Kĩlungu kya 7
Veva Mũtheu
Asa waitũ wa Ĩtunĩ nũmũnyuvĩte mũndũ wa kũtũmanyĩthya maũndũ ala E kwenda tũmanye. Mũndũ ũũ nũũ, na tũtonya kwĩĩmanyĩsya ata kũelewa maũtũmane ma Asa waitũ wa Ĩtunĩ?
Veva Mũtheu Athũkũmaa na Asa Waitũ wa Ĩtunĩ na Yesũ Kũtũtetheesya
Veva Mũtheu athũkũmaa na Asa waitũ wa Ĩtunĩ na Yesũ. Nũkũsĩĩaa kwitũ kana Me thayũ na Nĩmatwendete. Nũmatetheeasya kũtũmanyĩsya maũndũ ala twaĩlĩte kũmanya na kwĩka na kũtũtetheesya kwĩw’a mĩao Yoo. Ndethĩawa na mwĩĩ wa nyama na mavĩndĩ ta Asa waitũ wa Ĩtunĩ na Yesũ. We nĩ veva. Ailye ta mũndũ.
Asa waitũ wa Ĩtunĩ, Yesũ Klĩsto, na Veva Mũtheu nĩ andũ atatũ me kĩvathũkan’yo. Mathũkũmaa vamwe kũtũtetheesya kwĩĩmanyĩsya maũndũ ala twaĩlĩte kũmanya na kwĩka. Yĩla twakwata maũtũmane kuma kũla kwĩ Asa waitũ wa Ĩtunĩ kana Yesũ, Veva Mũtheu nĩwe ũmaetae kwĩtũ mavinda onthe. Na ĩngĩ nũtũtetheeasya kwĩw’a mĩao Yoo.
Ũneenan’ya
-
Veva Mũtheu athũkũmaa naũ?
-
Veva Mũtheu e kĩvathũkan’yo ata na Asa waitũ wa Ĩtunĩ na Yesũ?
Wĩa wa Veva Mũtheu
Veva Mũtheu nũtũmanyĩasya ĩũlũ wa Asa waitũ wa Ĩtunĩ na Yesũ. Nũtũtavasya kana Methayũ na kana Nĩmatwendete. Nũtũmanyĩasya kana Asa waitũ wa Ĩtunĩ nĩwe Asa wa maveva maitũ. Ĩngĩ nũtũmanyĩasya kana Yesũ nĩwe Mũtangĩĩi waitũ.
Veva Mũtheu nũtũtetheeasya kũelewa ĩũlũ wa Asa waitũ wa Ĩtunĩ na Yesũ na maũndũ ala no nginya tũmeke nĩkana tũsyoke ĩtunĩ. Nũtũtetheeasya kwĩĩmanyĩsya na kũelawa ũw’o wo’nthe.
Veva Mũtheu ĩngĩ nũtũnengae vinya wa kũmĩw’a mĩao ya Asa waitũ wa Ĩtunĩ na Yesũ. Nũtonya kũtũtetheesya kwĩka ũnyuvi mũseo yĩla twaĩlĩte kũnyuva katĩ wa meko elĩ. Nũtonya kũtũnenga mũuo ĩvindanĩ ya thĩna.
Ũneenan’ya
-
Wĩa wa Veva Mũtheu nĩ mwaũ?
-
Veva Mũtheu atonya kũtũtetheesya kũmanya kyaũ?
-
Veva Mũtheu atonya kũtũtetheesya kwĩka ata?
Veva Mũtheu Atũmanyĩasya kwa Nzĩa ya Ũtonyi Mũnene
Veva Mũtheu nũtũmanyĩasya ũla wa waw’o na ũla wa ũvũngũ. Ũmanyĩsyo ũũ nĩmũlũmu mũno tũtĩsa kũlwa nĩw’o. Veva Mũtheu ndaneenaa naitũ nzĩanĩ tũtonya kwĩw’a na matũ maitũ. Ĩndĩ, Nũtumaa tũsũanĩa kana tũkew’a kana kĩla tũũsoma kana tũkwĩw’a nĩ kyaw’o. Mĩw’ĩle ĩno yĩthĩawa yĩna vinya mũno.
