Yesũ eeyĩaĩe Atũmwa Make kũmanyĩsya ũvoo mũseo nthĩnĩ wa nthĩ yonthe.
Kĩlungu kya 31
Wĩa Witũ wa Kũtavan’ya Ũvoo Mũseo
Tũtonya kũtetheesya syana syonthe sya Asa waitũ wa Ĩtunĩ kwĩw’a ũvoo mũseo ata?
Asa Waitũ wa Ĩtunĩ Endaa Syana Syake Syonthe Kũmanya Ũvoo Mũseo
Asa Waitũ wa Ĩtunĩ Nĩwendete Syana Syake Syonthe. Kĩla ũmwe waitũ e vata kwake, na kĩla ũmwe nĩ kwĩkala Take. Nĩwendaa tũsyoke kwĩkala Nake na kwĩthĩwa na ũtanu na ũseo ta ũla wĩnaw’o.
Asa waitũ wa Ĩtunĩ ena walan’yo wa kũtetheesya kĩla ũmwe waitũ kũsyoka na kwĩkala Nake. Walan’yo ũsu wĩtawa ũvoo mũseo wa Yesũ Klĩsto. Yĩla twasoma ũvoo mũseo, nĩtũmanyaa ũndũ twĩ ma vata. Nĩtũmanyaa nĩkĩ twĩ vaa ĩũlũ wa nthĩ ĩno. Nĩtũmanyaa vala tũkathi yĩla tũkakw’a. Nĩtũmanyaa ũndũ twaĩlĩte kwĩka nĩkana tũsyoke kwa Asa waitũ wa Ĩtunĩ.
Yesũ Klĩsto nĩ mwana-a-ia wa kĩveva waitũ. Nĩ mwana wa mbee wa kĩveva wa Asa waitũ wa Ĩtunĩ. Ookie kũũ nthĩ ta Mwana weka wa Asa waitũ wa Ĩtunĩ e nthĩnĩ wa mwĩĩ. Nũtwendete mũno kũvikĩĩa athĩna na akw’a kwondũ witũ. Nĩwamanyĩisye ũndũ Asa waitũ wa Ĩtunĩ wendaa tũmanye na kwĩka. Nĩwaseũvisye Ĩkanisa Yake kũtũtetheesya. Nĩwanenganie ũthembi Wake kwa aũme ĩũlũ wa nthĩ nĩkana mathũkũme wĩa Wake.
Ĩkanisa ya Yesũ Klĩsto ya Atheu ma Mĩthenya ya Mũminũkĩlyo nĩyo ĩkanisa yoka yĩla yĩna ũthembi wa Asa waitũ wa Ĩtunĩ na walan’yo Wake waw’o. Asa waitũ wa Ĩtunĩ endaa andũ onthe mamanye ĩũlũ wa walan’yo Wake na kũwĩtĩkĩla. Maũtw’ĩo ma Ĩkanisa yaw’o nĩmaĩlĩte kwitũ kũsyoka kwĩkala na Asa waitũ wa Ĩtunĩ.
Asa waitũ wa Ĩtunĩ nũtavĩtye kĩla mũthaithi wa Ĩkanisa Yake kũtavya angĩ ĩũlũ wa ũvoo mũseo. Athani onthe kuma Atamu nĩmatũmĩĩte ĩvinda yoo mũno kũmanyĩsya ũvoo mũseo kwa angĩ. Nĩmatũtavĩtye kana kĩla mũthaithi wa Ĩkanisa aĩlĩte kwĩthĩwa e mũmiseni. Kĩĩ nĩ kĩlungu kya watho twaathanie yĩla twavatisiwe. Nĩtwathanie kũtavya andũ ĩũlũ wa Yesũ yĩla tweethĩwa twĩna ĩvuso.
Ũneenan’ya
-
Nĩkĩ nomũvaka andũ onthe mew’e ũvoo mũseo?
-
Nũũ ũla waĩlĩte kũmanyĩsya ũvoo mũseo kwa andũ onthe?
Kĩla mũsyĩ nthĩnĩ wa Ĩkanisa nĩ waĩlĩte kũelewa vata wa kũmanyĩsya ũvoo mũseo. Nĩtwĩsĩ ũndũ walan’yo wa ũvoo mũseo ne wa vata. Twaĩlĩte kũsũvĩa ala angĩ ũndũ vatonyeka kwĩka ũndũ w’onthe ũkwendeka kũmatetheesya kũelewa walan’yo wa Asa waitũ wa Ĩtunĩ.
Andũ ma mũsyĩ nĩ matonya kwĩka maũndũ maingĩ kũtetheesya angĩ kũmanya ĩũlũ wa ũvoo mũseo. Maũndũ amwe nĩmo aa:
-
Kwĩkaa maũndũ maseo kwa angĩ.
