Kĩlungu kya 6
Atamu na Eva
Atamu na Eva maĩ aaũ? Meekie ata kũtũtetheesya?
Atamu na Eva Nĩmo Maĩ Andũ Ma Mbee Kũka Kũũ Nthĩ Ĩno
Asa waitũ wa Ĩtunĩ amatw’ĩĩe andũ ma mbee masyĩtwa ta Atamu na Eva. Maĩ syana ilĩ katĩ wa ila syaĩ nthangaau vyũ. Nĩmatumie kũtonyeka ithyonthe tũke kũũ nthĩ.
Ĩtunĩ Atamu eetawa Mikaeli. Aĩ ũmwe wa ndongoi sitũ. Nĩwatũtongoeisye kaũnĩ na Satani. Mikaeli aĩ mũndũ mũseo. Nĩweekie ũndũ Asa waitũ wa Ĩtunĩ wendaa eke. Nĩwatw’ĩkie mũndũ wa mbee kwĩthĩwa ĩũlũ wa nthĩ ĩno.
Eva aĩ mwĩĩtu mũseo wa Asa waitũ wa Ĩtunĩ. Asa waitũ wa Ĩtunĩ nĩwamũtũmie Eva kũũ nthĩ ena Atamu ethĩwe e mũka wake na kũmũtetheesya. Asa waitũ wa Ĩtunĩ nĩweesĩ ũtaĩ ũseo Atamu kwĩkala eweka. Atamu, eweka, ndaĩ atonya kũtuma tũka kũũ nthĩ. Kĩlungu kya Eva nthĩnĩ wa walan’yo kyaĩ kya vata ota kya Atamu.
Ũneenan’ya
-
Mbee wa kũka kũũ nthĩ, Atamu eetawa ata na eekie ata?
-
Nĩkĩ Asa waitũ wa Ĩtunĩ wamũtũmie Eva ethĩwe ena Atamu?
Mũũnda wa Eteni Nĩw’o Waĩ Wĩkalo wa Mbee wa Atamu na Eva
Asa waitũ wa Ĩtunĩ nĩwoombie vandũ vanake va Atamu na Eva va kwĩkala. Veetawa Mũũnda wa Eteni. Yĩla Atamu na Eva maĩ Mũũndanĩ wa Eteni, kĩla ũmwe woo aĩna mwĩĩ wa nyama na mavĩndĩ ũla ũtaĩ ũtonya kũkw’a. Mayaĩna syana. Mayaĩna vata wa kũvanda na kũketha kana kũthũkũmĩa syĩndũ ila mendaa. Mayalilikanaa thayũ woo ĩtunĩ. Mayeesĩ kĩla kyaĩ kĩseo na kĩla kyaĩ kĩthũku.
Nthĩnĩ wa Mũũnda wa Eteni, Atamu na Eva nĩmaĩmatonya kũendan’ya na kũneenan’ya na Asa waitũ wa Ĩtunĩ. Nĩwamatavisye maũndũ ala maaĩlĩte kwĩka. Nĩwamatavisye masũvĩe mũũnda na kũwia wĩ mwanake. Nĩwameie methĩwe na syana. Ĩngĩ nĩwameie nĩmatonya kũya ĩtunda ya kĩla mũtĩ nthĩnĩ wa mũũnda kwa ũthasyo, ateo ũmwe. Asa waitũ wa Ĩtunĩ nĩwameie matĩkaye ĩtunda ya mũtĩ wa ũmanyi wa ũseo na ũthũku. Nĩwamakanisye kana ethĩwa makaya ĩtunda ya mũtĩ ũsu makakw’a.
Ũneenan’ya
-
Thayũ wa Atamu na Eva Mũũndanĩ wa Eteni waĩ kĩvathũkan’yo kyaũ na wa ũmũnthĩ?
-
Asa waitũ wa Ĩtunĩ ameie Atamu na Eva meke ata?
Atamu na Eva me Mũũndanĩ wa Eteni.
Atamu na Eva Nĩmavathaniw’e na Asa Waitũ wa Ĩtunĩ
Satani nĩwoonaa ta ũtonya kwananga walan’yo wa Asa waitũ wa Ĩtunĩ. Nĩwookie Mũũndanĩ wa Eteni na kũtata kũmũsesenga Eva aye ĩtunda yĩmwe ya mũtĩ wa ũmanyi wa ũseo na ũthũku. Nĩwamwĩie kana ethĩwa nũkũya ĩtunda yĩu ndakakw’a. Nĩwaisye akamanya kĩvathũkan’yo kya ũseo na ũthũku, ota Asa waitũ wa Ĩtunĩ. Eva nĩwamũĩkĩĩie Satani, na aya ĩtunda. Yĩla Eva wamũtavisye Atamu kana nĩwaĩ anaya ĩtunda, Atamu nĩwamanyie kana Eva nĩwaĩlĩte kuma mũũndanĩ. Onake nĩwaĩe ĩtunda nĩkana mekalan’ye vamwe.