Vinya wa Veva Mũtheu nũtonya kwĩw’ĩka nĩ andũ aingĩ kwa ĩvinda yĩmwe. Kũelewa ũũ nesa, sũanĩa ĩũlũ wa syũa. Ve syũa yĩmwe, ĩndĩ kyeni kyayo na muutĩa wayo nĩsyĩw’ĩkaa nĩ andũ me kũndũ kwingĩ kwa ĩvinda yĩmwe. Veva Mũtheu nũtonya kũsũanĩĩwa kwa nzĩa o ĩsu. Vinya Wake nũtonya kwĩw’ĩka nĩ andũ me kũndũ kwingĩ kwa ĩvinda yĩmwe onavala We Mwene ethĩawa o vandũ vamwe kwa ĩvinda o yĩmwe.
Ũneenan’ya
-
Veva Mũtheu atũmanyĩthasya ata maũndũ ala twaĩlĩte kũmanya?
-
Veva Mũtheu atonya kũtetheesya andũ aingĩ ata kwa ĩvinda yĩmwe?
Veva Mũtheu Nũtetheeasya Kĩla Ũmwe Waitũ
Ĩtina wa Asa waitũ wa Ĩtunĩ amalũngya Atamu na Eva Mũũndanĩ wa Eteni, nĩmavoyie na kũmũkũlya ũndũ maĩlĩte nĩ kwĩka. Asa waitũ wa Ĩtunĩ nĩwatũmie Veva Mũtheu amamanyĩsye ĩũlũ Wake na Yesũ na ĩũlũ wa maũndũ ala Atamu na Eva maaĩlĩte kwĩka. Veva Mũtheu amatavisye kana maũmanyĩsyo ma Asa waitũ wa Ĩtunĩ maĩ maw’o. Nĩwamanengie vinya wa kwĩka maũndũ ala Asa waitũ wa Ĩtunĩ wendaa meke.
Ĩngĩ nĩwamatetheeisye kwĩthĩwa me auu na kũtũnga mũvea kwondũ wa maũndũ ala Asa waitũ wa Ĩtunĩ wamekĩte.
Kwĩsĩla ũtongoesyanĩ wa Veva Mũtheu, Atamu na Eva nĩmamanyie nĩmatonya kwĩkala ĩngĩ na Asa waitũ wa Ĩtunĩ mũthenya ũmwe ethĩwa makamũatĩĩaa Yesũ mavinda onthe na kwĩw’a mĩao Yake. Ũtongoesya wa Veva Mũtheu nĩwaetie ũtanu mũno kũla maĩ.
Asa waitũ wa Ĩtunĩ nĩwendete kĩla ũmwe waitũ. Nũtũmaa Veva Mũtheu atũtongoesye na kũtũmanyĩsya ũw’o. Ĩndĩ, Veva Mũtheu akatũtetheesya o ethĩwa tũkatata kũatĩĩa mĩao na mawĩaĩo ala ũtũeteae kuma kwa Asa waitũ wa Ĩtunĩ na Yesũ kwa kĩthito. Ethĩwa tũikatata kwĩw’a kwa ũkwatĩlĩĩlyo mĩao Yoo, kana ethĩwa tũikwenda Veva Mũtheu kũtũmanyĩsya, Ndakatũmanyĩthya kĩndũ ona kĩva. Tũkeethĩwa na thayũ mũseo ethĩwa tũkaatĩĩa maũmanyĩsyo ma Veva Mũtheu.
Ũneenan’ya
-
Veva Mũtheu amatetheeisye Atamu na Eva ata?
-
Nonginya twĩke ata tũikwata ũtethyo kuma kũla kwĩ Veva Mũtheu?