Kĩlungu kya 28
Kĩlungu kya Ĩkũmi na Nthembo
Kĩlungu kya ĩkũmi na nthembo nĩ kyaũ, na Asa waitũ wa Ĩtunĩ atũathimaa ata yĩla twainengane kwa kwenda?
Asa Waitũ wa Ĩtunĩ Nũtwĩĩte Tũĩve Kĩlungu kya Ĩkũmi
Kĩlungu kya ĩkũmi nĩ kĩlungu kĩmwe kya ĩkũmi kya mbesa na syĩndũ ingĩ tũkwataa. Asa waitũ wa Ĩtunĩ nĩwatavisye andũ tene, tene mũno maĩve kĩlungu kya ĩkũmi. Avalaamu, Yakovo, na angĩ aingĩ nĩmeewie mwĩao ũũ.
Ethĩwa nĩtwaĩvwa kana twakwata mbesa, nĩtwaĩlĩte kũnengane ĩmwe ĩũlũ wa ĩkũmi ta kĩlungu kya ĩkũmi. Ethĩwa twĩna indo kana malĩu no tũĩve kĩlungu kya ĩkũmi. Tũnenganae ĩmwe ĩũlũ wa ĩkũmi ya ũsyao wa malĩu kana ĩmwe ĩũlũ wa ĩkũmi ya indo nzaũ ila syĩthĩiwe nthĩnĩ wa mwaka. Ethĩwa nĩvatonyeka, vandũ va kũnengane malĩu kana indo kwa Ĩkanisa, twaĩlĩte kũita na kũnengane mbesa isu kwa Ĩkanisa. Tũĩvaa kĩlungu kya ĩkũmi kwa mũsyaĩĩsya kana mũtongoi wa ũvonge. Ethĩwa tũyĩsĩ kĩlungu kĩla twaĩlĩte kũnengane, nĩtwaĩlĩte kũkũlya mũsyaĩĩsya witũ kana mũtongoi wa ũvonge atũtetheesye kũelewa nĩ mwĩao wa kĩlungu kya ĩkũmi.
Twaĩva kĩlungu kitũ kya ĩkũmi, tũtetheeasya kũnyaĩĩsya ũvoo mũseo nthĩ yonthe. Kĩlungu kya ĩkũmi kĩtũmĩkaa kwaka myako ya Ĩkanisa, kũtumbĩthya mavuku, na kũĩvĩa syĩndũ ingĩ syendekanaa nthĩnĩ wa Ĩkanisa ya Yesũ yaw’o.
Ona syana nĩsyaĩlĩte kũĩva kĩlungu kya ĩkũmi. Ikeemanyĩsya kwĩka ũũ syoona asyai masyo mayĩĩva kĩlungu kya ĩkũmi. Ethĩwa ikambĩlĩlya kũĩva kĩlungu kya ĩkũmi syĩ nini, ikenda kũkĩĩvaa yĩla ikaneneva na kwĩthĩwa na mĩsyĩ yasyo ene.
Ũneenan’ya
-
Twĩĩtwe tũĩve mbesa siana ata ta kĩlungu kya ĩkũmi?
-
Tũtonya kũmanyĩsya syana sitũ kũĩva kĩlungu kya ĩkũmi ata?
Twonanasya Wendo kwa Asa Waitũ wa Ĩtunĩ Yĩla Twaĩva Kĩlungu kya Ĩkũmi
Twaĩlĩte kũĩva kĩlungu kya ĩkũmi twĩna wendi nĩ kana Asa waitũ wa Ĩtunĩ akĩtĩkĩle na kũtũathima kwondũ wakyo. Twaĩlĩte kũĩva kĩlungu kya ĩkũmi nũndũ nĩtũkwenda kũkĩĩva.
Ethĩwa tũtĩna wendi wa kũĩva kĩlungu kya ĩkũmi, twaĩlĩte kũsũanĩa maũathimo onthe Asa waitũ wa Ĩtunĩ ũtũnengete. Kwa kũĩva kĩlungu kya ĩkũmi na wendi twonanasya wendo kwa Asa waitũ wa Ĩtunĩ na andũ angĩ.
Ũneenan’ya
-
Soma 2 Akolintho 9:6–7.
-
Nĩkĩ ve vata wa kũnengane kwa kwenda?
Asa Waitũ wa Ĩtunĩ Nũtwathĩte Kũtũathima Ethĩwa Tũkaĩva Kĩlungu kya Ĩkũmi
Asa waitũ wa Ĩtunĩ nũtanaa yĩla twaĩva kĩlungu kya ĩkũmi. Nũtwathĩte kũtũathima ethĩwa nĩtũkũkĩĩva. Nĩwaĩtye kana akatũnenga maũathimo maingĩ tũtĩkamanya twĩĩkana namo ata. Ona ĩngĩ nĩwaĩtye tũikanangwa na ala athũku ethĩwa tũkaĩva kĩlungu kya Ĩkũmi kwa kwenda.
