mwĩĩ wa nyama na mavĩndĩ nĩ ũmwe wa mĩthĩnzĩo mĩnene ĩla Asa waitũ wa Ĩtunĩ ũtũnengete. Asa waitũ wa Ĩtunĩ e mwĩĩ wa nyama na mavĩndĩ, na endaa syana Syake syĩkale Take.
Vinya wa kwĩthĩwa na syana nĩ mũtheu mũno. Asa waitũ wa Ĩtunĩ nũtũnengete mwĩao ũla ũtũtavasya ũndũ wa kũtũmĩa vinya ũũ. Mwĩao ũũ wĩtawa mwĩao wa mwĩkalĩle mũtheu. Wasyaa twaĩlĩte kũmanyana kĩmwĩĩ na mũndũ ũla mũtwaanĩte kĩ mĩao eweka. Ũũ nĩkwasya tũtaĩlĩte kũmanyana kĩmwĩĩ mbee wa kũtwaana, na ĩtina wa kũtwaana twaĩlĩte kũmanyana kĩmwĩĩ na mũũme waitũ eweka kana kĩveti kitũ kĩkyoka.
Kumya ĩvu, kana kumya kana katekasyae kuma nthĩnĩ wa nyinyia na kwĩtĩkĩlya kakw’e kana kũwaa kana keo ĩvunĩ ya nyinyia, nũthũku ateo ethĩwa vena itumi syĩmwanya, ila syendaa ũkunĩkĩlwa nesa kwa mboya na ũtethyo kuma kwa mũsyaĩĩsya kana mũtongoi wa ũvonge. Tũtaĩlĩte kũtetheesya mũndũ ũngĩ ona wĩva kumya ĩvu.
Asyai nĩmo maĩlĩte kũmanyĩsya mwĩao wa mwĩkalĩle mũtheu kwa syana syoo. Asyai maĩlĩte kũimanyĩsya kana mĩĩ yoo nĩmĩtheu na kana mataĩlĩte kwĩtĩkĩlya mũndũ ona ũmwe kũkwata ilungu imwe sya mĩĩ yoo. Nĩmaĩlĩte kũlũngalya maũtao mathũku na ndeto ila syana syoo imanyaa kuma kwa angĩ.
Syana siendeee na kwĩana, syaĩlĩte kũmanyĩw’a kana Asa waitũ wa Ĩtunĩ atũnengete vinya wa kwĩthĩwa na syana na kana kũtũmĩa vinya ũũ ĩtina wa mũtwaano nĩ ũseo. Syana iivikĩĩa ũkũũ wa myaka 12. kana 13, twaĩlĩte kwĩthĩwa twaitetheeisye kũelewa ũndũ syana syũmbawa. Twaĩlĩte nĩ kũimanyĩsya tene kwa nzĩa ya ũmanyi kũisianĩa na maũthũku kana maũmanyĩsyo ma ũvũngũ.
Ũneenan’ya
-
Nĩkĩ Asa waitũ wa Ĩtunĩ watũnengie vinya wa kwĩthĩwa na syana?
-
Mwĩao wa mwĩkalĩle mũtheu nĩ kyaũ?
-
Nĩ kyaũ twaĩlĩte kũmanyĩsya syana sitũ ĩũlũ wa mĩĩ yoo?
Satani Nĩwendaa Tũtũle Mwĩao wa Mwĩkalĩle Mũtheu
Satani endaa atũsiĩĩe kũsyoka kwa Asa waitũ wa Ĩtunĩ. Satani nĩwendaa tũtũle mwĩao wa mwĩkalĩle mũtheu. Endaa tũsũanĩe vinya wa kwĩthĩwa na syana ti mũtheu. Endaa tũsũanĩe kũtũla mwĩao wa mwĩkalĩle mũtheu ti naĩ.
Satani atũmĩaa nzĩa mbũĩ kũtũsesenga tũtũle mwĩao ũũ. Atataa kũtuma tũsũanĩa kana kwĩtĩkĩlya angĩ kwona kana kũkwata mĩĩ yaitũ nĩ kwĩtĩkĩlye. Satani endaa tũsũanĩe masũanĩo mathũku. Nũtũthuthasya kũsisya mavisa, sinema, na kũsũnga kũla kũũtũtata twĩthĩwe na mĩkalĩle ĩte mĩtheu. Ona ĩngĩ nũtũthuthasya twose yanya nthĩnĩ wa kũsũnga na kwĩthukĩĩsya ngewa, ngũĩ, na mbathi ila siũtũtata twĩkale mĩkalĩle ĩte mĩtheu. Satani endaa twĩke maũndũ aa nĩ kana mĩĩ yaitũ yĩikethĩwe yĩ mĩtheu na kwa ũu tũitũmĩa vinya ũsu kwĩthĩwa na syana kwa nzĩa ĩla ĩtaĩlĩte.
