Klĩsto nĩwatumie vethĩwe vatonyeka kwitũ kwĩthĩwa thayũ ĩngĩ ĩtina wa kũkw’a.
Kĩlungu kya 35
Thayũ Ĩtina wa Kĩkw’ũ
Tũtonya kwĩyũmban’ya ata kwa thayũ ũla ũkĩte?
Maveva Maitũ nĩmekalaa Thayũ Ĩtina wa Twakw’a.
Twĩ syana sya veva sya Asa waitũ wa Ĩtunĩ. Yĩla twekalaa Nake ĩtunĩ ta maveva, tũyaĩna mĩĩ ya kwoneka. Kyaĩ kĩlungu kya walan’yo Wake kwitũ tũsyawe ĩũlũ wa nthĩ ĩno nĩkana maveva maitũ makwate mĩĩ ya nyama na mavĩndĩ. Maveva maitũ nĩmo manengae thayũ mĩĩ yaitũ ya kwoneka yĩla tũkwĩkala ĩũlũ wa nthĩ.
Ota ũndũ kũsyawa kwaĩ walan’yo wa Asa waitũ wa Ĩtunĩ kwitũ, kĩlungu kĩngĩ kya walan’yo Wake kwitũ nĩ ithyĩ kũkw’a. Yĩla twakw’a, maveva maitũ nĩmatiaa mĩĩ yaitũ. Vate veva, mwĩĩ ndwĩ na thayũ na wiawa mbũanĩ.
Ĩndĩ maveva maitũ maĩthayũ mbee wa kũsyawa kwitũ, na makaendeea na kwĩkala ĩtina wa kĩkw’ũ. Yĩla tũkakw’a, mathayũ maitũ makathi nthĩ ya maveva kweteela ũthayũũkyo, naw’o mwĩĩ ũyeteela kavulĩnĩ.
Nthĩnĩ wa nthĩ ya maveva maveva maitũ makeethĩwa mailyĩ ota ũndũ twekalaa ĩũlũ wa nthĩ na mĩĩ ya nyama na mavĩndĩ. Tũkeethĩwa tũilyĩ ũndũ tũilyĩ vaa. Tũkasoanĩaa oũndũ tũsoanĩaa na kũĩkĩĩa maũndũ ala twaĩkĩĩe vaa. Ala alũngalu thayũnĩ ũũ makeethĩwa meo alũngalu. Ala mataĩ alũngalu makeethĩwa o ĩngĩ mate alũngalu. Tũkeethĩwa na mawendi o amwe ĩtina wa twakw’a o ta ala twaĩnamo ĩũlũ wa nthĩ ĩno.
Ũneenan’ya
-
Mĩĩ yaitũ ya kĩveva yaumie va?
-
Nĩ kyaũ kĩkĩkaa kwayo yĩla twakw’a?
-
Mĩĩ ya kĩveva yĩilye ata?
Nthĩ ya Maveva Nĩ Vandũ va Kũthũkũma, Ũmanyĩsyo, na Kweteela
Athani ma Asa waitũ wa Ĩtunĩ nĩmatũtavĩtye maũndũ maingĩ ĩũlũ wa nthĩ ya maveva. Vandũ vamwe vetawa ũseonĩ. Yĩla mũndũ wakw’a ũla wĩtĩkĩlĩte ũvoo mũseo na eethĩwa e mũatĩĩi wa Yesũ, veva wa mũndũ ũsu ũendaa ũseonĩ. Vaa nĩ vandũ vala andũ methĩawa na ũtanu na mũuo. Vaa nathasye kuma thĩnanĩ, kĩmako, na woo. Nĩmatonya kwĩka maũndũ maingĩ ma waĩlu, ta kũmanyĩsya angĩ ĩũlũ wa ũvoo mũseo kana kwĩĩmanyĩsya mũno ĩũlũ waw’o mo ene.
Vandũ vala vangĩ vetawa kolokolonĩ wa veva. Mĩthemba ĩtatũ ya andũ ĩkeethĩwa vau. Vakeethĩwa na ala maĩ athũku thayũnĩ ũũ, ala mekalile mĩkalĩle mĩseo ĩndĩ mayaaĩtĩkĩla ũvoo mũseo, na ala mataaĩthĩwa ona ĩmwe na ĩvuso ya kwĩw’a ũvoo mũseo.