Asa waitũ wa Ĩtunĩ akatũathima wĩthĩe notũmũmanye nesa. Akatũathima tũmanye mũno ĩũlũ wa ũvoo mũseo. Akatũnenga vinya mwingĩ wa kwia maũmanyĩsyo ma ũvoo mũseo kĩla mũthenya na kũtetheesya mĩsyĩ yaitũ kũatĩĩa ũvoo mũseo. Ĩngĩ nĩtũmũtaanĩthasya yĩla twatetheesya angĩ kwĩĩmanyĩsya ĩũlũ wa ũvoo mũseo.
Yĩla twaĩva kĩlungu kya Ĩkũmi, nĩtwĩĩmanyĩasya kũsũvĩa mbesa sitũ nesa na kũeka kwĩĩyenda. Nĩtwaĩlĩte mavinda onthe kũvatha kĩlungu kya ĩkũmi kuma kwa ũkwati witũ, na ĩndĩ tũkeethĩa kana Asa waitũ wa Ĩtunĩ akatũathima tũtonye kũsũvĩa kĩla kyatiala nĩkana twĩthĩwe na kya kwĩana kwa mawendi maitũ.
Ũneenan’ya
-
Nĩ maũathimo meva atatũ tũkwataa kumana na kũĩva kĩlungu kya ĩkũmi?
Nĩtũtetheeasya Andũ Angĩ Yĩla Twaĩva Nthembo ya Kũtĩĩa Kũya
Ta athaithi ma Ĩkanisa nĩtũtĩaa kũya mũthenya ũmwe kĩla mwei. Kũũ nĩkwasya tũleaa kũya maya elĩ. Tũtĩĩsaa kana kũnywa kĩndũ kwa masaa mĩongo ĩlĩ na ana. Tũĩkĩaa kana kũtĩĩa kũya kũtũtetheeasya kwĩthĩwa na maveva malũmu.
Asa waitũ wa Ĩtunĩ nũtwĩĩte tũnengane nthembo yĩtawa nthembo ya kũtĩĩa kũya. Nthembo ĩĩ yaĩlĩte kwĩthĩwa yĩ kĩla twĩĩaĩlĩte kũtũmĩa kwa malĩu ala tũtanaya mũthenya ũla tũtĩĩte kũya. Nĩtwaĩlĩte kũnengane kũthonoka ũtalo ũũ ethĩwa nĩtũtonya. Asa waitũ wa Ĩtunĩ akatũathima ethĩwa tũkeeka. Nthembo ii itũmĩawa kwa kũthooa lĩu, wĩkalo, ngũa, na syĩndũ ingĩ kwa ala mena vata wasyo. Yĩla twaĩva nthembo ya kũtĩĩa kũya twonanasya wendo kwa andũ ala angĩ.
Tũnenganae nthembo yaitũ ya kũtĩĩa kũya kwa Mũsyaĩĩsya kana mũtongoi wa ũvonge, na mbesa ii atũmĩaa kũtetheesya ala ngya na ala mekwenda ũtethyo wĩ mwanya. Asa waitũ wa Ĩtunĩ nĩwaĩtye kana ethĩwa tũkatethya ngya akatũathima. Akasũngĩa mboya sitũ na kũtũtetheesya yĩla tũkwenda ũtethyo. Akatũtetheesya kũelewa ũvoo mũseo nesa na akatũtongoeasya kĩla ĩvinda.
Ĩkanisa ĩtũmĩaa kĩlungu kya ĩkũmi na nthembo:
-
Kũmanyĩsya ũvoo mũseo kwa angĩ.
-
Kwaka na kũsũvĩa makalũ, nyũmba sya kũkomanĩa, na myako ĩngĩ ya Ĩkanisa.
-
Kwa kũtumbĩthya mavuku ma kũmanyĩsya na syĩndũ ingĩ ila andũ ma Ĩkanisa mendaa kwĩĩmanyĩsya ĩũlũ wa ũvoo mũseo na kũthũkũma wĩa wa Asa waitũ wa Ĩtunĩ.
-
Kũtetheesya ala matatonya kwĩĩsũvĩa.
Ũneenan’ya
-
Tũtonya kwonan’ya ata mũvea witũ kwa Asa waitũ wa Ĩtunĩ kwa maũathimo onthe ũtũnengete?
-
Nĩkĩ tũtaanĩthaw’a nĩ kũĩva nthembo ya kũtĩĩa kũya?
Kũtĩĩa kũya na kũvoya kũetae maũathimo.