Satani mavinda angĩ atũtataa kwĩsĩla mĩw’ĩlenĩ yaitũ. Satani nĩwĩsĩ yĩla tũkwĩw’a twĩithyoka, twalitanĩlwa, kana tũtena ũtanu. Anyuvaa mavinda aa ma wonzu kũtuma twenda kũtũla mwĩao wa mwĩkalĩle mũtheu. Endaa tũsũanĩe twĩna ĩvuso ya kũtũmĩa vinya ũũ kwĩthĩwa na syana kwa nzĩa yonthe tũtonya kwenda kũũtũmĩa. Atataa kũtuma tũsũanĩa va ti ũndũ mũthũku wĩkĩka kwitũ twatũla mwĩao wa mwĩkalĩle mũtheu.
Asa waitũ wa Ĩtunĩ nũtonya kũtũnenga vinya kũsiĩa matatwa ma Satani. Ndendaa twone maũndũ mavuku kana kũsũanĩa masũanĩo mavuku. Nĩwathanĩte ndaketĩkĩlya Satani kũtũtata kũthonoka ũndũ tũtatonya kwĩsiĩa. Nũtũseũvĩsye nzĩa ya kũsinda matatwa.
Nĩtũtonya kũvoya Asa waitũ wa Ĩtunĩ ũtethyo wa kũsiĩa Satani. Yĩla twavoya, Asa waitũ wa Ĩtunĩ akatũma Veva Mũtheu kũtũtetheesya. Veva Mũtheu akatũtetheesya kũlilikana kana mĩĩ yaitũ nĩ mĩtheu na kana vinya wa kwĩthĩwa na syana nĩ mũtheu. Veva Mũtheu akatũtetheesya tũikatũmĩe ũtonyi ũũ kwa nzĩa ĩtaĩlĩte. Akatũtetheesya kũnyuva maũndũ maseo ma kwona na makũsoma na makũmasũanĩa. Akatũtetheesya kũlilikana kana kũtũla mwĩao wa mwĩkalĩle mũtheu ũkatuma tũthata na kwĩw’a mwĩao ũũ kũkatuma twĩthĩwa na ũtanu.
Ũneenan’ya
-
Nĩkĩ satani wendaa tũtũle mwĩao wa mwĩkalĩle mũtheu?
-
Tũtonya kwĩka ata kũsiĩa matatwa ma Satani?
-
Asa waitũ wa Ĩtunĩ akatũtetheesya ata kwĩw’a mwĩao wa mwĩkalĩle mũtheu?
Kũtũla Mwĩao wa Mwĩkalĩle Mũtheu nĩ Naĩ Nthũku Mũno
Kũmanyana kĩmwĩĩ nĩ kũseo na kũtheu yĩla kweethĩwa katĩ wa mũũme na mũka wake ala mena wendo na ndaĩa kwoo ene. Nĩkw’o nzĩa ĩla Asa waitũ wa Ĩtunĩ ũtũnengete kwĩthĩwa na syana. Nokw’o nzĩa ya aũme na iveti kwonan’ya wendo katĩ woo na kũthengeanĩa mĩw’ĩlenĩ yoo. Ĩndĩ kũmanyana kĩmwĩĩ nza wa mũtwaano nĩ naĩ nthũku mũno.
Kũtũla mwĩao wa mwĩkalĩle mũtheu kũtumaa twĩthĩwa tũtena ũtanu. Yĩla twamanya tũinamwĩw’a Asa waitũ wa Ĩtunĩ, nĩtwĩw’aa twĩna mavĩtyo na nthoni. Tũmanyaa nĩtwatũmĩa kwa nzĩa ĩteyaw’o vinya mũtheu ũla ũtũnengete na kana nĩtũtumĩte angĩ methĩwa matena ũtanu. Kũtũla mwĩao wa mwĩkalĩle mũtheu nokũtume kana kasyawa katena mũsyĩ mũlũngalu.
No naĩ ilĩ nthũku mũno kũthonoka kũtũla mwĩao wa mwĩkalĩle mũtheu. Naĩ ii nĩ kũlea Veva Mũtheu na kũwaa. Ala matũlĩte mwĩao wa mwĩkalĩle mũtheu nĩmatonya kũekewa. Asa waitũ wa Ĩtunĩ nĩwaĩtye kana ethĩwa makeethĩwa na mũĩkĩĩo nthĩnĩ wa Yesũ na kũalyũla ngoo kwondũ wa naĩ syoo, akamaekea. Ala matũlaa mwĩao wa mwĩkalĩle mũtheu na kũlea kũalyũla ngoo maikatonya kwĩkala na Asa waitũ wa Ĩtunĩ.
