Yesũ nĩwoonanisye wĩwi kwa Asa Wake kwa kũvatiswa.
Kĩlungu kya 22
Wĩwi
Asa waitũ wa Ĩtunĩ nũtũtavĩty’e maũndũ ala twaĩlĩte kwĩka nĩkana twĩthĩwe twĩ atanu na tũisyoka kwĩkala Nake. Nata tũtonya kũmanya kwĩka maũndũ aa?
Asa Waitũ wa Ĩtunĩ Atũnengae Mĩao Nũndũ Nũtwendete
Asa waitũ wa Ĩtunĩ endaa twĩthĩwe twĩatanu vaa ĩũlũ wa nthĩ nĩkwĩthĩwa nũtwendete. Ona nĩwendaa tũsyoke kũla ũĩ nĩkana tũtonye kwĩthĩwa na ũtanu ũla wĩnaw’o. Tũtonya kwĩka ũũ ethĩwa tũkatũmĩa ũtonyi ũla ũtũnengete twĩkale Take.
Asa waitũ wa Ĩtunĩ nĩwĩsĩ ũndũ twaĩlĩte kwĩka twĩkale Take. Nĩwatũnengie mĩao ĩla ĩtũtavasya kĩla kĩseo kwitũ kwĩka. Ona nũtũtavasya kĩla kĩtekĩseo kwitũ kwĩka.
Kĩla mwĩao Asa waitũ wa Ĩtunĩ ũtũnengete nĩ kwa ũseo witũ na ũkatũtethya. Mĩao ĩno nĩtonya kũtũtongoesya nthĩnĩ wa mathayũ maitũ, na ethĩwa tũkamĩw’a tũkeethĩwa twĩatanu.
Ithyonthe nĩtwĩthĩĩtwe tũtũlĩte mĩao ya Asa waitũ wa Ĩtunĩ. Nũndũ nĩtũtũlĩte mĩao ya Asa waitũ wa Ĩtunĩ, nĩtwĩthĩĩtwe twĩkĩte naĩ. Nũndũ nĩtwĩkĩte naĩ, nĩtũtaanĩw’e na Asa waitũ wa Ĩtunĩ. Kũtw’ĩĩwa kwitũ kwaw’o kwa naĩ sitũ nĩ ithyĩ tũtaanĩw’e na Asa waitũ wa Ĩtunĩ tene na tene.
Ĩndĩ Asa waitũ wa Ĩtunĩ nũtwendete. Nĩseũvĩtye nzĩa ya kũĩva thiĩ wa naĩ sitũ. Nĩwatũmie Mwana Wake, Yesũ, aĩve thiĩ wa naĩ sitũ. Yesũ nĩwaĩvie thiĩ ũsu, na nĩtũtonya kũsyoka kũla kwĩ Asa waitũ wa Ĩtunĩ kwa kwĩthĩwa na mũĩkĩĩo nthĩnĩ wa Yesũ. Kwĩthĩwa na mũĩkĩĩo nthĩnĩ wa Yesũ nĩkwasya nĩtũũmũatĩĩa na tũtĩthĩwa twĩ aatĩĩi Make ewi. Ala methĩawa na mũĩkĩĩo nthĩnĩ wa Yesũ nĩmew’aa mĩao Yake. Ĩtambya ya mbee ya kũsyoka kwa Asa waitũ wa Ĩtunĩ nĩkwĩthĩwa na mũĩkĩĩo nthĩnĩ wa Yesũ, kũtata kwa ũw’o kũmwĩw’a. Ĩndĩ, ethĩwa tũkaendeea na kwĩthĩwa twĩ aĩkĩĩku kwa Yesũ, akatũtetheesya kwĩthĩwa twĩ ewi kwa mĩao yonthe ya Asa waitũ wa Ĩtunĩ, na Asa waitũ wa Ĩtunĩ akatũekea naĩ sitũ.
