Ala aĩkĩĩku kũvikĩĩa mũminũkĩlyo makanenevw’a vamwe na Asa waitũ wa Ĩtunĩ na Yesũ Klĩsto.
Kĩlungu kya 36
Thayũ wa Tene na Tene
Tũkathi kwĩkala va ĩtina wa Kũsilĩlwa kwa Mũminũkĩlyo?
Tũkathi Kĩla Ũmwe Vandũ Vala Tũveeyũmbanĩsye
Yesũ amanyĩisye kana Asa waitũ wa Ĩtunĩ aseũvĩtye kũndũ kwingĩ kwitũ kwa kwĩkala. Kĩla ũmwe waitũ akatũmwa vamwe va kũndũ kũna, kwĩanana na ũndũ twaĩ aĩkĩĩku kwa Yesũ Klĩsto. Tũkathi ũsumbĩnĩ ũla tweeyũmbanĩsye kwa maũnyuvi ala twĩkĩte. Kũndũ kũũ kũna nĩ ũsumbĩ wa selesitio, ũsumbĩ wa tĩlesĩtio, ũsumbĩ wa telesitio, na nza kĩvindunĩ.
Ũsumbĩ wa Selesitio
Vaa nĩ vandũ vala Asa waitũ wa Ĩtunĩ na Yesũ mekalaa. Nĩ vandũ vala andũ makethĩwa me atanu, na vakeethĩwa ve vanake mũno kũthonoka ũndũ tũtonya kũsoanĩa. Andũ ala makekala nthĩnĩ wa ũsumbĩ ũũ makamwenda Asa waitũ wa Ĩtunĩ na Yesũ na makanyuva kũmew’a. No mũvaka methĩwe maaalyũla ngoo kwondũ wa naĩ syoo syonthe na nomũvaka methĩwe maaĩtĩkĩla Yesũ ta Mũtangĩĩi woo. Nomũvaka methĩwe maavatiswa na kũkwata mũthĩnzĩo wa Veva Mũtheu. Nomũvaka methĩwe na ũkũsĩ kuma kwa Veva Mũtheu kana Yesũ nĩ Mũtangĩĩi.
Kwĩkala vandũ vala va ĩũlũ vyũ ũsumbĩnĩ wa selesitio vetawa ũnenevyo* kana thayũ wa tene na tene. Kwĩthĩwa vatonyeka kwĩkala vandũ vaa va ũsumbĩnĩ wa selesitio, andũ nomũvaka methĩwe matwaanĩte nthĩnĩ wa ĩkalũ na nomũvaka methĩwe meanĩasya mawathano matheu ala meekie nthĩnĩ wa ĩkalũ. Makakwata syĩndũ syonthe Asa waitũ wa Ĩtunĩ wĩnasyo na mayĩkala Take. Na makeethĩwa matonya kwĩthĩwa na syana sya kĩveva na kũmaseũvĩsya nthĩ nzaũ sya kwĩkala, na kwĩka maũndũ onthe ala Asa waitũ wa Ĩtunĩ wĩkĩte. Andũ ala matatwaanĩe nthĩnĩ wa ĩkalũ no mekale kũndũ kũngĩ kwa ũsumbĩ wa selesitio, ĩndĩ maikanenevw’a.
Ũsumbĩ wa Tĩlesĩtio
Ũsumbĩ ũũ ti mũseo ta ũsumbĩ wa selesitio. Ona kwĩthĩwa Yesũ akathoka ũsumbĩnĩ wa tĩlesĩtio, ala mekalaa vau maikekala na Asa waitũ wa Ĩtunĩ, na maikakwata kyonthe wĩnakyo. Ala makathi ũsumbĩ wa tĩlesĩtio makeethĩwa andũ ma ndaĩa. Amwe moo makeethĩwa athaithi ma Ĩkanisa, na angĩ maikethĩwa. Makeethĩwa ala mataaĩtĩkĩla Yesũ ĩũlũ wa nthĩ ĩndĩ ĩtina mamwĩtĩkĩla nthĩnĩ wa nthĩ ya maveva. Andũ ala makekala vau maikethĩwa amwe ma mũsyĩ wa tene na tene ĩndĩ makekala kĩvathũkan’yo, matena mĩsyĩ. Asa waitũ wa Ĩtunĩ akamanenga andũ aa ũtanu ũla meeyũmbanĩĩtye kũkwata.
