Kĩlungu kya 12
Wĩw’anĩthyo wa Yesũ Klĩsto
Yesũ nĩwathĩnie mũno kwondũ wa naĩ sitũ. Nĩkĩ wanyuvie kũkw’a kwondũ witũ?
Asa Waitũ wa Ĩtunĩ Nĩwatũmie Yesũ Klĩsto kũũ Nthĩ Ethĩwe e Mũtangĩĩi Waitũ
Twaĩlĩte kwĩthĩwa na mĩĩ ya nyama na mavĩndĩ tũtikala ta Asa waitũ wa Ĩtunĩ, ĩndĩ Asa waitũ wa Ĩtunĩ nĩweesĩ kana nĩtũkakw’a ithyonthe na tũyasya mĩĩ yaitũ nũndũ Atamu na Eva mayaa mwĩw’a Asa waitũ wa Ĩtunĩ. Kwa kũya ĩtunda yĩla Asa waitũ wa Ĩtunĩ wameie maikaye, mũthya makakw’a, na ota ũu kĩla ũmwe ũngĩ wasyaiwe ĩtina woo. Ĩngĩ, Asa waitũ wa Ĩtunĩ nĩweesĩ kana ithyonthe tũkeeka naĩ yĩla twĩ kũũ nthĩ, na nũndũ wa naĩ sitũ tũikatonya kũsyoka kwĩkala Nake. Nĩtũkenda ũtethyo kũĩva thiĩ wa naĩ sitũ na kwĩthĩwa twĩ ewi nĩkana tũtonye kũsyoka kwa Asa waitũ wa Ĩtunĩ. Nĩtũkenda ũtethyo wa kũkwata ĩngĩ mĩĩ yaitũ ya nyama na mavĩndĩ ĩtina wa kũkw’a. Yesũ nĩwaisye nũkatũtetheesya. Nũkethĩwa e Mũtangĩĩi waitũ.
Nĩtwendaa mũndũ ũtena naĩ kũtũĩvĩa naĩ sitũ. Yesũ nowe weka waĩatonya kwĩka ũũ. Ndaaĩka naĩ. Aĩna vinya ĩũlũ wa kĩkw’ũ, kwa ũu Aĩatonya kũtũtetheesya kwĩthĩwa na mĩĩ yaitũ ĩngĩ ĩtina wa kũkw’a. Nĩwatwendete mũno. Nĩwendaa kũthĩna kwondũ wa naĩ sitũ tũtonye kwĩthĩwa twĩ atheu. Nĩwendaa kũkw’a kwondũ witũ nĩkana tũtonye kwĩthĩwa thayũ ĩngĩ ĩtina wa kũkw’a. Kwĩĩyumya kwa Yesũ kwondũ witũ kwĩtawa Wĩw’anĩthyo.
Ũneenan’ya
-
Nĩkĩ kyaĩ kĩndũ kya vata kwa Asa waitũ wa Ĩtunĩ kũmũtũma Yesũ kũũ nthĩ ĩno?
Kũthĩna kwa Yesũ Kũtwonasya Ũndũ We na Asa Waitũ wa Ĩtunĩ Matwendete
Asa waitũ wa Ĩtunĩ nũtwendete mũno kwĩthĩwa atũmie Mwana Wake, Yesũ, kũũ nthĩ na Amũeka athĩne na kũkw’a kwondũ witũ. Yesũ atwendete mũno mũvaka eew’a woo mwingĩ na kũkw’a kwondũ witũ. Yesũ nĩweesĩ kũthĩna kũkeethĩwa kwĩ kwingĩ. Kwaĩ kwingĩ mũno ovakuvĩ kwĩthĩwa atatonya kũmĩĩsya. Ĩndĩ nĩwendaa ithyĩ twĩthĩwe tũtonya kwĩkala ta Asa waitũ wa Ĩtunĩ.
Yesũ aendie vandũ vetawa Mũũndanĩ wa Ngesemanii. Vau nĩwatulilye ndu na avoya kũla kwĩ Asa waitũ wa Ĩtunĩ akwate ũtethyo. Nĩwamũkũlilye Asa waitũ wa Ĩtunĩ, ethĩwa vaĩ vatonyeka, kana ndaĩlĩte kũthĩnw’a. Ĩndĩ Aasya kana akeeka ũndũ Asa waitũ wa Ĩtunĩ wendaa eke. Yesũ ndaathing’ĩĩw’a kũthĩna. Nĩwanyuvie kũthĩna nũndũ kwaĩ kĩlungu kya walan’yo wa Asa waitũ wa Ĩtunĩ nĩkana tũtonye kũthew’a kuma naĩnĩ.
Ku Ngesemanii, Yesũ nĩwathĩnie kwondũ wa naĩ sya andũ onthe, ta syaĩ Syake mwene. Kũthĩna kwake kwondũ wa naĩ sitũ kwaĩ kũnene kũthonoka ũndũ ona ũmwe waitũ ũtonya kũelewa. Ũwoo waĩ mwingĩ mũno mũvaka atetema. Nthakame nĩyaumĩlile kuma kĩla kalima ka mwĩĩ Wake.