Mĩao ĩmwe ya Yesũ nĩ ya athaithi onthe ma Ĩkanisa. Ĩno anenganae nthĩnĩ wa maandĩko matheu na kwĩsĩla athaninĩ Make. Mĩao ĩmwe atũnengae ithyĩ ene kĩmũndũ, kwĩsĩla kwa Veva Mũtheu. Kwa ngelekan’yo, maandĩko matheu na athani matũtavasya kana athaithi onthe ma Ĩkanisa nĩmaĩlĩte kũtetheesya kũmanyĩsya ũvoo mũseo kũla kwĩ ala angĩ. Ĩndĩ Veva Mũtheu akatavya kĩla ũmwe waitũ ũndũ ũtonya kwĩka kĩmũndũ kũmanyĩsya ũvoo mũseo kwa andũ ma mĩsyĩ yitũ, anyanyae, na atũi. Ethĩwa tũkasoma maandĩko matheu, kwĩĩthukĩĩsya ndeto sya athani, na kũatĩĩa wasya Veva Mũtheu, tũkeethĩawa tũimanya kĩla ĩvinda ũndũ twaĩlĩte kwĩka.
Ũneenan’ya
-
Mĩao ya Asa waitũ wa Ĩtunĩ na Yesũ ĩtwonasya wendo Woo kwitũ ata?
-
Tũtonya kũmanya ata ũndũ Asa waitũ wa Ĩtunĩ na Yesũ matũtavĩtye twĩke?
Kĩla Mwĩao wa Asa Waitũ wa Ĩtunĩ Nĩwavata
Nĩtwaĩlĩte kwĩthĩwa tũtenda kwĩka kĩla ũndũ Yesũ ũtwĩyĩaĩe twĩke. Mĩao Yake yonthe nĩyavata na nĩtũtetheeasya kwĩyũmban’ya kwĩkala na Asa waitũ wa Ĩtunĩ. Mbivilia nĩtũtavasya ngewa ya mũndũ weetawa Naamani. Aĩ mũwau mũno na endaa mwathani weetawa Elisa amũvosye. Aumie mũsyĩ kwake na athi nthĩ ĩla Elisa wekalaa. Elisa atũmie mũtũmwa akamwĩe Naamani akathambe mavinda mũonza nthĩnĩ wa ũsĩ wa Yolotani, na akavow’a.
Naamani nĩwathatie yĩla weeiwe eke ũu. Nĩwaseng’ie nĩkĩ waĩlĩte kũthi Ũsĩnĩ wa Yolotani, nĩkwĩthĩwa kwaĩ mbũsĩ mbingĩ nene vala wekalaa. Ĩndĩ onakwĩthĩwa aĩ mũthatu, Naamani ĩtina nĩwatw’ie kwĩw’a. Nĩkwĩthĩwa nĩweewie, nĩwavoiw’e. Keka ndaaĩw’a, ndethĩwa aavow’a.
Andũ amwe nĩ masũanĩĩaa mĩao ya Yesũ yĩvinya kũmĩw’a. Ĩvinda yĩmwe kwaĩ mwanake weetawa Nevi, ũla, ena ana-a-inya, nĩmakũlilwe meke ũndũ waĩna vinya mũno. Yesũ ameie masyoke mũsyĩ waYelusaleme makose maandĩko matheu mavata. Ana-a-inya make maisye maitonya kwĩka ũu. Vaĩna vinya mũno. Ĩndĩ Nevi aisye nũkwĩka ũndũ Yesũ wamwĩie eke. Aisye kana yĩla Yesũ watwĩa twĩke ũndũ, ona ethĩwa wĩonekana wĩvinya ata kwitũ, nũtũtetheeasya kũwĩka.
Yesũ nũtwĩĩte nĩtwaĩlĩte kũthũkũma twĩkale Take na Asa waitũ wa Ĩtunĩ. Ndaĩ atonya kũtwĩa twĩke ũndũ ũũ ateo Esĩ nĩtũtonya kũwĩka.
Yesũ ailye ta Asa waitũ wa Ĩtunĩ nĩkwĩthĩwa ndaaĩka naĩ. Ithyonthe nĩtwĩkĩte naĩ, ĩndĩ notwĩkale ta Asa waitũ wa Ĩtunĩ kwĩsĩla mũĩkĩĩo nthĩnĩ wa Yesũ na ũalyũlo wa ngoo.