Athani ma Asa waitũ wa Ĩtunĩ matwĩĩte kana amiseni makatũmwa kuma kwa ala alũngalu nthĩnĩ wa nthĩ ya maveva kũmanyĩsya ũvoo mũseo kwa maveva onthe ma andũ ala akw’ũ. Aingĩ makeetĩkĩla ũvoo mũseo na kũalyũla ngoo. Maũtw’ĩo mavata ma ũtangĩĩo makeekwa kwondũ woo nĩ andũ ala methayũ nthĩnĩ wa makalũ ma Asa waitũ wa Ĩtunĩ. Ala mataen’ye kana amemba angĩ ma Ĩkanisa nĩmekaa maũtw’ĩo aa kwondũ woo. Na ĩndĩ makeethĩwa matonya kuma kolokolonĩ wa maveva. Kwa nzĩa ĩno, Asa waitũ wa Ĩtunĩ aseũvasya ĩvuso ya syana Syake syonthe kũkwata maũathimo ma ũvoo mũseo ona ethĩwa mekalaa ĩndĩĩ ĩũlũ wa nthĩ.
Mũminũkĩlyonĩ ala onthe me nthĩnĩ wa nthĩ ya maveva makathayũũkw’a. Ũthayũũkyonĩ, veva na mwĩĩ ikakwatanw’a vamwe ĩngĩ. Ona kũtw’ĩka mwĩĩ nĩwoie na watw’ĩka kĩtoo yĩla waĩ mbũanĩ, ũkatw’ĩka mwĩĩ ũtĩkakw’a na mwĩĩ mũlũngalu. Maandĩko matheu maasya ona vaĩ ũswĩĩ wa mĩtwe yaitũ ũkaa na kana syĩndũ syonthe ikatũngĩĩwa vala syaĩle na ũndũ syailye.
Ũthayũũkyonĩ mwĩĩ na veva ikakwatanw’a, itĩkataanĩw’a ĩngĩ. Kwĩsĩla wendonĩ Wake wa nthembo nene ya wĩw’anĩthyo kwitũ, Yesũ anenganie mũthĩnzĩo ũũ wa ũseng’yo wa kũthayũũka kwa kĩla mũndũ ũla wĩkalaa ĩũlũ wa nthĩ ĩno.
Ũneenan’ya
-
Nĩmaũaanĩku elĩ meva me nthĩnĩ wa nthĩ ya maveva?
-
Nĩ aaũ makethĩwa ũseonĩ? Maveva ala me ũseonĩ mekaa ata?
-
Nĩ aaũ makethĩwa kolokolonĩ wa veva? Nĩ kyaũ kĩkĩkaa vau?
Ithyonthe Tũkasilĩlwa Ũsilĩlonĩ wa Mũthya
Tũsilĩlawa mavinda maingĩ ĩvindanĩ ya mathayũ maitũ ma tene na tene. Nĩtwasilĩilwe yĩla twekalaa na Asa waitũ wa Ĩtunĩ tũsiw’e kana twĩaĩlu kũka kũũ nthĩ na kũkwata mĩĩ. Nĩtũsilĩlawa yĩla twĩvaa kũsiw’a kana twĩaĩlu kũvatiswa. Aũme nĩmasilĩlawa masiw’e kana nĩ aĩlu kũnengwa ũthembi. Nĩtũsilĩlawa tũsiw’e kana twĩaĩlu kũlika ĩkalũnĩ tũkwate maũathimo memwanya. Ĩtina wa twakw’a, nĩtũsilĩlawa, na mũthĩnzĩo ũla tũkwataa ũkeethĩwa wĩ kwĩanana na ũndũ twekalile ĩũlũ wa nthĩ.
Ĩtina wa twathayũũkw’a, tũkaetwe mbee wa Asa waitũ wa Ĩtunĩ kũsilĩlwa kwa ĩvinda ya mũthya. Ũũ wĩtawa Ũsilĩlo wa Mũthya. Ũsilĩlo ũũ wa mũthya ũkatw’a vala tũkathi kwĩkala tene na tene. Tũkasilĩlwa kwa maũndũ ala twaneenie na tweeka na twasoanĩie nthĩnĩ wa thayũ ũũ. Tũkasilĩlwa kwĩanana na ũndũ twaatĩĩie nesa maũmanyĩsyo ma Yesũ. Tũkasilĩlwa na maũlilikan’yo ala maminĩte kwiwa kũũ ĩũlũ wa nthĩ na ĩtunĩ. Asa waitũ wa Ĩtunĩ akaeka Yesũ atũsilĩle.
Yesũ nũtwendete mũno, ĩndĩ nĩ mũsili waw’o na nomũvaka atũsilĩle kwa mĩthemba ya mathayũ ala twekalile. Kyonthe twaasũanĩa kana kũneena kana kwĩka nĩ kĩandĩke, ilĩkonĩ sitũ na nthĩnĩ wa maũlilikan’yo ala maminĩte kwiwa. Yesũ nĩwĩsĩ meko maitũ onthe, na yĩla tũkaũngama mbee Wake tũkamalilikana, onaitũ.
Ũneenan’ya
-
Weta mavinda amwe ala tũsilĩlawa.
-
Nĩ maũndũ meva amwe ala tũkasilĩlwa nũndũ wamo?
