Kĩlungu kya 27
Ndeto ya Ũĩ
Ũmwe wa maũathimo manene ala Asa waitũ wa Ĩtunĩ ũtũnengete nĩ mĩĩ yaitũ ya nyama na mavĩndĩ. Nũtũnengete mwĩao wa ũima wa mwĩĩ kũtũtetheesya kũsũvĩa mĩĩ yaitũ. Nĩ kyaũ wĩsĩ ĩũlũ wa mwĩao ũũ wa ũima wa mwĩĩ?
Mĩĩ Yaitũ nĩ Mĩtheu
Kĩtumi kĩmwe kya vata kya kũka kũũ nthĩ nĩ kũkwata mĩĩ ya nyama na mavĩndĩ. Twendaa mĩĩ nĩ kana twĩkale ta Asa waitũ wa Ĩtunĩ. Notwĩna mĩĩ ya nyama na mavĩndĩ tũtonya kwĩĩmanyĩsya maũndũ ala twaĩlĩte kũmanya nĩkana twĩkale Take. Nĩtũtonya kwĩthĩwa na syana. Nĩtũtonya kũkwata maũtw’ĩo mavata kwitũ kũsyoka kwĩkala na Asa waitũ wa Ĩtunĩ. Tũtena mĩĩ tũtaĩtũtonya kwĩka maũndũ aa.
Nũndũ maveva maitũ mekalaa nthĩnĩ wa mĩĩ yaitũ, mwĩĩ nĩ mũtheu. Yĩla twĩna mũĩkĩĩo nthĩnĩ wa Yesũ Klĩsto na kũtata kũmwĩw’a, Asa waitũ wa Ĩtunĩ nũtũmaa Veva Mũtheu kwĩthĩwa naitũ. Veva Mũtheu ndatonya kwĩkala naitũ ethĩwa tũtĩ ewi na tũtimĩsũvĩaa mĩĩ yaitũ.
Yĩla twakw’a, maveva maitũ nĩmatiaa mĩĩ yaitũ. Yĩla Yesũ wakwie, veva Wake nĩwatiie mwĩĩ Wake. Ĩtina wa mĩthenya ĩtatũ, veva Wake nĩwasyokeanĩie na mwĩĩ Wake ĩngĩ na nĩwathayũũkiw’e. Yesũ aĩna vinya wa kũthayũũka ĩngĩ; na nũndũ wa nthembo Yake kwitũ, onaitũ tũkathayũũkw’a ĩtina wa kũkw’a. Maveva na mĩĩ yaitũ ikatũngĩanĩwa vamwe ĩngĩ. Yesũ nĩweesĩ kana tũkeethĩwa tũtenda twĩthĩwe na mĩĩ ĩtatonya kũkw’a ya nyama na mavĩndĩ nĩkana twĩkale ta Asa waitũ wa Ĩtunĩ na tũyĩkala Nake tene na tene.
Asa waitũ wa Ĩtunĩ endaa tũsũvĩe mĩĩ yaitũ nesa. Ethĩwa tũkasũvĩa mĩĩ yaitũ nesa, nĩtũtonya kwĩthĩwa na ũima wa mwĩĩ na twĩalũmu na kwĩka maũndũ angĩ Wendaa twĩke. Ithyonthe nĩtwaĩlĩte kũtw’a kana nĩtũũsũvĩa mĩĩ yaitũ nesa kana twĩĩka maũndũ ma kũmĩũmĩsya. Nĩtwĩsĩ mĩĩ yaitũ nĩ ya vata thayũnĩ ũũ na ĩtina wa thayũ ũũ. Twaĩlĩte kwenda kũmĩsũvĩa nesa. Asa waitũ wa Ĩtunĩ ndatanaa yĩla tũteũsũvĩa mĩĩ yaitũ.
Asyai nĩmo maĩlĩte kũmanyĩsya syana syoo kana mĩĩ yasyo nĩ mũthĩnzĩo mũtheu kuma kwa Asa waitũ wa Ĩtunĩ na kũsielesya nĩkĩ mĩĩ yasyo nĩ ya vata mũno. Yĩla syana syaelewa nĩkĩ ve vata wa kũsũvĩa mĩĩ yasyo, siĩkenda kũatĩĩa matatwa ma Satani.
