Mũtangĩĩi, Yesũ Klĩsto, asyaĩwe vandũ vauu.
Kĩlungu kya 11
Thayũ wa Yesũ Klĩsto
Yesũ Klĩsto nowe weka ũtonya kũtũtongoesya kũsyoka kwa Asa waitũ wa Ĩtunĩ. Wĩsĩ kyaũ ĩũlũ Wake?
Andũ Aingĩ Nĩmeeteelete kwa Wendi Mũnene Kũka kwa Yesũ Klĩsto
Yesũ nĩweeyumisye kwĩthĩwa e Mũtangĩĩi waitũ. Nĩwaisye akooka kũũ nthĩ kũtwon’ya ũndũ wa kũsyoka kwa Asa waitũ wa Ĩtunĩ. Andũ aingĩ ala maĩthayũ mbee wa kũsyawa kwa Yesũ nĩmaĩkĩĩaa kana nũkoka kwĩthĩwa e Mũtangĩĩi woo. Nĩmeeteelete mũno kũka Kwake. Nĩmeesĩ Nũtonya kũmatangĩĩa kuma ũsilĩlonĩ wa tene na tene wa naĩ syoo.
Athani onthe ala maĩthayũ mbee wa kũsyawa kwa Yesũ nĩmatavisye andũ akooka. Asa waitũ wa Ĩtunĩ nĩwatũmie mũlaĩka kũmũtavya Atamu kana Yesũ nũkoka kũũ nthĩ.
Myaka mingĩ mbee wa Yesũ kũsyawa, mwathani weetawa Isaia nĩwoonie woninĩ kana Yesũ akathĩnw’a kwondũ wa kũĩvĩa naĩ sitũ. Isaia nĩwaisye kana andũ makamũmena makamũlea Yesũ na Yesũ akeew’a kĩmako kingĩ.
Nevi, mwathani ũla tũsomaa ĩũlũ wake nthĩnĩ wa Ĩvuku ya Momoni, nĩwoonie maũndũ ala Yesũ ũkeka. Nevi oonie maũndũ aa myaka mingĩ mbee wa kũsyawa kwa Yesũ. Nĩwoonie kana Yesũ ke mokonĩ ma nyinyia Wako. Mũlaĩka nĩwamũtavisye Nevi kana aĩ Mwana wa Asa waitũ wa Ĩtunĩ.
Nĩtũsomaa ĩũlũ wa mwathani Mbenyamini nthĩnĩ wa Ĩvuku ya Momoni. Nĩwatavisye andũ kana Yesũ akooka mĩtũkĩ kũũ nthĩ. Mbenyamini ameie Yesũ akavosya awau, atume syonze ithi, atume ililinda syona, na kũtuma ala au matũ mew’a. Ĩngĩ nũkaumya maveva mathũku na kũthayũũkya ala akw’ũ. Mbenyamini aisye Yesũ akamanyĩsya andũ kũmwenda Asa waitũ wa Ĩtunĩ na kwendana ithyĩ ene.
Athani onthe ala maĩ thayũ ĩtina wa Yesũ asyawa nĩmatũtavĩtye Nĩwookie. Vate Yesũ Klĩsto, walan’yo wa Asa waitũ wa Ĩtunĩ wĩthĩwa wavalũkile.
Ũneenan’ya
-
Nĩkĩ Yesũ weeyumisye kũka kũũ nthĩ?
-
Nĩ athani meva amwe ala makũsĩĩie kana Nũkoka?
Kũsyawa kwa Yesũ Kwaetie Ũtanu Mũnene Kũũ Nthĩ
Yesũ asyaĩwe mũsyĩnĩ mũnini wa Mbethelemu. Alaĩka nĩmainie yĩla Wasyaiwe nĩkwĩthĩwa maĩ atanu. Ndata nzaũ nĩyaumĩlile yayayanĩ. Aĩthi na andũ oĩ nĩmaendie kũmwona na kũmũthaitha. Andũ aingĩ nthĩ yonthe nĩmatanĩaa ĩsyawa Yake ona yu.