Nĩtũtusaa kwa Meko Maitũ ma Kĩla Mũthenya Kũkeethĩwa Ata Kwitũ Twamina Kũkw’a
Ethĩwa tũkeeka ũla waĩlu ĩvindanĩ ya mathayũ maitũ, tũkeeyũmban’ya kwĩkala tene na tene na Asa waitũ wa Ĩtunĩ na andũ ala aseo ma nthĩ. Ethĩwa tũtaa-atĩĩa mĩao ya Asa waitũ wa Ĩtunĩ, tũkeew’a woo mũno yĩla tũkaũngama mbee wa Yesũ tũsilĩlwe.
Athani maisye kana ndeto sitũ, masũanĩo maitũ, na mawĩa maitũ monthe makatũsilĩla ethĩwa maĩ mathũku. Nĩmaĩtye kana ala athũku makaũngama mbee wa Yesũ mena nthoni kwĩthĩwa mate-eanĩe na kwenda kwĩvitha kuma ũthyũnĩ Wake.
Kwa kĩla mũndũ ũla waaĩkala ĩũlũ wa nthĩ ĩno, ĩndĩ, mũthenya wa Ũsilĩlo wa Mũminũkĩlyo ũkeethĩwa mũthenya mũseo kana mũthenya wa ũthatu. Twaĩlĩte kwĩĩyũmbanĩsya ĩvinda yĩĩ yũkĩte nĩkana kwitũ wĩĩthĩwa wĩ mũthenya wa ũtanu. Twĩenda twĩĩthĩwa tũtonya kũũngama mbee wa Asa waitũ wa Ĩtunĩ vate nthoni na kũmwĩw’a ayasya nĩweetĩkĩlya kĩla tweekie ĩvindanĩ ya mathayũ maitũ.
Twaĩlĩte kũsoanĩa ĩũlũ wa ũsilĩlo ũũ wa mũminũkĩlyo. Twaĩlĩte kwĩthĩwa twĩ aĩkĩĩku kwa Yesũ Klĩsto na kũalyũla ngoo kwondũ wa naĩ sitũ mũvaka mũminũkĩlyonĩ wa mathayũ maitũ nĩkana twĩĩthĩwa twĩĩyũmbanĩtye kwondũ wa w’o. Ĩsu noyo nzĩa ĩla tũtonya kwĩthĩwa twĩna ũthasyo kuma naĩnĩ syonthe yĩla ĩvinda yĩu yĩvika. Ethĩwa tũkeethĩwa na mũĩkĩĩo nthĩnĩ wa Yesũ Klĩsto na kũalyũla ngoo kwondũ wa naĩ sitũ syonthe, Asa waitũ wa Ĩtunĩ akatũekea naĩ sitũ na kũtũtetheesya kwĩthĩwa tũtena naĩ vyũ. Ethĩwa tũkeethĩwa twĩ aĩkĩĩku kwa Yesũ Klĩsto, tũkatũmĩa mathayũ maitũ kwĩka maũndũ maseo, kũsoanĩa masũanĩo maseo, na kũneena ndeto nzeo. Tũkakĩa andũ, mavuku, na kũndũ kũla kũtuma twĩthĩwa na masũanĩo mathũku kana kwĩthĩwa tũtealũngalu kwa nzĩa ona yĩva.
Asa waitũ wa Ĩtunĩ endete kĩla ũmwe witũ na atwendaa twĩkale twĩaĩlu kũsyoka mbee Wake. Ethĩwa tũkendeew’a nĩ kwĩkala Nake na andũ ala aseo twendete, nomũvaka twĩthĩwe na mũĩkĩĩo nthĩnĩ wa Yesũ Klĩsto na kwĩka maũndũ ala ũtwĩaĩaa twĩke. Nomũvaka oĩngĩ tũtetheesye mĩsyĩ yaitũ kwĩkala mwĩkalo mũseo. Asa waitũ wa Ĩtunĩ akatũtetheesya. Nũtũnengete ũvoo mũseo wa kũtwon’ya nzĩa na nũtwĩĩte nĩtũtonya kũmũvoya ĩvinda yonthe kwondũ wa ũtethyo.
Ũneenan’ya
-
Nĩkĩ masũanĩo maitũ ma kĩla mũthenya na meko ne ma vata mũno?
-
Nata ũtonya kwĩka kũseũvya masũanĩo maku, ndeto, na meko?
-
Nĩkĩ twendaa ũtethyo wa Asa waitũ wa Ĩtunĩ nĩkana tũtw’ĩke alũngalu?
-
Nĩkĩ no kwĩsĩla kwa mũĩkĩĩo w’oka nthĩnĩ wa Yesũ Klĩsto tũtonya kũsilĩlwa waĩlu wa kwĩkala na Asa waitũ wa Ĩtunĩ?