Ĩtina, andũ avuku nĩmookie kũmwosa na mamũtwaa kwa asumbĩki ma Yelusaleme. Vau mamũtĩlanga mata na mamũkũna mũno. Maseũvisye ngovia ya mĩw’a na mamĩkĩa ĩũlũ wa mũtwe Wake. Nĩmamũthekeeie na mamũthilĩkya.
Asumbĩki asu meeie asikalĩ asu mamwambe Yesũ. Mamũkuĩthisye ngelan’yo ya mũtĩ yaĩ ngito kũthi vandũ vala Waendaa ũkw’ĩa. Nĩmamwambie ngelan’yonĩ kwa kũathĩĩa mĩsumaa kwĩsĩla mokonĩ na maaũ Make. Ngelan’yonĩ, Nĩwaminie kũthĩnĩa thiĩ wa kũlea kwĩw’a kwa Atamu na kwa naĩ sitũ ene.
Nĩwatiiwe asũĩte vaũ kwa ĩvinda ya masaa maingĩ. Onakũtw’ĩka nĩwathĩnaa, na kũtw’ĩka andũ amwe nomaendeee na kũmũthekeea, nĩwavindĩtye na kwĩthĩwa e mũmĩĩi. Mũthya, nĩwamwĩie Asa waitũ wa Ĩtunĩ nĩwatũngĩte veva Wake Kwake, na Akw’a.
Yesũ aĩna vinya wa kwĩtangĩĩa kuma kĩkw’ũnĩ. Nĩwaĩatonya kũendeea na kwĩthĩwa e thayũ, ĩndĩ anyuva kũkw’a nĩkana tũtonye kwĩkala ĩngĩ na Asa waitũ wa Ĩtunĩ.
Yĩla Yesũ wakwie, veva Wake nĩwatiie mwĩĩ Wake. Mũthenyanĩ wakatatũ ĩtina wa kũkw’a, veva Wake nĩwasyokeie mwĩĩ Wake, na eethĩwa e thayũ ĩngĩ. Kũsyoka kwa veva mwĩĩnĩ kwĩtawa ũthayũũkyo.
Yesũ nĩwamaumĩlĩĩle Atũmwa Make na andũ angĩ ĩtina wa kũthayũũka Kwake. Nĩwamonisye Atũmwa Make maũvano ala matiiwe nĩ mĩsumaa mokonĩ na maaũnĩ Make. Nĩmamakwatie na mamanya kana ũũ aĩ mũtongoi woo, Yesũ, nĩwaĩmũthayũũku. Nĩwaneenie namo na aya namo.
Ũneenan’ya
-
Asa waitũ wa Ĩtunĩ oonanisye wendo Wake kwitũ ata?
-
Yesũ oonanisye wendo Wake kwitũ ata?
Mũũndanĩ wa Ngesemani, na ĩtina ngelan’yonĩ, Yesũ nĩwoosie naĩ sya andũ onthe.
Yesũ Nĩwatumie Tũtonya Kũthew’a Kuma Naĩnĩ
No Yesũ weka waĩatonya kũĩvĩa naĩ sitũ. Nĩtũkwataa ũtethyo w’onthe wa nthembo Yake kwa kũĩkĩĩa kana e thayũ na kũia mĩao Yake. Nonginya twĩĩlile kwondũ wa naĩ sitũ. Tũtaĩlĩte kũsyĩka ĩngĩ. Nĩtwaĩlĩte kũatĩĩa maũmanyĩsyo ma Yesũ Klĩsto. Na ĩndĩ Asa waitũ wa Ĩtunĩ aitũekea naĩ sitũ.
Ũneenan’ya
-
Nĩkĩ ũũmwenda Yesũ aũtetheesye kũsinda naĩ syaku?
-
Waĩlĩte kwĩka ata nĩkana Wĩw’anĩthyo wa Yesũ ũtonye kũĩvĩa naĩ syaku?
Yesũ akwie ngelan’yonĩ kwondũ wa naĩ sya andũ onthe.
Yesũ Nĩwatumie Ithyonthe Tũtonya Kwĩsa Kũkwata Mĩĩ Yitũ Ĩngĩ
Yesũ akwie atenda na aĩ mũndũ wa mbee kwĩthĩwa emũthayũũku. Nowe mũndũ ũla weka waĩna vinya wa kwĩĩthayũũkya. Nĩwatumie kwĩthĩwe tũtonya kũthayũũkw’a.
Ona kũtw’ĩka no tũkakw’a, nĩtũkekala thayũ ĩngĩ. Yĩla twakw’a, maveva maitũ nĩmatiaa mĩĩ yitũ. Ĩndĩ kuma Yesũ asinda kĩkw’ũ, maveva maitũ na mĩĩ yaitũ ikakwatanywa ĩngĩ vamwe tene na tene. Tũtĩkakw’a ĩngĩ. Ũũ nĩ mũthĩnzĩo Yesũ ũnengete kĩla ũmwe ũsyaawa ĩũlũ wa nthĩ.
Ũneenan’ya
-
Yesũ atumie tũtonya kwĩthĩwa tũkwata mĩĩ yaitũ ĩngĩ ata?
-
Ala makathayũũkw’a naaũ?