Yesũ aĩ kĩvathũkan’yo na kana ona keva kaasyawa. Asa wa Yesũ aĩ Asa waitũ wa Ĩtunĩ. Asa waitũ wa Ĩtunĩ ndaĩ Asa wa veva wa Yesũ w’oka ĩndĩ vamwe na ou aĩ Asa wa mwĩĩ Wake wa nyama na mavĩndĩ. Yesũ nĩwakwatie vinya kuma kũla kwĩ Asa Wake ũla andũ ala angĩ matenaw’o. Andũ mayaĩ matonya kwosa thayũ Wake ateo amaekie maw’ose. Ĩtina wa akw’a, Aĩna vinya wa kũthayũũkya mwĩĩ wake ĩngĩ.
Nyinyia wa Yesũ aĩ Meli. Aĩ mwĩĩtu mũtheu wa mũika ũla wekalaa vakuvĩ myaka 2,000. mĩvĩtu mũsyĩnĩ weetawa Nasaleti. Yĩla waĩ kelĩtu kanini kambikĩla, atemũtwae, mũlaĩka kuma kwa Asa waitũ wa Ĩtunĩ nĩwamũkĩie. Mũlaĩka nĩwamũtavisye kana nĩwe ũkethĩwa e nyinyia wa Yesũ Klĩsto. Mũlaĩka amwĩa kana Asa waitũ wa Ĩtunĩ akeethĩwa e Asa wa Yesũ. Vayĩ mũndũ ĩũlũ wa nthĩ waĩ ethĩwa e Asa Wake.
Mũlaĩka ĩngĩ nĩwookie kũla kwĩ mũndũũme ũla waendaa kũtwaa Meli. Mũndũũme ũsu eetawa Yosevu. Mũlaĩka nĩwatavisye Yosevu kana kala kakasyawa kakeethĩwa ke ka Asa waitũ wa Ĩtunĩ na ti ka mũndũũme ona wĩva ĩũlũ wa nthĩ. Mũlaĩka nĩwamũtavisye aĩlĩte kũmũtwaa Meli. Kwa ou Yosevu na Meli nĩmatwaanie. Ĩtina wa Yesũ kũsyawa, Yosevu nĩwamũsũvĩie Yesũ ta waĩ mwana wake mwene.
Nĩkwĩthĩwa nyinyia Wake aĩ na mwĩĩ ũtonya kũkw’a, Yesũ aĩ atonya kwĩw’a nzaa, na woo, na Aĩ atonya kũkw’a.
Ũneenan’ya
-
Tũmanyaa ata kana kũsyawa kwa Yesũ kwaĩ ũndũ wa vata?
-
Nĩ mavinya maũ Yesũ wakwatie kuma vala ve Asa Wake?
-
Nĩ maũndũ meva Yesũ Weewie nĩkwĩthĩwa aĩna nyinyia wa kũũ nthĩ?
Yĩla waĩ o kamwana, Yesũ nĩwamanyĩisye aũme asomu ĩkalũnĩ.
Yesũ Ookie Kũtũmanyĩsya Ũvoo Wake Mũseo
Yesũ Ndaĩna Naĩ
Yesũ ndaĩna naĩ. Nĩweekie kĩla ũndũ w’onthe Asa waitũ wa Ĩtunĩ wendaa eke. Yesũ nĩweanie ota syana ila ingĩ ũndũ sianaa. Aendee na kwĩana, nĩwakwatie ũĩ. Aĩna vinya wa Asa waitũ wa Ĩtunĩ.
Yĩla Yesũ waĩna ũkũũ wa myaka 12, nĩweesĩ nĩwatũmĩtwe kwĩka maũndũ ala Asa waitũ wa Ĩtunĩ wendaa eke. Nĩweesĩ aĩna wĩa wĩ mwanya wa kwĩka ĩũlũ wa nthĩ.