Ũsumbĩ wa Telesitio
Ũsumbĩ ũũ ti mũseo ta ũsumbĩ wa selesitio kana ũsumbĩ wa tĩlesĩtio. Vayĩ ũmwe katĩ wa Asa waitũ wa Ĩtunĩ kana Yesũ ũkathokea ala makekala vau. Alaĩka makamathokeaa andũ aa, na makeethĩawa na ũtethyo wa Veva Mũtheu. Andũ ala mekalaa nthĩnĩ wa ũsumbĩ wa telesitio nĩ ala mataaĩtĩkĩla ũvoo mũseo kana ũkũsĩ wa Yesũ, vaa ĩũlũ wa nthĩ kana nthĩnĩ wa nthĩ ya maveva. Makathĩna kwondũ wa naĩ syoo ene kolokolonĩ wa maveva kũvikĩĩa ĩtina wa Myaka Ngili. Ĩndĩ mũminũkĩlyonĩ maithayũũkw’a.
Yĩla maĩ ĩũlũ wa nthĩ ĩno, maĩ akengani, ing’ei, owaani, athani ma ũvũngũ, ilaalai, na ala mavũthasya maũndũ matheu. Maĩ andũ ala meetĩkĩlile mĩĩkĩĩo ya nthĩ kũte maũmanyĩsyo ma Yesũ. Andũ aingĩ makekala ũsumbĩnĩ ũũ. Asa waitũ wa Ĩtunĩ akamanenga andũ aa ũtanu ũla meeyũmbanĩĩtye kũkwata.
Nza Kĩvindunĩ
Nza kĩvindunĩ nĩ vala Satani na ala mamũatĩĩie makekala. Andũ aa makeethĩwa ala manyuvie kwĩkala na Satani. Maikaekewa. Andũ aa makekala tene na tene nthĩnĩ wa kĩvindu, kĩmako, na kũthĩna na Satani na maveva ala mamũatĩĩie.
Ũneenan’ya
-
Nomũvaka twĩĩyũmbanĩsye ũsumbĩ wĩva nĩkana twĩkale ta Asa waitũ wa Ĩtunĩ?
-
Nĩ maũndũ meva amwe twaĩlĩte kwĩka vaa ĩũlũ wa nthĩ twĩthĩwe twĩ aĩlu kwĩkala ta Asa waitũ wa Ĩtunĩ?
Asa Waitũ wa Ĩtunĩ Nĩwatũnengie Ũvoo Mũseo Twĩĩyũmbanĩsye Thayũ wa Tene na Tene Nthĩnĩ wa Ũsumbĩ wa Selesitio
Asa waitũ wa Ĩtunĩ anengae kĩla ũmwe waitũ mwanya wa kwĩthĩwa na thayũ wa tene na tene vamwe Nake. Thayũ wa tene na tene nĩ mũthemba wa thayũ ũla Asa waitũ wa Ĩtunĩ na Yesũ mekalaa. Asa waitũ wa Ĩtunĩ nĩ mũlũngalu. Nĩwĩsĩ maũndũ onthe. Ena vinya ĩũlũ wa syĩndũ syonthe. Asumbĩkaa syĩndũ syonthe. Ekalaa kwĩanana na ũw’o wa tene na tene na mĩao ya tene na tene.
Yesũ nĩweewie Asa waitũ wa Ĩtunĩ, na kwoou nĩwĩkalaa na Asa waitũ wa Ĩtunĩ. Ethĩwa tũkeeka maũndũ ala Yesũ watũmanyĩisye twĩke, tũkeethĩwa tũtonya kwĩkala ta We na Asa waitũ wa Ĩtunĩ. Kwĩthĩwa na thayũ wa tene na tene na Asa waitũ wa Ĩtunĩ nĩw’o mũthĩnzĩo ũla mũnene ũtonya kũtũnenga. Ũkatũetee ũtanu mwingĩ kũthonoka kĩndũ kĩngĩ kyonthe.
Ũvoo mũseo nũtũtavasya kyonthe twaĩlĩte kũmanya na kyonthe twaĩlĩte kwĩka kũkwata thayũ wa tene na tene. Ũtũtetheeasya kũmanya Asa waitũ wa Ĩtunĩ na Yesũ. Ũtũmanyĩasya kwĩkala ũndũ mekalaa. Kwa kũvoya na kũsoma maandĩko matheu nĩtũtonya kũmamanya nesa. Yĩla twamamanya na kũmenda, nĩtũkendaa kwĩw’a ndeto Syoo. Tweew’a, tũkeethĩwa tũtonya kwĩkala tamo na kwĩthĩwa twĩ aĩlu kwĩkala namo tene na tene.