Mavinda amwe tũitonya kũelewa kĩtumi kya mĩao ĩmwe ya Yesũ. Ĩndĩ ethĩwa nĩtũmwendete Yesũ na kũmũĩkĩĩa, tũkeeka ũndũ ũtũtavasya twĩke. Nĩtũkew’a ona ethĩwa tũikũelewa nĩkĩ watwĩa twĩke ũndũ. Atamu na Eva meekie ũũ. Yesũ ameie Atamu na Eva maumye nthembo* kwa Asa waitũ wa Ĩtunĩ. Mũthenya ũmwe mũlaĩka nĩwookie kwa Atamu na amũkũlya nĩkĩ waumasya nthembo. Atamu nĩ waisye ndeesĩ nĩkĩ, ateo kwĩthĩwa Yesũ nĩwamwĩĩte eke ũu. Mũlaĩka nĩwamũtavisye Atamu kĩtumi kya mwĩao ũsu na amũmanyĩsya Atamu ũvoo mũseo. Yesũ nĩwendeeiw’e nĩ Atamu nũndũ Atamu nĩwamwĩwie ona mbee wa kũmanya kĩtumi kya ũ mwĩao.
Nĩtwaĩlĩte kwĩw’a mĩao ya Yesũ nũndũ nĩtũmwendete na nĩtũkwenda kũmwĩw’a. Asa waitũ wa Ĩtunĩ nĩwaĩtye nĩwendeeaw’a nĩ ala mekwenda kũmwĩw’a Yesũ. Nũthataa yĩla syana Syake itekũmwĩw’a Yesũ kũvikĩĩa ũndũ wĩkĩke ũla ũũmathing’ĩĩsya kwĩw’a. Asa waitũ wa Ĩtunĩ nĩwendaa syana Syake syonthe imanye kũmwenda Yesũ na kũmwĩw’a, nũndũ ĩno noyo nzĩa yoka matonya kũsyoka kwa Asa waitũ wa Ĩtunĩ.
Ũneenan’ya
-
Nĩkĩ vevata kwĩw’a mĩao ya Yesũ ona yĩla yĩkwonekana yĩvinya mũno kũmĩw’a?
-
Nĩkĩ twaĩlĩte kwĩw’a mĩao ona ethĩwa tũĩkũmĩelewa?
-
Nĩkĩ vevata wa kwĩw’a nũndũ nĩtũkwenda kwĩw’a?
Yĩla Twamwenda Asa Waitũ wa Ĩtunĩ, Nĩtwendaa Kũmwĩw’a Yesũ
Yesũ nĩweekie kĩla ũndũ w’onthe Asa waitũ wa Ĩtunĩ wa mwĩaĩe eke. Yesũ nĩwamwĩwie Asa waitũ wa Ĩtunĩ nũndũ nĩwamwendete Asa waitũ wa Ĩtunĩ. Satani nĩwamũtatie Yesũ ndakamwĩw’e Asa waitũ wa Ĩtunĩ. Yesũ ndaaĩka maũndũ ala watatiwe nĩ Satani eke.
Mwĩao wa Mbee na Wavata Mũno nĩ wa Kũmwenda Asa Waitũ wa Ĩtunĩ
Yĩla twamwenda Asa waitũ wa Ĩtunĩ, nĩtwendaa kũmwĩw’a ta Yesũ ũndũ weekie. Tũtonya kũmwenda Asa waitũ wa Ĩtunĩ mũno yĩla twamanya mũno ĩũlũ Wake. Twĩ vata wa kwĩĩmanyĩsya ĩũlũ Wake na ũndũ wĩkaa kwondũ witũ. Tũmanyaa ũũ kwa kũsoma maandĩko matheu na kwĩĩthukĩĩsya atongoi ma Ĩkanisa ya Yesũ Klĩsto. Yĩla twamwenda Asa waitũ wa Ĩtunĩ, ona ĩngĩ tũkamwenda Yesũ nũndũ wa ũndũ weekie kũtũtetheesya kũsyoka kwa Asa waitũ wa Ĩtunĩ. Tũmanyaa kũmwenda Yesũ kwa kwĩka maũndũ ala ũtwĩaĩe ithyĩ twĩke. O ũndũ wendo witũ kũla kwĩ Asa waitũ wa Ĩtunĩ na Yesũ waendeea na kwongeleka, kwĩw’a mĩao Yoo nĩkũvũthaa.