-
Kũtavasya angĩ wĩna ũtanu nũndũ nĩwĩw’aa maũmanyĩsyo ma ũvoo mũseo.
-
Kũeleasya ũvoo mũseo kwa anyanyau na atũi. Kũmathokya kũthi naku maũmbanonĩ ma Ĩkanisa.
-
Kũthokya andũ moke mũsyĩ kwaku methĩwe naku kwa kĩvoyo kya mũsyĩ kya wĩoo kana yĩla amiseni matonya kũmamanyĩsya.
-
Kũnenga amiseni masyĩtwa na mawĩkalo ma anyanyau na ala mũtaen’ye ala methĩwa mayenda kũmanya ĩũlũ wa ũvoo mũseo.
-
kũmanyĩsya syana vata wa kũthũkũma ta amiseni. Itetheesye kwia mbesa sya kũthi ũmiseni.
-
Kũĩvaa kĩlungu kyaku kya ĩkũmi.
-
Kumya mbesa sya kĩnandũ kya ũmiseni.
Ũneenan’ya
-
Sũanĩa nzĩa ya kũtavya mũndũ ũla ũte mũthaithi wa Ĩkanisa ĩũlũ wa ũvoo mũseo.
-
Mũsyĩ waku ũtonya kwĩka ata kũtetheesya andũ angĩ kũmanya ĩũlũ wa ũvoo mũseo?
Mũsyĩ Waku Nũtonya Kwĩthĩwa wĩ Kĩlungu kya Vata kya Wĩa wa Ũmiseni wa Ĩkanisa
Ĩkanisa yitũ nĩtũmĩte ngili sya amiseni kũmanyĩsya ũvoo mũseo nthĩnĩ wa nthĩ mbingĩ. Aingĩ moo nĩ andũ ma mũika katĩ wa myaka 18 na 25. Andũ akũũ no mathũkũmaa ta amiseni. Methĩawa me athaithi aĩkĩĩku, ewi ma Ĩkanisa ala mena wendi wa kũthũkũma Asa waitũ wa Ĩtunĩ.
Amiseni angĩ aingĩ nĩmekwendekana. Mũsyĩ waku nũtonya kwosa mwanya nthĩnĩ wa wĩa ũũ wa vata wa kũmban’ya andũ ma mũsyĩ kũthi miseni. Asyai nĩmatonya kũtetheesya syana syoo kũkwata maũkũsĩ ma ũvoo mũseo na kũmanya kũelesya ũvoo mũseo kwa angĩ. Nĩmatonya kũmanyĩsya syana syoo kwenda andũ ma mĩthemba yonthe. Asyai onamo nĩmaĩlĩte kwĩyũmbanĩsya kũthi ũmiseni ĩtina wa syana syoo syeana.
Andũ aingĩ mainamba kwĩw’a ĩũlũ wa ũvoo mũseo. Amwe moo mekalaa nthĩnĩ wa kũla amiseni mataaĩthĩwa matonya kũthi. Andũ aa maĩlĩte kwĩthĩwa na mwanya wa kwĩw’a na kwĩtĩkĩla ũvoo mũseo. Asa waitũ wa Ĩtunĩ akanengane nzĩa ya ũndũ ũũ kwĩkĩka. Twaĩlĩte kũmũvoya nĩkana atongoi ma nthĩ ii metĩkĩlye amiseni kũlika na kũmanyĩsya andũ moo.
Ũneenan’ya
-
Mĩsyĩ nthĩnĩ wa Ĩkanisa yĩthĩĩtwe ĩtĩanĩsya wĩa woo wa kũmanyĩsya ũvoo mũseo ata?
-
Nĩkĩ amiseni angĩ aingĩ mekwendekana ũmũnthĩ?
Maũathimo Manene Nĩmokaa kwa Ala Matavasya Angĩ Ĩũlũ wa Ũvoo Mũseo
Asa waitũ wa Ĩtunĩ akatũathima ethĩwa tũkasũvĩa angĩ kũvikĩĩa kũmatavya ĩũlũ wa ũvoo mũseo. Akatũathima kwa kwĩw’a mĩao Yake na kwa ũtanu ũla tũetae kwa ala metĩkĩlaa ũvoo mũseo. Nũtwĩĩte tũkeethĩwa na ũtanu ethĩwa tũkatethya ũmwe wa syana Syake kũmanya ũvoo mũseo na kũsyoka Kwake. Ũtanu witũ ũkeethĩwa wĩ mũnene ethĩwa tũkatetheesya syana Syake mbingĩ kũsyoka Kwake.
Ũneenan’ya
-
Nĩ maũathimo meva mokaa kumana na kũtwaĩa andũ angĩ ũvoo mũseo?
-
Waaĩthĩwa na amwe ma maũathimo aa?