Ũneenan’ya
-
Nĩkĩ twĩna mĩĩ ya nyama na mavĩndĩ?
-
Nĩkĩ mĩĩ yaitũ mĩtheu?
-
Nĩkĩ ve vata kwitũ kũmanyĩsya syana sitũ vata wa kũsũvĩa mĩĩ yasyo?
Asa Waitũ wa Ĩtunĩ Nũtũnengete Mwĩao wa Ũima wa Mwĩĩ
Asa waitũ wa Ĩtunĩ nũtũtavĩtye syĩndũ imwe ila nzeo kwa mĩĩ yaitũ na syĩndũ imwe ila itenzeo kwayo. Ũũ ũandĩkĩtwe maandĩkonĩ matheu na wĩtawa Ndeto ya Ũĩ.
Asa waitũ wa Ĩtunĩ nĩwavuanisye Ndeto ya Ũĩ kũla kwĩ Mwathani Joseph Smith. Nĩ mwĩao. Nonginya twĩw’e mwĩao ũũ nĩkana twĩthĩwe na mĩĩ yĩna vinya na ilĩko syĩna vinya.
Ndeto ya Ũĩ ĩtũmanyĩasya kĩla kĩseo kwa mĩĩ yaitũ. Twaĩlĩte kũya na kũnywa syĩndũ syoka ila nzeo kwa mĩĩ yaitũ. Twaĩlĩte kũya matunda, mboka, na mbeũ. Twaĩlĩte kũya kĩthimo kĩla kyaĩlĩte kya malĩu aa na ti kũya mũno. Tũtaĩlĩte kũya nyama mbingĩ.
Ũneenan’ya
-
Nĩ malĩu meva maseo kwa mĩĩ yaitũ?
Asa Waitũ wa Ĩtunĩ Nũtũtavĩtye Kĩla Kĩtekĩseo kwa Mĩĩ Yaitũ
Asa waitũ wa Ĩtunĩ nĩwĩsĩ Satani akatata kũtũsesenga tũtũmĩe mĩĩ yaitũ naĩ. Asa waitũ wa Ĩtunĩ nũtũtavĩtye syĩndũ imwe ila itenzeo kwa mĩĩ yaitũ. Kũnywa ũkĩ ti kũseo kwa mĩĩ yaitũ. Asa waitũ wa Ĩtunĩ nũtwĩaĩe tũikanyw’e ũkĩ, mbinyu, na syaũnywa ingĩ ila imilaa. Syĩndũ ii nitonya kũete maũwau na nitonya kũete ũthatu nthĩnĩ wa mũsyĩ. Yĩla andũ manywa syĩndũ ii, maitonya kũsũanĩa nesa. Syaũnywa ii itumaa andũ manyuva maũndũ mathũku, kũkengana, kwananga mbesa syoo syonthe, na kũtũla mwĩao wa mwĩkalĩle mũtheu. Yĩla mũndũ mũka mũito wanyw’a ũkĩ, nũtonya kũũmĩsya kana kala katekasyae. Andũ ala manyusaa mbũkĩ nĩmaetae mathĩna mathũku mũno.
Asa waitũ wa Ĩtunĩ nũtũtavĩtye kana mbakĩ nĩ mũisyo kwa mĩĩ yaitũ. Tũyaĩlĩte kũnywa sikala kana kũtanyuka mbakĩ. Asomi nĩmonanĩtye kana mbakĩ nĩyĩetae ũwau na nĩtonya kũũmĩsya syana itenzyae.
Asa waitũ wa Ĩtunĩ oĩngĩ nũtũtavĩtye tũtĩkanywe kaawa kana kyai. Tũtaĩlĩte kũnywa kaawa na kyai nũndũ syĩthĩawa na ndawa nthũku. Tũtaĩlĩte kũtũmĩa ndawa, ateo ndawa ila matakĩtalĩ matũnengae.