Ũneenan’ya
-
Thayũ wa tene na tene nĩ kyaũ? Nũũ ũkaũkwata?
-
Ũvoo mũseo ũtethasya ata kũtũmban’ya kwondũ wa thayũ wa tene na tene?
Asa Waitũ wa Ĩtunĩ Akatũtethya Yĩla Twanyuva Kwĩw’a Ũvoo Mũseo
Asa waitũ wa Ĩtunĩ nĩwĩsĩ nĩvatonyeka kwa ithyonthe kwĩw’a ũvoo mũseo na kũkwata thayũ wa tene na tene. Nĩkwĩthĩwa twĩ syana syake, twĩna ũtonyi wa kwĩkala Take. Nĩwĩsĩ mawonzu ala kĩla ũmwe waitũ wĩnamo na nĩ maũndũ meva matonya kũtũtata. Nũtwĩtĩkĩlitye tũke kũũ nthĩ kwa ĩvinda na vandũnĩ vala veũtũnenga mavuso ma kwĩka maũndũ maseo na kwĩĩmanyĩsya.
Yĩĩ nĩyo ĩvinda ya kwĩka w’onthe twaĩlĩte kwĩka tũkwate thayũ wa tene na tene. Asa waitũ wa Ĩtunĩ nũtwendete na nĩwendaa tũendeee. Nĩwĩkĩte w’onthe ũla ũtonya kwitũ. Nũnenganĩte nthĩ vala tũtonya kwĩĩmanyĩsya na kwĩana. Nĩwatũmie Mwana Wake, Yesũ Klĩsto, ethĩwe e Mũtangĩĩi waitũ na kũtũmanyĩsya ũvoo mũseo. Nũtũthoketye tũmũvoye. Nũtumĩte vethĩwa vatonyeka Veva Mũtheu ethĩwe mũtũtongoesya waitũ. Yu nĩtwaĩlĩte kwĩka ũla waĩlu. Ethĩwa tũkanyuva kwĩthĩwa na mũĩkĩĩo nthĩnĩ wa Yesũ Klĩsto na kũmwĩw’a, akatũtethya na kũtũnenga vinya wa kũsinda matatwa na mathĩna angĩ ala mokaa nthĩnĩ wa mathayũ maitũ.
Asa waitũ wa Ĩtunĩ nũtũkũlĩtye twĩtĩkĩle ũvoo mũseo. Kwĩka ũũ nomũvaka mbee twĩthĩwe na mũĩkĩĩo nthĩnĩ wa Yesũ Klĩsto. Ĩndĩ nomũvaka tũalyũle ngoo kwondũ wa naĩ sitũ nĩkana tũtonye kũvatiswa na kũlũlũmĩĩlw’a ta mũthaithi wa Ĩkanisa ya Yesũ Klĩsto Ya Atheu ma Mĩthenya ya Mũminũkĩlyo. Yĩla twalũlũmĩĩlw’a, nĩtũkwataa mũthĩnzĩo wa Veva Mũtheu kuma kwa mũndũ ũla wĩna ũthembi. Veva Mũtheu atavasya kĩla ũmwe waitũ ũndũ Yesũ ũkwenda twĩke, na kũkwata thayũ wa tene na tene na nomũvaka tũtũmĩe ũtialo wa mathayũ maitũ kũmwĩw’a na kũmũthũkũma.
Yesũ nĩwendaa ithyonthe twĩw’e mĩao kũtũtetheesya kwĩyũmban’ya kũsyoka kwĩkala na Asa waitũ wa Ĩtunĩ. Ĩno nĩ vamwe na kwĩw’a mwĩao wa mwĩkalĩle mũtheu, kũĩva kĩlungu kya ĩkũmi na kũnengane nthembo, kwĩw’a Ndeto ya Ũĩ, kwĩthĩwa twĩ aĩkĩĩku mavinda onthe, na kwia mũthenya wa Savato wĩ mũtheu.