Mwĩao wa Kelĩ Mũnene nĩ Kwenda Andũ Onthe
Yesũ nĩwatũtavisye twendae na kũtethya andũ angĩ. Nĩwatũtavisye tũmekae ala angĩ o ũndũ tũkwenda matwĩke. Nĩwaisye tũyaĩlĩte kũneena maũndũ mathũku ĩũlũ woo. Nĩtwaĩlĩte kũmaekea mavĩtyo moo. Nĩtwaĩlĩte kũtethya angĩ kwa nzĩa yonthe ĩla tũtonya.
Yĩla twenda Asa waitũ wa Ĩtunĩ na Yesũ, nĩtwendaa na kũtethya angĩ. O ũndũ twenda na kũthũkũma Yesũ na andũ angĩ, kwĩw’a mĩao yonthe ya Asa waitũ wa Ĩtunĩ na Yesũ nĩkũvũthaa.
Ũneenan’ya
-
Nĩ mĩao yĩva ĩlĩ mĩnene?
-
Ngelekan’yo ya Yesũ ĩtonya kũtũtetheesya kwĩw’a mĩao ya Asa waitũ wa Ĩtunĩ ata?
-
Tũtonya kũmanya kũmwenda Asa waitũ wa Ĩtunĩ na Yesũ na kwenda kwĩw’a mĩao Yoo ata?
Kĩla Ũathimo Tũkwataa Ũkaa Nũndũ wa Wĩwi
Asa waitũ wa Ĩtunĩ atũathimaa yĩla tweew’a mĩao Yake. Nĩwathanaa ũathimo kwa kĩla mwĩao tweew’a. Kĩla ĩvinda tweew’a mwĩao, nĩtũkwataa ũathimo kwondũ wa kũwĩw’a. Ethĩwa tũikwĩw’a mwĩao, tũitonya kwĩĩkwatya kũkwata ũathimo ũla wathanĩtwe.
Maũathimo amwe ala mokaa kumana na kwĩw’a mĩao ya Asa waitũ wa Ĩtunĩ nĩ ũtanu, ũthasyo wa kũlea kwĩthĩwa na w’ia, ũima wa mwĩĩ, na ũmanyi mwingĩ na ũtonyi. Ũathimo ũla mũnene Asa waitũ wa Ĩtunĩ ũtwathaa nĩ kana nĩtũtonya kwĩkala Take na kwĩkala Nake tene na tene. Nĩtũtonya kũkwata maũathimo aa kwa kwĩw’a mĩao Yake yonthe.
O tũitata kwa kĩthito kwĩw’a mĩao ya Asa waitũ wa Ĩtunĩ, vevata kũlilikana kana tũtonya kwĩka ũu kwa ũtonyi wa Yesũ w’oka. Ĩngĩ nĩtwaĩlĩte kũlilikana kana yĩla twalea kwĩw’a, Asa waitũ wa Ĩtunĩ akatũekea yĩla twaia mũĩkĩĩo witũ nthĩnĩ wa Yesũ Klĩsto na kũalyũla ngoo. Nĩkwĩthĩwa ithyonthe nĩtwĩkĩte naĩ, nĩtwaĩlĩte kũtũnga mũvea mũno kwa Wĩw’anĩthyo wa Yesũ Klĩsto. Kwondũ wa Wĩw’anĩthyo Wake, Asa waitũ wa Ĩtunĩ nũtonya kũtũekea na kũtũathima na kũtũtetheesya twĩthĩwe twĩ ewi. Tũtĩkesa kwĩthĩwa twĩ aĩlu kwa maũathimo ma Asa waitũ wa Ĩtunĩ twĩ ithyoka.
Ũneenan’ya
-
Nĩ maũathimo meva matonya kũkũkĩa kwondũ wa wĩwi kwa Asa waitũ wa Ĩtunĩ?
-
Nĩ ata Yesũ ũtũtetheeasya kũkwata maũathimo aa?
-
Nĩ ata tũtonya kũkwata mũthĩnzĩo ũla mũnene wa Asa waitũ wa Ĩtunĩ?