Kĩlungu kya 15
Ũvatiso
Kũvatiswa nĩ kĩndũ kĩmwe kya vata mũno kĩla ũtonya kwĩka ĩũlũ wa nthĩ ĩno. Nĩkĩ ũvatiso wavata mũno? Nĩ nzĩa yĩva ya ũvatiso yaw’o?
Asa Waitũ wa Ĩtunĩ Nũtumĩsye Mwĩao Tũvatiswe
Kũvatiswa nĩ kũthikwa kĩw’ũnĩ vyũ kwa ĩvinda na kũkĩlw’a ĩngĩ nĩ mũndũ wĩna ũkũmũ wa kwĩka ũvatiso. Ũvatiso nĩ kĩlungu kya walan’yo wa Asa waitũ wa Ĩtunĩ kwitũ. Nũtumĩsye mwĩao tũvatiswe kwonan’ya kana nĩtũĩkĩĩaa nthĩnĩ wa Yesũ Klĩsto, kana nĩtũmwendete na nĩtũkwenda kũmwĩw’a, na kana nĩtũalyũlĩte ngoo kwondũ wa naĩ sitũ.
Yesũ nĩweesĩ kana Asa waitũ wa Ĩtunĩ nĩumĩsye syana Syake syonthe mwĩao wa kũvatiswa. Yĩla Yesũ waĩ ĩũlũ wa nthĩ, nĩwavatisiwe. Eekie ũũ nũndũ endaa kũmwĩw’a Asa waitũ wa Ĩtunĩ. Ĩngĩ nĩwendaa kũtwon’ya kana nĩtwaĩlĩte kũmwĩw’a Asa waitũ wa Ĩtunĩ na kũvatiswa.
Kĩla mũndũ ũvikĩtwe ũkũũ wa myaka nyanya, ũla ũeleawa ũla ũseo na ũthũku, na ũla wĩna mũĩkĩĩo nthĩnĩ wa Yesũ na nĩwalyũlĩte ngoo nĩwaĩlĩte kũvatiswa. Syana ila syĩna ũkũũ wa myaka ĩtheo wa nyanya itĩvata wa kũvatiswa. Asa waitũ wa Ĩtunĩ ndaisilĩlaa kwondũ syĩkaa. Ĩngĩ, andũ ala me mathĩna ma mũtwe matatonya kũelewa ũla waw’o na ũla ũthũku matĩvata wa kũvatiswa. Andũ ala angĩ onthe nonginya mavatiswe ethĩwa nĩmekwenda kũsyoka na kwĩkala na Asa waitũ wa Ĩtunĩ.
Yesũ nũtũtavĩtye yĩla twaĩlĩte kũvatiswa. Nĩwatavisye aatĩĩi Make mavatise andũ ĩtina wa andũ mamanya ĩũlũ Wake, maĩkĩĩa nthĩnĩ Wake, na malyũla ngoo. Nĩwanengie aũme amwe Ĩkanisanĩ Yake ũkũmũ wa kũvatisa.
Ũneenan’ya
-
Nĩkĩ Asa waitũ wa Ĩtunĩ wendaa tũvatiswe?
-
Nĩkĩ Yesũ wavatisiwe?
-
Nũũ ũla waĩlĩte kũvatiswa?
Klĩsto avatisiwe nĩ Yoana Mũvatisi.
Kũvatiswa Nĩ Kĩndũ Kĩmwe kya Vata Vyũ Tũtonya Kwĩka
Kwa kũvatiswa, nĩtwonasya Asa waitũ wa Ĩtunĩ nĩtũkwenda kũatĩĩa walan’yo Wake kwitũ. Nĩtwathanaa kũmwĩtĩkĩla Yesũ ta mũtongoi waitũ na kwĩw’a kĩla ũndũ w’onthe Ũtwĩaa twĩke. Nĩtwathanaa kĩla ĩvinda kũmũlilikana na maũndũ ala wĩkĩte kwondũ witũ.