Mũthenya ũmwe nĩwaendie na Meli na Yosevu Yelusaleme. Yĩla Meli na Yosevu masyokete mũsyĩ, nĩmoonie kana Yesũ ndaĩnamo. Nĩmasyokie Yelusaleme kũmũmantha. Ĩtina wa mĩthenya ĩtatũ nĩmamwĩthĩie ĩkalũnĩ, aineenan’ya na andũ oĩ na aisũngĩa makũlyo moo. Kĩla ũmwe wamwĩwie nĩwaseng’ie Nĩweesĩ mũno na aĩ atonya kũsũngĩa makũlyo moo. Yosevu na Meli maĩna ũtanu kũmwona, ĩndĩ mayaĩna ũtanu nĩkwĩthĩwa Ndaaĩkala namo. Yesũ nĩwameie kana nonginya athũkũme wĩa wa Asa Wake wa Ĩtunĩ.
Yesũ Nĩwavatisiwe*
Yĩla Yesũ waĩna ũkũũ wa myaka 30, nĩwaendie kũla kwĩ Yoana Mũvatisi akavatiswe. Yoana nĩwoonie ndaĩlĩte kũmũvatisa Yesũ, nĩkwĩthĩwa Yesũ ndaĩ aaĩka naĩ. Ĩndĩ Yesũ amwĩa Yoana amũvatise. Yesũ nĩwendaa kwĩw’a mĩao yonthe ya Asa waitũ wa Ĩtunĩ. Yoana nĩwamũvatisie Yesũ, kwa kũmũthika kĩw’ũnĩ na kũmũkĩlya ĩngĩ ĩũlũ. Yĩla Yesũ wavatisiwe, Asa waitũ wa Ĩtunĩ nĩwaneenie kuma ĩtunĩ na asya kana Yesũ aĩ Mwana Wake na kana We, Asa waitũ wa Ĩtunĩ, aĩna ũtanu nũndũ Wake. Veva Mũtheu ĩngĩ nĩwookie kũla kwĩ Yesũ yĩla wavatisiwe.
Satani Nĩwamũtatie Yesũ
Ĩtina wa Yesũ avatiswa, Nĩwaendie weũnĩ kwĩthĩwa eweka na kũtĩĩa kũya na kũvoya. Ĩtina wa Yesũ atĩĩa kũya vandũ va mĩthenya 40, Satani nĩwookie na kũmũtata. Satani nĩweesĩ kana ethĩwa akatuma Yesũ eka naĩ ĩmwe, Yesũ ndaĩ atonya kwĩthĩwa eka maũndũ ala Watũmĩtwe eke. Na ĩndĩ walan’yo wa Asa waitũ wa Ĩtunĩ ũivalũka.
Yesũ nĩweesianĩie na maũtatwa onthe ma Satani. Mũthya, Nĩwamwĩie Satani aende. Ĩtina wa Satani kũthi, alaĩka nĩmookie na kũmũthokea Yesũ.
Yesũ Nĩwamanyĩisye Kũmwenda Asa Waitũ wa Ĩtunĩ na Kwendana Ithyĩ kwa Ithyĩ
Ĩtina wa eesianĩa na Satani, Yesũ nĩwambĩlĩlye kũmanyĩsya andũ. Kĩtumi kĩmwe kya kũka kwake kũũ nthĩ kyaĩ kũtũmanyĩsya ũndũ twaĩlĩte kwĩkala.
Yesũ nĩwamanyĩisye kana nĩtwaĩlĩte kũmwenda Asa waitũ wa Ĩtunĩ na ngoo sitũ syonthe, kĩlĩko, na vinya. Ĩngĩ nĩwamanyĩisye kana nĩtwaĩlĩte kwenda andũ ala angĩ ota ũndũ twĩĩyendete ithyĩ ene. Nĩtwaĩlĩte ĩngĩ kũmaekea na kũmatethya andũ ala angĩ. Yesũ nĩwatwonisye ũndũ wakwĩka maũndũ aa. Nĩwoonanisye wendo Wake kwa Asa waitũ wa Ĩtunĩ kwa kwĩka kĩla ũndũ Asa waitũ wa Ĩtunĩ wamũkũlĩtye eke.
