Kũka kwa Kelĩ kwa Yesũ Klĩsto

Yesũ Klĩsto akooka kũũ nthĩ ĩngĩ. Nĩmawonan’yo meva makethĩwa me ma kũka kwake, na nĩata tũtonya kwĩyũmban’ya kũmũthaũa yĩla ũkoka?

Yesũ Nĩwaathanie Akooka Kũũ Nthĩ Ĩngĩ

Mĩthenya mĩongo ĩna ĩtina wa Yesũ kũthayũũka, We na Atũmwa Make nĩmakomanĩie ĩũlũ wa kĩĩma kĩtawa Kĩĩma kya Mĩthata. Ĩvinda yaĩ ĩviku ya Yesũ kũsyoka ĩtunĩ. Nĩwaĩ ekĩte maũndũ onthe ala ĩthe waitũ wa Ĩtunĩ wamũtũmĩte eke. Atũmwa Make nĩmamũsyaĩĩisye Yesũ ayambata ĩũlũ ĩtunĩ. Oyĩla Atũmwa masyaĩĩsye, alaĩka elĩ nĩmookie na mamea Yesũ akooka ĩngĩ kũũ nthĩ. Kuma ĩvinda yĩu kũvikĩĩa ũmũnthĩ, ala maĩkĩĩie nthĩnĩ wa Yesũ nĩmasyaĩĩasya kũsyoka Kwake. Kũsyoka kwake kwĩtawa Kũka kwa Kelĩ kwa Klĩsto.

Kũkanĩ kwa Kelĩ, Yesũ akatheea kuma ĩtunĩ na vinya mũnene. Akathesya nthĩ maũthũku onthe, na Satani ndakethĩwa ĩngĩ na vinya ĩũlũ wa andũ. Yesũ akasumbĩka kwa miaka ngili ĩũlũ wa andũ onthe ala methĩĩtwe me aĩkĩĩku Kwake.

Ũneenan’ya

Tũmanyaa ata kana Yesũ akasyoka ĩngĩ kũũ nthĩ?

Yesũ Nũtũtavĩtye Ũndũ Kũkethĩwa Mbee wa Atanoka

Yesũ nũtũtavĩtye maũndũ maingĩ ala makekĩka mbee wa kũka kwake ĩngĩ. Maũndũ aa metawa mawonan’yo ma Kũka Kwa Kelĩ Kwake. Nũtwĩĩte tũsyaĩĩsye mawonan’yo aa na tũyĩthĩwa twĩyũmbanĩtye kwondũ wa kũka Kwake. Aisye kana yĩla tũkona maũndũ aa mayĩkĩka, twaĩlĩte kũmanya nĩũkĩte mĩtũkĩ. Ĩndĩ tũtĩkamanya ĩvinda yĩla ya ũw’o ya kũka Kwake.

Ethĩwa tũkasoma maandĩko matheu na tweethĩwa twĩ aĩkĩĩku kwa Yesũ, tũkamanya mawonan’yo ma kũka kwa Yesũ nĩ meva. Maũndũ maingĩ makeekĩka mbee wa Yesũ kũka nthĩ ĩngĩ. Amwe nĩmekĩkĩte, angĩ nĩmaendeee na kwĩkĩka oyu, na ala angĩ makeekĩka ĩvindanĩ yũkĩte.

Mbee wa Kũka Kwa Kelĩ Kwa Yesũ, ũvoo mũseo ũkeethĩwa ũtavanĩtw’e kwa nthĩ syonthe. Ũũ ũkataanĩthya andũ aingĩ na kũmaetee maũathimo. Maũndũ ala angĩ makekĩka makatata mũĩkĩĩo witũ. Kũkeethĩwa ũthũku mũnene, ithingitho sya nthĩ na maũndũ angĩ ma mawanangĩko.

Kũkeethĩwa na Thĩna Mũnene Ĩũlũ wa Nthĩ

Yesũ aisye tũkamanya kũka kwake kwĩ vakuvĩ yĩla tũkona ũthũku mwingĩ, kaũ, na kũthĩnĩka ĩũlũ wa nthĩ. Yĩĩ ĩkeethĩwa ĩvinda ya thĩna mũnene. Kũkeethĩwa ithingitho sya nthĩ, iuutani nene, maũwau, na mayũa. Mbua ya mavia ĩkaananga malĩu ma nthĩ.