Yĩla twaia mũĩkĩĩo witũ nthĩnĩ wa Yesũ Klĩsto, kũalyũla ngoo kwondũ wa naĩ sitũ, na kũvatiswa, Asa waitũ wa Ĩtunĩ nũtũekeaa naĩ sitũ. Nũtwathaa kana nĩtũtonya kũsyoka kwĩkala Nake. Nũtwĩtĩkĩlaa ta athaithi ma Ĩkanisa ya Yesũ. Nũtũmaa Veva Mũtheu kũtũtetheesya kwĩĩmanyĩsya ĩũlũ Wake na kũtũtetheesya kwĩka maũndũ ala maseo. Nĩtũkwataa maũathimo aa onthe ethĩwa tũkaendeea na kwĩka maũndũ aa twathanaa kwĩka yĩla twavatiswa.
Tũtonya kũkwata maũathimo aa ethĩwa twĩavatise. Ĩno noyo nzĩa yoka ya kũsyoka kwĩkala na Asa waitũ wa Ĩtunĩ. Ĩno noyo nzĩa yoka ya kũtw’ĩka athaithi ma Ĩkanisa ya Yesũ Klĩsto. Ĩno noyo nzĩa yoka yaitũ kũkwata mũthĩnzĩo wa Veva Mũtheu, yĩla nĩ ĩvuso ya kwĩthĩwa na Veva Mũtheu kũtũtetheesya mathayũnĩ maitũ. Mũthĩnzĩo ũũ tũnengawe ĩtina wa kũvatiswa. Maũndũ aa onthe nĩ mavata nĩkana tũtonye kũsyoka kwĩkala na Asa waitũ wa Ĩtunĩ.
Ũneenan’ya
-
Nĩ watho mwaũ twathanaa kwa Asa waitũ wa Ĩtunĩ yĩla twavatiswa?
-
Nĩ watho mwaũ Asa waitũ wa Ĩtunĩ ũtwathaa yĩla twavatiswa?
-
Nĩkĩ ũvatiso wavata mũno?
Nonginya Tũkeeyũmbanĩsya Kũvatiswa
Nonginya tũkeka maũndũ mana tũtĩĩyũmbanĩsya kũvatiswa. Nonginya twĩĩmanyĩsye ĩũlũ wa Yesũ Klĩsto na kũĩkĩĩa nthĩnĩ Wake, kũalyũla ngoo kwondũ wa naĩ sitũ, na kwĩka maũndũ ala Yesũ ũtumĩsye mwĩao twĩke.
Ũneenan’ya
-
Nonginya twĩke ata twĩĩyũmbanĩsye ũvatiso?
Nonginya tũvatiswe kwa kũthikwa kĩw’ũnĩ tũtĩekewa naĩ sitũ.
Ũvatiso Nũtũnengae Mwambĩlĩlyo Mweũ
Ũvatiso nũtũekaa twambĩlĩlye thayũ mweũ, mũtheu kuma naĩnĩ. Yesũ ĩvinda yĩmwe nĩwaisye kana nĩta kũsyawa ĩngĩ kwitũ. Aisye kana ateo tũsyaiwe ĩngĩ kĩveva, tũitonya kũsyoka kwĩkala na Asa waitũ wa Ĩtunĩ.
Ũmwe wa aatĩĩi ma Yesũ, ũla ĩsyĩtwa yake weetawa Vaũlo, aisye twaĩlĩte kwambĩlĩlya thayũ mweũ ĩtina wa kũvatiswa. Aisye kana yĩla twathikwa kĩw’ũnĩ tũivatiswa, nĩta kũthika naĩ sitũ syonthe. Yĩla twaũma kĩw’ũnĩ, nĩtakwĩthĩwa twĩ atheu, mũndũ mweũ, twĩĩyũmbanĩtye kwambĩlĩlya thayũ mweũ. Ũvatiso nũtwambĩlĩlasya nzĩa ya kũsyoka kwa Asa waitũ wa Ĩtunĩ.