Nĩkana twĩkale ta Asa waitũ wa Ĩtunĩ nomũvaka oĩngĩ tũkwate maũtw’ĩo ala manenganawe nthĩnĩ wa ĩkalũ, metawa ũvwĩko.* Nĩtwaĩlĩte kũsiĩlwa vau nĩkana twĩĩthĩwa vamwe na mĩsyĩ yaitũ tene na tene. Nĩtwaĩlĩte ĩndĩ kũmantha masyĩtwa na maũvoo ala makonanĩtye na ala maitũ makwie tũtaen’ye na kũnenga kĩla twakwata kwa Ĩkanisa, nĩkana methĩwe na maũtw’ĩo ala mevata mekwe kwondũ woo nthĩnĩ wa ĩkalũ.
Yesũ nĩwatwĩaĩie twĩke maũndũ maingĩ. Aa nĩ vamwe na kũmatavya angĩ ĩũlũ wa Ũvoo mũseo, kũmenda na kũmatetheesya, na kwĩthĩwa twĩ ngelekan’yo nzeo kũla maĩ.
Nĩtwaĩlĩte oĩngĩ kwia mawatho onthe twĩkĩte na Asa waitũ wa Ĩtunĩ, kũthi mbũmbanonĩ sitũ sya Ĩkanisa kĩla ĩndĩ, kũmanyĩsya mũsyĩ witũ ũvoo mũseo kwa kũsoma maandĩko matheu kĩla mũthenya, na kũvoya twĩithyoka na twĩna mũsyĩ witũ kĩla mũthenya.
Ethĩwa twĩna mũĩkĩĩo nthĩnĩ wa Yesũ Klĩsto na kũtata kwĩw’a mĩao Yake yonthe, tũkakwata thayũ wa tene na tene na kwĩkala ta Asa waitũ wa Ĩtunĩ.
Kwĩkala ta Asa waitũ wa Ĩtunĩ nĩta kwambata ngasi. Nomũvaka twambĩĩe kuma nthĩ na kwambata kĩla ĩtambya mũvaka tũvike mũthya. Mwathani Joseph Smith aisye kana ethĩwa nĩtũkwenda kwĩkala ta Asa waitũ wa Ĩtunĩ nomũvaka tũmanye ũndũ wĩw’aa, ũsũanĩaa, na wĩkaa. Yĩla twaelewa nĩ maũndũ aa ĩũlũ Wake, nĩtũtonya ĩndĩ kwĩĩmanyĩsya maũndũ onthe ĩũlũ Wake, kũvikĩĩa tũmanye kwĩkala ũndũ ũilyĩ.
Ũũ ũkatũtetheesya kũlilikana kana Asa waitũ wa Ĩtunĩ ĩmwe aĩ mũndũ ũla wekalaa ĩũlũ wa nthĩ, ota ũndũ twĩkalaa. Atw’ĩkie Asa waitũ wa Ĩtunĩ kwa kũsinda mathĩna, ota ũndũ twaĩlĩte kwĩka ĩũlũ wa nthĩ ĩno. Onavamwe na ũu, Mwathani Joseph Smith aisye tũikeemanyĩsya kĩla ũndũ tũkwenda kwĩĩmanyĩsya yĩla twĩ nthĩnĩ wa nthĩ ĩno. Tũkakua ĩvinda yĩasa ĩtina wa kũmina thayũ ũũ kũmanya maũndũ onthe twaĩlĩte kũmanya nĩkana twĩkale ta Asa waitũ wa Ĩtunĩ.
Yĩla twamanya kwia mĩao yonthe ya Asa waitũ wa Ĩtunĩ, sũanĩa ũtanu ũla twĩĩthĩwa naw’o tũisyoka Kwake na aitũtavya ena ũtanu na thayũ ũla twekalile na tũkekala Take na kwĩkala Nake tene na tene.
Ũneenan’ya
-
Nĩkĩ vatonyeka kwa kĩla ũmwe witũ kwĩkala ta Asa waitũ wa Ĩtunĩ?
-
Nĩ maũndũ meva twaĩlĩte kwĩka twĩthĩwe na mũthemba wa thayũ ũla Asa waitũ wa Ĩtunĩ wĩnaw’o?
-
Asa waitũ wa Ĩtunĩ atũtetheeasya ata kwĩkala Take?
-
Elesya ũndũ ũtonya kwĩw’a ũneew’a Asa waitũ wa Ĩtunĩ aikwĩa kana nĩwĩkĩte nesa na nũkwendete.