Ala mavukiw’e kana kũtũmĩwa naĩ kĩmwĩĩ mayĩna mavĩtyo ma kũtũla mwĩao wa mwĩkalĩle mũtheu.
Ũekeo ũtonya kũka kwĩsĩla mũĩkĩĩo nthĩnĩ wa Yesũ na ũalyũlo wa ngoo. Nomũvaka tũmanye nĩtwĩkĩte naĩ na kwĩw’a wĩĩlilo waw’o kwa mavĩtyo ala twĩkĩte. Twaĩlĩte kũeka kwĩka ũndũ ũla mũthũku na kũumbũla naĩ ĩla twĩkĩte kwa Asa waitũ wa Ĩtunĩ, kwa andũ ala twĩthĩwa tũũmĩĩtye, na kwa ũkũmũ wa ũthembi ũla waĩlĩte (mũsyaĩĩsya, mũtongoi wa ũvonge, mũtongoi wa kyambo, kana mũtongoi wa miseni). Asa waitũ wa Ĩtunĩ nĩwaĩtye akaekea ala mena mũĩkĩĩo nthĩnĩ wa Yesũ, kũumbũla naĩ syoo kwa Asa waitũ wa Ĩtunĩ na kwa mũtongoi ũla waĩlĩte wa Ĩkanisa, na kũalyũla ngoo syoo kwa ũw’o. Mũndũ ona wĩva ũla ũtekaa maũndũ aa onthe ndaalyũlĩte ngoo kwa ũw’o na ndakaekewa.
Ũneenan’ya
-
Nĩkĩ kũtũla mwĩao wa mwĩkalĩle mũtheu ne naĩ nthũku?
-
Nĩ kyaũ kĩtonya kwĩkĩka kwitũ yĩla twatũla mwĩao wa mwĩkalĩle mũtheu?
-
Nĩkĩ twaĩlĩte kwĩw’a mwĩao wa mwĩkalĩle mũtheu?
-
Twaĩlĩte kwĩka ata nĩkana tũalyũle ngoo yĩla twatũla mwĩao wa mwĩkalĩle mũtheu?
Kwĩw’a Mwĩao wa Mwĩkalĩle Mũtheu Nĩkũtũtanĩthasya
Yĩla tweew’a mwĩao wa mwĩkalĩle mũtheu, twonanasya ngelekan’yo nzeo kwa syana sitũ kũatĩĩa. Nĩtwĩsĩ Asa waitũ wa Ĩtunĩ nĩwendeeaw’a nithyĩ kwa kũmwĩw’a. Yĩla twamwĩw’a, ala ma mũsyĩ witũ nĩmamanyaa kana nĩtũmendete, na tũtĩna kĩtumi kya kwĩw’a twĩna mavĩtyo kana nthoni. Nĩtwĩkalaa ta Asa waitũ wa Ĩtunĩ. Asa waitũ wa Ĩtunĩ nũtũathimaa na syana sitũ, kana syana ila tũkethĩwa nasyo, yĩla tweew’a mwĩao wa mwĩkalĩle mũtheu.
Kũtũmĩa vinya ũla Asa waitũ wa Ĩtunĩ wĩkĩĩte mĩĩnĩ yaitũ nthĩnĩ wa mũtwaano ũkaete ũtanu. Kwa ala elĩ matwaanĩte, kũmanyana kĩmwĩĩ nĩ kũetae ũtanu. Nĩkũtonya kũmaete vakuvĩ vamwe na kwĩw’a wendo mũlũmu. Syana ila isyaawa nĩ ũathimo kuma kwa Asa waitũ wa Ĩtunĩ. Onakwĩthĩwa syana mavinda amwe nĩsietae kĩmako kingĩ kana woo kũla kwĩ asyai moo, ona ĩngĩ nĩsietae ũtanu mwingĩ. Maũtanu amwe manene twĩsĩ mathayũnĩ maitũ makooka syana sitũ siendeee na kwĩana, kũmanya, kũtwaana na syeethĩwa na syana syoo.
Ũneenan’ya
-
Nĩ maũathimo meva tũkwataa yĩla tweew’a mwĩao wa mwĩkalĩle mũtheu?
-
Nĩkĩ twĩthĩawa na ũtanu yĩla tweew’a mwĩao wa mwĩkalĩle mũtheu kũte yĩla tũtekũwĩw’a?