Asa waitũ wa Ĩtunĩ nũtũtavĩtye kana ũkĩ, mbakĩ, na ndawa sya kũmila nitonya kũtũtethya ethĩwa nĩtũũmanya kũitũmĩa nesa. Nĩwaisye ũkĩ nĩwakũtũmĩwa kũthambya mĩĩ yaitũ. Mbakĩ nĩtonya kũtũmĩka kũiita itau sya ng’ombe ndwau. Ndawa mavinda angĩ nitetheeasya kũtũvosya yĩla twĩ awau. Ĩndĩ mbee wa tũtanamba kũtata kũtũmĩa syĩndũ ii, twaĩlĩte kwĩĩmanyĩsya kuma kwa andũ oĩ itonya kũtũmĩka kwa kwĩka ata na itonya kũtũmĩka ata. Ethĩwa tũkaitũmĩa kwa nzĩa ĩtaĩlĩte, nitonya kũtũũmĩsya.
Tũtaĩlĩte kwĩkĩa kĩndũ ona kĩva nthĩnĩ wa mĩĩ yaitũ kĩtekĩseo kwitũ. Ndeto ya Ũĩ nĩtũtavasya syĩndũ imwe ila sya kũũmĩsya mũno. Nĩ mwĩao wa vata.
Ndeto ya Ũĩ ndĩtũtavĩtye kĩla kĩndũ kyonthe tũtaĩlĩte kũtũmĩa. Twaĩlĩte kũelewa kana kĩndũ ona kĩva kya kũũmĩsya mĩĩ yaitũ kana ilĩko, ona vala ti kĩwete nthĩnĩ wa Ndeto ya Ũĩ, kĩyaĩlĩte kũtũmĩwa. Twaĩlĩte nĩ kũsũvĩa mĩĩ yaitũ kwa nzĩa ingĩ, ta kũmĩthambya kĩla ĩvinda kũmĩkalya yĩ mĩtheu na kũkwata ĩthaũ ya kwĩana na kũthyũmũa.
Ũneenan’ya
-
Tũmanyaa ata kana syĩndũ imwe ti nzeo kwa mĩĩ yaitũ?
-
Nĩ syĩndũ syĩva imwe tũtaĩlĩte kwĩkĩa nthĩnĩ wa mĩĩ yaitũ?
-
Kũthyũmũa na kũthaũka kũkwatene ata na mwĩao wa ũima wa mwĩĩ wa Asa waitũ wa Ĩtunĩ?
-
Twaĩlĩte kwia mĩĩ yaitũ yĩ mĩtheu ata?
Maũathimo Manene Nĩmokaa Kumana na Kwĩw’a Ndeto ya Ũĩ
Ethĩwa tũkeew’a Ndeto ya Ũĩ, Asa waitũ wa Ĩtunĩ akaathima mĩĩ yaitũ yĩthĩwe na vinya kũte ũndũ yĩthĩwa ethĩwa tũinew’a mwĩao ũũ. Tũkeethĩwa tũtonya kwĩka wĩa Wake kũũ ĩũlũ wa nthĩ. Nĩwaĩtye kana ethĩwa tũkeew’a mwĩao ũũ tũkeethĩwa tũtonya kũsemba vate kũnoa na kũtambũka vate kũleela. Ũũ nĩ ũathimo mũnene.
Asa waitũ wa Ĩtunĩ ĩngĩ nũtwathĩte kũtũathima na ũĩ mũnene na ũmanyi ethĩwa nĩtũkwĩw’a Ndeto ya Ũĩ. Veva Mũtheu akatũvuanĩsya maũndũ maingĩ ma vata ala tũtatũtonya kũmamanya. Satani ndakethĩwa na vinya ĩũlũ waitũ. Ethĩwa tũkeew’a Ndeto ya Ũĩ, tũkeethĩwa twĩna ũima wa mwĩi mũseo na kwĩyũmbanĩsya thayũ wa tene na tene* na Asa waitũ wa Ĩtunĩ.
Ũneenan’ya
-
Nĩ maũathimo meva mokaa kwitũ kumana na kwĩw’a Ndeto ya Ũĩ?