Yesũ Nĩwamendete Andũ Onthe
Yesũ aĩna wendo kwa kĩla ũmwe. Nĩwavoasya awau. Nĩwatumaa ililinda syona na syonze kũthi. Nĩwoosaa syana nini mokonĩ Make na kũsiathima.
Yesũ nĩwoonanasya wendo kwa ala meekaa naĩ. Nĩwamamanyĩisye kwĩĩlila kwondũ wa naĩ syoo na maikaaĩke naĩ ĩngĩ. Yesũ ona nĩwamendie ala mamũwaie. Nĩwamavoyeie kũla kwĩ Asa waitũ wa Ĩtunĩ. Yesũ nĩwamanyĩisye kana nĩtwaĩlĩte kwendana ithyĩ kwa ithyĩ ũndũ watwendie ithyĩ.
Ũneenan’ya
-
Nĩ maũndũ amwe meva tũtonya kwĩka kũmwonia Asa waitũ wa Ĩtunĩ kana nĩtũmwendete?
-
Nĩ maũndũ amwe meva tũtonya kwĩka kwa andũ ala angĩ kwonan’ya kana nĩtũmendete?
Yesũ Nĩwaseũvisye Ĩkanisa
Yesũ nĩwendaa andũ onthe mamanye nzĩa ya kũsyoka kwa Asa waitũ wa Ĩtunĩ. Nzĩa yake yĩtawa ũvoo mũseo. Yesũ aseũvisye ĩkanisa nĩkana andũ onthe matonye kwĩĩmanyĩsya ũvoo mũseo.
Yesũ nĩwanyuvie aũme ĩkũmi na elĩ, metawa Atũmwa, kũtongoesya Ĩkanisa. Makamanyĩsya andũ ũvoo mũseo ĩtina wa Asyoka ĩtunĩ. Yesũ nĩwamanengie Atũmwa Ĩkũmi na elĩ ũkũmũ wa kũũngama vandũ Vake. Maĩmatonya kũmanyĩsya ũvoo mũseo kwa andũ onthe na kũmavatisa. Maĩmatonya kũnyuva angĩ kũtetheesya kũmanyĩsya ũvoo mũseo na kwĩka maũndũ onthe ala wendaa mekwe.
Ũneenan’ya
-
Nĩkĩ Yesũ wanyuvie Atũmwa Ĩkũmi na elĩ?
Yĩla Tweemanyĩsya ĩũlũ wa Yesũ, Nĩtũeleawa Ũndũ ne Mũndũ wa Kĩtumi
Yesũ nĩwatetheeisye kĩla ũmwe waitũ kwa kũtwon’ya ũndũ wa kwĩkala. Yĩla tweemanyĩsya kwĩkala Take, nĩtwĩĩmanyĩasya kwĩka maũndũ ala matũtanĩthasya. Nĩtũtonya ĩngĩ kwĩĩmanyĩsya maũndũ ala meũtũtetheesya kũsyoka na kwĩkala na Asa waitũ wa Ĩtunĩ.
Yĩla twamanya kana Yesũ nũtwendete, nĩtwĩw’aa mũuo. Nĩtwĩw’aa twĩ asũvĩĩku na tũtena w’ia. Nĩtũmanyaa nĩtũtonya kũmwĩĩkwatya kwĩthĩwa e mũtongoi waitũ. Nĩtũmanyaa kana nĩũeleawa mathĩna maitũ. Maũmanyĩsyo Make matũtetheeasya kũsinda mathĩna maitũ. Yĩla twaelewa kĩla kyonthe Yesũ wĩkĩte kwitũ, wendo witũ Kwake nĩwongelekaa. Wendo witũ Kwake nũtumaa twenda kũmwĩw’a. Nĩtweteelaa mũno ĩvinda yĩla tũkatonya kwĩthĩwa Nake.
Ũneenan’ya
-
Kwĩĩmanyĩsya kwitũ ĩũlũ wa Yesũ kũtũtethasya ata?
-
Wĩw’aa ata yĩla ũendeee na kwĩĩmanyĩsya ĩũlũ wa Yesũ?