Mĩkalĩle ya Atamu na Eva nĩyavĩndũkie ĩtina wa maya ĩtunda yĩla Asa waitũ wa Ĩtunĩ wamatavĩtye maikaye. Asa waitũ wa Ĩtunĩ nĩwamaumisye Mũũndanĩ wa Eteni. Mayaĩ matonya kũendan’ya Nake kana kũneenan’ya Nake ĩngĩ. Kuma ĩvinda yĩu mũndũ nĩwavathaniw’e na wĩthĩonĩ wa Asa waitũ wa Ĩtunĩ. Kwĩthĩwa tũtevamwe na Asa waitũ wa Ĩtunĩ kwĩtawa kĩkw’ũ kya kĩveva.* Atamu na Eva nĩmaaĩlĩte kwĩkala nza wa mũũnda ũsu mwanake. Nĩmaaĩlĩte kũthũkũma makwate syĩndũ ila mendaa.
Mĩĩ yoo nĩyavĩndũkie. Yu nĩmaĩmatonya kũkwata syana. Maĩ matonya kũwaa na kwĩw’a woo na kĩmako, na mũthenya ũmwe makakw’a. Maũvĩndũku ala mookĩie Atamu na Eva metawa Kũvalũka kwa Atamu.
Maũvĩndũku aa nĩ kwa kĩla ũmwe wa maũsyaanĩo onthe ma Atamu na Eva. Ota mo, ithyĩ twĩona ũtonyi wa kwĩthĩwa na syana; na ũwau, woo, kĩmako, ona kĩkw’ũ nĩkyatũkĩie.
Ũneenan’ya
-
Satani eekie ata kũtata kwananga walan’yo wa Asa waitũ wa Ĩtunĩ?
-
Mĩkalĩle ya Atamu na Eva yavĩndũkie ata ĩtina wa maya yĩla ĩtunda ya mũtĩ wa ũmanyi wa ũseo na ũthũku?
-
Kĩkw’ũ kya kĩveva nĩ kyaũ?
-
Kũvalũka kwa Atamu nĩ kyaũ?
Kũvalũka kwa Atamu Kwaĩ Kĩlungu kya Vata kya Walan’yo wa Asa Waitũ wa Ĩtunĩ
Asa waitũ wa Ĩtunĩ nĩwendie syana Syake kũka kũũ nthĩ kũkwata mĩĩ ya nyama na mavĩndĩ. Ĩtina wa Amaumya Atamu na Eva Mũũndanĩ wa Eteni, nĩmambĩlĩilye kwĩthĩwa na syana. Ĩtinanĩ syana syoo nĩsyatwaanie na syeethĩwa na syana. Kwa nzĩa ĩno syana sya maveva sya Asa waitũ wa Ĩtunĩ ila syekalaa Nake nĩsyambĩlĩlye kũka kũũ nthĩ ota ũndũ wendethasya. Nũndũ wa ũndũ Atamu na Eva meekie, kĩla ũmwe waitũ nĩwavikĩĩie kũka kũũ nthĩ na kũkwata mwĩĩ wa nyama na mavĩndĩ.
Asa waitũ wa Ĩtunĩ ĩngĩ nĩwavangĩie syana syake kũthũkũma na kũkwata syĩndũ ila mendaa. Kuma Atamu na Eva mauma Mũũndanĩ wa Eteni, syana sya Asa waitũ wa Ĩtunĩ kũũ nthĩ nithũkũmaa nĩkana ikwate syĩndũ ila syĩkwenda.
Ĩtina wa Atamu na Eva maya ĩtunda yĩla Asa waitũ wa Ĩtunĩ wameete maikaye, nĩmamanyie kĩvathũkan’yo kya ũseo na ũthũku. Yu, kĩla ũmwe waitũ kũũ ĩũlũ wa nthĩ nũtonya kũmanya kĩvathũkan’yo kya ũseo na ũthũku na kwĩĩnyuvĩa ewe mwene kwĩka maũndũ maseo kana maũndũ mathũku.
Yĩla Asa waitũ wa Ĩtunĩ wamaumisye Atamu na Eva kuma Mũũndanĩ wa Eteni, nĩmatatie kwĩĩmanyĩsya maũndũ ala Wendaa meke. Nĩmamwĩwie na mamanyĩsya syana syoo kũmwĩw’a. Kĩla ũmwe waitũ onake nĩwaĩlĩte kwĩĩmanyĩsya maũndũ ala Asa waitũ wa Ĩtunĩ e kwenda twĩke, na nĩtwaĩlĩte kũmwĩw’a na kũmanyĩsya syana sitũ kũmwĩw’a.
Ũneenan’ya
-
Satani nĩwaanangie walan’yo wa Asa waitũ wa Ĩtunĩ?
-
Nĩkĩ twaĩlĩte kwĩthĩwa na mũvea kwondũ wa maũndũ ala Atamu na Eva meekie?