Kĩlungu kya 5
Yesũ Nĩwoombie Nthĩ
Nũũ ũla woombie nthĩ? Nĩkĩ wamyũmbie?
Nĩtwendaa Nthĩ
Kĩlungu kya walan’yo wa Asa waitũ wa Ĩtunĩ ũla watũeleisye ku ĩtunĩ kyaĩ ithyĩ tume ĩtunĩ kwa ĩvinda. Nĩtwendaa vandũ va kũthi, vaasa na wĩthĩonĩ Wake, kũkwata mĩĩ ya nyama na mavĩndĩ na kũtatwa twonan’ye kana nĩtũtonya kũnyuva maũnyuvi maseo. Nĩwendaa mũndũ atũseũvĩsye vandũ vaa. Nĩwamũnyuvie Yesũ eke ũu.
Ũneenan’ya
-
Nĩkĩ Ngai wendie kũtũmbĩa nthĩ?
Yesũ Nĩwoombie Nthĩ
Yesũ nĩwoombie nthĩ. Nĩwoombie mũthenya na ũtukũ. Nĩwoombie syũa, mwei, na ndata. Nĩwavathanisye kĩw’ũ kuma nthĩ nyũmũ na oomba maũkanga, maia, na mbũsĩ. Nĩwavandie nyeki, mĩtĩ, malaa, na mĩthemba yonthe ĩngĩ ya mĩtĩ ĩũlũ wa nthĩ. Na ĩndĩ eekĩa nyamũ, makũyũ, nyũnyi, na tũsamũ tũla tũtambũkaa ĩũlũ wa nthĩ. Yĩla Yesũ weekie ũũ w’onthe, nthĩ yaĩ mbũmbĩku kwondũ wa andũ kwĩkala ĩũlũ wayo.
Asa waitũ wa Ĩtunĩ ĩndĩ nĩwoombie mũndũũme na mũndũ mũka. Mũndũũme eetiwe Atamu, na ũmũndũ mũka eetwa Eva. Kĩla ũmwe woo aĩna mwĩĩ wa nyama na mavĩndĩ ta ũla wa Asa waitũ wa Ĩtunĩ. Wĩa ũũ w’onthe wa kũmba nthĩ na kwia syĩndũ syĩ thayũ ĩũlũ wayo wĩtawa Ũmbi. Asa waitũ wa Ĩtunĩ nĩwendeeiw’e nĩ nthĩ na syĩndũ syonthe ila wamwĩyaĩe Yesũ aie ĩũlũ wayo.
Ũneenan’ya
-
Atamu na Eva maĩkĩvathũkan’yo ata na syĩndũ ila ingĩ Ngai woombĩte?
Wũmbi wa Asa Waitũ wa Ĩtunĩ Wonanasya Nũtwendete
Yu twĩkalaa nthĩ mbanake ĩla Asa waitũ wa Ĩtunĩ wamwĩyĩaĩe Yesũ ombe. Syũa nĩtũnengae muutĩa na kyeni. Mbua nĩmeasya mĩtĩ na nĩtũnengae kĩw’ũ kya kũnywa. Mĩtĩ na nyamũ ila syĩ ĩũlũ wa nthĩ nĩtũnengae lĩu na ngũa.
Yesũ oombie syĩndũ ii syonthe kwondũ witũ, ungu wa welekelyo wa Asa waitũ wa Ĩtunĩ. Yĩla twoona kana oombie syĩndũ ii kwondũ witũ, nĩtũmanyaa kana Asa waitũ wa Ĩtunĩ nũtwendete na nũtũsũvĩaa.
Ũneenan’ya
-
Sũanĩa syĩndũ imwe ila Asa waitũ wa Ĩtunĩ watũseũvĩsye.
-
Tũmanyaa ata kana Asa waitũ wa Ĩtunĩ nũtwendete na nũtũsũvĩaa?
Nĩtũtonya Kwonan’ya Kana Twĩna Mũvea Kwondũ wa Nthĩ
Nĩtwaĩlĩte ĩvinda yonthe kũlilikanaa kana Asa waitũ wa Ĩtunĩ oombĩthisye syĩndũ syonthe ĩũlũ wa nthĩ kwondũ witũ. Ndatanaa yĩla twalea kũlilikana ũu. Nĩtũtonya kũmwonia kana twĩna mũvea kwa kũtũmĩa syĩndũ ila syĩ ĩũlũ wa nthĩ kwa ũĩ. Tũtaĩlĩte kwananga kĩndũ ona kĩva ĩũlũ wa nthĩ. Nĩtwaĩlĩte kũsũvĩa nthĩ na kũmĩia yĩ ntheu. Nĩtwaĩlĩte kũmũtũngĩa Asa waitũ wa Ĩtunĩ mũvea kwondũ wa nthĩ ĩno mbanake yĩla tũũmũvoya. Ĩngĩ Nĩtũmwonasya twĩna mũvea kwondũ wa nthĩ kwa kwĩka maũndũ ala E kwenda twĩke vaa.
Ũneenan’ya
-
Tũtonya kũmwonia Asa waitũ wa Ĩtunĩ kana twĩna mũvea kwondũ wa nthĩ ata?