Andũ aingĩ makaeka kũmwenda Asa waitũ wa Ĩtunĩ na kũvĩndũkĩa Satani. Makaeka ĩngĩ kũmenda na kũmathũkũma andũ angĩ na kwambĩĩa kũmaũmĩsya. Kũkeethĩwa na makaũ maingĩ ĩũlũ wa nthĩ. Nthĩ ikokitana syo mbene. Makaũ aa makaendeea kũvikĩĩa kaũ mũnene wa mũthya wĩthĩwe, ũla ũkethĩwa kaũ wa wanangĩko mũnene ũtaaũkitwa ĩũlũ wa nthĩ. Na ĩndĩ Yesũ ayũka.

Ũvoo Mũseo Nĩ Mũtũngĩĩe

Athani nĩmaisye ũvoo mũseo ũkatũngĩĩwa kũũ nthĩ mbee wa Yesũ atanoka ĩngĩ. Ũvoo mũseo nĩ mũtũngĩĩe kwĩsĩla Mwathani Joseph Smith. Kĩla ũmanyĩsyo wa ũvoo mũseo ũla nĩ wa vata kwitũ kũmanya na kwĩka nĩkana tũsyoke kwa Asa waitũ wa Ĩtunĩ nĩ mũtũngĩĩe kũũ nthĩ.

Yesũ nĩwaisye tũkamanya kũka kwake kwĩ vakuvĩ yĩla Ĩvuku ya Momoni yatumbĩthiw’e na kũnenganwe kũũ nthĩ yonthe. Tene mũno athani Isaia na Esekieli nĩmatavanisye ĩũlũ wa Ĩvuku ya Momoni. Ĩvuku ya Momoni yaalyũlilwe nĩ Mwathani Joseph Smith kwa kĩthyomo kya Kĩsũngũ. Nĩyĩalyũlĩtwe nthĩnĩ wa ithyomo mbingĩ kuma ĩvinda yĩu. Ĩkanenganwe kwa nthĩ syonthe mbee wa Yesũ atanoka.

Nyũmba ya Isilaeli Ĩkoombanw’a Ĩngĩ

Asa waitũ wa Ĩtunĩ nĩwaisye nzyawa sya nyũmba ya Isilaeli* nomũvaka syĩw’e na kwĩtĩkĩla ũvoo mũseo na kwĩyũmban’ya kũkomana na Yesũ yĩla ũkoka ĩngĩ. Ala meetĩkĩla ũvoo mũseo nomũvaka maũmanyĩsye kwa andũ oonthe, kwaka makalũ, na kwĩka maũtw’ĩo kwa andũ ala akw’ũ.

Andũ aingĩ kuma nyũmba ya Isilaeli, yĩthĩwe nĩ kĩnthakame kana kwa kũtuwa ana, nĩmaendeee na kũtw’ĩkĩthwa athaithi ma Ĩkanisa mamina kwĩtĩkĩla ũvoo mũseo wa Yesũ klĩsto. Nthĩ ntheu nĩmbathime kwondũ wa kũmbanĩa nzyawa mbingĩ sya Avalaamu. Nzyawa sya Avalaamu nĩ vamwe na andũ metawa Alavu na Ayuti, na angĩ. Nzyawa sya Ĩvuku ya Momoni andũ ma Amelika, ala oĩngĩ nĩ nzyawa sya Avalaamu, nĩmetĩkĩlĩte ũvoo mũseo na kũtw’ĩka andũ alũmu na atheu.

Ũvoo Mũseo Ũkatavanw’a Kwa Nthĩ Yonthe

Yesũ nĩwaisye tũkamanya nĩũkĩte mĩtũkĩ yĩla aatĩĩi Make makethĩwa matavanĩtye ũvoo mũseo kwa nthĩ yonthe. Kuma ĩvinda yĩla Ĩkanisa yatũngĩĩiwe, amiseni nĩmatũmĩtwe kũtavan’ya ũvoo mũseo kwa nthĩ syĩ kĩvathũkan’yo. Amiseni aingĩ oyu nĩmeũtavan’ya ũvoo mũseo kĩla vandũ ĩũlũ wa nthĩ. Kĩla mũthaithi wa Ĩkanisa nũkũlĩtw’e atavye ala mataen’ye na anyanyae ĩũlũ wa ũvoo mũseo, na aingĩ nĩmaendete nthĩ ingĩ kũtavan’ya ũvoo mũseo, nĩkana andũ onthe methĩwe na ĩvuso ya kũwĩw’a.

Eliya Nĩwookie

Mwathani Malaki Mbivilianĩ aisye kana mbee wa Yesũ kũka ĩvinda ya kelĩ, mwathani Eliya akathokea nthĩ. Akaete ĩngĩ ũkũmũ wa kũsiĩla mĩsyĩ vamwe tene na tene. Akatuma andũ menda kwĩĩmanyĩsya ĩũlũ wa ala moo makwie na nzyawa syoo na kũmatethya matangĩĩwe. Mweinĩ wa Kana 1836, Eliya nĩwookie na atũngĩĩa ũkũmũ ũũ kwa Mwathani Joseph Smith. Nũndũ Eliya nĩwookie, mĩsyĩ nĩtonya yu kũsiĩlwa vamwe makalũnĩ ĩũlũ wa nthĩ ũmũnthĩ.

Mũsyĩ Mweũ wa Yelusaleme Ũkaakwa

Yesũ aisye tũkamanya nĩũkĩte mĩtũkĩ yĩla Ĩkanisa Yake ĩkaka mũsyĩ wĩtawa Yelusaleme Nzaũ. Yesũ aisye akasumbĩka mũsyĩnĩ ũsu, na andũ ala atheu makekala vau. Nũtũtavĩty’e vala mũsyĩ ũũ ũkakw’a. Ĩkeethĩwa nthĩnĩ wa Missouri, nthĩ ya Amelika.

Aa no amwe ma mawonan’yo ala makatwon’ya kana Yesũ nĩũkĩte mĩtũkĩ. Maandĩko matheu nĩmatũtavasya mawonan’yo angĩ. Ona vala mawonan’yo maingĩ nĩmonekete, tũyĩsĩ ĩvinda yaw’o yĩla Yesũ ũkoka ĩngĩ.

Ũneenan’ya

Tũmanya ata kana kũka kwa kelĩ kwa Yesũ kwĩ vakuvĩ?
Mawonan’yo ma kũka kwa kelĩ kwa Yesũ nĩ maũ?

Nĩtũtonya Kwithĩwa na Mũuo na Wĩkwatyo Ona Kũtw’ĩka Maũvuku na Mathĩna Nĩmatũthyũlũlũkĩte

Twaĩlĩte kwĩthĩwa twĩyũmbanĩtye kwondũ wa kũka kwa kelĩ kwa Yesũ. Nzĩa ĩla nzeo vyũ kwitũ kwĩyũmban’ya kwondũ wa kũka kwake nĩ kwĩw’a maũmanyĩsyo Make kĩla mũthenya. Nĩtwaĩle oĩngĩ kwĩw’a mĩao na mawĩaĩo ala ũnengae Mũtongoi wa Ĩkanisa kwitũ ũmũnthĩ. Nĩtwaĩlĩte kwĩthĩwa twĩ aĩlu kwĩthĩawa na Veva Mũtheu mavinda onthe kũtongoeasya masũanĩo na meko maitũ. Yesũ aisye kana ethĩwa nĩtwĩyũmbanĩtye ayũka, tũikethĩwa na w’ia. Tũkeethĩwa twĩ atanu na tũkenda kwĩthĩwa Nake. Andũ ala aseo maikanangwa yĩla ũkoka. Makekala ĩũlũ wa nthĩ, na syana syoo ikeana ite na naĩ. Yesũ akeethĩawa namo na akamaathimaa na kũmatongoeasya.

Yĩla Yesũ ũkoka ĩngĩ kuma ĩtunĩ, ala athũku makaanangwa. Andũ ala aseo ala makwie makookĩla kuma mboanĩ syoo na kũmũkomana okĩte kuma ĩtunĩ. Ala athũku maikokĩla kuma mboanĩ syoo nginya ĩtina wa ĩvinda ya myaka 1,000. Kĩlungu kya myaka 1,000. kĩtawa Myaka Ngili.*

Yĩla Yesũ wekalaa ĩũlũ wa nthĩ, no andũ anini meesĩ kana we, Mũtangĩĩi wa nthĩ, nĩwookie. Yĩla Yesũ ũkoka ĩngĩ, kĩla ũmwe akamanya Nĩwe Yesũ Klĩsto, Mwana wa Ngai, Mũtangĩĩi wa nthĩ.

Ũneenan’ya

Kũmanya mawonan’yo ma Kũka Kwa Kelĩ kũtonya kũtũtethya ata?
Kũkeekĩka ata kwa andũ ala aseo ĩũlũ wa nthĩ ĩla Yesũ wĩsyoka?
Kũkeekĩka ata kwa andũ ala athũku ala makethĩwa mayĩkala ĩũlũ wa nthĩ?